ຈີນ ຈັດກອງປະຊຸມຮັບມືກັບພະຍາດ ອັກເສບປອດ

   ຂ່າວ­ສານ​ຊີ​ອາ​ໄອ​ລາຍ​ງານ​ວ່າ: ທ່ານ ຫຼີ​ເຄີ້​ສຽງ ນາ ­ຍົກ­ລັດ­ຖະ­ມົນ­ຕີ​ຈີນ ໄດ້​ເປັນ​ປະ­ທານ ຈັດ​ກອງ​ປະ­ຊຸມ​ຮັບ​ມືກັບ​ສະ­ຖາ­ນະ​ການ​ການ​ແຜ່​ລະ­ບາດ​ຂອງ​ເຊື້ອ​ໄວ​ຣັດ​ຈຸ​ລະ​ໂຣກ​ສາຍ​ພັນ​ໃໝ່ ໃນ​ວັນ​ທີ 29 ມັງ­ກອນ​ຜ່ານ​ມາ. ກອງ​ປະ­ຊຸມ​ໄດ້​ລະ­ບຸ​ວ່າ: ປັດ­ຈຸ­ບັນ ຈີນ ໄດ້​ເພີ່ມ​ກໍາ​ລັງ​ປ້ອງ​ກັນ​ທີ່​ດີ ແຕ່​ສະ ­ຖາ­ນະ​ການ​ຍັງ​ແຜ່​ລະ­ບາດ​ເພີ່ມ​ຫຼາຍ​ຂຶ້ນ, ລັດ­ຖະ­ບານ​ຈີນ ຕ້ອງ​ໃຊ້​ມາດ​ຕະ­ການ​ຢ່າງ​ລະ­ອຽດ​ຮອບ​ຄອບ​ເພື່ອ​ຄວບ​ຄຸມ​ການ​ແຜ່​ລະ­ບາດ​ຂອງ​ພະ​ຍາດ.
   ກອງ​ປະ­ຊຸມ​ເນັ້ນ​ວ່າ: ຕ້ອງ​ສົ່ງ­ເສີມ​ວຽກ​ງານ​ປ້ອງ​ກັນ​ການ​ຕິດ­ເຊື້ອ​ຢູ່​ນະ­ຄອນ​ອູ​ຮັ້ນ ແຂວງ​ຫູ​ເປີຍ, ຮັກ­ສາ​ຜູ້​ປ່ວຍ​ຢ່າງ​ສຸດ​ຄວາມ​ສາ­ມາດ, ພະ­ຍາ­ຍາມ​ຫຼຸດ​ອັດ­ຕາ​ການ​ເສຍ​ຊີ­ວິດ, ເປີດ ­ເຜີຍ​ຂໍ້​ມູນ​ການເຮັດ​ວຽກ ຢ່າງ​ໂປ່​ງ​ໃສ ແລະ ທັນ​ການ, ເລັ່ງ​ລັດ​ການ​ວິ​​ໄຈ​ວັກ​ຊິນ, ພະ­ຍາ­ຍາມ​ຮັບ­ປະ­ກັນ​ວັດ­ຖຸ ແລະ ອຸ­ປະ ­ກອນ ປ້ອງ ກັນ​ທາງ​ການ​ແພດ, ລວມ​ເຖິງ​ວັດ­ຖຸ​ທີ່​ຈໍາ​ເປັນ ໃນ​ຊີ­ວິດ​ປະ​ຈໍາ​ວັນ ໂດຍ​ໃຊ້​ມາດ​ຕະການ​ຕ່າງໆ ເຮັດ​ໃຫ້​ລາ­ຄາ​ສິນ­ຄ້າ​ມີ​ສະ­ຖຽນ​ລະ​ພາບ.
ກອງ​ປະ­ຊຸມ​ຊີ້​ອອກ​ວ່າ: ຕ້ອງ​ຮັບ­ປະ­ກັນ​ການ​ຈຳ​ກັດ​ການແຜ່​ລະ​ບາດ​ຂອງ​ເຊື້ອ​ໄວ​ຣັດ​ຈຸ​ລະ​ໂຣກ​ສາຍ​ພັນ​ໃໝ່ ຫຼັງ​ຈາກ​ປະ­ຊາ­ຊົນ​ກັບ­ເຂົ້າ​ສູ່​ການ​ເຮັດ​ວຽກ ແລະ ແກ້​ໄຂ​ບັນ­ຫາ​ນັກ​ທ່ອງ​ທ່ຽວ​ຈີນ ທີ່​ຕິດ​ຄ້າງ​ຢູ່​ຕ່າງ​ປະ​ເທດ.
