ຫົວ​ຂໍ້ : ສະຫວັນນະເຂດ ອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 03/02/2020 08:55:23 ຈຳ​ນວນ​ຜູ້​ເຂົ້າ​ຢ້ຽມ​ຊົມ 403 ຄັ້ງ

   ປະຕິບັດ​ຕາມ​ລັດ​ຖະ​ດຳ ລັດ​ຂອງ​ປະທານ​ປະເທດ​ແຫ່ງ ສປປ ລາວ ວ່າ​ດ້ວຍການ​ໃຫ້ອະ ໄພ​ຍະ​ໂທດ​ແກ່​ນັກໂທດທີ່​ມີ​ຄວາມ​ກ້າວໜ້າ​ໃນ​ຂອບເຂດ ທົ່ວ​ປະເທດ ເນື່ອງ​ໃນ​ໂອກາດ​ວັນຊາດ​ທີ 2 ທັນວາ 2019 ຄົບ ຮອບ 44 ປີ. ອີງ​ຕາມ​ລັດ​ຖະ​ທຳ​ມະນູນ​ແຫ່ງ ສປປ ລາວ ໝວດ VI ມາດຕາ 67, ຂໍ້ 12 ກ່ຽວ​ກັບ ການ​ຕົກລົງ​ໃຫ້​ອະໄພ​ຍະ​ໂທດ. ດັ່ງນັ້ນ ຫວ່​າງ​ແລ້ວນີ້  ຢູ່  ແຂວງ​ສະຫວັນ​ນະ​ເຂດ ໄດ້​ຈັດ​ພິທີ​ປະກາດ​ອະໄພ​ຍະ​ໂທດ​ແກ່​ນັກໂທດທີ່​ມີ​ຄວາມ​ກ້າວໜ້າທີ່​ຄ້າຍ​ຄຸມ​ຂັງ​ແກ້ງ​ຄັນ​ເມືອງ​ເຊ​ໂປ​ນ. ໂດຍ​ມີ​ທ່ານ  ໂພ​ໄຊ ໄຊ​ຍະ​ສອນ  ກຳມະການສຳຮອງ​ສູນ​ກາງ​ພັກ  ຮອງ​ເລຂາ​ພັກ​ແຂວງ   ຮອງ​ເຈົ້າແຂວງ​ສະ ຫວັນ​ນະ​ເຂດ, ທ່ານ ພັອ ສົມ​ໝາຍ ພົມມະຈັນ ຮັກສາ​ການ​ຫົວໜ້າ​ກອງ​ບັນຊາ​ການ ປກສ ແຂວງ, ມີ​ບັນດາ​ພະແນກການ​ທີ່​ກ່ຽວຂ້ອງ​ເຂົ້າ​ຮ່ວມ.
   ສຳລັບ​ແຂວງ​ສະຫວັນ​ນະ​ເຂດ ຈຳນວນ​ນັກໂທດ​ທີ່​ສະເໜີ​ອະໄພ​ຍະ​ໂທດຜ່ອນ​ໂທດ ແລະ ປ່ອຍ​ຕົວ​ໃນ​ປີ 2019 ມີ 462 ຄົນ, ຍິງ 71 ຄົນ, ໃນ​ນີ້ ນັກໂທດ​ໄດ້​ຮັບ​ການ​ອະໄພ​ຍະ​ໂທດ​ປ່ອຍ​ຕົວມີ​ຈໍາ​ນວນ 92 ຄົນ, ໄດ້​ຮັບ​ການ​ອະໄພ​ຍະ​ໂທດ​ຫຼຸດ ຜ່ອນ​ໂທດ 370 ຄົນ, ຍິງ 54 ຄົນ, ໃນ​ນີ້​ໄດ້​ຮັບ​ການ​ອະໄພ​ຍະ​ໂທດຫຼຸດຜ່ອນ​ໂທດ​ຈາກ​ຈຳຄຸກ​ຕະຫຼອດ​ຊີວິດມາ​ເປັນ​ໂທດ​ມີ​ກຳນົດ 20 ປີ, ມີ 13 ຄົນ. 
