ຫົວ​ຂໍ້ : ຈີນ ເນັ້ນໃຫ້ຍົກສູງການປິ່ນປົວຜູ້ຕິດເຊື້ອໃຫ້ຫາຍຂາດຈາກພະຍາດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 07/02/2020 09:15:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 478 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ທ່ານ ຫຼີ​ເຄີ້​ສຽງ ນາຍົກລັດຖະມົນຕີ​ຈີນ ໄດ້​ເປັນ​ປະທານ​ຈັດ​ກອງ​ປະຊຸມ​ໜ່ວຍ​ງານ​ຮັບຜິດຊອບ​ວຽກ​ງານ​ຮັບ​ມື​ກັບ​ການ​ແຜ່​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ຂັ້ນ​ສູນ​ກາງ​ຈີນ. ພ້ອມ​ທັງ​ຊີ້​ໃຫ້​ເຫັນ​ວ່າ: ແຂວງ​ຫູ​ເປີຍ ໂດຍ​ສະເພາະ​ນະຄອນ​ອູ​ຮັ້ນ ຍັງ​ເປັນ​ເຂດ​ສຳຄັນ​ທີ່​ສຸດ​ໃນ​ການ​ຕ້ານ​ພະຍາດ, ຄວນ​ຍົກ​ສູງ​ອັດຕາ​ການ​ປິ່ນປົວ​ຜູ້​ຕິດເຊື້ອ ແລະ ອັດຕາ​ການ​ຫາຍ​ຂາດ​ຈາກ​ພະຍາດ, ຫຼຸດ​ອັດຕາ​ການ​ຕິດເຊື້ອ ແລະ ອັດຕາ​ການ​ເສຍ​ຊີ​ວິດ.
  ກອງ​ປະຊຸມ​ໄດ້​ລະບຸ​ວ່າ: ຈະ​ຈັດ​ສັນ​ໂຮງໝໍ​ເຄື່ອນ​ທີ່​ຈຳນວນ​ໜຶ່ງ ແລະ ຈະ​ຈັດ​ສົ່ງ​ໜ່ວຍ​ແພດ​ໄປ​ແຂວງ​ຫູ​ເປີຍ ເພີ່ມ​ອີກ 2.000 ຄົນ. ນອກຈາກ​ນີ້, ຍັງ​ຈະ​ຂໍ​ໃຊ້​ໂຮງແຮມ, ສູນ​ຝຶກ​ອົບຮົມ ແລະ ສະຖານທີ່​ອື່ນໆ ເພື່ອ​ນຳ​ໃຊ້​ເປັນ​ບ່ອນ​ກັກ​ບໍລິເວນ​ຜູ້​ສົງໄສ​ຕິດເຊື້ອ, ຜູ້​ມີ​ອາການ​ບໍ່​ຮຸນ​ແຮງ ແລະ ຜູ້​ທີ່​ຕ້ອງ​ເຝົ້າ​ລະ​ວັງ. ພ້ອມ​ກັນ​ນັ້ນ, ຍັງ​ໄດ້​ສົ່ງ​ໜ່ວຍ​ແພດ​ທີ່​ມີ​ລະດັບ​ວິຊາ​ການ​ສູງ​ໄປ​ປິ່ນປົວ​ຜູ້​ເຈັບ​ໜັກ ແລະ ກຽມພ້ອມ​ອຸປະກອນ​ກອບ​ກູ້​ຊີວິດ ແລະ ອຸປະກອນ​ປ້ອງ​ກັນ​ທາງ​ການ​ແພດ; ຍົກ​ສູງ​ຄວາມ​ສາມາດ​ກວດກາ​ບົ່ງມະຕິ​ຜູ້​ຕິດ​ເຊື້ອ.
