ໜັງສືພິມ ປະຊາຊົນ

ກອງປະຊຸມໃຫຍ່ຜູ້ແທນອົງຄະນະພັກເມືອງຄຳເກີດ ຄັ້ງທີ IX

ເຜີຍແຜ່ໂດຍ: siththiphone rasphone ເວລາ: 06/02/2020 10:07:14 ຈຳນວນຢ້ຽມຊົມ 1179 ຄັ້ງ

ກອງປະຊຸມໃຫຍ່ອົງຄະນະພັກເມືອງຄຳເກີດຄັ້ງທີ IX ໄດ້ເປີດຂຶ້ນຢ່າງເປັນທາງການ ໃນວັນທີ 4 ກຸມພາ ຜ່ານມາ ທີ່ຫ້ອງປະຊຸມອາຄານແກ້ວໄມ ມະນີໂຊກໄຊ ຊຶ່ງເປັນເມືອງທີສອງຂອງແຂວງບໍລິຄຳໄຊ ຖັດຈາກເມືອງປາກຊັນ ພາຍໃຕ້ການເປັນປະທານ ແລະ ກ່າວເປີດຂອງ ສະຫາຍ ເພັດສະໄໝ ໄຊຍະທິຈັກ ວ່າການເລຂາພັກເມືອງຄຳເກີດ ເປັນກຽດເຂົ້າຮ່ວມໂດຍສະຫາຍ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງ ບໍລິຄໍາໄຊ, ກອງປະຊຸມຄັ້ງນີ້ມີຜູ້ແທນເຂົ້າຮ່ວມທັງໝົດເກືອບ 200 ກວ່າສະຫາຍ ໃນນັ້ນມີຜູ້ແທນສົມບູນ 131 ສະຫາຍ,ຍິງ 15 ສະຫາຍ ຊິຶ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງເກືອບ 2.000 ສະຫາຍ ທີ່ມາຈາກແຕ່ລະຂົງເຂດວຽກງານ ແລະ ຮາກຖານທົ່ວເມືອງ.
ໃນພິທີໄດ້ຮັບຟັງການຜ່ານບົດລາຍງານການເມືອງທັງ 2 ພາກ ແລະ ແຜນພັດທະນາເສດຖະກິດ-ສັງຄົມ ຊຶ່ງສະເໜີໂດຍ ສະຫາຍວ່າການເລຂາພັກເມືອງຄຳເກີດ ທັງນີ້ ເພື່ອເປັນການຕີລາຄາຄືນ ຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງ 5 ປີຜ່ານມາ ແລະ ພ້ອມກັນພິຈາລະນາກຳນົດທິດທາງແຜນການ 5 ປີຕໍ່ໜ້າ, ຕະຫຼອດໄລຍະ 5 ປີຜ່ານມາ ຄະນະບໍລິຫານງານພັກເມືອງໄດ້ພ້ອມກັບປະຊາຊົນບັນດາເຜົ່າໃນທົ່ວເມືອງ ຕັ້ງໜ້າເສີມຂະຫຍາຍມູນເຊື້ອ ແຫ່ງຄວາມສາມັກຄີອັນເປັນປຶກແຜ່ນ ບຸກໜ້າບືນຕົວກ້າວຂຶ້ນເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນ ເອງ ປະຕິບັດແນວທາງປ່ຽນ ແປງໃໝ່ຮອບດ້ານ ທີ່ມີຫຼັກການຂອງພັກ ອັນພົ້ນເດັ່ນ ແມ່ນໄດ້ສືບຕໍ່ຫັນລົງກໍ່ສ້າງຮາກຖານ ພັດທະນາຊົນນະບົດຮອບດ້ານ ຢ່າງເປັນຂະບວນການຕໍ່ເນື່ອງ, ກອງປະຊຸມຄັ້ງນີ້ຈະໄດ້ສັງເກດຕີລາຄາຄືນ ຜົນສຳເລັດແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 8 ຂອງອົງຄະນະພັກເມືອງໃນໄລຍະ 5 ປີຜ່ານມາ ແລະ ຮັບຮອງເອົາມະຕິກອງປະ ຊຸມ, ແຜນພັດທະນາເສດຖະກິດ-ສັງຄົມ 5 ປີຕໍ່ໜ້າ ພ້ອມກັນນັ້ນຈະໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໜ່ ຊຶ່ງມີຜູ້ສະໝັກທັງໝົດ 29 ສະຫາຍ ເລືອກເອົາ 25 ສະຫາຍ, ກອງປະຊຸມຄັ້ງນີ້ ແມ່ນດໍາເນີນໄປເປັນເວລາ 2 ວັນ ຈຶ່ງສໍາເລັດ.
(ຂ່າວ-ພາບ: ຫົງທອງ)