   ໃນ​ໂອກາດ​ເຂົ້າ​ຮ່ວມ​ພິທີ ທ່ານ ໂພ​ໄຊ ໄຊ​ຍະ​ສອນ ໄດ້​ຮຽກຮ້ອງ​ໃຫ້​ຜູ້​ທີ່​ໄດ້​ຮັບ​ການ​ປ່ອຍ​ຕົວໄດ້​ຫັນປ່ຽນ​ແນວ​ຄິດ​ຈິດໃຈປະ​ຖິ້ມ​ໃນ​ການ​ກະທຳ​ທີ່​ບໍ່​ດີ, ຕ້ອງ​ທຳ​ມາ​ຫາ​ກິນ​ດ້ວຍ​ຄວາມ​ບໍລິສຸດ​ສັດຊື່, ສິ່ງ​ໃດທີ່ບໍ່ ດີ, ການ​ກະທຳ​ທີ່​ເປັນ​ການ​ລະ ເມີດ​ຕໍ່​ກົດໝາຍ, ຮີດຄອງ​ປະ ເພນີ​ອັນ​ດີງາມ​ຂອງ​ຊາດແມ່ນ​ຫ້າມ​ເດັດຂາດ, ສ່ວນ​ຜູ້​ທີ່​ໄດ້​ຮັບ​ການ​ຜ່ອນ​ໂທດກໍໃຫ້​ເອົາໃຈໃສ່​ສ້າງ​ຜົນງານ,  ປະຕິບັດ​ລະບຽບ​ກົດໝາຍ,  ເປັນ​ແບບຢ່າງ​ໃນ​ການ​ອອກແຮງ​ງານ, ເຄົາລົບ​ເຈົ້າ​ໜ້າທີ່ບໍ່​ໃຫ້​ມີ​ແນວ​ຄິດ​ເຕັ້ນ​ ໂຕນ​ໂຍນ​ໜີ ເພື່ອ​ໃຫ້​ມີ​ໂອກາດ​ໄດ້​ຮັບ​ການ​ຜ່ອນ​ໂທດ​ໃນ​ປີ​ຕໍ່​ໄປ ແລະ ຮຽກຮ້ອງ​ໃຫ້​ພໍ່​ແມ່ພີ່ ນ້ອງ, ອຳນາດ​ການ​ປົກຄອງເມືອງ, ບ້ານ, ເຈົ້າ​ໜ້າທີ່ ປກສ ກຸ່ມບ້ານ, ປກສເມືອງບ່ອນນັກໂທດ​ອາ​ໄສ​ຢູ່, ຕ້ອງ​ມີ​ການຕິດຕາມ, ກວດກາ​ ພຶດຕິ​ກຳ, ການປະພຶດການກະ ທຳຂອງ​ນັກໂທດ​ທີ່​ໄດ້​ຮັບ​ການ​ປ່ອຍ​ຕົວ, ເອົາໃຈໃສ່​ສຶກສາອົບ ຮົມ ເພື່ອ​ໃຫ້​ເຂົາເຈົ້າ​ມີ​ຄວາມ ​ເຂົ້າໃຈ​ກ່ຽວ​ກັບ​ແນວທາງນະ ໂຍ ບາຍ​ຂອງ​ພັກ  ແລະ  ກົດໝາຍ​ຂອງ​ບ້ານ​ເມືອງເປັນ​ຄົນ​ດີ​ຂອງ​ຄອບຄົວ ແລະ ສັງຄົມ​ຕໍ່​ໄປ.
(ຂ່າວ-ພາບ​:  ນັກ​ຂ່າວ​ແຂວງ​ສະຫວັນ​ນະ​ເຂດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110