ຫົວ​ຂໍ້ : ການຮ່ວມມືດ້ານເສດຖະກິດເປັນເສົາຄ້ຳຕົ້ນຕໍ ຫວຽດນາມ-ອາຊຽນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 07/02/2020 09:11:17 ຈຳ​ນວນ​ຜູ້​ເຂົ້າ​ຢ້ຽມ​ຊົມ 401 ຄັ້ງ

ຮຽບຮຽງ​ໂດຍ: ສີ​ວັນ

  ປີ 2020, ຫວຽດນາມ ດຳລົງ​ຕຳແໜ່ງ​ເປັນ​ປະທານ ອາ​ຊຽນ. ນອກຈາກ​ບັນດາ​ເປົ້າ​ໝາຍ​ຍູ້​ແຮງ​ການ​ພົວພັນ​ຄູ່​ຮ່ວມ​ມື ຂອງ ອາ​ຊຽນ, ເສີມ​ຂະຫຍາຍ​ບົດບາດ​ເປັນໃຈ​ກາງຂອງ​ອາ​ຊຽນ, ຊຸກຍູ້​ການ​ຮ່ວມ​ສຳພັນ ແລະ ການ​ເຊື່ອມ​ຕໍ່​ດ້ານ​ເສດຖະກິດ​ພາຍ​ໃນ​ພາກ​ພື້ນ ອາ​ຊຽນ​ແລ້ວ, ຫວຽດນາມ ຍັງ​ວາງ​ອອກ​ບັນດາ​ບຸລິມະສິດ ເພື່ອ​ຊຸກຍູ້​ໃນ​ເສົາຄ້ຳ​ເສດຖະກິດ ອາ​ຊຽນ ອີກ​ດ້ວຍ.
ໃນ​ຂະບວນ​ວິວັດ​ການ​ເຊື່ອມ​ໂຍງ​ເສດຖະກິດ​ສາກົນ​ຂອງ​ຫວຽດນາມ, ອາ​ຊຽນ ສວມ​ບົດບາດ​ເປັນ​ຄູ່​ຮ່ວມ​ມື​ດ້ານ​ການ​ຄ້າ​ສຳຄັນ​ແຖວ​ໜ້າ. ປີ 1996, ເມື່ອ​ຫວຽດນາມ ເຂົ້າ​ຮ່ວມ​ກຸ່ມ​ການ​ຄ້າ​ເສລີ​ອາ​ຊຽນ (AFTA), ວົງ​ເງິນ​ການ​ຄ້າ​ສອງ​ສົ້ນ​ຂອງ​ຫວຽດນາມ ກັບ​ບັນດາ​ປະເທດ​ພາຍ​ໃນ​ກຸ່ມ​ອາ​ຊຽນ ບັນລຸ​ປະມານ  6 ຕື້​ໂດ​ລາ, ແຕ່​ມາ​ຮອດ​ປັດຈຸບັນ, ໂຕ​ເລກ​ດັ່ງກ່າວ ໄດ້​ເພີ່ມ​ຂຶ້ນ​ຫຼາຍ​ກວ່າ 10 ເທົ່າ, ຫຼາຍ​ກວ່າ 60 ຕື້​ໂດ​ລາ.
  ຕາມ​ແຫຼ່ງ​ຂ່າວ​ຈາກ​ວິທະ ຍຸ​ກະຈາຍສຽງ​ຫວຽດນາມ ລາຍ​ງານ​ວ່າ: ມາ​ຮອດ​ປັດຈຸບັນ, ຫວຽດນາມ ໄດ້​ເຊັນ​ສັນຍາ FTA ຈໍາ​ນວນ 16 ສະ​ບັບ. ໃນ​ນັ້ນ, ມີ​ສັນຍາ​ການ​ຄ້າ​ເສລີ​ໃໝ່​ຫຼາຍ​ສະບັບ ຊຶ່ງ​ລວມ​ມີ​ບັນດາ​ພື້ນຖານ​ເສດຖະກິດ​ໃຫຍ່​ທີ່​ສຸດ​ໃນ​ໂລກ. ຫວຽດນາມ ໄດ້​ລົງ​ນາມ​ສັນຍາ FTA ກັບ 15 ປະເທດ​ໃນ​ຈຳນວນ 20 ປະເທດ​ຂອງ​ກຸ່ມ G20. ສິ່ງ​ດັ່ງກ່າວ, ໄດ້​ສະແດງ​ໃຫ້​ເຫັນ​ກຳລັງ​ຄວາມ​ສາມາດ ແລະ ທີ່​ຕັ້ງ​ບົດບາດ, ພາບ​ພົດ​ຂອງ​ຫວຽດນາມ ໄດ້​ເພີ່ມ​ຂຶ້ນ​ຢ່າງ​ແຮງ. ເມື່ອ​ຕີ​ລາຄາ​ຄວາມ​ສຳຄັນ​ຂອງ​ການ​ເຊື່ອມ​ໂຍງ​ເສດຖະກິດ ອາ​ຊຽນ ໃນ​ຂະບວນ​ວິວັດ​ການ​ເຊື່ອມ​ໂຍງ​ເຂົ້າ​ກັບ​ສາກົນ​ຂອງ​ຫວຽດນາມ.
