ນາຍົກລັດຖະມົນຕີ ຕິດຕາມຊຸກຍູ້ພື້ນຖານການຜະລິດ ຢູ່ເມືອງສັງທອງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 10/02/2020 09:46:26 ຈຳ​ນວນ​​ຢ້ຽມ​ຊົມ 10852 ຄັ້ງ

ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ພື້ນຖານການຜະລິດຢູ່ເມືອງສັງທອງ ນະຄອນຫຼວງວຽງຈັນ, ໃນວັນທີ 7 ກຸມພາຜ່ານມາ ໂດຍມີ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານເຈົ້າເມືອງສັງທອງ ພ້ອມດ້ວຍ ປະຊາຊົນເມືອງສັງທອງໃຫ້ການຕ້ອນຮັບຢ່າງອົບອຸ່ນ.

ໂອກາດດັ່ງກ່າວ, ທ່ານ ດາວເພັດ ອາລຸນ ເຈົ້າເມືອງສັງທອງ ໄດ້ລາຍງານກ່ຽວກັບສະພາບການພັດທະນາເສດຖະກິດ-ສັງຄົມ ໃຫ້ຮູ້ວ່າ: ເມືອງໄດ້ສຸມໃສ່ປັບປຸງລະບົບໂຄງລ່າງພື້ນຖານ ໄດ້ມີການຂະຫຍາຍຕົວ ແລະ ອຳນວຍຄວາມສະດວກດ້ານຕ່າງໆ ໃຫ້ແກ່ຂະບວນການຜະລິດ ແລະ ການບໍລິການຕ່າງໆ ເພື່ອເຮັດໃຫ້ເມືອງສັງທອງ ມີການພັດທະນາຢ່າງຕໍ່ເນື່ອງ ຊຶ່ງທ່າແຮງທີ່ສໍາຄັນຂອງເມືອງ ແມ່ນການປູກຝັງ  ແລະ  ລ້ຽງສັດ, ທົ່ວເມືອງມີເນື້ອທີ່ກະສິກຳທັງໝົດ 29 ພັນກວ່າເຮັກຕາ, ໃນປີ  2019  ສາມາດຜະລິດເຂົ້ານາປີໄດ້ 8.500 ເຮັກຕາ, ນາແຊງ 53 ເຮັກຕາ, ພືດອຸດສາຫະກໍາ 1.155 ເຮັກຕາ, ໄມ້ໃຫ້ໝາກ 216 ເຮັກຕາ ແລະ ສຳລັບການລ້ຽງສັດ ມີທັງໝົດ 128.000 ກວ່າໂຕ, ໄດ້ລ້ຽງເປັນຟາມ 11 ຟາມ ປະກອບມີ ງົວ, ແບ້, ໝູ, ໄກ່ ແລະ ເຕົ່າ, ເຮັດໃຫ້ເມືອງສາມາດເກັບລາຍຮັບໄດ້ທັງໝົດໃນປີ 2019 ແມ່ນ 7,6 ຕື້ກີບ, ລາຍຮັບສະເລ່ຍແມ່ນ 1.800 ໂດລາຕໍ່ຄົນຕໍ່ປີ.

