ຫົວ​ຂໍ້ : ສີລັງກາ ຖືກຍົກໃຫ້ເປັນສູນກາງການຂົນສົ່ງແຫ່ງໃໝ່ຂອງໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 05/02/2020 09:44:35 ຈຳ​ນວນ​ຜູ້​ເຂົ້າ​ຢ້ຽມ​ຊົມ 275 ຄັ້ງ

(ເນື່ອງ​ໃນ​ໂອກາດ​ວັນ​ຊາດ ສີ​ລັງ​ກາ 4 ກຸມ​ພາ 2020)

ຮຽບຮຽງໂດຍ: ​ລຸ້ງ​ດາວ ບຸນ​ມີ
  ສາທາລະນະ​ລັດ ສັງຄົມ​ນິຍົມ ປະຊາທິປະໄຕ ສີ​ລັງກາ ເປັນ​ປະເທດ​ທີ່​ເປັນ​ເກາະ, ຕັ້ງ​ຢູ່​ອາຊີ​ໃຕ້ ແລະ ຖືກ​ອ້ອມ​ຮອບ​ໄປ​ດ້ວຍ​ມະຫາ​ສະ​​ໝຸດ​ອິນເດຍ, ອ່າວ​ມັນ​ນາ, ຊ່ອງ​ແຄບ​ປອກ, ສີ​ລັງກາ ແມ່ນ​ປະເທດ​ທີ່ຢູ່ໃກ້​ ກັບ​ອິນ​ເດຍ ແລະ ມານ​ດິບ, ມີເນື້ອທີ່​ທັງ​ໝົດປະມານ 65.610 ກິໂລແມັດ​ມົນທົນ, ມີ​ສະ ພາບ​ອາກາດ​ແບບ​ເມືອງ​ຮ້ອນ, ຝົນຕົກ​ຫຼາຍ​ໃນ​ລະຫວ່າງ​ມໍ​ລະ​ສຸມ, ມີ​ສະກຸນ​ເງິນ​ຂອງ​ປະເທດ​ແມ່ນ ຣູບ​ປີ​ສີ​ລັງ​ກາ. ນະຄອນຫຼວງ​ຂອງ​ປະເທດ​ນີ້​ແມ່ນ ໂກລຳ​ໂບ.
  ສີ​ລັງກາ ເປັນ​ປະເທດ​ຂະ​​ໜາດ​ນ້ອຍ​ໃນ​ອາຊີ​ໃຕ້, ມີ​ພົນລະເມືອງ 21.390.000 ກວ່າ​ຄົນ, ມີ​ລາຍ​ໄດ້​ລະດັບ​ປານ​ກາງ​-ຕໍ່າ (Lower-Middle-Incom), ຍ້ອນ​ສົ່ງ​ຄາມ​ພາຍ​ໃນ​ແກ່ຍາວ​ເຖິງ 26 ປີ (1983-2009) ເຮັດ​ໃຫ້​ສີ​ລັງກາ ບໍ່ໍ່​ຄ່ອຍ​ເປັນ​ທີ່​ຮູ້ຈັກ​ທັງ​ໃນ​ດ້ານ​ເສດຖະກິດ, ການ​ຄ້າ ແລະ ການ​ລົງ​ທຶນ. ແຕ່​ຫຼັງ​ຈາກ​ສົງຄາມ​ໃນ​ປະເທດ​ສິ້ນ​ສຸດ​ລົງ​ໃນ​ປີ 2009, ສີ​ລັງກາ ກໍ​ຖືກ​​ສັງ​ເກດ​ອີກ​ຄັ້ງ​ໃນ​ຖານະ​ປະເທດ​ທີ່​ເສດຖະກິດ​ເຕີບ​ໂຕ​ໄວ​ທີ່​ສຸດ​ໃນ​ຂົງເຂດ​ອາ​ຊີ. ໃນ​ໄລຍະ 6-7 ປີ​ທີ່​ຜ່ານ​ມາ, ເສດຖະກິດ​ຂະຫຍາຍຕົວ​ສູງ​ເຖິງ 7,1% ຕໍ່​ປີ (2017) ເຊັ່ນ​ດຽວ​ກັບ​ເງິນ​ລົງທຶນ​ໂດຍ​ກົງ​ຈາກ​ຕ່າງປະເທດ (FDI) ຈຳນວນ​ຫຼາຍ​ທີ່​ກຳລັງ​ຫຼັ່ງໄຫຼ​ເຂົ້າ​ໄປ​ໃນ​ສີ​ລັງ​ກາ. 
