ຫົວ​ຂໍ້ : ອາ­ຊີ ຈະ​ກ້າວ​ຂຶ້ນ​ເປັນ​ສູນ​ກາງ​ທຸ­ລະ​ກິດ​ຮ່ວມ​ລົງ­ທຶນ​ຂອງ​ໂລກ

ເຜີຍ​ແຜ່​ໂດຍ​: admin ເວ​ລາ: 15/12/2019 14:33:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 31 ຄັ້ງ

ຮຽບຮຽງ​ໂດຍ: ລຸ້ງ​ດາວ

   ຜົນ​ການ​ສຶກສາ​ຄົ້ນ​ຄ້ວາ ​ຫຼ້າ​ສຸດ​ຂອງ​ບໍລິສັດ ເທ​ມາ​ເສ໊ກ ບໍລິສັດ​ເພື່ອ​ການ​ລົງທຶນ​ຂອງ​ລັດຖະບານ​ສິງກະໂປ ທີ່​ເຜີຍແຜ່ ເມື່ອ​ເດືອນ​ຕຸລາ​ຜ່ານ​ມາ ໂດຍ​ລະບຸ​ວ່າ: ພາກ​ພື້ນ​ອາຊີ ຊຶ່ງ​ນຳ​ໂດຍ​ປະເທດ​ຈີນ ຈະ​ລື່ນ​ກາຍ ອາ​ເມ​ຣິ​ກາ ກ້າວ​ຂຶ້ນ​ມາ​ເປັນ​ສູນ​ກາງ​ທຸລະ​ກິດ​ຮ່ວມ​ລົງທຶນ​ໂລກ ໄວ​ທີ່​ສຸດ​ໃນ​ປີ 2020.

   ໃນ​ທ້າຍ​ປີ 2018, ກອງ​ທຶນ​ທຸລະ​ກິດ​ຮ່ວມ​ລົງທຶນ​ໃນ​ອາຊີ ມີ​ຊັບ​ສິນ​ຈັດການ​ບໍລິຫານ ຄິດ​ເປັນ​ມູນ​ຄ່າ 323.000 ລ້ານ​ໂດ​ລາ. ຂະນະ​ທີ່​ທຸລະ​ກິດ​ຮ່ວມ​ລົງທຶນ​ໃນ​ອາ​ເມ​ຣິ​ກາ​ເໜືອ ມີ​ການ​ບໍລິຫານ​ຈັດການ​ກອງ​ທຶນ​ຕ່າງໆ​ທີ່​ມີ​ມູນ​ຄ່າ​ການ​ລົງທຶນ ໂດຍ​ລວມ​ຢູ່​ທີ່ 397.000 ລ້ານ​ໂດ​ລາ.

   ທ່ານ ອີ້ ໄຝ ຂ່ານ ຫົວໜ້າ​ຝ່າຍ​ປະຕິບັດ​ງານ​ຂອງ​ບໍລິສັດ ພຣີ​ຄິນ ບໍລິສັດ​ໃຫ້​ບໍລິການ​ຂໍ້​ມູນ​ກ່ຽວ​ກັບ​ຊັບ​ສິນ​ທາງ​ເລືອກ​ມີ​ການ​ດຳເນີນ​ງານ​ໃນ ອາ​ເມ​ຣິ​ກາ ກ່າວ​ວ່າ: ຖ້າ​ຫາກ​ທຸລະ​ກິດ​ຮ່ວມ​ລົງທຶນ​ໃນ​ອາຊີ​ຍັງ​ຄົງ​ມີ​ອັດຕາ​ການ​ເຕີບ​ໂຕ​ແບບ​ນີ້​ຕໍ່​ໄປ, ທຸລະ​ກິດ​ຮ່ວມ​ລົງທຶນ​ໃນ​ພາກ​ພື້ນ​ອາຊີ ຈະ​ມີ​ມູນ​ຄ່າ​ລື່ນ​ທຸລະ​ກິດ​ຮ່ວມ​ລົງທຶນ​ໃນ​ອາ​ເມ​ຣິ​ກາ ຢ່າງ​ແນ່ນອນ​ພາຍ​ໃນ​ປີ 2020.