  ທ່ານ ເຈິ່ນ​ຕ໊ວນ​ແອັງ ລັດຖະມົນຕີ​ກະຊວງ​ອຸດສາ ຫະກຳ​ການ​ຄ້າ ຫວຽດນາມ ຢັ້ງຢືນ​ວ່າ: ອາດ​ເວົ້າ​ໄດ້​ວ່າ, ການ​ຮ່ວມ​ມື​ຂອງ​ພວກ​ເຮົາ​ກັບ​ອາ​ຊຽນ ແມ່ນ​ບັນດາ​ບາດກ້າວ​ເດີນ​ທຳ​ອິດ. ຄວາມ​ສາມາດ​ຂອງ​ຫວຽດນາມ ໃນ​ການ​ສຳຜັດ​ກັບ​ເສດຖະກິດ​ຂອງ​ພາກ​ພື້ນ​ອາ​ຊຽນ ແລະ ບັນດາ​ພາກ​ພື້ນ​ອື່ນໆ ໃນ​ໂລກ ໂດຍ​ຜ່ານ​ບົດບາດ​ຂອງ​ອາ​ຊຽນ ໄດ້​ຮັບ​ການ​ຢັ້ງຢືນ​ຢ່າງ​ຈະ​ແຈ້ງ.  ການ​ຮ່ວມ​ມື​ຂອງ​ຫວຽດນາມ ກັບ ອາ​ຊຽນ ໃນ​ທຸກ​ຂົງເຂດ. ໃນ​ນັ້ນ ຖື​ເສດຖະກິດ​ເປັນ​ເສົາຄ້ຳ​ສຳຄັນ ໄດ້​ນຳ​ມາ​ຊຶ່ງ​ທີ່​ຕັ້ງ​ບົດບາດ​ສຳຄັນ​ທີ່​ສຸດ​ໃຫ້​ແກ່​ຫວຽດນາມ ຄື​ໃນ​ປັດຈຸບັນ, ນັບ​ທັງ​ດ້ານ​ການເມືອງ, ການ​ພົວພັນ​ຕ່າງປະເທດ ກໍ​ຄື​ເສດ​ຖະ​ກິດ.
  ການ​ເຊື່ອມ​ໂຍງ​ເສດຖະ ກິດ ອາ​ຊຽນ ບໍ່​ພຽງ​ແຕ່​ນຳ​ມາ​ຊຶ່ງ​ກາລະ​ໂອກາດ​ເພີ່ມ​ທະວີ​ຊຸກຍູ້​ການ​ຮ່ວມ​ມື​ດ້ານ​ການ​ຄ້າ​ກັບ​ໂລກ​ເທົ່າ​ນັ້ນ, ແຕ່​ຫາກ​ຍັງ​ປະກອບສ່ວນ​ຢ່າງ​ຕັ້ງໜ້າ ແລະ ມີ​ຄວາມ​ໝາຍ​ແກ່​ການ​ສ້າງ​ໂຄງ​ປະກອບ​ພື້ນຖານ​ເສດຖະກິດ​ຄືນໃໝ່, ສືບຕໍ່​ປ່ຽນແປງ​ໃໝ່​ຮູບ​ແບບ​ການ​ເຕີບ​ໂຕ ກໍ່​ຄື​ຕິດ​ພັນ​ກັບ​ການ​ສ້າງ​ລັດ​ແຫ່ງ​ກົດໝາຍ, ບົນ​ພື້ນຖານ​ເສດຖະກິດ​ການ​ຕະຫຼາດ ຕາມ​ກໍາ​ນົດ​ທິດ​ສັງຄົມ​ນິຍົມ.
