ຫົວ​ຂໍ້ : ນວ ປຸກລະດົມ ເຝົ້າລະວັງ ປ້ອງກັນ ໄວຣັສໂຄໂຣນາ

ເຜີຍ​ແຜ່​ໂດຍ​: siththiphone rasphone ເວ​ລາ: 06/02/2020 10:33:55 ຈຳ​ນວນ​ຜູ້​ເຂົ້າ​ຢ້ຽມ​ຊົມ 556 ຄັ້ງ

   ນະຄອນຫຼວງ​ວຽງ​ຈັນ (ນວ) ໄດ້​ຈັດ​ກອງ​ປະຊຸມ ເຜີຍແຜ່​ຂໍ້​ມູນ​ຂ່າວສານ ແລະ ປຸກລະດົມ ເພື່ອ​ເຝົ້າ​ລະວັງ​ປ້ອງ​ກັນ​ພະຍາດ​ອັກເສບ​ປອດ​ຍ້ອນ​ເຊື້ອ​ຈຸ​ລະ​ໂຣກ ໂຄ​ໂຣ​ນາ (NCoV) ຂຶ້ນ​ໃນ​ວັນ​ທີ 5 ກຸມພາ​ນີ້ ທີ່ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ໂດຍ​ມີ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ, ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ ພ້ອມ​ດ້ວຍ ຜູ້ຕາງໜ້າ​ຈາກ​ໂຮງໝໍ ໃນ 9 ຕົວ​ເມືອງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
   ກອງ​ປະຊຸມ​ຄັ້ງ​ນີ້ ໄດ້​ຮັບ​ຟັງ​ການ​ລາຍ​ງານ​ສະພາບ​ການ​ລະບາດ, ມາດ​ຕະການ​ເຝົ້າ​ລະ ວັງ ແລະ ການ​ປ້ອງ​ກັນ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກໂຄ​ໂ​ຣ​ນາ ສາຍ​ພັນ​ໃໝ່ (NCoV) ຊຶ່ງ​ໄດ້​ມີ​ການ​ເຝົ້າ​ລະວັງ​ຢູ່​ສະໜາມ​ບິນ​ສາກົນ​ວັດ​ໄຕ, ດ່ານ​ຂົວ​ມິດຕະພາບ ລາວ - ໄທ 1 ແລະ ດ່ານ​ປະເພນີ; ມີ​ການ​ເຝົ້າ​ລະວັງ​ຢູ່​ສະຖານທີ່​ບໍລິການ​ສາທາລະນະ​ສຸກ​ເມືອງ ທັງ 9 ຕົວ​ເມືອງ ແລະ ຈັດ​ຝຶກ​ອົບຮົມ​ຄວາມ​ຮູ້​ພື້ນຖານ​ດ້ານ​ລະບາດ​ວິທະຍາ ແລະ ພະ ຍາດໂຄ​ໂຣ​ນາ ໃຫ້​ພະນັກງານ​ສາທາລະນະ​ສຸກ ຂັ້ນ​ເມືອງ; ກະກຽມ​ອຸປະກອນ​ການ​ປ້ອງ​ກັນ​ເຊັ່ນ: ຜ້າ​ອັດ​ປາກ, ເຄື່ອງ​ແທກ​ອຸນຫະພູມ, ຊຸດ​ປ້ອງ​ກັນ, ນຳ້​ຢາລ້າງ​ມື ແລະ ອື່ນໆ.
   ໃນ​ທີ່​ປະຊຸມ, ທ່ານ ດຣ. ຈັນທະ​ໄລ ໄຊ​ຍະ​ວົງ ຫົວໜ້າ​ຫ້ອງການພະ​ແນ​ກ​ສາທາລະ ນະ​ສຸກ ນວ ທັງ​ເປັນ​ຫົວໜ້າ​ຫ້ອງ​ປະຕິບັດ​ການ​ສຸກ​ເສີນ​ດ້ານ​ສາທາລະນະ​ສຸກ ໄດ້​ເຜີຍແຜ່​ຄວາມ​ຮູ້​ດ້ານ​ການ​ປ້ອງ​ກັນ​ຕົວ​ເອງ​ຈາກ​ພະຍາດ​ດັ່ງກ່າວ​ໃຫ້​ຜູ້​ເຂົ້າ​ຮ່ວມ​ໄດ້​ຮັບ​ຊາບ.
 (ຂ່າວ+ ພາບ: ສຸກ​ສະຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110