ຫົວ​ຂໍ້ : ສານອວຍພອນວັນສ້າງຕັ້ງພັກ ກອມມູນິດຫວຽດນາມ

ເຜີຍ​ແຜ່​ໂດຍ​: admin ເວ​ລາ: 04/02/2020 11:27:18 ຈຳ​ນວນ​ຜູ້​ເຂົ້າ​ຢ້ຽມ​ຊົມ 2819 ຄັ້ງ

   ສະ­ຫາຍ ນາງ ສູນ​ທອນ ໄຊ​ຍະ​ຈັກ ກໍາ​ມະ​ການ​ສູນ​ກາງ​ພັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ໄດ້​ສົ່ງ​ສານ​ອວຍ­ພອນ ເຖິງ ສະ­ຫາຍ ຮວ່າງ​ບິ່ງ​ກວັນກໍາ​ມະ​ການ​ສູນ​ກາງ​ພັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ກອມ​ມູ​ນິດຫວຽດ­ນາມ ເມື່ອ​ບໍ່​ດົນ​ມາ​ນີ້ ທີ່​ນະ­ຄອນ­ຫຼວງ​ຮ່າ​ໂນ້ຍ, ເນື້ອ​ໃນ​ສານ​ລະ­ບຸ​ວ່າ:

   ເນື່ອງ​ໃນ​ໂອ­ກາດ​ວັນ​ສ້າງ­ຕັ້ງ​ພັກ​ກອມ​ມູ​ນິດ​ຫວຽດ­ນາມ ຄົບ­ຮອບ 90 ປີ (3/2/1930 - 3/2/2020), ຕາງ­ໜ້າ​ຄະ­ນະ​ພັກ, ຄະ​ນະ​ນໍາ ແລະ  ພະ­ນັກ­ງານ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ປະ­ຊາ­ຊົນ ປະ­ຕິ­ວັດ ລາວ ແລະ ໃນ​ນາມ​ສ່ວນ​ຕົວ, ຂ້າ­ພະ­ເຈົ້າ ຂໍ​ສົ່ງ​ຄໍາ​ອວຍ­ພອນ​ໄຊ​ອັນ​ປະ­ເສີດ, ຄວາມ​ສາ­ມັກ­ຄີ​ຮັກ­ແພງ ຖານ​ສະ­ຫາຍ​ອ້າຍ​ນ້ອງ​ທີ່​ສະ­ໜິດ­ສະ­ໜົມ ມາ​ຍັງ​ສະ­ຫາຍ ພ້ອມ​ດ້ວຍ​ຄະ­ນະ​ພັກ, ຄະ​ນະ​ນໍາ ແລະ ພະ­ນັກ­ງານ​ຂອງ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ທຸກ​ຖ້ວນ​ໜ້າ.

