ຫົວ​ຂໍ້ : ປາກິສຖານ ເພີ່ມການນຳເຂົ້ານ້ຳມັນປາມຈາກ ມາເລເຊຍ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 07/02/2020 09:12:44 ຈຳ​ນວນ​ຜູ້​ເຂົ້າ​ຢ້ຽມ​ຊົມ 452 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ວັນ​ທີ 5 ກຸມພາ​ຜ່ານ​ມາ, ທ່ານ ອິມ​ຣານ ຂານ ນາຍົກ​ລັດ​ຖະມົນຕີ​ປາ​ກິ​ສຖານ ກ່າວ​ພາຍຫຼັງ​ພົບ​ປະ​ປຶກສາ​ຫາລື​ກັບ​ທ່ານ ມາ​ຫາ​ເທຍ ໂມ​ຮາ​ໝັດ ນາຍົກລັດຖະມົນຕີ ມາ​ເລ​ເຊຍ ຢູ່​ເມືອງ​ປຸດ​ຕຣາ​ຈາ​ຍາ ຂອງ​ມາ​ເລ​ເຊຍ ວ່າ: ໜຶ່ງ​ໃນ​ບັນຫາ​ສຳຄັນ​ທີ່​ມີ​ການ​ປຶກສາ​ຫາລື​ກັນ​ໃນ​ຄັ້ງ​ນີ້​ຄື: ສະຖານະ​ການ​ໂລກ​ໃນ​ຕະຫຼາດ​ນ້ຳມັນ​ປາມ ຊຶ່ງ​ລັດຖະບານ​ປາ​ກິ​ສຖານ ໄດ້​ສັງເກດ​ການ​ມາ​ຕະຫຼອດ ນັບ​ຕັ້ງແຕ່​ຕົ້ນ​ເດືອນ​ກຸມພາ​ນີ້ ກ່ຽວ​ກັບ​ການ​ທີ່ ອິນ​ເດຍ ຢຸດຕິ​ການ​ນຳ​ເຂົ້າ​ນ້ຳມັນ​ປາມ​ຂອງ ມາ​ເລ​ເຊຍ ດ້ວຍ​ເຫດ​ນີ້, ປາ​ກິສຖານ ຈະ​ພະຍາຍາມ​ຢ່າງ​ສຸດ​ຄວາມ​ສາມາດ ເພື່ອ​ຊ່ວຍ​ຊົດ​ເຊີຍ​ສ່ວນ​ທີ່​ຫາຍ​ໄປ​ໃຫ້​ກັບ​ມາ​ເລ​ເຊຍ ໃນ​ເລື່ອງ​ການ​ສົ່ງ​ອອກ​ນ້ຳມັນ​ປາມ. 
  ຂ່າວ​ລະບຸ​ວ່າ: ປາ​ກິ​ສ ຖານ ນຳ​ເຂົ້າ​ນ້ຳມັນ​ປາມ​ຈາກ ມາ​ເລ​ເຊຍ ປະມານ 135.000 ໂຕນ ເມື່ອ​ເດືອນ​ມັງກອນ​ທີ່​ຜ່ານ​ມາ ຊຶ່ງ​ຖື​ວ່າ​ສູງ​ທີ່​ສຸດ​ເປັນ​ປະຫວັດ​ສາດ. ສ່ວນ​ສະຖິຕິ​ໝົດ​ປີ 2019 ບັນລຸ​ປະມານ 1,1 ລ້ານ​ໂຕນ. ຂະນະ​ດຽວ​ກັນ, ອິນ​ເດຍ ນຳ​ເຂົ້າ​ນ້ຳມັນ​ປາມ​ຈາກ ມາ​ເລ​ເຊຍ ພຽງ 40,400 ໂຕນ, ຫຼຸດ​ລົງ​ເຖິງ 80% ເມື່ອ​ທຽບ​ກັບ​ສະຖິຕິ​ໃນ​ໄລຍະ​​ດຽວ​ກັນ​ຂອງ​ປີ 2019. 
  ທັງ​ນີ້, ບັນດາ​ຜູ້​ປະກອບ​ການ​ສວນ​ປາມ ແລະ ນ້ຳມັນ​ປາມ​ໃນ ມາ​ເລ​ເຊຍ ຍັງ​ຮຽກຮ້ອງ​ໃຫ້​ລັດຖະບານ​ຊ່ວຍ​ເຫຼືອ. ເມື່ອ​ທ້າຍ​ເດືອນ​ທີ່​ຜ່ານ​ມາ ມີ​ການ​ລາຍ​ງານ​ຈາກ​ບໍລິສັດ​ເອັມ​ເອັສ​ ເອັມ ມາ​ເລ​ເຊຍ ໂຮ​ນ​ດິ້ງ ເບີ​ຮັດ ຜູ້​ຜະລິດ​ນ້ຳຕານ​ລາຍ​ໃຫຍ່​ທີ່​ສຸດ​ຂອງ ມາ​ເລ​ເຊຍ ວ່າ: ໄດ້​ຕົກລົງ​ຊື້​ນໍ້າ​ຕານ​ດິບ​ຈາກ ອິນ​ເດຍ ໃນ​ໄຕ​ມາດ​ທຳອິດ​ຂອງ​ປີ​ນີ້ 130.000 ໂຕນ, ຄິດ​ເປັນ​ມູນ​ຄ່າ 200 ລ້ານ​ຣິງ​ກິດ (ສະກຸນ​ເງິນ​ມາ​ເລ​ເຊຍ) ເມື່ອ​ທຽບ​ກັບ​ສະຖິຕິ​ຂອງ​ປີ​ທີ່​ຜ່ານ​ມາ ຊຶ່ງ​ທາງ​ບໍລິສັດ​ນຳ​ເຂົ້າ​ນ້ຳຕານ​ດິບ​ຈາກ ອິນ​ເດຍ ປະມານ 88.000 ໂຕນ, ຈາກ​ທັງ​ໝົດ 1,95 ລ້ານ​ໂຕນ. ສ່ວນ​ໃຫຍ່​ເປັນ​ການ​ສັ່ງ​ຊື້​ຈາກ ບຣາ​ຊິນ ແລະ ໄທ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110