ຫົວ​ຂໍ້ : ອັງກິດ ພົ້ນສະພາບການເປັນສະມາຊິກ EU

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 05/02/2020 09:47:06 ຈຳ​ນວນ​ຜູ້​ເຂົ້າ​ຢ້ຽມ​ຊົມ 275 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ວັນ​ທີ 1 ກຸມພາ​ທີ່ຜ່ານ​ ມາ, ທ່ານ ບໍ​ຣິສ ຈອນຊັນ ນາ ຍົກລັດຖະມົນຕີ​ອັງກິດ ໄດ້ຖະ ແຫຼງການ​ພາຍຫຼັງ​ກ້າວ​ເຂົ້າ​ສູ່​ວັນ​ໃໝ່​ທີ່ ອັງກິດ ພົ້ນ​ອອກ​ຈາກ​ການ​ເປັນ​ສະມາຊິກ​ຂອງ​ສະຫະພາບ​ເອີ​ຣົບ (EU) ເປັນ​ເວລາ 47 ປີ ໂດຍ​ກ່າວ​ວ່າ: ມື້ນີ້​ເປັນ​ມື້​ໃໝ່​ຂອງ​ອັງກິດ, ເປັນ​ການ​ເປີດ​ສາກ​ໃໝ່​ຂອງ​ປະເທດ, ເປັນ​ໄລຍະ​ເວລາ​ແຫ່ງ​ການ​ປ່ຽນແປງ ແລະ ການ​ເລີ່ມ​ຕົ້ນ​ໃໝ່ ທີ່ແທ້​ຈິງ​ຂອງ​ອັງກິດ ພ້ອມ​ທັງ​ຢືນຢັນ​ວ່າ: ສິ່ງ​ນີ້​ບໍ່​ແມ່ນ​ຈຸດ​ຈົບ ແຕ່​ເປັນ​ຈຸດ​ເລີ່ມ​ຕົ້ນ​ຂອງ​ອັງ​ກິດ.
  ນອກຈາກ​ນີ້, ທ່ານ ຈອນ​ຊັນ ຍັງ​ກ່າວ​ວ່າ: ລັດຖະບານ​ອັງກິດ ຈະ​ສ້າງ​ຄວາມ​ເປັນ​ປຶກ​ແຜ່ນ ແລະ ຍົກ​ລະດັບ​ປະເທດ​ໃຫ້​ດີ​ຂຶ້ນ​ໄປ​ອີກ ຫຼັງ​ຈາກ​ອັງກິດ ສ້າງ​ຄວາມ​ສຳພັນ​ຮູບ​ແບບ​ໃໝ່​ກັບ EU. ຂະ​ນະ​ດຽວກັນ​ນັ້ນ, ທ່ານ ໄນ​ເຈນ ຟາ​ຣາດ ຫົວໜ້າ​ພັກ​ວ່າ​ດ້ວຍ​ການ​ຖອນ​ຕົວ​ອອກ​ຈາກ​ເອີ​ຣົບ (Brexit) ກ່າວ​ວ່າ: ໃນ​ທີ່​ສຸດ​ວັນ​ທີ່​ອັງກິດ​ເປັນ​ອິດສະຫຼະພາບ​ກໍ​ມາ​ເຖິງ. ຫຼັງ​ຈາກ​ທີ່​ອັງກິດ​ຖອນ​ຕົວ​ອອກ​ຈາກ​ການ​ເປັນ​ສະມາຊິກ EU ຢ່າງ​ເປັນ​ທາງ​ການ. ໃນ​ມື້ນີ້ ກໍ​ຈະ​ເລີ່ມ​ຕົ້ນ​ໄລຍະ​ເວລາ​ແຫ່ງ​ການ​ປ່ຽນ​ຜ່ານ 11 ເດືອນ​ຈົນ​ເຖິງ​ທ້າຍ​ປີ​ນີ້, ເພື່ອ​ໃຫ້​ອັງກິດ ແລະ EU ເຮັດ​ການ​ເຈລະຈາ​ໃນ​ດ້ານ​ຕ່າງໆ ນັບ​ຕັ້ງແຕ່​ການ​ຄ້າ​ໄປ​ຈົນ​ເຖິງ​ຄວາມ​ໝັ້ນຄົງ.
  ອັງກິດ ໄດ້​ເລີ່ມ​ດຳເນີນ​ການ​ຕາມ​ຂະບວນ​ການ​ຖອນ ​ຕົວ​ອອກ​ຈາກ EU, ຕັ້ງແຕ່​ສະໄໝ​ຂອງ​ອະດີດນາຍົກລັດ ຖະມົນຕີ ທ່ານ ເດ​ວິດ ຄາ​ເມ​ຣອນ ໃນ​ປີ 2013, ເຖິງ​ແມ່ນ​ວ່າ​ປັດຈຸບັນ, ຍັງ​ບໍ່​ທັນ​ເຫັນ​ພາບ​ຢ່າງ​ຊັດ​ເຈນ​ຂອງ​ການ Brexit ຫຼັງ​ຜ່ານ​ພົ້ນ​ວັນ​ທີ 31 ມັງກອນ​ທີ່​ຜ່ານ​ມາ ເພາະ​ຍັງ​ຖື​ວ່າ: ເປັນ​ໄລຍະ​ເວລາ​ປ່ຽນ​ຜ່ານ, ແຕ່​ຈະ​ເລີ່ມ​ເຫັນ​ຄວາມ​ຊັດ​ເຈນ​ຫຼາຍ​ຂຶ້ນ ພາຍຫຼັງ​ວັນ​ທີ 31 ທັນວາ​ປີ​ນີ້, ທີ່​ຜູ້ນຳ​ອັງກິດ ຈະ​ບັນລຸ​ຂໍ້​ຕົກລົງ​ການ​ຄ້າ​ເສລີ​ສະບັບ​ຖາວອນ​ກັບ EU.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110