ຫົວ​ຂໍ້ : ປະທານ ໂຮ່ຈິມິນ ກັບວຽກງານສ້າງຕັ້ງພັກກອມມູນິດ ຫວຽດນາມ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 03/02/2020 08:57:51 ຈຳ​ນວນ​ຜູ້​ເຂົ້າ​ຢ້ຽມ​ຊົມ 298 ຄັ້ງ

(ເນື່ອງ​ໃນ​ໂອກາດ​ວັນ​ສ້າງຕັ້ງ​ພັກ​ກອມ​ມູ​ນິດ​ຫວຽດນາມ​ຄົບຮອບ 90 ປີ 3/2/1930-3/2/2020)

        ໂດຍ: ສີ​ວັນ
 

   ໃນ​ຕະຫຼອດ​ໄລຍະ​ປະ ຫວັດສາດ 90 ປີ​ແຫ່ງ​ການ​ເຕີບ​ໃຫຍ່​ຂະຫຍາຍຕົວ ແລະ ພັດທະນາຂອງ​ພັກກອມ​ມູ​ນິດ​ຫວຽດນາມ, ຄວາມ​ສາມັກຄີ​ແມ່ນ​ມູນເຊື້ອ​ທີ່​ມີຄ່າ, ແມ່ນກໍາ​ ລັງ​ແຮງ​ອັນ​ໃຫຍ່​ຫຼວງ ເພື່ອ​ໃຫ້ ພັກ​ຜ່ານ​ຜ່າ​ທຸກ​ຄວາມຫຍຸ້ງ ຍາກ​ທຸລະກັນດານ, ນໍາ​ພາ ການ​ປະຕິ​ວັດ​ສໍາ​ເລັດ​ຜົນ, ນໍາ​ເອົາ​ປະເທດ​ຊາດ ແລະ ປະ ຊາຊົນ​ບັນດາເຜົ່າ, ເຮັດ​ໃຫ້​ພາລະກິດ​ປະຕິວັດ​ກ້າວ​ໄປສູ່​ ໄຊຊະນະ​ທີ່​ຍິ່ງ​ໃຫຍ່, ຮອບ ດ້ານ. ປະຫວັດສາດໄດ້​ຢັ້ງຢືນ ​ໃຫ້​ເຫັນ​ພັກ​ນໍາ​ໜ້າດ້ານ​ສະຕິ ປັນຍາ, ເຂັ້ມແຂງ​ດ້ານ ຄຸນ​ທາດ ການເມືອງ, ເປັນ​ແບບຢ່າງ​ດ້ານ ຄຸນສົມບັດ​ສິນ​ທໍາ​ປະຕິວັດ, ຄວາມ​ສາມັກຄີ​ເປັນເອກະ​ພາບ​ດ້ານ​ແນວ​ຄິດ ແລະ ການ ເຄື່ອນໄຫວ​ຕົ້ນຕໍ ແມ່ນ​ພື້ນຖານ​ອັນ​ໜັກ​ແໜ້ນ ເພື່ອ​ກໍ່ສ້າງ​ກຸ່ມ​ກ້ອນ​ມະຫາ​ສາມັກຄີ​ທົ່ວ​ປວງ​ຊົນ. ມີ​ຄວາມ​ສາມັກຄີ​ເປັນ​ເອກະ​ພາບ​ພາຍ​ໃນ​ພັກ​ຍິ່ງ​ມີ​ການ​ປັບປຸງ ຊຶ່ງ​ເຮັດ​ໃຫ້​ກໍາລັງ​ ແຮງ​ຂອງກຸ່ມ​ກ້ອນ​ມະຫາສາ ມັກຄີ​ທົ່ວ​ປວງ​ຊົນ​ຍິ່ງ​ນັບ​ມື້​ເພີ່ມ​ຂຶ້ນ. ເພື່ອ​ກໍ່ສ້າງ​ກຸ່ມ​ກ້ອນ​ມະຫາ​ສາມັກຄີ, ເປັນ​ເອກະ​ພາບ​ພາຍ​ໃນ​ພັກ, ການຈັດຕັ້ງ​ພັກ​ທຸກ​ຂັ້ນ ແລະ ສະມາຊິກ​ພັກ​ທຸກ​ຄົນ​ຕ້ອງ​ປະຕິບັດ​ຢ່າງ​ເຂັ້ມ​ງວດ​ບັນດາ​ຫຼັກການ ​ການ​ເຄື່ອນໄຫວ​ພັກ, ເປັນຕົ້ນ​ແມ່ນ​ຫຼັກການ​ລວມ​ສູນ​ປະຊາທິປະໄຕ, ຕໍາ​ນິ​ຕົນ​ເອງ ແລະ ຕໍາ​ນິ​ໝູ່​ເພື່ອນ​ເປັນ​ປົກກະຕິ, ຕ້ານ​ບັນດາ​ແນວ​ຄິດ ແລະ ການ​ປະພຶດ​ລັດທິ​ສວຍ ໂອກາດ​ແບບ​ບໍ່​ມີ​ຫຼັກ​ການ.
