ຫົວ​ຂໍ້ : ລັດ­ຖະ­ບານ​ເອ​ເລັກ​ໂຕ​ຣ​ນິກ​ຫວຽດ­ນາມ ຮັບ­ປະ­ກັນ​ຄວາມ​ປອດ​ໄພ

ເຜີຍ​ແຜ່​ໂດຍ​: admin ເວ​ລາ: 15/12/2019 14:33:56 ຈຳ​ນວນ​ຜູ້​ເຂົ້າ​ຢ້ຽມ​ຊົມ 70 ຄັ້ງ

ຮຽບຮຽງ​ໂດຍ: ສີ​ວັນ    

   ລະບົບ​ແບ່ງປັນ ແລະ ຕິດຕາມ​ກວດກາ​ຄວາມ​ປອດ​ໄພ​ດ້ານ​ຂໍ້​ມູນ​ຂ່າວສານ​ຮັບ​ໃຊ້​ລັດຖະບານ​ເອ​ເລັກ​ໂຕ​ຣ​ນິກ ໂດຍ​ບັນດາ​ສະມາຊິກ​ໃນ​ສະຫະພັນ​ປົດ​ລະຫັດ​ໄວ​ຣັດ ແລະ ປ້ອງ​ກັນ​ຕ້ານ​ການ​ໂຈມ​ຕີ​ທາງ​ເຄືອ​ຂ່າຍ​ອິນ​ເຕີ​ແນັດ ຊຶ່ງ​ລວມ​ມີ Viettel, VNPT, CMC, FPT, BKAV ໄດ້​ສົມທົບ​ກັນ​ສ້າງ​ຂຶ້ນ. ລະບົບ​ດັ່ງກ່າວ​ເຮັດ​ໜ້າທີ່​ຕິດຕາມ​ກວດກາ, ວິເຄາະ​ວິໄຈ, ແບ່ງປັນ​ຂໍ້​ມູນ ແລ້ວ​ແຈ້ງ​ເຕືອນໃຫ້​ແກ່​ບັນດາ​ກະຊວງ, ຂະແໜງການ, ທ້ອງຖິ່ນ​ໂດຍ​ໄວ ເພື່ອ​ແນໃສ່​ຮັບປະກັນ​ຄວາມ​ປອດ​ໄພ​ທາງ​ເຄືອ​ຂ່າຍ​ອິນ​ເຕີ​ແນັດ ໃຫ້​ແກ່​ລັດຖະບານ​ເອ​ເລັກ​ໂຕ​ຣ​ນິກ.      

   ຫວຽດນາມ ກໍ​ຄື​ກັບ​ບັນດາ​ປະເທດ​ອື່ນໆ​ໃນ​ທົ່ວ​ໂລກ, ໄດ້​ມີ​ຫຼາຍ​ອົງການ, ວິ​ສາ​ຫະ​ກິດ ແລະ ສ່ວນ​ບຸກຄົນ ຖືກ​ໂຈມ​ຕີ​ທາງ​ເຄືອ​ຂ່າຍ​ອິນ​ເຕີ​ແນັດ ເມື່ອ​ໃຊ້​ບັນດາ​ການ​ບໍລິການ​ສາທາລະນະ​ອອນ​ລາຍ, ການ​ຕິດຕໍ່​ພົວພັນ​ທາງ​ເອ​ເລັກ​ໂຕ​ຣ​ນິກ ແລະ ອື່ນໆ. ລະບົບ​ແບ່ງປັນ ແລະ ຕິດຕາມ​ກວດກາ​ຂໍ້​ມູນ​ຂ່າວສານ ຮັບ​ໃຊ້​ລັດຖະບານ​ເອ​ເລັກ​ໂຕ​ຣ​ນິກ ໄດ້​ເລີ່ມ​ປະຕິບັດ​ໃນ​ທ້າຍ​ເດືອນ​ພະຈິກ​ຜ່ານ​ມາ ແມ່ນ​ໜຶ່ງ​ໃນ​ບັນດາ​ຄວາມ​ພະຍາຍາມ ເພື່ອ​ແນໃສ່​ຮັບປະກັນ​ຄວາມ​ປອດ​ໄພ​ດ້ານ​ຂໍ້​ມູນ​ຂ່າວສານ ທາງ​ດ້ານ​ເຄືອ​ຂ່າຍ​ອິນ​ເຕີ​ແນັດ​ໃນ​ຂະບວນ​ວິວັດ​ການ​ສ້າງ​ລັດຖະບານ​ເອ​ເລັກ​ໂຕ​ຣ​ນິກ​ຢູ່​ຫວຽດນາມ, ມຸ່ງ​ໄປ​ເຖິງ​ລັດຖະບານ​ດີ​ຈີ​ຕອນ ແລະ ພື້ນຖານ​ເສດຖະກິດ​ດີ​ຈີ​ຕອນ.