ທ່ານ ເຈິ່ນ​ຕວ໊ນ​ແອັງ ໃຫ້​ຮູ້​ຕື່ມ​ວ່າ: ປະຊາ​ຄົມ​ເສດຖະກິດ​ອາ​ຊຽນ ໄດ້​ສ້າງຕັ້ງ​ຂຶ້ນ​ເມື່ອ​ເດືອນ​ທັນວາ ປີ 2015 ອີກ​ຄັ້ງ​ໜຶ່ງ ໄດ້​ພິສູດ​ໃຫ້​ເຫັນ​ວິໄສ​ທັດ​ລວມ​ຂອງ​ການ​ນຳ​ບັນດາ​ປະເທດ​ອາ​ຊຽນ ກໍ​ຄື​ຂອງ​ຫວຽດນາມ, ໃນ​ນັ້ນ ໄດ້​ຢັ້ງຢືນ​ການ​ປະກອບສ່ວນ​ຢ່າງ​ຕັ້ງໜ້າ​ຂອງ​ຫວຽດນາມ​ໃນ​ພື້ນຖານ​ລວມ​ດັ່ງ​ກ່າວ. ປະຊາ​ຄົມ​ເສດຖະກິດ​ອາ​ຊຽນ ແລະ ວິໄສ​ທັດ​ຂອງ ອາ​ຊຽນ ຮອດ​ປີ 2025, ແມ່ນ​ບັນດາ​ການ​ກຳນົດ​ທິດ​ພື້ນຖານ ກໍ​ຄື​ຫຼັກການ ເພື່ອ​ຮັບປະກັນ​ທີ່​ຕັ້ງ​ບົດບາດ​ອາ​ຊຽນ ເໝືອນ​ດັ່ງ​ສູນ​ກາງຂອງ ອາຊີ​ຕາເວັນ​ອອກ​ສ່ຽງ​ໃຕ້, ຂອງ​ອາຊີ​ຕາເວັນ​ອອກ, ຂອງ​ອາຊີ - ປາ​ຊີ​ຟິກ, ຊ່ວຍ​ໃຫ້​ທັງ​ຫວຽດນາມ ກໍ​ຄື ບັນດາ​ປະເທດ​ສະມາຊິກ​ຂອງ ອາ​ຊຽນ ມີ​ຄວາມ​ວັດທະນາ​ຖາວອນ ແລະ ພັດ​ທະ​ນາ.
  ປີ 2020 ກໍແມ່ນ​ປີ​ທີ່​ຫວຽດນາມ​ສິ້ນ​ສຸດ​ອາຍຸ​ການ 5 ປີ​ຂອງ​ກອງ​ປະຊຸມ​ໃຫຍ່​ທົ່ວ​ປະເທດ ຂອງ​ພັກ ແລະ ເລີ່ມ​ຕົ້ນ​ການ​ສ້າງ​ຍຸດທະສາດ 10 ປີ ແຫ່ງ​ການ​ພັດທະນາ​ເສດຖະກິດ​ສັງ​ຄົມ. ໃນ​ສະພາບ​ການ​ນັ້ນ, ການ​ປະຕິບັດ​ບັນດາ​ຄວາມ​ຮັບຜິດຊອບ​ສຳຄັນ​ຂອງ​ປະທານ​ອາ​ຊຽນ​ກໍຮຽກຮ້ອງ​ໃຫ້ ຫວຽດນາມ ຕ້ອງ​ມີ​ບັນດາ​ທັດສະນະ​ທີ່​ສະເໝີ​ຕົ້ນ​ສະເໝີ​ປາຍ ແລະ ຈະແຈ້ງ​ນັບ​ທັງທາງ​ ດ້ານ​ການ​ຕ່າງປະເທດ ກໍຄື​ບັນ ດາ​ປັດ​ໄຈ​ທີ່​ກ່ຽວຂ້ອງ​ເຖິງ​ເປົ້າ​ໝາຍ​ຍຸດທະສາດ​ພັດທະນາ 5 ປີ ກໍຄື​ຍຸດທະສາດ 10 ປີ ແລະ ໄລ​ຍະຍາວ​ອີກ​ດ້ວຍ.
  ດ້ວຍ 2 ເນື້ອ​ໃນ​ຈິດໃຈ​ໃນ​ຫົວຂໍ້​ຂອງ​ປີ 2020, ຫວຽດນາມ ກໍ່​ໄດ້​ກຳນົດ​ທິດ​ບັນດາ​ເປົ້າ​ໝາຍ​ບຸລິມະສິດ​ຢ່າງ​ລະ​ອຽດ. ໃນ​ສະພາບ​ການ​ປະຕິວັດ​ອຸດສາຫະກຳ 4.0, ເສດຖະກິດ​ດີ​ຈີ​ຕອນ, ລັດທິ​ອາລັກຂາ​ການ​ຄ້າ, ການ​ຄ້າ​ຝ່າຍ​ດຽວ ພວມ​ສ້າງ​ບັນດາ​ສິ່ງ​ທ້າ​ທາຍ​ອັນ​ໃຫຍ່​ຫຼວງ​ໃຫ້​ແກ່​ລະບົບ​ການ​ຄ້າ​ຫຼາຍ​ຝ່າຍ ໂດຍ​ອີງໃສ່​ກົດ​ໝາຍ. ໃນ​ນັ້ນ, ມີ​ບັນດາ​ຂອບ​ເຂດ​ຂອງ​ກຸ່ມ AFTA, ເຮັດ​ແນວໃດ ເພື່ອ​ເພີ່ມ​ທະວີ​ຄວາມ​ສາມາດ​ໃນ​ການ​ຮັບ​ມື​ຂອງ​ອາ​ຊຽນ, ເພີ່ມ​ທະວີ​ການ​ເຊື່ອມ​ຕໍ່​ໃນ​ການ​ເລີ່ມ​ຕົ້ນ​ທຸລະ​ກິດ​ປະດິດ​ຄິດ​ສ້າງ, ໃນ​ການ​ຄ້າ​ເອ​ເລັກ​ໂຕ​ຣ​ນິກ, ລຶບ​ລ້າງ​ບັນດາ​ຮົ້ວ​ກີດຂວາງ​ໃນ​ການ​ຫັນ​ການ​ຄ້າ​ເປັນ​ເສລີ ແມ່ນ​ບັນດາ​ຈຸດ​ສຸມ​ບຸລິມະສິດ​ໃນ​ປີ​ເປັນ​ປະທານ​ອາ​ຊຽນ 2020. 
