ຫົວ​ຂໍ້ : ພາກກະສິກຳ ເປັນຖານການຜະລິດຫຼັກຂອງປະເທດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 06/02/2020 09:42:31 ຈຳ​ນວນ​ຜູ້​ເຂົ້າ​ຢ້ຽມ​ຊົມ 232 ຄັ້ງ

(ເນື່ອງ​ໃນ​ໂອກາດ​ວັນຊາດ ນູ​ແວນ​ເຊ​ລັງ 6/2/1840-6/2/2020)
ຮຽບຮຽງໂດຍ: ​ລຸ້ງ​ດາວ ບຸນ​ມີ
  ນູ​ແວນ​ເຊ​ລັງ ຕັ້ງ​ຢູ່ເຂດ ​ມະຫາ​ສະ​ໝຸດ​ປາ​ຊີ​ຟິກ​ຕາເວັນ ຕົກ​ສ່ຽງ​ໃຕ້, ປະກອບ​ດ້ວຍ​ແຜ່ນດິນ​ໃຫຍ່ 2 ຕອນ ແລະ ບັນດາ​ເກາະ​ນ້ອຍ​ຫຼາຍ​ເກາະ. ນູ​ແວນ​ເຊ​ລັງ ໃນ​ພາສາ​ຂອງ​ເຜົ່າ​ພື້ນເມືອງ​ມາວ​ຣີ​ແມ່ນ Aotearoa ຊຶ່ງ​ແປ​ວ່າ: ດິນແດນ​ເຝື້ອ​ຂາວ​ທີ່​ຍາວ​ຢຽດ. ປະເທດ​ນີ້ ຖື​ວ່າ​ເປັນ​ດິນແດນ​ທີ່​ຕັ້ງ​ຢູ່​ໂດດດ່ຽວ​ທາງ​ດ້ານ​ພູມ​ສາດ, ຫ່າງ​ໄກ​ຈາກ ອົສ​ຕຣາ​ລີ ທາງ​ດ້ານ​ໃຕ້​ສຸດ​ຂອງ​ທະເລ ຕັສ​ມັນ, ສ່ວນ​ດ້ານ​ເໜືອ​ແມ່ນ​ຢູ່​ໃກ້​ກັບ ຄາ​ລິ​ໂດ​ເນຍ, ຟີ​ຈິ ແລະ ກົງ​ກາ. ນູ​ແວນ​ເຊ​ລັງ ຈະ​ແບ່ງ​ເປັນ​ເກາະ​ເໜືອ ແລະ ເກາະ​ໃຕ້. ສ່ວນ​ເກາະ​ນ້ອຍ​ທີ່ຢູ່​ທາງ​ໃຕ້​ຂອງ​ປະເທດ​ຈາກ​ເໜືອ​ສຸດ​ລົງ​ມາ​ໃຕ້​ສຸດ ຈະ​ມີ​ສະພາບ​ອາກາດ​ທີ່​ແຕກ​ຕ່າງ​ກັນ ເໝາະ​ສຳລັບ​ການ​ປູກຝັງ ຊຶ່ງ​ການ​ປູກຝັງ​ກໍ​ເປັນ​ລາຍ​ໄດ້​ຫຼັກ​ຂອງ​ປະ​ເທດ.  ມີ​ເນື້ອທີ່​ທັງ​ໝົດ 268.000 ກວ່າ​ກິໂລ​ຕາ​ແມັດ, ນະຄອນຫຼວງ​ແມ່ນ ເວ​ລິງ​ຕັນ.