  ກອງ​ປະຊຸມ​ດັ່ງກ່າວ ຍັງ​ຊີ້​ໃຫ້​ເຫັນ​ວ່າ: ຕ້ອງ​ເດັດດ່ຽວ​ເຕົ້າໂຮມ​ຊັບພະຍາກອນ​ທາງ​ການ​ແພດ ແລະ ອຸປະກອນ​ປ້ອງ​ກັນ​ທາງ​ການ​ແພດ ເພື່ອ​ສົ່ງ​ໄປ​ໃຫ້​ເຂດ​ຕໍ່ຕ້ານ​ພະຍາດ​ສຳຄັນ​ທີ່​ສຸດ. ຂະນະ​ດຽວ​ກັນ, ກໍ​ຕ້ອງ​ຮັບປະກັນ​ການ​ສະໜອງ​ເຄື່ອງ​ອຸປະໂພກ ບໍລິໂພກ ປະຈຳ​ວັນ.
ຂ່າວ​ລາຍ​ງານ​ວ່າ: ທ່ານ ເທ​ຣົສ ອັດ​ຮາ​ໂນມ ເກ​ເບ​ເຢ​ຊຸສ ຜູ້ອຳນວຍການ​ໃຫຍ່​ອົງການ​ອະນາໄມ​ໂລກ (WHO) ໄດ້​ກ່າວ​ຕໍ່​ກອງ​ປະຊຸມ​ຄະນະ​ບໍລິຫານ​ງານ​ອົງການ​ອະນາໄມ​ໂລກ​ວ່າ: ບັນດາ​ປະເທດ​ຄວນ​ຢືນ​ຢູ່​ບົນ​ພື້ນຖານ​ຂອງ​ສະພາບ​ຄວາມ​ເປັນ​ຈິງ, ພິຈາລະນາ​ຢ່າງ​ເປັນ​ເອກະ​ພາບ​ຕາມ​ຫຼັກ​ວິທະຍາສາດ ແລະ ​ມີ​ສະຕິ; ມີ​ຄວາມ​ຈຳເປັນ​ປ້ອງ​ກັນ​ພະຍາດ ແຕ່​ກໍ​ບໍ່​ຄວນ​ເກີນ​ເຫດ. ອົງການ​ອະນາໄມ​ໂລກ ຍັງ​ສະເໜີ​ວ່າ: ບໍ່​ຄວນ​ຈຳກັດ​ການທ່ອງທ່ຽວ ແລະ ການ​ຄ້າ​ສາກົນ​ຄື​ທີ່​ໄດ້​ກຳນົດ​ຜ່ານ​ມາ.
  ປັດຈຸບັນ, ບໍ່​ມີ​ເຫດຜົນ​ຕ້ອງ​ນຳ​ໃຊ້​ມາດ​ຕະການ​ເຂົ້າ​ແຊກ​ແຊງ​ທີ່​ບໍ່​ຈຳເປັນ​ຕໍ່​ການທ່ອງທ່ຽວ ແລະ ​ການ​ຄ້າ​ສາ​ກົນ. ອົງການ​ອະນາໄມ​ໂລກ ຮຽກຮ້ອງ​ໃຫ້​ທຸກ​ປະເທດ ຈົ່ງ​ນໍາ​ໃຊ້​ມາດ​ຕະການ​ບົນ​ຫຼັກ​ຖານ ແລະ ສອດຄ່ອງ​ກັບ​ຫຼັກ​ຖານ​ຕົວ​ຈິງ. ອົງການ​ອະນາໄມ​ໂລກ ພ້ອມ​ແລ້ວ​ຈະ​ໃຫ້​ຄຳ​ແນະນຳ​ທີ່​ກ່ຽວຂ້ອງ​ແກ່​ປະເທດ​ທີ່​ຢາກ​ນຳ​ໃຊ້​ມາດ​ຕະການ​ຕໍ່​ເລື່ອງ​ນີ້.
ຕາມ​ການ​ລາຍ​ງານ​ຂອງ​ຄະ​ນະ​ກໍາ​ມະ​ການ​ສາທາລະນະ​ສຸກ​ແຫ່ງ​ຊາດ​ຈີນ ເປີດເຜີຍ​ໃນ​ວັນ​ທີ 6 ກຸມພາ​ວ່າ: ຈໍາ​ນວນ​ຜູ້​ຕິດເຊື້ອ​ພະຍາດ​ໃນ​ທົ່ວ​ໂລກມີ 28.276 ຄົນ, ເສຍ​ຊີວິດ 565 ຄົນ. 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110