   ພວກ​ຂ້າ­ພະ­ເຈົ້າ ຕີ​ລາ­ຄາ​ສູງ​ທີ່ ຕະ­ຫຼອດ​ໄລ­ຍະ 90 ປີ​ທີ່​ຜ່ານ​ມາ, ພາຍ​ໃຕ້​ການ​ນໍາ​ພາ​ອັນ​ຖືກ­ຕ້ອງ​ສະ­ຫຼາດ​ສ່ອງ​ໃສ ຂອງ​ພັກ​ກອມ​ມູ​ນິດ​ຫວຽດ­ນາມ, ປະ­ຊາ­ຊົນ​ຫວຽດ­ນາມ ອ້າຍ​ນ້ອງ ສາ­ມາດ​ຍາດ​ໄດ້​ໄຊ­ຊະ­ນະ ອັນ​ຍິ່ງ​ໃຫຍ່​ໃນ​ພາ­ລະ­ກິດ​ປົດ​ປ່ອຍ​ຊາດ​ຕ້ານ​ກັບ​ຜູ້​ຮຸກ​ຮານ​ຕ່າງ​ຊາດ​ເປັນ​ເວ­ລາ​ຫຼາຍ​ສິບ​ປີ ແລະ ພາຍ­ຫຼັງ ປະ­ເທດ​ຊາດ ໄດ້​ຮັບ​ການ​ປົດ​ປ່ອຍ​ຢ່າງ​ສົມ­ບູນ ແລະ ທ້ອນ­ໂຮມ​ປະ­ເທດ​ຊາດ​ໃນ​ປີ 1975 ແລ້ວ, ພັກ​ກອມ​ມູ​ນິດ​ຫວຽດ­ນາມ ໄດ້​ສືບ​ຕໍ່​ນໍາ​ພາ​ປະ­ຊາ­ຊົນ​ສ້າງ­ສາ​ປະ­ເທດ​ຊາດ​ຕາມ​ເສັ້ນ­ທາງ​ກ້າວ​ຂຶ້ນ​ສັງ­ຄົມ​ນິ­ຍົມ, ສາ­ມາດ​ຍາດ​ໄດ້­ຜົນ​ງານ​ອັນ​ໃຫຍ່​ຫຼວງ​ຮອບ­ດ້ານ ແລະ ມີ​ຄວາມ​ໝາຍ​ປະ­ຫວັດ­ສາດ ໃນ​ທຸກ​ຂົງ­ເຂດ ໂດຍ​ສະ­ເພາະ​ແມ່ນ ບັນ­ດາ​ຜົນ​ສໍາ​ເລັດ​ຮອບ­ດ້ານ​ໃນ​ພາ­ລະ­ກິດ​ແຫ່ງ​ການ​ປ່ຽນ­ແປງ​ໃໝ່ ຂອງ ສສ ຫວຽດ­ນາມ, ອັນ​ໄດ້​ເຮັດ​ໃຫ້ ຫວຽດ­ນາມ ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ​ຢ່າງ​ໜັກ​ແໜ້ນ, ສັງ­ຄົມ​ມີ​ຄວາມ​ເປັນ​ລະ­ບຽບ​ຮຽບ­ຮ້ອຍ, ເສດ­ຖະ­ກິດ​ມີ ການ​ຂະ­ຫຍາຍ­ຕົວ ດ້ວຍ​ຈັງ­ຫວະ​ໄວ ແລະ ຕໍ່​ເນື່ອງ​ໃນ​ທ່າມ­ກາງ​ທີ່​ເສດ­ຖະ­ກິດ​ຂອງ​ໂລກ ພວມ​ມີ ຄວາມ​ຫຍຸ້ງ­ຍາກ, ການ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະ­ຫງົບ ມີ​ຄວາມ​ໝັ້ນ​ທ່ຽງ​ເຂັ້ມ­ແຂງ, ຊີ­ວິດ​ການ​ເປັນ​ຢູ່ ຂອງ​ປະ­ຊາ­ຊົນ ສືບ­ຕໍ່​ໄດ້​ຮັບ​ການ​ປັບ­ປຸງ​ດີ​ຂຶ້ນ​ເລື້ອຍໆ, ການ​ພົວ­ພັນ​ຮ່ວມ​ມື​ກັບ​ຕ່າງ­ປະ­ເທດ ໄດ້​ຮັບ​ການ​ເປີດ ກວ້າງ, ຖາ­ນະ​ບົດ­ບາດ​ອິດ​ທິ​ພົນ​ຂອງ ພັກ​ກອມ​ມູ​ນິດ​ຫວຽດ­ນາມ ແລະ ສາ­ທາ­ລະ­ນະ​ລັດ ສັງ­ຄົມ​ນິ­ຍົມ ຫວຽດ­ນາມ ນັບ​ມື້​ນັບ​ສູງ​ເດັ່ນ​ຂຶ້ນ​ໃນ​ເວ­ທີ​ພາກ​ພື້ນ ແລະ ສາ​ກົນ.