  ນູ​ແວນ​ເຊ​ລັງ ຈັດ​ເປັນ​ປະເທດ​ທີ່​ນໍາ​ໜ້າ​ທາງ​ດ້ານ​ນະ​ວັດຕະ​ກຳ​ສິ່ງ​ປະດິດ​ທີ່​ສ້າງສັນ ແລະ ເຕັກ​ໂນ​ໂລ​ຊີ ທີ່​ກ້າວໜ້າ​ໃນ​ລະດັບ​ໂລກ. ເປັນ​ປະເທດ​ຂະໜາດ​ນ້ອຍ​ທີ່​ດໍາ​ເນີນ​ນະໂຍບາຍ​ການ​ເປີດ​ເສລີ​ທາງ​ການ​ຄ້າ, ເປັນ​ແຫຼ່ງ​ອຸດສາຫະກຳ ແລະ ທຸລະ​ກິດ​ພາກ​ບໍລິການ, ເນັ້ນ​ການ​ສົ່ງ​ອອກ​ສິນຄ້າ​ກະສິກຳ ແລະ ທຸລະ​ກິດ​ພາກ​ບໍລິການ ໂດຍ​ອາ​​ໄສ​ພາກ​ການ​ຜະລິດ​ຂັ້ນ​ຕົ້ນ​ເຊັ່ນ: ກະສິກຳ, ເໝືອງ​ແຮ່, ວັດຖຸ​ດິບ, ຊັບພະຍາກອນ​ທາງ​ທຳ​ມະ​ຊາດ​ທີ່​ມີ​ມູນ​ຄ່າ​ເຖິງ​ເຄິ່ງ​ໜຶ່ງ​ຂອງ​ມູນ​ຄ່າ​ສົ່ງ​ອອກ​ທັງ​ໝົດ. ການ​ສົ່ງ​ອອກ​ສິນຄ້າ ແລະ ບໍລິການ ມີ​ມູນ​ຄ່າ 1/3 ຂອງ​ມູນ​ຄ່າ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP). 
  ປັດໄຈ​ສຳຄັນ​ທີ່​ເຮັດ​ໃຫ້​ ເສດຖະກິດ​ຂອງ​ປະເທດ​ຂະ ຫຍາຍຕົວແມ່ນ​ອຸດສາຫະກຳ​ນົມ ຊຶ່ງ​ສ່ວນ​ໃຫຍ່​ແມ່ນ​ປ້ອນ​ຕະຫຼາດ​ອາຊີ ແລະ ທຸລະ​ກິດ​ການ​ກໍ່ສ້າງ ທີ່​ເຕີບ​ໂຕ​ຢ່າງ​ວ່ອງໄວ ທີ່​ໄດ້​ແຮງ​ໜູນ​ມາ​ຈາກ​ຄວາມ​ຈຳເປັນ​ໃນ​ການ​ຟື້ນ​ຟູ​ເນື້ອທີ່ ຫຼັງ​ເກີດ​ແຜ່ນດິນ​ໄຫວ​ຄັ້ງ​ໃຫຍ່​ຫຼາຍ​ຄັ້ງ​ໃນ​ຫຼາຍ​ປີ​ຜ່ານ​ມາ. 
  ນອກຈາກ​ນີ້, ນູ​ແວນ​ເຊ​ລັງ ຍັງ​ໄດ້ຜົນ​ປະໂຫຍດ​ຈາກ​ລາຄາ​ຜະລິດ​ຕະ​ພັນ​ນົມ​ທີ່​ສູງ​ຂຶ້ນ 48%. ສົ່ງ​ຜົນ​ໃຫ້​ອັດຕາ​ການ​ຄ້າ​ຂອງ​ປະເທດ​ສູງ​ທີ່​ສຸດ​ໃນ​ຮອບ 40 ປີ. ຂະນະ​ດຽວ​ກັນ, ການ​ຟຶ້ນ​ຟູ​ເມືອງ​ໃຫຍ່​ອັນ​ດັບ2 ຂອງ​ປະເທດ​ເຊັ່ນ: ເມືອງ​ໄຄ​ຣ​ເຊິນ ມູນ​ຄ່າ 30.000 ລ້ານ​ໂດ​ລາ. ຫຼັງ​ຈາກ​ເກີດ​ແຜ່ນດິນ​ໄຫວ​ເມື່ອ​ປີ 2011 ກໍ່ໃຫ້ເກີດ​ພາກ​ທຸລະ​ກິດ, ຄວາມ​ເຊື່ອ​ໝັ້ນ​ພາກ​ທຸລະ​ກິດ​ເພີ່ມ​ຂຶ້ນ​ສູ່​ລະດັບ​ສູງ​ສຸດ​ໃນ​ຮອບ 20 ປີ, ໃນ​ໄຕ​ມາດ​ສຸດ​ທ້າຍ​ຂອງ​ປີ 2013. ໃນ​ຂະນະ​ທີ່​ຈໍາ​ນວນ​ຜູ້​ອົບພະຍົບ​ເຂົ້າ​ເມືອງ ແລະ ການ​ຈ້າງ​ງານ​ກໍ່​ເພີ່ມ​ຂຶ້ນ. ຈາກ​ການ​ປະຕິ​ຮູບ​ລະບົບ​ເສດຖະກິດ​ແບບ​ຄວບ​ຄຸມ​ໃນ​ທ້າຍ​ປີ 1980 ແລະ ຕົ້ນ​ປີ 1990 ເຮັດ​ໃຫ້ປ​ະ​ເທດມີ​ລະບົບ​ເສດຖະກິດ​ແບບ​ເປີດ ແລະ ໄດ້​ພັດທະນາ​ເປັນ​ປະເທດ​ທີ່​ມີ​ຄວາມ​ສາມາດ​ໃນ​ການ​ແຂ່ງຂັນ​ໃນ​ລະດັບ​ໂລກ.