ພັກ​ກອມ​ມູ​ນິດ​ຫວຽດນາມ​ ໄດ້​ຮັບ​ການ​ສ້າງຕັ້ງ​ຂຶ້ນ​ໃນ​ວັນ​ທີ 3/2/1930, ນັບ​ແຕ່​ນັ້ນ ເປັນ ຕົ້ນ​ມາ, ຍາມ​ໃດ​ພັກ ​ກໍ​ລ້ວນ​ແຕ່​ໄດ້​ເອົາໃຈໃສ່​ຊີ້​ນໍາ-ນໍາ​ພາ​ຢ່າງ​ໃກ້​ຊິດ​ກັບ​ປະຊາຊົນ​ໃນ ການສ້າງສາ, ປົກ​ປັກ​ຮັກສາ ແລະ  ພັດທະນາ​ປະເທດ​ຊາດກໍ​ຄື​ ການ​ສ້າງສາ​ເສດຖະກິດ-  ສັງຄົມ​ໃຫ້​ນັບ​ມື້​ເຕີບໃຫຍ່ຂະ ຫຍາຍຕົວ​ຂຶ້ນ​ໄປ​ເລື້ອຍໆ. ນໍາ ​ພາ​ປະຊາຊົນ​ສຸມ​ໃສ່​ພັດທະ ນາ​ເສດຖະກິດ, ການ​ລົງທຶນ ດ້ານການ​ຄ້າ - ບໍລິການ, ບັນດາ​ຂະແໜງການ​ອຸດ​ສາ​ຫະ​ກໍາ - ການ​ຄ້າ, ກະ​ສິ​ກໍາ, ວຽກ​ງານ​ ກໍ່ສ້າງຊົນ​ນະບົດ​ໃໝ່, ແບບ ແຜນ​ວິທີ​ເຮັດ​ວຽກ, ພ້ອມ​ກັນ​ນັ້ນ ກໍ​ໄດ້​ພັດທະນາ​ພື້ນຖານ​ໂຄງ​ລ່າງ​ເທື່ອ​ລະ​ກ້າວ ຕາມ​ທິດຫັນເປັນ​ຕົວ​ເມືອງ​ທີ່​ທັນ​ສະ​ໄໝ. ທັງ​ໝົດ​ເຫຼົ່ານັ້ນ, ແມ່ນ​ບໍ່​ອາດ​ລືມ​ໄດ້​ຜູ້​ນໍາ​ທີ່​ຍິ່ງ​ໃຫຍ່, ຜູ້​ລິ​ເລີ່ມ​ສ້າງຕັ້ງພັກ​ກອມ​ມູ​ນິດ ​ຫວຽດນາມ ນັ້ນ​ແມ່ນ​ທ່ານ ປະທານ ໂຮ່​ຈິ​ມິນ. ພາຍຫຼັງການ​ ປະຕິວັດເດືອນ​ຕຸລາ​ຣັດ​ເຊຍ, ປະທານ ໂຮ່​ຈິ​ມິນ (ເວລາ​ນັ້ນ​ແມ່ນ ທ່ານ ຫ​ງວຽນອາຍກວັກ) ໄດ້​ມີ​ບົດ​ສະຫຼຸບ​ວ່າ: ການ​ປະ ຕິວັດ​ປົດປ່ອຍ​ຊາດ ແມ່ນພາກ ​ສ່ວນ​ສໍາຄັນ​ຂອງ​ການ​ປະຕິ ວັດ​ກອມ​ມູ​ນິດ​ໃນ​ທົ່ວ​ໂລກ; ການ​ປະຕິວັດ​ປົດ​ປ່ອຍ​ຊາດ ຕ້ອງ​ຂະຫຍາຍ​ຂຶ້ນ​ເປັນ​ການ​ປະຕິວັດ​ສັງຄົມ​ນິຍົມ ຈຶ່ງ​ຈະ​ສາມາດ​ຍາດ​ໄດ້​ໄຊຊະນະ​ທີ່​ສົມບູນ​ແບບ.