  ທ່ານ ເຈິ່ນ​ຕວນ​ແອັງ ລັດ ຖະມົນຕີ​ກະຊວງ​ອຸດ​ສາ​ຫະ​ກຳ ແລະ ການ​ຄ້າ ຫວຽດນາມ​ເນັ້ນ​ໜັກ​ວ່າ: ທຸກໆ​ສິ່ງ​ນັ້ນ​ຮຽກຮ້ອງ​ໃຫ້​ພວກ​ເຮົາ​ຕ້ອງ​ມີ​ບົດບາດ​ຂອງ​ຜູ້​ເປັນ​ປະທານ​ອາ​ຊຽນ ຊຶ່ງ​ເປັນ​ຜູ້​ທີ່​ສາມາດ​ແກ້​ໄຂ​ບັນຫາ, ບໍລິຫານ​ໄດ້​ເປັນ​ຢ່າງ​ດີ ດ້ວຍ​ບົດບາດ​ປະຈັນບານ​ຂອງ​ຕົນ ເພື່ອ​ພ້ອມ​ກັບ​ບັນດາ​ປະເທດ​ອາ​ຊຽນ​ຢັ້ງຢືນ​ອີກ​ຄັ້ງ​ໜຶ່ງ​ຢູ່​ໃນ​ລະດັບ​ສູງ​ກວ່າ, ສະພາບ​ການ​ໃໝ່, ດ້ວຍ​ການ​ເຊື່ອມ​ໂຍງ, ຮ່ວມ​ສຳ​ພັນ. ຕ້ອງ​ເຮັດ​ແນວໃດ​ເພື່ອ​ຮັບປະກັນ​ໄດ້​ຄວາມ​ສາມາດ​ໃນ​ການ​ຮັບ​ມື​ກັບ​ບັນດາ​ການ​ຜັນ​ແປ​ໃໝ່ ແລະ ​ສືບຕໍ່​ສ້າງ​ບັນດາ​ພະລັງ​ຊີວິດ​ໃໝ່​ໃຫ້​ແກ່​ອາ​ຊຽນ ກໍຄື​ໃຫ້​ແກ່​ບັນດາ​ຂອບ​ເຂດ​ການ​ຮ່ວມ​ມື​ຂອງ​ອາ​ຊຽນ ແລະ​ບັນດາ​ຄູ່​ຮ່ວມ​ມື.
  ໃນ​ຖານະ​ເປັນ​ປະທານ​ອາ​ຊຽນ 2020, ປີ​ນີ້ ຫວຽດນາມ ມີ​ຂໍ້​ລິ​ເລີ່ມ​ປະມານ 16 - 17 ຂໍ້ ໂດຍ​ຜັນ​ຂະຫຍາຍ​ໃນ​ບັນດາ​ຂົງເຂດ​ຄື: ເສດຖະກິດ, ການ​ຄ້າ, ການ​ລົງທຶນ, ອຸດ​ສາ​ຫະ​ກຳ. ພ້ອມ​ກັບ​ບັນດາ FTA ລະຫວ່າງ ອາ​ຊຽນ ກັບ​ບັນດາ​ຄູ່​ຮ່ວມ​ມື​ໃນ​ໂລກ​ທີ່​ມີ​ຢູ່​ແລ້ວ, ສັນຍາ RCEP ຊຶ່ງ​ອາ​ຊຽນ​ຄາດ​ວ່າ: ຈະ​ໄດ້​ຮັບ​ການ​ລົງ​ນາມ​ໃນ​ປີ​ນີ້, ການ​ຮ່ວມ​ມື​ເສດຖະກິດ​ອາ​ຊຽນ​ປີ 2020. ແນ່ນອນ​ວ່າ ຈະ​ນຳ​ມາ​ຊຶ່ງ​ບັນດາ​ສະພາບ​ການ​ໃໝ່.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110