ລາວ-ສະຫະພາບເອີຣົບຫາລືວຽກງານໃນຕໍ່ໜ້າ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 05/02/2020 09:26:09 ຈຳ​ນວນ​​ຢ້ຽມ​ຊົມ 655 ຄັ້ງ

  ທ່ານ ບໍ່​ວຽງ​ຄໍາ ວົງ​ດາ ລາ ລັດຖະມົນຕີ​ກະຊວງ​ວິທະຍາສາດ ​ແລະ​ ເຕັກ​ໂນ​ໂລ​ຊີ (ກວຕ), ໄດ້​ຕ້ອນຮັບ​ການ​ເຂົ້າ​ຢ້ຽມ​ຂຳ​່ນັບ​ຂອງ​ທ່ານ ແອນ​ໂຕ​ນີ​ໂອ ແຄມ​ປີນ​ອສ ປະທານ​ອົງການ​ສິດທິ​ບັດ​ສະຫະພາບ​ເອີ​​ຣົບ (EPO) ພ້ອມ​ດ້ວຍ​ຄະນະ ໃນ​ວັນ​ທີ 3 ກຸມພາ​​ ຜ່ານ​ມາ ທີ່​ຫ້ອງ​ຮັບແຂກ​ຂອງ ​ກວຕ.
  ໃນ​ໂອກາດ​ດັ່ງກ່າວ, ທ່ານ ລມຕ ໄດ້​ສະແດງ​ຄວາມ​ຍິນດີ​ຕ້ອນຮັບ​ປະທານ​ອົງການ​ສິດທິ​ບັດ​ສະຫະພາບ​ເອີ​ຣົບ ພ້ອມ​ດ້ວຍ​ຄະນະ ທີ່​ໄດ້​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ສປປ ລາວ ຊຶ່ງ​ເປັນ​ການ​ປະກອບ​ສ່ວນ​ສໍາ​ຄັນ​ເຂົ້າ​ໃນ​ການ​ພັດທະນາ​ວຽກ​ງານ​ສິດທິ​ບັດ​ໃຫ້​ນັບ​ມື້​ດີ​ຂຶ້ນ, ທ່ານ ລມຕ ຍັງ​ກ່າວ​ຕື່ມ​ວ່າ: ຂ້າພະເຈົ້າ​ດີໃຈ​ຫຼາຍ​ທີ່​ຮູ້​ຂ່າວ​ວ່າ ການ​ເຈລະຈາ​ເພື່ອ​ເຊັນ​ສັນຍາ​ທີ່​ຈະ​ຮ່ວມ​ມື​ກັນຈະ​ບັນລຸ​ຜົນ​ສໍາ​ເລັດ ແລະ​ມີ​ຄວາມ​ຍິນດີ ທີ່​ທັງ​ສອງ​ຝ່າຍ​ຈະ​ຮ່ວມ​ມື​ກັນ ລະຫວ່າງ ກົມ​ຊັບ​ສິນ​ທາງ​ປັນຍາ ກໍ​ຄື ພະ​ແນກ ​ສິດທິ​ບັດ ​ກວຕ ​ຂອງ​ລາວ; ວຽກ​ງານ​ສິດທິ​ບັດ ຢູ່ ສປປ ລາວ ມີ​ຫຼາຍ​ອັນ​ທີ່​ເປັນ​ບັນຫາ​ໃໝ່ ສະນັ້ນ ຈຶ່ງ​ມີ​ຄວາມ​ຫວັງ​ທີ່​ສຸດ​ໃນ​ການ​ຮ່ວມ​ມື​ລະຫວ່າງ​ສອງ​ຝ່າຍ ແລະ ຖື​ສໍາ​ຄັນ​ບັນຫາ​ຂອງ​ການ​ຮ່ວມ​ມື ໃນ​ດ້ານ​ການ​ຍົກ​ລະດັບ​ໃຫ້​ແກ່​ນັກວິຊາການ ໃນ​ການ​ພັດທະນາ​ຊັບພະຍາກອນ​ມະນຸດ,  ກົມ​ຊັບ​ສິນ​ທາງ​ປັນຍາ ພະ​ແນ​ກ​ສິດທິ​ບັດ ມີ​ພະນັກງານ​ບໍ່​ຫຼາຍ ແລະ ຈໍາ​ນວນ​ພະນັກ​ງານ​ດ່ັງ​ກ່າວ​ແມ່ນ​ຍັງ​ອ່ອນ​ນ້ອຍ​ດ້ານ​ຄວາມ​ຮັບ​ຮູ້ ແລະ​ມີ​ຄວາມ​ຍິນດີ​ຈະ​ຕ້ອງ​ໄດ້​ມີ​ການ​ພົວພັນ​ຮ່ວມ​ມື​ກັນ.
  ປະທານ​ອົງການ​ສິດທິ​ບັດ​ສະຫະພາບ​ເອີ​​ຣົບ ກ່າວ ສະແດງ​ຄວາມ​ຂອບໃຈ​ຕໍ່​ທ່ານ  ລມຕ  ທີ່​ໄດ້​ໃຫ້ການ​ຕ້ອນຮັບ​ອັນ​ອົບ​ອຸ່ນ ພ້ອມ​ທັງ​ກ່າວ​ຈຸດປະສົງ ແລະ ລາຍ​ງານ​ຫຍໍ້ ໃຫ້​ກັບ ລມຕ​ຊາບ. 