ໃນ​ຂະນະ​ທີ່​ປະເທດ​ມະ ຫາ​ອຳນາດ ທາງ​ເສດຖະກິດ​ຂອງ​ໂລກ​ຕ່າງ​ກໍເຫັນ ສີ​ລັງກາ ເປັນ​ຍຸດທະສາດ​ດ້ານ​ການ​ຄ້າ ແລະ ການ​ລົງທຶນ​ທີ່​ສຳ​ຄັນ. ໃນ​ຫຼາຍ​ປີ​ທີ່​ຜ່ານ​ມາ, ຜູ້ນຳ​ລະດັບ​ສູງ​ຂອງ ຈີນ ແລະ ສະຫະລັດ​ອາ​ເມ​ຣິ​ກາ ໄດ້​ໄປ​ຢ້ຽມຢາມ​ສີ​ລັງ​ກາ​ຫຼາຍ​ເທື່ອ ເພື່ອ​ເຈລະຈາ​ການ​ຄ້າ, ການ​ລົງ​ທຶນ. ນີ້​ສະແດງ​ໃຫ້​ເຫັນ​ວ່າ: ສີ​ລັງກາ ມີ​ຫຼາຍ​ສິ່ງ​ທີ່​ໜ້າ​ສົນໃຈ, ສີ​ລັງກາ ຕັ້ງ​ຢູ່​ໃນ​ຈຸດ​ຍຸດທະສາດ​ການ​ຄ້າ​ສຳຄັນ​ຂອງ​ໂລກ ໂດຍ​ເປັນ​ເກາະ​ທີ່​ຕັ້ງ​ຢູ່​ທາງ​ຕອນ​ໃຕ້​ຂອງ​ອິນ​ເດຍ ຊຶ່ງ​ເປັນ​ຈຸດ​ເຄິ່ງ​ກາງຂອງ​ເສັ້ນທາງ​ເດີນ​ເຮືອ​ລະຫວ່າງ​ພາກ​ພື້ນ​ອາຊີ​ຕາເວັນ​ອອກ, ອາຊີ​ໃຕ້, ຕາເວັນ​ອອກ​ກາງ, ເອີ​ຣົບ ແລະ ອາ​ຟຣິ​ກາ ເຮັດ​ໃຫ້ ສີ​ລັງກາ ຖືກ​ຍົກ​ໃຫ້​ເປັນ​ສູນ​ກາງ​ການ​ຂົນສົ່ງ​ແຫ່ງ​ໃໝ່​ຂອງ​ໂລກ ຊຶ່ງ​ເປັນ​ຈຸດ​ເດັ່ນ​ທີ່​ເຮັດ​ໃຫ້ ສະຫະ​ລັດ​ອາ​ເມ​ຣິ​ກາ ແລະ ຈີນ ລວມ​ເຖິງ​ປະເທດ​ອື່ນໆ ຕ້ອງການ​ເປີດ​ຄວາມ​ສຳພັນ​ທາງ​ການ​ຄ້າ​ກັບ ສີ​ລັງກາ ເພື່ອ​ເປັນ​ປະຕູ​ການ​ຄ້າ​ເຊື່ອມ​ຕໍ່​ໄປ​ຍັງ​ພາກ​ພື້ນ​ຕ່າງໆ ແລະ ຍ້ອນ​ທີ່​ຕັ້ງ​ເປັນ​ຍຸດທະສາດ​ການ​ຄ້າເຮັດ​ໃຫ້ ສີ​ລັງກາ ເປັນ​ເມືອງ​ທ່າ​ສຳຄັນ​ໃນ​ການ​ຂົນສົ່ງ​ສິນຄ້າ ໂດຍ​ທ່າເຮືອ​ໂກລຳ​ໂບ ເປັນ​ທ່າເຮືອ​ທີ່​ໃຫຍ່ ແລະ ທັນ​ສະໄໝ​ທີ່​ສຸດ ໃນ​ອາຊີ​ໃຕ້ ແລະ ໃຫຍ່​ເປັນ​ອັນ​ດັບ 27 ຂອງ​ໂລກ. ປັດຈຸບັນ, ສີ​ລັງກາ ກຳລັງ​ຢູ່​ລະຫວ່າງ​ການ​ຂະຫຍາຍ​ທ່າເຮືອ​ຄັ້ງ​ໃຫຍ່ ໂດຍ​ແມ່ນ ສປ ຈີນ ໃຫ້ການ​ສະ​ໜັບ​ສະ​ໜູນ​ເງິນ​ລົງທຶນ​ທີ່​ມີ​ມູນ​ຄ່າ​ຫຼາຍ​ກ່​ວາ 1,4 ພັນ​ລ້ານ​ໂດ​ລາ ແລະ ຄາດ​ວ່າ​ຈະ​ໃຫ້​ສຳເລັດ​ພາຍ​ໃນ​ປີ​ນີ້. ຖ້າ​ສໍາ​ເລັດ ຈະ​ເຮັດ​ໃຫ້​ທ່າເຮືອ ໂກລຳ​ໂບ ໃຫຍ່​ຕິດ​ອັນ​ດັບ​ທີ 15 ຂອງ​ໂລກ. 