   ຕາມ​ແຫຼ່ງ​ຂ່າວສານ​ຫວຽດ ນາມ, ການ​ກໍ່ສ້າງ​ລັດຖະບານ​ເອ​ເລັກ​ໂຕ​ຣ​ນິກ, ເຕັກ​ໂນ​ໂລ​ຊີ ແມ່ນ 1 ໃນ 4 ເສົາ​ຄ້ຳ​ສໍາ​ ຄັນ (ດ້ານ​ຊັບພະຍາກອນ​ມະ ນຸດ, ລະບອບ​ລະບຽບ​ການ/ຂັ້ນຕອນ, ເຕັກ​ໂນ​ໂລ​ຊີ ແລະ ແຫຼ່ງ​ກຳລັງ) ໂດຍ​ລັດຖະບານ​ໄດ້​ສຸມ​ໃສ່​ລົງ​ທຶນ. ທ່ານ ຫ​ງວຽນ​ຊວັນ​ຟຸກ ນາຍົກລັດຖະມົນຕີ​ຫວຽດນາມ ໄດ້​ຊີ້​ນຳ​ວ່າ: ອັດຕາ​ການ​ໃຊ້​ຈ່າຍ​ໃຫ້​ແກ່​ການ​ຮັກສາ​ຄວາມ​ປອດ​ໄພ​ທາງ​ເຄືອ​ຂ່າຍ​ອິນ​ເຕີ​ແນັດ​ຕໍ່າ​ສຸດ​ແມ່ນ 10%  ຂອງ​ຍອດ​ລາຍ​ຈ່າຍ​ທັງ​ໝົດ​ໃຫ້​ແກ່​ຂົງເຂດ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ.

   ໃນ​ການ​ຜັນ​ຂະຫຍາຍ​ລັດຖະບານ​ເອ​ເລັກ​ໂຕ​ຣ​ນິກ, ຄວາມ​ຮຽກຮ້ອງ​ຮັບປະກັນ​ຄວາມ​ລັບ ແລະ ຄວາມ​ປອດ​ໄພ​ດ້ານ​ຂໍ້​ມູນ​ຂ່າວສານ  ແມ່ນ​ປັດ​ໄຈ​ທີ່​ມີ​ຄວາມ​ສຳຄັນ​ຫຼາຍ.  ນີ້​ແມ່ນ​ເງື່ອນໄຂ​ພື້ນ ຖານ, ແມ່ນ​ປັດ​ໄຈ​​ສຳ​ຄັນ ເພື່ອ​ໃຫ້​ກິດຈະການ​ຫັນ​ໄປ​ສູ່​ດີ​ຈີ​ຕອນ​ແຫ່ງ​ຊາດ, ພັດທະນາ​ລັດຖະບານ​ເອ​ເລັກ​ໂຕ​ຣ​ນິກ ມຸ່ງ​ໄປ​ສູ່​ລັດຖະບານ​ດີ​ຈີ​ຕອນ, ພື້ນຖານ​ເສດຖະກິດ​ດີ​ຈີ​ຕອນ, ສັງຄົມ​ດີ​ຈີ​ຕອນ. ລະດັບ​ຄວາມ​ປອດ​ໄພ​ທາງ​ເຄືອ​ຂ່າຍ​ອິນ​ເຕີ​ແນັດ​ຂອງ​ສຳນັກງານ, ອົງການ​ຈັດ​ຕັ້ງ​ໃດ​ໜຶ່ງ ບໍ່​ຂຶ້ນ​ກັບ​ວ່າ​ອົງການ​ນັ້ນ ຖືກ​ບຸກໂຈມຕີ​ຫຼື​ບໍ, ແຕ່​ຫາກ​ຂຶ້ນ​ກັບ​ວິທີ​ການ​ທີ່​ອົງການ, ສຳນັກງານ​ນັ້ນ ປະຕິກິລິຍາ​ຄື​ແນວໃດ ພາຍຫຼັງ​ຖືກ​ບຸກ​ໂຈມ​ຕີ.