   ແຫຼ່ງ​ຂ່າວ​ຕ່າງປະເທດ​ລາຍ​ງານ​ວ່າ: ຜົນ​ຂອງ​ການ​ສຶກ ສາ​ຄັ້ງ​ນີ້ ຊີ້​ໃຫ້​ເຫັນ​ວ່າ: ກອງ​ທຶນ​ຕ່າງໆ​ທີ່​ເນັ້ນ​ໃສ່​ລົງທຶນ​ໃນ​ພາກ​ພື້ນ​ອາຊີ ມີ​ອັດຕາ​ການ​ເຕີບ​ໂຕ​ສະເລ່ຍ​ປີ​ລະ 30%, ນັບ​ຕັ້ງແຕ່​ປີ 2010 ເປັນຕົ້ນ​ມາ, ທຽບໃສ່​ກອງ​ທຶນ​ຮ່ວມ​ທຶນ​ໃນ​ອາ​ເມ​ຣິ​ກາ​ເໜືອ ທີ່​ມີ​ອັດຕາ​ການ​ເຕີບ​ໂຕ​ສະເລ່ຍ 9% ຕໍ່​ປີ. ເນື່ອງ​ຈາກ​ນັກ​ລົງທຶນ​ໃນ​ປັດຈຸບັນ ສະແຫວງຫາ​ການ​ລົງທຶນ​ດ້ານ​ເຕັກ​ໂນ​ໂລ​ຊີ​ທີ່​ກ້າວໜ້າ, ສູນ​ນະ​ວັດຕະ​ກຳ​ຂອງ​ໂລກ​ເຊັ່ນ: ປັກ​ກິ່ງ ແລະ ນະຄອນ​ຊຽງ​ໄຮ້​ຂອງ​ຈີນ ຈຶ່ງ​ມີ​ບົດບາດ​ສຳຄັນ ແລະ ດຶງ​ດູດ​ເງິນ​ທຶນ​ເຂົ້າ​ພາກ​ພື້ນ​ອາຊີ​ຫຼາຍ​ຂຶ້ນ ຊຶ່ງ​ເຫັນ​ໄດ້​ຈາກ​ກອງ​ທຶນ​ສຳລັບ​ທຸລະ​ກິດ​ຮ່ວມ​ລົງທຶນ​ຂະໜາດ​ໃຫຍ່ 10 ແຫ່ງ​ໃນ​ອາຊີ ລ້ວນ​ແຕ່​ມີ​ສຳນັກງານ​ໃຫຍ່​ຢູ່​ຈີນ.

   ທ່ານ ຈີ້​ຊຸນ ຟຸ ຫຸ້ນ​ສ່ວນ​ບໍລິສັດ ຈີ​ຈີ​ວີ ແຄ​ປິ​ຕັນ ຊຶ່ງ​ມີ​ສຳນັກງານ​ຕັ້ງ​ຢູ່​ນະຄອນຫຼວງ​ປັກ​ກິ່ງ ແລະ ນະຄອນ​ຊຽງ​ໄຮ້ ຂອງ​ຈີນ ກ່າວ​ວ່າ: ປັດຈຸບັນ, ນັກ​ລົງທຶນ​ໃນ​ທຸລະ​ກິດ​ຮ່ວມ​ລົງທຶນ​ທັງຫຼາຍ ຫັນ​ມາ​ລົງທຶນ​ເຂົ້າ​ໃນ​ພື້ນຖານ​ໂຄງ​ລ່າງ, ທຸລະ​ກິດ​ການ​ຊຳລະ​ເງິນ, ທຸລະ​ກິດ​ການ​ກູ້​ເງິນ ແລະ ທຸລະ​ກິດ​ໂລ​ຈິ​ສ​ຕິກ ຊຶ່ງ​ເປັນ​ຮູບ​ແບບ​ທຸລະ​ກິດ​ໃໝ່, ໃນ​ຂະນະ​ທີ່​ລາຍ​ໄດ້​ເພີ່ມ​ຂຶ້ນ ປະກອບ​ກັບ​ການ​ເຂົ້າ​ເຖິງ​ມື​ຖື​ຂອງ​ຄົນ​ໃນ​ອາຊີ ຊ່ວຍ​ເພີ່ມ​ໂອກາດ​ທາງ​ທຸລະ​ກິດ​ແກ່​ບັນດາ​ບໍລິສັດ start up ຢ່າງ​ຫຼວງ​ຫຼາຍ.