  ນອກຈາກ​ນັ້ນ, ລັດຖະ ບານ​ສີ​ລັງກາ ກໍ​ໃຫ້​ຄວາມ​ສຳ ຄັນ​ກັບ​ນະໂຍບາຍ​ການ​ສຶກສາ​ຕໍ່​ເນື່ອງ ໂດຍ​ເລີ່ມ​ການ​ສຶກສາ​ພາກ​ບັງຄັບ ແຕ່​ຊັ້ນ​ປະຖົມ​ຈົນ​ເຖິງ​ມັດທະຍົມ​ຕົ້ນ ແລະ ໃຫ້​ຮຽນ​ໂດຍ​ບໍ່​ໄດ້​ເສຍ​ຄ່າ ຈົນ​ເຖິງ​ຂັ້ນ​ປະລິນຍາ​ຕີ ນັບ​ຕັ້ງແຕ່​ປີ 1978. ປັດຈຸບັນ, ສີ​ລັງກາ ຖື​ເປັນຕົ້ນ​ແບບ​ສຳລັບ​ປະເທດ​ກຳລັງ​ພັດທະນາ​ອື່ນໆ ໃນ​ການ​ພັດທະນາ​ລະບົບ​ການ​ສຶກສາ, ເຮັດ​ໃຫ້​ພົນລະເມືອງ​ມີ​ລະດັບ​ຄວາມ​ຮູ້​ຄວາມ​ສາມາດ ແລະ ມີ​ຄຸນ​ນະ​ພາບ, ອັດຕາ​ການ​ຮູ້​ໜັງສື​ຢູ່​ໃນ​ລະດັບ​ສູງ​ເຖິງ 92% ຊຶ່ງ​ສູງ​ທີ່​ສຸດ​ເມື່ອ​ທຽບ​ກັບ​ປະເທດ​ລາຍ​ໄດ້​ປານ​ກາງ - ຕໍ່າ​ດ້ວຍ​ກັນ ແລະ ໃກ້​ຄຽງ​ກັບ​ປະເທດ​ທີ່​ພັດທະນາ​ແລ້ວ.ສ່ວນ​ນະໂຍບາຍ​ເສດຖະກິດ ລັດຖະບານ ເນັ້ນ​ການ​ວາງ​ແຜນ​ຍຸດທະສາດ​ໄລຍະ​ຍາວ ໃນ​ການ​ພັດທະນາ​ປະເທດ ເພື່ອ​ຍົກ​ຖານະ​ຂຶ້ນເປັນ​ປະເທດໃນ​ ກຸ່ມ​ພົນລະເມືອງ​ມີ​ລະດັບ ຄວາມ​ຮູ້​ສູງ, ໃຊ້​ນະ​ວັດຕະ​ກຳ ແລະ ເຕັກ​ໂນ​ໂລ​ຊີ ຂັບ​ເຂື່ອນ​ເສດຖະກິດ​ໃຫ້​ມີ​ການ​ເຕີບໂຕ​ແບບ​ຍືນ​ຍົງ, ສົ່ງເສີມ​ການລົງ ທຶນ​ຈາກ​ຕ່າງປະເທດຕະຫຼອດ ​ຮອດ​ການ​ພັດທະນາ​ຊັບພະ ຍາກອນ​ມະ​ນຸດ. 
  ສປປ ລາວ ແລະ ສີ​ລັງກາ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 2 ກໍລະກົດ ປີ 1965.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110