ນູ​ແວນ​ເຊ​ລັງ ມີ​ພາກ​ກະສິກຳ​ຂະໜາດ​ໃຫຍ່ ຊຶ່ງ​ເປັນ​ຖານ​ການ​ຜະລິດ​ຫຼັກ​ຂອງ​ປະເທດ, ສິນຄ້າ​ສົ່ງ​ອອກ​ສຳຄັນ​ຂອງ​ປະເທດ ແມ່ນ​ສິນຄ້າ​ທີ່​ໄດ້​ຈາກ​ກະສິກຳ, ການ​ປະມົງ ແລະ ປ່າໄມ້​ເຊັ່ນ: ນົມ ແລະ ຜະລິດ​ຕະ​ພັນ​ຜັກ, ໝາກ​ໄມ້, ປາ ແລະ ໄມ້. ນອກຈາກ​ນີ້, ພາກ​ບໍລິການ ໂດຍ​ສະເພາະ​ການທ່ອງທ່ຽວ ເປັນ​ອີກ​ແຫຼ່ງ​ລາຍ​ຮັບ​ທີ່​ສຳຄັນ​ຂອງ​ປະເທດ ຊຶ່ງ​ໃນ​ແຕ່​ລະ​ປີ​ຈະ​ມີ​ນັກ​ທ່ອງ​ທ່ຽວ​ຕ່າງ​ຊາດ​ເດີນທາງ​ເຂົ້າ​ມາ​ປະເທດ ປີ​ລະ​ປະມານ 2-3 ລ້ານ​ຄົນ, ຍ້ອນ​ວ່າ​ມີ​ລະບົບ​ການ​ຮັກສາ​ຄວາມ​ປອດ​ໄພ ແລະ ຮັກສາ​ສິ່ງແວດລ້ອມ​ໄດ້​ດີ, ປະກອບ​ກັບ​ທິວ​ທັດ​ປະເທດ​ທີ່​ສວຍ​ງາມ​ຕາມ​ແບບ​ທໍາ​ມະ​ຊາດ ແລະ ຖື​ວ່າ​ເປັນ​ສະຖານທີ່​ທ່ອງ​ທ່ຽວ​ທີ່​ມີ​ຄຸນ​ນະ​ພາບ. ໃນ​ຂະນະ​ທີ່​ພາກ​ອຸດສາຫະກຳ​ເລີ່ມ​ມີ​ບົດບາດ​ເພີ່ມ​ຂຶ້ນ​ເລື້ອຍໆ. 