   ຜົນ​ການ​ສຶກສາ​ຄັ້ງ​ນີ້, ຍັງ​ໄດ້​ສະແດງ​ໃຫ້​ເຫັນ​ວ່າ: ພາກ​ພື້ນ​ອາຊີ ໄດ້​ຊຸກຍູ້​ການ​ຂະຫຍາຍຕົວ​ຂອງ​ທຸລະ​ກິດ​ຮ່ວມ​ລົງທຶນ​ທົ່ວ​ໂລກ. ຈຳນວນ​ຂອງ​ສະ​ຖາ​ບັນ​ຕ່າງໆ​ໃນ​ອາຊີ ທີ່​ເຂົ້າ​ໄປ​ລົງທຶນ​ໃນ​ກອງ​ທຶນ​ເພື່ອ​ການ​ລົງທຶນ​ໃນ​ໄລຍະ 5 ປີ​ທີ່​ຜ່ານ​ມາ ເພີ່ມ​ຂຶ້ນ​ທົບ 2 ເທົ່າ ເມື່ອ​ທຽບໃສ່ ອາ​ເມ​ຣິ​ກາ ຫຼຸດ​ລົງ 50% ໃນ​ປີ 2018 ຈາກ 55% ໃນ​ປີ 2013.

   ເຖິງ​ຢ່າງໃດ​ກໍຕາມ, ທ່ານ ເຕົາ​ຈາງ ຮອງ​ກຳມະການ​ຜູ້​ຈັດການ​ກອງ​ທຶນ​ການ​ເງິນ​ສາກົນ ຫຼື IMF ຄາດ​ຄະເນ​ວ່າ: ການ​ຂະຫຍາຍຕົວ​ຂອງ​ເສດຖະກິດ​ຈີນ ໃນ​ປີ 2020 ຈະ​ຢູ່​ທີ່​ລະດັບ 5,8%, ຫຼຸດ​ລົງ​ຈາກ​ລະດັບ 6,1% ຂອງ​ໂຕ​ເລກ​ການ​ຄາດ​ຄະເນ​ສຳລັບ​ປີ 2019 ແລະ ຫຼຸດ​ລົງ​ຈາກ​ລະດັບ​ການ​ຂະຫຍາຍຕົວ​ໃນ​ປີ 2018 ຢູ່​ທີ່ 6,2%. ເສດຖະກິດ​ຈີນ ຢູ່​ໃນ​ທິດ​ທາງ​ທີ່​ຊ້າ​ລົງ​ຢ່າງ​ຕໍ່​ເນື່ອງ. ທ່ານ ເຕົາ​ຈາງ ເຫັນ​ວ່າ: ໂຕ​ເລກ​ຄາດ​ຄະເນ​ເສດຖະກິດ​ຂອງ​ຈີນ ຢູ່​ໃນ​ລະດັບ​ທີ່​ສົມ​ເຫດ​ສົມ​ຜົນ ເນື່ອງ​ຈາກ​ຈີນ ກຳລັງ​ຢູ່​ໃນ​ລະຫວ່າງ​ການ​ປັບ​ໂຄງ​ປະກອບ​ເສດຖະກິດ​ໄປ​ສູ່​ການ​ຂະຫຍາຍຕົວ​ໃນ​ທາງ​ທີ່​ຍືນ​ຍົງ​ຫຼາຍ​ຂຶ້ນ. ໝາຍ​ຄວາມ​ວ່າ: ຈີນ​ຈະ​ຫຼຸດ​ການ​ເພິ່ງ​ພາ​ອາໄສ​ເງິນ​ກູ້​ໃນ​ການ​ກະ​ຕຸ້ນ​ເສດຖະກິດ, ແຕ່​ຈະ​ຫັນ​ໄປ​ສຸມ​ໃສ່​ການ​ອຸປະ​ໂພ​ກ-​ບໍລິໂພກ​ພາຍ​ໃນ​ປະເທດ​ໃຫ້​ຫຼາຍ​ຂຶ້ນ ຊຶ່ງ​ການ​ປ່ຽນ​ຜ່ານ​ທາງ​ດ້ານ​ເສດຖະກິດ​ແບບ​ນີ້ ຈະ​ເຮັດ​ໃຫ້​ເສດຖະກິດ​ຈີນ ຂະຫຍາຍຕົວ​ຊ້າ​ລົງ ແຕ່​ຈະ​ມີ​ຄຸນ​ນະ​ພາບ​ການ​ເຕີບ​ໂຕ​ທີ່​ດີ​ຂຶ້ນ.

