ກອງປະຊຸມສະຫຼຸບຕີລາຄາວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ປະຈໍາ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2021 ໄດ້ຈັດຂຶ້ນໃນອາ​ທິດຜ່ານມານີ້ ທີ່ສະໂມສອນແຂວງ ໂດຍການເປັນປະທານຂອງ ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ ປະທານຄະນະກຳມະການ ປກຊ-ປກສ ແຂວງ, ມີຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ຫົວໜ້າ-ຮອງພະແນກ ແລະ ຄະນະພັກ-ຄະນະກອງບັນຊາການ ປກຊ-ປກສ ແຂວງເຂົ້າຮ່ວມ.

ໃນກອງປະຊຸມ, ສະຫາຍ ພົນຈັດຕະວາ ສົມທອງ ດອນກັນນ້ອຍ ຫົວໜ້າການເມືອງກອງບັນຊາການທະຫານແຂວງ, ຮອງປະທານຄະນະກໍາມະການ ປກຊ-ປກສ ແຂວງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານ ປກຊ-ປກສ ໄລຍະ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2021 ໂດຍພື້ນຖານແລ້ວແຂວງແມ່ນມີຄວາມສະຫງົບດີ, ຄະນະພັກ-ອົງການປົກຄອງທ້ອງຖິ່ນໄດ້ເຄື່ອນໄຫວນໍາພາ-ຊີ້ນໍາຕາມແນວທາງຂອງພັກ ຊຶ່ງເຮັດໃຫ້ປະຊາຊົນມີຄວາມເຊື່ອໝັ້ນຕໍ່​ການນໍາພາຂອງພັກ-ລັດຂັ້ນທ້ອງຖິ່ນ, ຮູ້ການພັດທະນາຕົນເອງດ້ວຍການຜະລິດ ແລະ ບໍລິການດີຂຶ້ນເທື່ອລະກ້າວ; ພ້ອມນັ້ນ ກໍໄດ້ປັບປຸງການຈັດຕັ້ງກໍາລັງ ປກຊ-ປກສ ບ້ານສໍາເລັດທຸກບ້ານ, ໄດ້ຈັດຕັ້ງອົບຮົມສໍາເລັດ 40% ຂອງແຜນການປີ 2021, ໄດ້ສ້າງບ້ານ-ກຸ່ມບ້ານປ້ອມໝັ້ນ, ບ້ານປ້ອງກັນຊາດເຂັ້ມແຂງ, ບ້ານປອດຄະດີ ແລະ ບ້ານປອດຢາເສບຕິດຈໍານວນໜຶ່ງ. ສາມາດມ້າງຄະດີຢາເສບຕິດໄດ້ 22 ເລື່ອງ, ກັກຕົວຜູ້ຖືກຫາໄດ້ 22 ຄົນ, ຢຶດຂອງກາງຢາບ້າໄດ້ເກືອບ 2 ພັນເມັດ, ພ້ອມເງິນກີບ, ອາວຸດເສິກ ແລະ ອຸປະກອນອື່ນໆ ຈຳນວນໜຶ່ງ, ຢຶດລົດເຄື່ອນໄຫວໄມ້ເຖື່ອນໄດ້ 8 ຄັນ, ຢຶດໄມ້ເຖື່ອນ 900 ກວ່າຕັບເທົ່າກັບ 10 ກວ່າແມັດກ້ອນ.

ສະຫາຍ ພົນຈັດຕະວາ ສົມທອງ ດອນກັນນ້ອຍ ກ່າວຕື່ມອີກວ່າ: ທິດທາງແຜນການໃນທ້າຍປີນີ້ຈະສູ້ຊົນຮັບປະກັນໃຫ້ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອບ, ຕັ້ງໜ້າຫັນລົງກໍ່ສ້າງຮາກຖານການເມືອງ, ສ້າງທ່າສະໜາມ 3 ຂັ້ນ ຕິດພັນກັບການພັດທະນາຊົນນະບົດຕາມທິດ 3 ສ້າງ ດ້ວຍການເຜີຍແຜ່ກົດໝາຍໃຫ້ກວ້າງຂວາງທົ່ວເຖິງ, ເປັນເຈົ້າການຕ້ານທຸກການແຊກຊ້ອນ ໂດຍສົງຄາມຫັນປ່ຽນໂດຍສັນຕິທຸກຮູບແບບຂອງສັດຕູ ແລະ ກຸ່ມຄົນບໍ່ຫວັງດີໃຫ້ທັນການ, ເອົາໃຈໃສ່ຄຸ້ມຄອງພົນລະເມືອງຄົນຕ່າງປະເທດ  ແລະ ອົງການຈັດຕັ້ງສາກົນໃຫ້ເຂົ້າສູ່ລະບຽບກົດໝາຍ, ຕ້ານ ແລະ ສະກັດກັ້ນບັນດາສື່ອອນລາຍ ທີ່ກຸ່ມຄົນບໍ່ດີສວຍໃຊ້ໂຄສະນາທີ່ຜິດກົດໝາຍໃຫ້ເຂັ້ມງວດ.

 (ຂ່າວ-ພາບ: ພຸດທະສອນ)