  ພົນລະເມືອງ​ຂອງ​ນູ​ແວນ​ເຊ​ລັງ ມີ​ທັງ​ໝົດ 4.794 ລ້ານ​ຄົນ (ຂໍ້​ມູນ​ປີ 2017), ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP ບັນລຸ 205,9 ຕື້​ໂດ​ລາ (ທະນາຄານ​ໂລກ 2017), ອັດຕາ​ການ​ເຕີບ​ໂຕ​ຂອງ GDP ກວມ 3%, ລາຍ​ໄດ້​ສະເລ່ຍ​ໃສ່​ຫົວ​ຄົນ​ບັນລຸ 42.940 ກວ່າ​ໂດ​ລາ​ຕໍ່​ຄົນ​ຕໍ່​ປີ. ສິນຄ້າ​ກະສິກຳ​ທີ່​ສຳຄັນ​ແມ່ນ ນົມ ແລະ ຜະລິດ​ຕະ​ພັນ​ນົມ, ຊີ້ນ​ສັດ (ງົວ, ແກະ ແລະ ປາ), ເຂົ້າສາລີ, ເຂົ້າ​ບະ​ເລ, ມັນ​ຝຣັ່ງ, ຂົນ​ແກະ, ແກ່ນ​ພືດ, ຜັກ ແລະ ໝາກ​ໄມ້. ສິນຄ້າ​ອຸດສາຫະກຳ ແມ່ນ​ອາຫານ​ແປ​ຮູບ, ໄມ້ ແລະ ຜະລິດ​ຕະ​ພັນ​ເຈ້ຍ, ແຜ່ນແພ, ເຄື່ອງ​ຈັກ, ອຸປະກອນ​ຂົນສົ່ງ, ເໝືອງ​ແຮ່ ແລະ ການ​ທ່ອງ​ທ່ຽວ. ສິນຄ້າ​ສົ່ງ​ອອກ​ທີ່​ສຳຄັນ​ແມ່ນ ນົມ ແລະ ຜະລິດ​ຕະ​ພັນ​ນົມ, ຊີ້ນ​ສັດ, ໄມ້, ເຊື້ອ​ໄຟ, ເຄື່ອງ​ຈັກ. ຕະຫຼາດ​ສົ່ງ​ອອກ​ທີ່​ສຳຄັນ ແມ່ນ​ອົສ​ຕຣາ​ລີ, ຈີນ, ອາ​ເມ​ຣິ​ກາ, ຍີ່ປຸ່ນ ແລະ ສ.ເກົາ​ຫຼີ. ໃນ​ດ້ານ​ການ​ນຳ​ເຂົ້າ, ສິນຄ້າ​ນຳ​ເຂົ້າ​ຕົ້ນຕໍ ແມ່ນ​ເຊື້ອ​ໄຟ, ເຄື່ອງ​ຈັກ, ເຄື່ອງ​ຈັກ​ໄຟຟ້າ, ພາຫະນະ, ພ​ລາ​ສ​ຕິກ ໂດຍ​ນຳ​ເຂົ້າ​ຈາກ ຈີນ, ອົສ​ຕຣາ​ລີ, ອາ​ເມ​ຣິ​ກາ, ຍີ່ປຸ່ນ ແລະ ສິງ​ກະ​ໂປ. 
  ນູ​ແວນ​ເຊ​ລັງ ເປັນ​ປະເທດ​ທີ່​ມີ​ເສດຖະກິດ ແລະ ລະບອບ​ການເມືອງ​ທີ່​ມີ​ສະຖຽນ​ລະ​ພາບ, ມີ​ລະບົບ​ການເມືອງ​ທີ່​ໝັ້ນຄົງ, ມີ​ລະບົບ​ກົດໝາຍ​ທີ່​ໂປ່​ງ​ໃສ ແລະ ມີ​ຊື່​ສຽງ​ດ້ານ​ຊັບພະຍາກອນ​ທຳ​ມະ​ຊາດ​ທີ່​ອຸດົມສົມບູນ, ການ​ຄົມມະນາຄົມ​ຂົນສົ່ງ ແລະ ລະບົບ​ສາ​ທາ​ລະ​ນຸ​ປະ​ໂພ​ກ​ທີ່​ຄົບ​ຖ້ວນ ລວມ​ທັງ​ມີ​ນະໂຍບາຍ​ການ​ທະນາຄານ ແລະ ການ​ເງິນ​ທີ່​ດີ ຕະຫຼອດ​ຮອດ​ມີ​ການ​ອຳນວຍ​ຄວາມ​ສະດວກ​ດ້ານ​ການ​ເຮັດ​ທຸລະ​ກິດ ທີ່​ສ້າງ​ຄວາມ​ເຊື່ອ​ໝັ້ນ​ໃນ​ການ​ປະກອບ​ທຸ​ລະກິດ. ສົ່ງ​ຜົນ​ໃຫ້ເປັນ​ໜຶ່ງ​ໃນ​ສະຖານທີ່​ ທີ່​ດຶງ​ດູດ​ການ​ລົງທຶນ​ຈາກ​ຕ່າງປະເທດ​ຫຼາຍ​ທີ່​ສຸດ.
  ສປປ ລາວ ແລະ ນູ​ແວນ​ເຊ​ລັງ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 15 ກໍລະກົດ ປີ 1966.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110