   ທ່ານ ເຈິ່ນ​ກວາງ​ຮຶງ ຜູ້ອຳນວຍການ​ສູນ​ຕິດຕາມ​ກວດກາ​ຄວາມ​ປອດ​ໄພ​ທາງ​ເຄືອ​ຂ່າຍ​ອິນ​ເຕີ​ແນັດ​ແຫ່ງ​ຊາດ, ສັງກັດ​ກົມ​ຄວາມ​ປອດ​ໄພ​ຂໍ້​ມູນ​ຂ່າວສານ, ກະຊວງ​ຖະແຫຼງ​ຂ່າວ ແລະ ສື່ສານ​ຫວຽດນາມ ຊີ້​ແຈງ​ວ່າ: ພວກ​ເຮົາ​ຕ້ອງ​ຍົກ​ສູງ​ສະຕິ​ລະມັດລະວັງ, ບໍ່​ຖື​ເບົາ ແລະ ເປັນ​ທີ່​ຍອມຮັບ ເມື່ອ​ພວກ​ເຮົາ​ຜັນ​ຂະຫຍາຍ​ໃນ​ຂອບ​ເຂດ​ກ້​ວາງ​ຂວາງ, ແນວ​ຄິດ​ຂອງ​ປະຊາຊົນ​ກໍໄດ້​ຮັບ​ການ​ຍົກ​ສູງ​ຂຶ້ນ ແລະ ມີ​ຄວາມ​ເອົາໃຈໃສ່​ເຖິງ​ຄວາມ​ປອດ​ໄພ​ດ້ານ​ຂໍ້​ມູນ​ຂ່າວສານ​ໃຫ້​ຫຼາຍ​ກ່ວາ​ເກົ່າ.

   ຄວາມ​ເປັນ​ເຈົ້າ​ການ, ຮັບ ປະກັນ​ຄວາມ​ປອດ​ໄພ, ຄວາມ​ໝັ້ນຄົງ​ທາງ​ເຄືອ​ຂ່າຍ​ອິນ​ເຕີ​ແນັດ ໃນ​ຂະບວນ​ວິວັດ​ສ້າງ​ລັດຖະບານ​ເອ​ເລັກ​ໂຕ​ຣ​ນິກ ຕ້ອງ​ມີ​ຄວາມ​ເປັນ​ເຈົ້າ​ການ. ໃນ​ທຸກໆ​ໂຄງການ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ລ້ວນ​ແຕ່​ຕ້ອງ​ມີ​ສ່ວນ​ປະກອບ​ຮັບປະກັນ​ຄວາມ​ປອດ​ໄພ, ຄວາມ​ໝັ້ນຄົງ​ທາງ​ເຄືອ​ຂ່າຍ​ອິນ​ເຕີ​ແນັດ. ນອກຈາກ​ລະບົບ​ແບ່​ງ​ປັນ ແລະ ຕິດຕາມ​ກວດກາ​ຄວາມ​ປອດ​ໄພ​ຂໍ້​ມູນ​ຂ່າວສານ ຮັບ​ໃຊ້​ລັດຖະບານ​ເອ​ເ​ລັກ​ໂຕ​ຣ​ນິກ ທີ່​ນຳ​ເຂົ້າ​ເຄື່ອນ​ໄຫວ, ຫວຽດນາມ ໄດ້​ເປັນ​ເຈົ້າ​ການ​ໃນ​ການ​ຜັນ​ຂະຫຍາຍ​ໂຄງການ​ຕ່າງໆ​ໃນ​ໄລຍະທີ່​ຈະ​ມາ​ເຖິງ.

