ຫົວ​ຂໍ້ : ທ່ານ ກູເຕີເຣັສ ປະກາດການເຄື່ອນໄຫວບຸລິມະສິດປີ 2020

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 10/02/2020 09:46:13 ຈຳ​ນວນ​ຜູ້​ເຂົ້າ​ຢ້ຽມ​ຊົມ 348 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ຫວ່າງແລ້ວນີ້, ຢູ່​ສໍາ​ນັກ​ງານ ສປຊ ທີ່​ນະຄອນ​ນິວ​ຢອກ ປະເທດ​ອາ​ເມ​ຣິ​ກາ, ທ່ານ ອັນໂຕ​ນີ​ໂອ ກູ​ເຕີ​ເຣສ ເລຂາທິການ​ໃຫຍ່​ສະຫະ​ປະຊາຊາດ (ສປຊ) ໄດ້​ດໍາ​ເນີນ​ກອງ​ປະຊຸມ​ຖະແຫຼງ​ຂ່າວ​ຕົ້ນ​ປີ ເພື່ອ​ແນໃສ່​ວາງ​ນິຕິ​ກໍາ​ກ່ຽວ​ກັບ​ບັນດາ​ບັນຫາ​ບຸລິມະສິດ​ຂອງ​ອົງການ​ດັ່ງກ່າວ​ໃນ​ປີ 2020 ໂດຍ​ສະເພາະ ແມ່ນ​ສຸມ​ໃສ່​ຊອກ​ຫາ​ມາດ​ຕະການ​ແກ້​ໄຂ​ຄວາມ​ເຄັ່ງ​ຕຶງ​ດ້ານ​ການເມືອງ, ຍູ້​ແຮງ​ບັ້ນ​ຮົບ​ຕ້ານ​ການ​ປ່ຽນແປງ​ຂອງ​ດິນ​ຟ້າ​ອາກາດ, ຊຸກຍູ້​ບັນດາ​ເປົ້າ​ໝາຍ​ພັດທະນາ​ແບບ​ຍືນ​ຍົງ (SDGs), ເພີ່ມ​ທະວີ​ການ​ສົມທົບ ລະຫວ່າງ ສປຊ ແລະ ບັນດາ​ອົງການ​ຈັດ​ຕັ້ງ​ຫຼາຍ​ຝ່າຍ​ອື່ນໆ.
  ຂ່າວ​ລະບຸ​ວ່າ: ກ່່ຽວ​ກັບ​ບັນດາ​ການເຄື່ອນໄຫວ​ລະ ອຽດ, ທ່ານ ກູ​ເຕີ​ເຣັສ ໃຫ້​ຮູ້​ວ່າ: ໃນ​ປີ 2020, ສປຊ ຈະ​ສຸມ​ໃສ່​ບັນດາ​ຄວາມ​ພະຍາຍາມ​ຊຸກຍູ້​ການ​ພົວພັນ​ທາງ​ການ​ທູດ​ໃຫ້​ຫຼາຍ​ກວ່າ​​ເກົ່າ ເພື່ອ​ສັນ ຕິພາບ; ຮຽກຮ້ອງ​ໃຫ້​ບັນດາ​ປະເທດ ຄວນ​ໃຫ້​ຄໍາ​ໝັ້ນ​ສັນຍາ​ຫຼາຍ​ຂຶ້ນ ນັບ​ທັງ​ການ​ປະກາດ​ດ້ານ​ການ​ເງິນ​ໃນ​ບັ້ນ​ຮົບ​ຕ້ານ​ການ​ປ່ຽນແປງ​ຂອງ​ດິນ​ຟ້າ​ອາກາດ ແລະ ເຂົ້າ​ຮ່ວມ​ບັນດາ​ກອງ​ປະຊຸມ​ໃຫຍ່​ໃນ​ປີ 2020 ໂດຍ​ສະເພາະ ແມ່ນ​ກອງ​ປະຊຸມ​ສຸດ​ຍອດ ສປຊ ກ່ຽວ​ກັບ​ການ​ປ່ຽນແປງ​ຂອງ​ດິນ​ຟ້າ​ອາກາດ ຊຶ່ງ​ຈະ​ຈັດ​ຂຶ້ນ​ຢູ່ ອັງກິດ, ຈະ​ແມ່ນ​ໂອກາດ​ເພື່ອ​ໃຫ້​ມີ​ການ​ກະ​ທໍາ​ຕົວ​ຈິງ; ສືບຕໍ່​ພະຍາຍາມ​ສ້າງ​ຂະບວນ​ວິວັດ​ແຫ່ງ​ການ​ຫັນ​ເປັນ​ໂລກາ​ພິ​ວັດ​ຢ່າງ​ຍຸ​ຕິ​ທໍາ, ບໍ່​ໃຫ້​ຜູ້​ໃດ​ຖືກ​ປະ​ໄວ້​ຢູ່​ທາງ​ຫຼັງ. ສປຊ ໄດ້​ວາງ​ທົດ​ສະ​ວັດ​ແຫ່ງ​ການ​ເຄື່ອນໄຫວ ເພື່ອ​ຫັນ​ບັນດາ​ເປົ້າ​ໝາຍ​ພັດທະນາ​ແບບ​ຍືນ​ຍົງ​ໃຫ້​ປະກົດ​ຜົນ​ເປັນ​ຈິງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110