ຫົວ​ຂໍ້ : ຫວຽດນາມ ສະເໜີ ອາຊຽນ ຮ່ວມມືປ້ອງກັນເຊື້ອພະຍາດໂຄໂຣນາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 10/02/2020 09:45:08 ຈຳ​ນວນ​ຜູ້​ເຂົ້າ​ຢ້ຽມ​ຊົມ 298 ຄັ້ງ

  ວິທະຍຸ​ກະຈາຍສຽງຫວຽດ ນາມ​ລາຍ​ງານ​ວ່າ: ທ້າຍ​ອາທິດ ​ຜ່ານ​ມາ, ທ່ານ ຫ​ງວຽນ​ຊວັນ​ຟຸກ ນາຍົກລັດຖະມົນຕີ​ຫວຽດ ນາມ ໄດ້​ມີ​ການ​ໂອ້​ລົມ​ທາງ​ໂທລະສັບ​ກັບ​ທ່ານ ໂຈ​ໂກ ວິ​ໂດ​ໂດ ປະທານາທິບໍດີ ອິນ​ໂດ​ເນ​ເຊຍ ກ່ຽວ​ກັບ​ການ​ຮ່ວມ​ມື ລະຫວ່າງ ບັນດາ​ປະເທດ​ອາ​ຊຽນ ເພື່ອ​ແນໃສ່​ຮັບ​ມື​ກັບ​ພະຍາດ​ອັກເສບ​ປອດ​ຈາກ​ເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່. 
  ຂ່າວ​ລະບຸ​ວ່າ: ໃນ​ເວລາ​ໂອ້​ລົມ​ສົນທະນາ, ທ່ານ ວິ​ໂດ​ໂດ ໄດ້​ຕີ​ລາຄາ​ສູງ​ຕໍ່​ລັດຖະບານ ຫວຽດນາມ ໄດ້​ມີ​ບັນດາ​ມາດ​ຕະການ​ຢ່າງ​ວ່ອງໄວ, ຄົບ​ຊຸດ ເພື່ອ​ສະກັດ​ກັ້ນ​ຄວບ​ຄຸມ ແລະ ປ້ອງ​ກັນ, ຕ້ານ​ການ​ແຜ່​ລະບາດ​ຂອງ​ເຊື້ອ​ພະ​ຍາດ. ພ້ອມ​ທັງ​ເຊື່ອ​ໝັ້ນ​ວ່າ: ຫວຽດນາມ ມີ​ຄວາມ​ສາມາດ​ສະກັດ​ກັ້ນ ເຊື້ອ​ພະຍາດ​ນີ້​ໄດ້​ສຳ​ເລັດ. ສ່ວນ​ທ່ານ ຫ​ງວຽນ​ຊວັນ​ຟຸກ ໄດ້​ຕີ​ລາຄາ​ສູງ​ວ່າ: ອິນ​ໂດ​ເນ​ເຊຍ ເປັນ​ໜຶ່ງ​ໃນ​ບັນດາ​ປະເທດ​ທີ່​ໄດ້​ຜັນ​ຂະຫຍາຍ​ບັນດາ​ມາດ​ຕະການ​ສະກັດ​ກັ້ນ​ເຊື້ອ​ພະຍາດ​ຢ່າງ​ວ່ອງໄວ, ມາ​ຮອດ​ປັດຈຸບັນ ຍັງ​ບໍ່​ທັນ​ກວດ​ພົບ​ກໍລະນີ​ໃດ​ທີ່​ຖືກ​ຕິດເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່.
ການ​ນຳ​ສອງ​ປະເທດ ໄດ້​ເຫັນ​ດີ​ເປັນ​ເອກະ​ພາບ​ວ່າ: ບັນດາ​ປະເທດ​ສະມາຊິກ​ຂອງ ອາ​ຊຽນ ຄວນ​ເປັນ​ເຈົ້າ​ການ​ໃນ​ການ​ສົມທົບ​ກັນ, ປະສານ​ງານ​ຂອງ​ແຕ່​ລະ​ປະເທດ ໃຫ້​ຖືກຕ້ອງ​ຕາມ​ເນື້ອ​ໃນ​ຈິດໃຈ “ສະໜິດ​ຕິດ​ພັນ ແລະ ເປັນ​ເຈົ້າ​ການ​ຮັບ​ມື” ແມ່ນ​ຫົວຂໍ້​ຂອງ​ອາ​ຊຽນ​ໃນ​ປີ​ນີ້, ເພື່ອ​ແນໃສ່​ຊອກ​ຫາ​ບັນດາ​ວິທີ​ການ​ແກ້​ໄຂ​ລວມ, ແບ່ງປັນ​ຄວາມ​ຮັບຜິດຊອບ​ໃນ​ການ​ຮັບ​ມື​ກັບ​ເຊື້ອ​ພະຍາດ​ທີ່​ລະບາດ​ໃນ​ພາກ​ພື້ນ. ບັນດາ​ປະເທດ​ອາ​ຊຽນ ໄດ້​ມີ​ປະສົບ​ການ​ອັນ​ລ້ຳ​ຄ່າ​ໃນ​ການ​ສົມທົບ​ກັນ​ຮັບ​ມື​ກັບ​ເຊື້ອ​ພະຍາດ SARS ປີ 2003 ມາ​ແລ້ວ. ດັ່ງນັ້ນ, ຄວນ​ສືບຕໍ່​ເສີມ​ຂະຫຍາຍ​ລັກສະນະ​ເປັນ​ເຈົ້າ​ການ, ຕັ້ງໜ້າ​ຮັບ​ມື​ກັບ ​ເຊື້ອ​ພະຍາດອັກເສບ​ປອດ​ຈາກ​ເຊື້ອ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່​ຄັ້ງ​ນີ້.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110