   ແຫຼ່ງ​ຂ່າວ​ຂອງ​ຄະ​ນະ​ກຳ ມະ​ການ​ສາ​ທາ​ລະ​ນະ​ສຸກ​ແຫ່ງ​ຊາດຈີນ ປະ​ຈຳ​ວັນ​ທີ 1/2/2020 ໃຫ້​ຮູ້ວ່າ:  ຜ່ານ​ການ​ເກັບ​ກຳ​ຂໍ້​ມູນ ຮອດ​ເວ​ລາ 24: 00 ໂມງ ຂອງ ວັນ​ທີ 1/2/2020 ຈາກ 31 ແຂວງ (ເຂດ​ປົກ​ຄອງ​ຕົນ​ເອງ, ນະ​ຄອນ​ຫຼວງ) ແລະ ກອງ​ພັນ​ທະ​ຫານ​ສ້າງ​ສາກໍ່​ສ້າງ​ທິ​ເບດ​ລາຍ​ງານ​ກໍ​ລະ​ນີ​ຢືນຢ​ັນ​ມີ​ຜູ້​ ຕິດເຊື້ອ​ເພີ່ມ 2.590 ກໍ​ລະນີ, ໃນນັ້ນ ຢູ່​ແຂວງ​ຫູ​ເປີຍ  ມີ 1.921 ກໍ​ລະ​ນີ​ປ່ວຍ​ໜັກ​ໃໝ່ 315 ກໍ​ລະ​ນີ (ແຂວງ​ຫູ​ເປີຍ 268 ກໍ​ລະ​ນ​ີ) ຜູ້​ເສຍ​ຊີ​ວິດ​ເພີ່ມ 45 ກໍ​ລະ​ນີ  (ແຂວງ​ຫູ​ເປີຍ 45 ກໍ​ລະ​ນີ) ກໍ​ລະ​ນີ​ປິ່ນ​ປົວ​ດີ​ມີ​ເພີ່ມ 85 ກໍ​ລະ​ນີ, ແຂວງ​ຫູ​ເປີຍ 49 ກໍ​ລະ​ນີ. ກໍ​ລະ​ນີ​ສົງ​ໃສ​ເພີ່ມ 4.562 ກໍ​ລະ​ນີ (ແຂວງ​ຫູ​ເປີຍ 2.602 ກໍ​ລະ​ນີ). ສັງ​ລວມ​ຮອດ​ເວ​ລາ 24:00 ໂມງ ຂອງວັນ​ທີ 1/2/2020 ຈາກ ທົ່ວ​ປະ​ເທດ​ຈີນ ມີ​ດັ່ງ​ນີ້​: ຜູ້​ຕິດ​ເຊື້ອ  ມີ 14.380 ກໍ​ລະ​ນີ, ອາ​ການ​ ໜັກ 2.110 ກໍ​ລະ​ນີ, ເສຍ​ຊີ​ວິດ 304 ກໍ​ລະ​ນີ, ປິ່ນ​ປົວ​ດີ​ແລ້ວ 328 ກໍ​ລະ​ນີ. ຄົນ​ເຈັບ​ທີ່​ ສົງ​ໃສວ່າ​ເປັນ​ພະ​ຍາດ​ດັ່ງ​ກ່າວ ມີ 19.544 ກໍ​ລະ​ນີ. ຜູ້​ທີ່​ມີ​ປະ ຫວັດ​ຢູ່​ໃກ້​ຊິດ​ກັບ​ຜູ້​ປ່ວຍ​ມີ 163.844 ກໍ​ລະ​ນີ ແລະ ຈຳ​ນວນ 8.044 ຄົນ ໄດ້​ປ່ອຍ​ຕົວ​ແລ້ວ. ໃນ​ນີ້ 137.594 ກໍ​ລະ​ນີ ຍັງ​ຢູ່​ໃນ​ໄລ​ຍະ​ເຝົ້າ​ຕິດ​ຕາມ​ພະ​ຍາດ​ຈາກ​ແພດ​ຢູ່. ສຳ​ລັບ​ຜູ້​ຕິດ ເຊື້ອ​ຢູ່​ໃນ​ເຂດ​ປົກ​ຄອງ​ພິ​ເສດ​ຂອງ ສ​ປ ຈີນ ມີ​ດັ່ງ​ນີ້:  ​ຮົງ​ກົງ ມີ 14 ກໍ​ລະ​ນີ, ມາ​ກາວ 7 ກໍ​ລະ​ນີ ແລະ ໄຕ້​ຫວັນ 10 ກໍ​ລະ​ນີ.
ລັດ­ຖະ­ບານ ແລະ ອຳ­ນາດ​ການ​ປົກ­ຄອງ​ຂັ້ນ​ຕ່າງໆ​ຂອງ​ຈີນ ໄດ້​ໃຊ້​ງົບ­ປະ­ມານ 27,3 ຕື້​ຢວນ ເພື່ອ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະ­ບາດ​ຂອງ​ພະ​ຍາດ.