   ສະນັ້ນ, ການ​ປະຕິວັດ​ປົດ​ປ່ອຍ​ຊາດ​ຫວຽດນາມ ແມ່ນ​ນອນ​ໃນ​ມາດ​ຕະ​ເກນ​ປະຕິວັດ​ກອມ​ມູ​ນິດ, ປົດ​ປ່ອຍ​ຊາດ ແມ່ນ​ບາດກ້າວ​ໜຶ່ງ, ບາດກ້າວ​ຕໍ່​ໄປ​ ແມ່ນ​ກ້າວ​ຂຶ້ນ​ລັດທິ​ສັງຄົມ ແນ ໃສ່​ປົດ​ປ່ອຍ​ສັງຄົມ, ປົດປ່ອຍ​ມະ​ນຸດ. ນັ້ນ​ແມ່ນ​ເສັ້ນທາງ​ປົດປ່ອຍ​ເດັດຂາດ​ທີ່​ສຸດ ແທດ ເໝາະ​ກັບ​ຄວາມ​ຮຽກຮ້ອງ ຕ້ອງ ການ ຂອງ​ຊາດ, ຄວາມ​ມຸ້ງ​ຫວັງ​ຂອງ​ປະຊາຊົນ ແລະ ທິດ​ທາງ​ຂອງ​ຍຸກ​ສະ​ໄໝ. ຈາກ​ບັນຫາ​ທີ່​ກ່າວ​ມາ​ນັ້ນ, ປະທານ ໂຮ່​ຈິ​ມິນ ຈຶ່ງ​ມີ​ແນວ​ຄວາມ​ຄິດ​ທີ່​ມີ​ລັກສະນະ​ທິດ​ສະ​ດີ​ວ່າ: ເຮັດ​ການ​ປະຕິວັດ​ຖ້າ​ຢາກ​ຊະນະ ຕ້ອງ​ມີ​ພັກ​ນໍາ​ພາ ເພື່ອ​ໃຫ້​ພາຍ​ໃນ​ພັກ​ຕ້ອງ​ປຸກລະດົມ ແລະ ຈັດ​ຕັ້ງ​ປະຊາຊົນ, ຢູ່​ພາຍ​ນອກ ແມ່ນ​ຕ້ອງ​ມີ​ການ​ຕິດຕໍ່​ພົວພັນ​ກັບ​ບັນດາ​ຜູ້​ທີ່​ຖືກ​ກົດ​ຂີ່​ຂູດ​ຮີດ ແລະ ຊົນ​ຊັ້​ນກໍາ​ມະ​ຊີບ​ໃນ​ທົ່ວ​ໂລກ.
ຢູ່​ບັ້ນ​ຮົບ​ຫວຽດ​ບັກ, ແຂວງ​ຕວຽນ​ກວາງ, ປະທານ ໂຮ່​ຈິ​ມິນ ໄດ້​ຮຽບຮຽງ​ເອກະສານ, ມະຕິ, ບັນດາແນວທາງ​ແຜນການ ເພື່ອ​ເຕົ້າໂຮມ​ກອງ​ປະຊຸມ​ຄະນະ​ໃນ​ວັນ​ທີ 4/6/1945, ຕົກລົງ​ເປັນ​ເອກະພາບ​ຖືເອົາ​ເຂດ​ບັ້ນ​ຮົບ​ເປັນ​ເຂດ​ປົດປ່ອຍ, ເປັນ​ເອກະ​ພາບ​ບັນ​ດາ​ກໍາ​ລັງ​ປະກອບອາວຸດ​ໃຫ້​ເປັນ​ກອງທັບ​ປົດປ່ອຍ. ຈາກ​ນັ້ນ ປະທານ ໂຮ່​ຈິ​ມິນ ໄດ້​ກະກຽມ​ຄົບຖ້ວນ​ບັນດາ​ປັດ​ໄຈ​ທາງ​ດ້ານ​ການເມືອງ, ແນວ​ຄິດ ແລະ ການຈັດຕັ້ງ​ເພື່ອ ໃຫ້​ພັກ​ກອມ​ມູ​ນິດ​ຫວຽດນາມ​ກໍາ​ເນີ​ດ​ເກີດ​ຂຶ້ນ, ເປັນຕົ້ນ​ແມ່ນ​ສ້າງຕັ້ງ ສະມາຄົມ ຊາວ​ໜຸ່ມ​ປະຕິວັດ​ຫວຽດນາມ ຊຶ່ງ​ແມ່ນ​ຕົ້ນ​ກໍາ​ເນີ​ດ​ຂອງ​ພັກ​ກອມ​ມູ​ນິດ​ຫວຽດນາມ.