ສະຫະພາບ​ເອີ​​ຣົບ, ເປັນ​ຫ້ອງການ​ໃຫຍ່​ອັນ​ດັບ2 ຂອງ​ເອີ​​ຣົບ ຊຶ່ງ​ມີ​ພະນັກງານ​ປະມານ 6.500 ຄົນ  ໃນ​ນັ້ນ 4.500 ຄົນ ເປັນນັກ​ວິທະຍາກອນ, ນັກວິທະຍາສາດ ຊຶ່ງ​ວຽກ​ງານ​ຫຼັກ ແມ່ນ​ການ​ອອກ​ສິດທິ​ບັດ ໃຫ້​ກັບ​ສິ່ງ​ປະດິດ​ສ້າງ​ຕ່າງໆ ສ່ວນ​ຫຼາຍວຽກ​ງານ​ທີ່​ເຮັດ ກ່ຽວ​ກັບການ​ພັດທະນາ​ເຕັກ​ໂນ​ໂລ​ຊີ, ພັດທະນາ​ນະ​ວັດ​ຕະ​ກໍາ ເພື່ອ​ສົ່ງເສີມ​ການ​ພັດທະນາ ແລະ ສະໜັບສະໜູນ​ການປະກອບສ່ວນ​ເຂົ້າ​ໃນ GDP;  ຜົນ​ຂອງ​ການ​ຮ່ວມ​ມືແມ່ນ​ມີ​ຜົນ​ດີ​ຕໍ່​ນັກ​ຄົ້ນຄວ້າ, ມະຫາວິທະຍາໄລ, ນັກຮຽນ, ນັກ​ພັດທະນາ ຈາກ​ການ​ອອກ​ແບບ, ຄົ້ນຄວ້າ ຈາກ​ການ​ສ້າງ​ນະ​ວັດ​ຕະ​ກໍາ.  ສ່ວນ​ການ​ຝຶກ​ອົບຮົມ, ສໍາ​ມະ​ນາ​ຕ່າງໆແມ່ນ​ມີ​ແຜນ​ຈະ​ໄດ້​ຈັດ​ຂຶ້ນ ແລະ ຈະ​ໄດ້​ເຊີນ​ເອົາ​ອາຈານ​ຈາກ​ມະຫາວິທະຍາໄລ  (ທີ່​ກ່ຽວຂ້ອງ) ໃນ​ທົ່ວ​ປະເທດ​ເຂົ້າ​ຮ່ວມ​ນໍາ,  ຈາກ​ນັ້ນ ກໍ​ມີ​ນັກ​ຄົ້ນຄວ້າ, ນັກ​ສຶກສາ ລ້ວນ​ແຕ່​ຈະ​ແມ່ນ​ຜູ້​ທີ່​ຈະ​ໄດ້​ຮັບ​ຜົນ​ປະໂຫຍດ​ຈາກ​ການ​ຮ່ວມ​ມື​ດັ່ງ​ກ່າວ.   ນອກຈາກ​ນັ້ນແລ້ວ ການ​ຝຶກ​ອົບຮົມ ກ່ຽວ​ກັບການ​ເຂົ້າ​ເຖິງ​ຂໍ້​ມູນ, ການ​ນໍາ​ໃຊ້​ຖານ​ຂໍ້​ມູນ ທີ່​ສ້າງ​ຂຶ້ນ ໂດຍ​ອົງການ EPO ຈະ​ເປັນ​ການ​ສະ​ສົມ​ຂໍ້​ມູນ ກ່ຽວ​ກັບ ນະ​ວັດ​ຕະ​ກໍາ​ເປັນ​ລະບົບ​ທີ່​ໃຫຍ່ ສາມາດ​ເຂົ້າ​ເບິ່ງ​ໄດ້,ສາມາດ​ຊ່ວຍ​ໃຫ້​ຜູ້​ສ້າງ​ນະ​ວັດ​ຕະ​ກໍາ, ສ້າງ​ໃຫ້​ນກ​ຄົ້ນຄວ້າ ໄດ້​ເຫັນ​ສິ່ງ​ທີ່​ເຄີຍ​ມີ​ມາ​ກ່ອນ​ແລ້ວ  ສະນັ້ນ ເຂົາເຈົ້າ​ຈຶ່ງ​ບໍ່​ໄດ້​ເສຍ​ໂອກາດ ໃນ​ການ​ພັດທະນາ​ສິ່ງ​ໃໝ່ໆ  ເພາະວ່າ ລະບົບ​ນີ້ ຈະ​ເປັນ​ການ​ປະຢັດ​ສິ່ງ​ທີ່​ສ້າງ​ມາ​ໃໝ່, ປະຢັດ​ເຈັ້ຍ,ປະຢັດ​ເງິນ​ຄໍາ ແລະ ສິ່ງ​ອື່ນໆ.
(ຂ່າວ: ແສງ​ຈັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110