   ທ່ານ ຫ​ງວຽນ​ແມັງ​ຮຸ່ງ ລັດຖະມົນຕີ​ກະ​​ຊວງ​ຖະ ແຫຼງ​ຂ່າວ ແລະ ການ​ສື່ສານ, ຮອງ​ປະທານ​ຄະນະ​ກຳມະ ການ​ແຫ່ງ​ຊາດ ກ່ຽວ​ກັບ​ລັດ ຖະບານ​ເອ​ເ​ລັກ​ໂຕ​ຣ​ນິກ ໃຫ້​ຮູ້​ວ່າ: ຫວຽດນາມ ຕ້ອງ​ເປັນ​ເຈົ້າ​ການທາງ​ດ້ານ​ເຕັກ​ໂນ​ໂລ​ຊີ ເພື່ອ​ຮັບປະກັນ​ຄວາມ​ປອດ​ໄພ, ຄວາມ​ໝັ້ນຄົງ​ທາງ​ເຄືອ​ຂ່າຍ​ອິນ​ເຕີ​ແນັດ. ໃນ​ໄລຍະ​​ທີ່ຈະ​ມາ​ເຖິງ, ກະຊວງ​ຖະແຫຼງ​ຂ່າວ ແລະ ການ​ສື່ສານ ຈະ​ມອບ​ໜ້າທີ່​ຢ່າງ​ລະອຽດ​ໃຫ້​ແກ່​ບັນດາ​ວິ​ສາ​ຫະ​ກິດ​ນຳ​ໜ້າ ແນໃສ່​ພັດທະນາ ສະພາບ​ແວດ​ລ້ອມ ເພື່ອ​​ຜະລິດ​ຕະ​ພັນ​ທີ່​ປອດ​ໄພ, ໝັ້ນຄົງ​ທາງ​ເຄືອ​ຂ່າຍ ຂອງ ຫວຽດນາມ ເພື່ອ​ຮັບ​ໃຊ້​ໃຫ້​ແກ່​ລັດຖະບານ​ເອ​ເລັກ​ໂຕ​ຣ​ນິກ, ຕົວ​ເມືອງ​ອັດ​ສະ​ລິ​ຍະ ແລະ ລະບົບ​ຂໍ້​ມູນ​ຂ່າວສານ​ສຳຄັນ​ຂອງ​ປະເທດ​ຊາດ. ວິ​ສາ​ຫະ​ກິດ ມີ​ທ່າແຮງ​ກ່ຽວ​ກັບ​ວິທີ​ການ​ໃດ​ແມ່ນ​ຈະ​ໄດ້​ມອບ ໝາຍ​ກ່ຽວ​ກັບ​ການ​ສຸມ​ໃສ່​ພັດທະນາ​ຢ່າງ​ເລິກເຊິ່ງ ແລະ ເປັນ​ມື​ອາຊີບ​ກ່ຽວ​ກັບ​ວິທີ​ການ​ນັ້ນ, ໄດ້​ຮັບ​ບຸລິມະສິດ ແລະ ສົ່ງເສີມ​ນຳ​ໃຊ້. ພ້ອມ​ກັນ​ນັ້ນ, ຈະ​ສ້າງຕັ້ງ​ສະຫະພັນ​ ເພື່ອ​ແນໃສ່​ຮ່ວມ​ມື, ໜູນ​ຊ່ວຍ​ຊຶ່ງ​ກັນ ​ແລະ ກັນ​ໃນ​ການ​ພັດທະນາ​ຜະລິດ​ຕະ​ພັນ, ຮັບປະກັນ​ບັນດາ​ຜະລິດ​ຕະ​ພັນ​ມີ​ການ​ເຊື່ອມ​ຈອດ. ສະຫະພັນ​ວິ​ສາ​ຫະ​ກິດ​ນີ້ກໍໃຫ້​ຄຳ​ໝັ້ນ​ສັນຍາ​ວ່າ: ຈະ​ນໍາ​ໃຊ້​ຜະລິດ​ຕະ​ພັນ​ຂອງ​ກັນ ເພື່ອ​ສະໜອງ​ວິທີ​ການ​ສັງ​ລວມ​ໃຫ້​ແກ່​ລູກ​ຄ້າ.

   ຮັບປະກັນ​ຄວາມ​ປອດ​ໄພ, ຄວາມ​ໝັ້ນຄົງ​ດ້ານ​ຂໍ້​ມູນ​ຂ່າວ​ສານ. ພິເສດ ແມ່ນ​ຂໍ້​ມູນ​ຂ່າວສານ​ສ່ວນ​ບຸກຄົນ ແລະ ສິດທິ​ສ່ວນ​ຕົວ ເມື່ອ​ເຂົ້າ​ຮ່ວມ​ການ​ນຳ​ໃຊ້​ການ​ບໍລິການ​ໃນ​ສະພາບ​ແວດ​ລ້ອມ​ເອ​ເລັກ​ໂຕ​ຣ​ນິກ​ເວົ້າ​ລວມ, ສະພາບ​ແວດ​ລ້ອມ​ອິນ​ເຕີ​ແນັດ​ເວົ້າ​ສະ​ເພາະ. ແມ່ນ​ໜຶ່ງ​ໃນ​ບັນດາ​ປັດ​ໄຈ​ຕັດສິນ​ຊີ້​ຂາດ​ໃຫ້​ແກ່​ຜົນສຳເລັດ​ຂອງ ລັດຖະບານ​ເອ​ເລັກ​ໂຕ​ຣ​ນິກ.

   ການ​ຍູ້​ແຮງ​ຂະບວນ​ວິ ວັດ​ດັ່ງກ່າວ​ຢ່າງ​ຕັ້ງໜ້າ ຈະ​ປະກອບສ່ວນ​ເຂົ້າ​ການ​ສ້າງ​ລັດຖະບານ​ເອ​ເລັກ​ໂຕ​ຣ​ນິກ ໃຫ້​ປະສົບ​ຜົນສຳເລັດ, ຮັບປະກັນ​ປະສິດ​ທິ​ຜົນ​ສູງ​ສຸດ ໃນ​ການ​ຮັບ​ໃຊ້​ປະຊາຊົນ ແລະ ວິ​ສາ​ຫະ​ກິດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110