ນັບ​ແຕ່​ກາງ​ປີ 1929 ຫາ​ຕົ້ນ​ປີ 1930, ຢູ່​ຫວຽດນາມໄດ້​ ເກີດ​ມີ 3 ອົງການ​ຈັດ​ຕັ້ງ​ກອມ ​ມູ​ນິດ, ຮັບ​ຮູ້​ໄດ້​ຈຸດ​ສໍາ​ຄັນ ແລະ ຄວາມ​ຈໍາ​ເປັນຄວາມເປັນເອກະ ​ພາບ​ບັນດາ​ອົງການຈັດ​ຕັ້ງ​ຕໍ່​ຄວາມ​ຮຽກຮ້ອງ​ຕ້ອງການ​ປະຫວັດສາດ​ໃໝ່. ວັນ​ທີ 3/2/ 1930, ທ່ານ ຫ​ງວຽນ​ອາຍ​ກວັກ (ປະທານ ໂຮ່​ຈິ​ມິນ) ໄດ້​ຈັດ​ກອງ​ປະຊຸມ​ຮ່ວມ​ບັນດາ​ອົງການ​ຈັດ​ຕັ້ງ​ກອມ​ມູ​ນິດ ກາຍເປັນ​ພັກ​ກອມ​ມູ​ນິດ​ຫວຽດນາມ, ເປີດ​ສັງກາດ​ໃໝ່​ທີ່​ຍິ່ງ​ໃຫຍ່​ໃຫ້​ແກ່​ການ​ປະຕິວັດ​ຫວຽດນາມ. ພັກ​ກອມ​ມູ​ນິດ​ຫວຽດນາມ ກໍາ​ເນີ​ດ​ ເກີດ​ຂຶ້ນ ແມ່ນ​ຕິດ​ພັນ​ກັບ​ອາຍຸ​ຂອງ​ປະທານ​ໂຮ່​ຈິ​ມິນ, ແມ່ນ​ການ​ກະກຽມ​ຄັ້ງ​ທໍາ​ອິດ​ທີ່​ແ​ນ່​ນອນ ທີ່​ມີ​ລັກສະນະ ຕັດສິນ ໃຫ້​ແກ່​ບາດກ້າວ​ພັດທະນາ​ແບບ​ກ້າວ​ກະໂດດ​ໃນ​ປະຫວັດສາດ​ຂອງ​ຊາດ​ຫວຽດນາມ.
   ບົດບາດ​ຂອງ​ປະທານ ໂຮ່​ຈິ​ມິນ ໃນ​ວຽກ​ງານ​ຈັດ​ຕັ້ງ, ສ້າງຕັ້ງ​ພັກ​ກອມ​ມູ​ນິດ​ຫວຽດ ນາມ ແມ່ນ​ສຸດທີ່​ຍິ່ງໃຫຍ່. ພ້ອມກັນ​ນັ້ນ, ສິ່ງ​ທີ່​ມີ​ຄວາມ​ໝາຍສໍາ​ຄັນ​ພິເສດ​ແມ່ນ ປະ ທານ ໂຮ່​ຈິ​ມິນ ໄດ້​ກໍ່ສ້າງ ແລະ ຝຶກ​ຝົນ​ຫຼໍ່​ຫຼອມ​ພັກ​ກອມ​ມູ​ນິດ​ຫວຽດນາມ ໃຫ້​ກາຍເປັນ​ພັກ​ອົງອາດ​ກ້າແກ່ນ, ມີ​ຄຸນ​ທາດ ແລະ ບົດຮຽນ​ໃນ​ການ​ນໍາ​ພາ​ການ​ປະຕິວັດ ກໍ​ຄື​ວຽກ​ງານ​ກໍ່ສ້າງ​ພັກ​ໂປ່​ງ​ໃສ, ເຂັ້ມແຂງ ແລະ ໜັກ​ແໜ້ນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110