   ພວກ​ຂ້າ­ພະ­ເຈົ້າ ຕີ​ລາ­ຄາ​ສູງ​ຕໍ່​ການ​ປະ­ກອບ­ສ່ວນ​ອັນ​ສໍາ​ຄັນ​ຂອງ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ກອມ​ມູ​ນິດ​ຫວຽດ­ນາມ ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ຫວຽດ­ນາມ ເວົ້າ​ລວມ, ກໍ​ຄື​ການ​ປະ ກອບ​ສ່ວນ​ທີ່​ສໍາ​ຄັນ, ຕັ້ງ­ໜ້າ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ, ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ອັນ​ຍິ່ງ​ໃຫຍ່, ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ ສອງ​ພັກ, ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ​-​ຫວຽດ­ນາມ ເວົ້າ​ສະ­ເພາະ ແລະ ຂໍ​ຖື​ໂອ­ກາດ​ນີ້ ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ­ຄຸນ​ຢ່າງ​ເລິກ­ເຊິ່ງ​ມາ​ຍັງ ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ​ກອມ​ມູ​ນິດ ຫວຽດ­ນາມ ທີ່​ຍາມ​ໃດ​ກໍ່​ໄດ້​ໃຫ້­ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ຢ່າງ​ຫຼວງ­ຫຼາຍ, ໃຫ້­ການ​ປະ­ສານ​ສົມ­ທົບ​ຢ່າງ​ໃກ້­ຊິດ​ກັບ ຄະ­ນະ​ພົວ­ພັນ ຕ່າງ­ປະ­ເທດ​ສູນ​ກາງ​ພັກ ປປ ລາວ ໃນ​ການ​ເປັນ​ເສ­ນາ​ທິ​ການ ໃຫ້​ແກ່​ສູນ​ກາງ​ພັກ​ທັງ​ສອງ ຕະ­ຫຼອດ​ໄລ­ຍະ​ຜ່ານ​ມາ. ພວກ​ຂ້າ­ພະ­ເຈົ້າ​ຂໍ​ໃຫ້​ຄໍາ​ໝັ້ນ​ສັນ­ຍາ​ວ່າ ຈະ​ສືບ­ຕໍ່​ຮ່ວມ​ກັບ​ບັນ­ດາ​ສະ­ຫາຍ ເພື່ອ​ປົກ​ປັກ​ຮັກ­ສາ ແລະ ເສີມ​ຂະ­ຫຍາຍ​ສາຍ​ພົວ­ພັນ​ພິ­ເສດ ລາວ​-​ຫວຽດ­ນາມ ໃຫ້​ນັບ​ມື້​ນັບ​ຈະ­ເລີນ​ງອກ​ງາມ​ຍິ່ງໆ​ຂຶ້ນ.

   ອີກ​ເທື່ອ​ໜຶ່ງ, ຂ້າ­ພະ­ເຈົ້າ ຂໍ​ອວຍ­ພອນ​ໃຫ້​ສະ­ຫາຍ ພ້ອມ​ດ້ວຍ​ຄະ­ນະ​ພັກ, ຄະ​ນະ​ນໍາ ແລະ ພະ­ນັກ­ງານ ຂອງ​ຄະ­ນະ​ພົວ­ພັນ​ຕ່າງ­ປະ­ເທດ ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ທຸກ​ຖ້ວນ​ໜ້າ ຈົ່ງ​ມີ​ສຸ­ຂະ­ພາບ​ເຂັ້ມ­ແຂງ, ມີ​ຄວາມ​ຜາ​ສຸກ ແລະ ມີ​ຜົນ​ສໍາ​ເລັດ​ໃນ​ການ​ປະ­ຕິ­ບັດ​ໜ້າ­ທີ່​ວຽກ​ງານ​ອັນ​ມີ​ກຽດ​ຂອງ​ຕົນ.

   ຂໍ​ອວຍ­ພອນ​ໃຫ້​ສາຍ​ພົວ­ພັນ​ມິດ­ຕະ­ພາບ​ທີ່​ຍິ່ງ​ໃຫຍ່, ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ ດ້ານ​ລະ­ຫວ່າງ ສອງ​ພັກ, ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ​-​ຫວຽດ­ນາມ ຈົ່ງ​ໝັ້ນ­ຄົງ​ຂະ­ໜົງ​ແກ່ນ ແລະ ແຕກ​ດອກ​ອອກ​ຜົນ​ຕະ­ຫຼອດ​ໄປ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110