   ທ່ານ ນາງ ຄຣິ​ສ​ຕິນ ລາ​ກາດ ຊຶ່ງ​ພວມ​ກຽມ​ເປັນ​ປະທານ ທະນາຄານ​ກາງ​ເອີ​ຣົບ ເຕືອນ​ວ່າ: ອາ​ເມ​ຣິ​ກາ ມີ​ຄວາມ​ສ່ຽງ​ທີ່​ຈະ​ສູນ​ເສຍ​ບົດບາດ​ຂອງ​ຕົນ​ໃນ​ຖານະ​ເປັນ​ຜູ້ນຳ​ເສດຖະກິດ​ໂລກ, ຖ້າ​ຍັງ​ສືບຕໍ່​ເຮັດ​ສົງຄາມ​ການ​ຄ້າຂາຍ​ກັບ​ຈີນ​ຕໍ່​ໄປ ແລະ ເຕືອນ​ວ່າ: ປະທານາທິບໍດີ ໂດ​ໂນ ທຣຳ ຂອງ ອາ​ເມ​ຣິ​ກາ ຄວນ​ຢຸດ​ການ​ກົດ​ດັນ​ທະນາຄານ​ກາງ​ອາ​ເມ​ຣິ​ກາ (ເຟດ) ໃຫ້​ຫຼຸດ​ອັດຕາ​ດອກ​ເບ້ຍ​ນະໂຍບາຍ ເພາະ​ອາດ​ຈະ​ກະ​ຕຸ້ນ​ໃຫ້​ອັດຕາ​ເງິນ​ເຟີ້​ຂອງ​ອາ​ເມ​ຣິ​ກາ ຢູ່​ໃນ​ລະດັບ​ທີ່​ບໍ່​ສາມາດ​ຄວບ​ຄຸມ​ໄດ້. ທ່ານ ຄຣິ​ສ​ຕິນ ລາ​ກາດ ກ່າວ​ຕື່ມ​ວ່າ: ເມື່ອ​ອັດຕາ​ການ​ວ່າງ​ງານ​ໃນ​ປະເທດ​ຢູ່​ທີ່ 3,7%, ອາ​ເມ​ຣິ​ກາ ບໍ່​ຈຳເປັນ​ຕ້ອງ​ກະ​ຕຸ້ນ​ການ​ເຕີບ​ໂຕ​ທາງ​ເສດຖະກິດ​ຫຼາຍ​ເກີນ​ໄປ​ດ້ວຍ​ການ​ຫຼຸດ​ອັດຕາ​ດອກ​ເບ້ຍ​ນະ​ໂຍ​ບາຍ. ເພາະວ່າ​ຖ້າ​ທ່ານ ທຣໍາ ເຮັດ​ແບບ​ນີ້​ຕໍ່​ໄປ, ຈະ​ເພີ່ມ​ຄວາມ​ສ່ຽງ​ທີ່​ຈະ​ເຮັດ​ໃຫ້​ອັດຕາ​ເງິນ​ເຟີ້​ເພີ່ມ​ຂຶ້ນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110