ຕໍ່ບັນດາຜົນສໍາເລັດດັ່ງ ກ່າວ, ທ່ານນາຍົກລັດຖະມົນ ຕີ ໄດ້ສະແດງຄວາມຍ້ອງຍໍຊົມ ເຊີຍຕໍ່ອໍານາດການປົກຄອງເມືອງສັງທອງ ທີ່ເຮັດໃຫ້ເມືອງຂອງຕົນເອງມີການພັດທະນາຢ່າງຕໍ່ເນື່ອງ ແລະ ມີໃບໜ້າໃໝ່ ໂດຍສະເພາະແມ່ນການພັດທະນາໂຄງລ່າງພື້ນຖານ ແລະ ການຊອກຫາທ່າແຮງບົ່ມຊ້ອນ ໂດຍມີການຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນເຮັດການຜະລິດ ແລະ ນຳໃຊ້ຊັບພະຍາກອນທຳມະຊາດທີ່ມີເຊັ່ນໄມ້ປ່ອງ ເພື່ອມາຜະລິດເປັນສິນຄ້າເພີ່ມມູນຄ່າ ແລະ ສ້າງລາຍຮັບເຂົ້າສູ່ຄອບຄົວ, ເຮັດໃຫ້ປະຊາຊົນມີວຽກເຮັດງານທຳ ແລະ ມີລາຍຮັບຢ່າງຕໍ່ເນື່ອງ ເພື່ອກ້າວໄປສູ່ການຫຼຸດພົ້ນອອກຈາກຄວາມທຸກຍາກເທື່ອລະກ້າວ. ພ້ອມດຽວກັນນັ້ນ, ກໍຍັງສາມາດດຶງດູດເອົາການລົງທຶນ, ການຮ່ວມມື ແລະ ການຊ່ວຍເຫຼືອຈາກໂຄງການຕ່າງໆທັງພາຍໃນ ແລະ ຕ່າງປະເທດ ເຂົ້າມາພັດທະນາເມືອງສັງທອງ ເຮັດໃຫ້ເສດຖະກິດ-ສັງຄົມ ມີການພັດທະນາ ແລະ ຊີວິດການເປັນຢູ່ຂອງພໍ່ແມ່ປະຊາຊົນໄດ້ຮັບການປັບປຸງ ໃຫ້ນັບມື້ນັບດີຂຶ້ນເທື່ອລະກ້າວ. ສະນັ້ນ ເພື່ອເຮັດໃຫ້ເມືອງສັງທອງ ສືບຕໍ່ມີການພັດທະນາຢ່າງຮອບດ້ານ ແລະ ຕໍ່ເນື່ອງ ຊີວິດການເປັນຢູ່ຂອງປະຊາຊົນດີຂຶ້ນກວ່າເກົ່າ, ຈຳນວນຄອບຄົວທຸກຍາກຫຼຸດລົງ, ທ່ານນາຍົກລັດຖະມົນຕີ ໄດ້ມີຄໍາເຫັນຊີ້ນໍາ ແລະ ເນັ້ນໜັກໃຫ້ເມືອງສືບຕໍ່ເອົາໃຈໃສ່ ເປັນຕົ້ນ ຕ້ອງແນະນຳ ແລະສົ່ງເສີມໃຫ້ປະຊາຊົນຮູ້ທຳມາຫາກິນແບບໃໝ່, ໃຫ້ເອົາໃຈໃສ່ນໍາໃຊ້ທ່າແຮງຂອງເມືອງໃຫ້ເກີດປະໂຫຍດສູງສຸດໂດຍສະເພາະການປົກປັກຮັກສາປ່າໄມ້ ແລະ ສ້າງແຜນຈັດສັນ ແລະ ນຳໃຊ້ປ່າໄມ້ ລວມທັງການພັດທະນາປ່າປອກໂຫຼ້ນໂດຍສ້າງໃຫ້ເປັນໂຄງການແລະ ແຜນການພັດທະນາລະອຽດ, ໃຫ້ເອົາໃຈໃສ່ຈັດສັນເຂດການປູກຝັງ-ລ້ຽງສັດໃຫ້ດີ; ເອົາໃຈໃສ່ພັດທະນາວຽກງານການປະມົງ, ສົ່ງເສີມການຜະລິດສະບຽງອາຫານ, ກະສິກໍາສະອາດຕິດພັນກັບການສົ່ງເສີມການປຸງແຕ່ງເພື່ອຕອບສະໜອງກັບຄວາມຕ້ອງການສັງຄົມ ແລະ ການທ່ອງທ່ຽວ; ພັດທະນາວຽກງານບໍ່ແຮ່ແບບຍືນຍົງ ແລະ ບໍ່ທຳລາຍສິ່ງແວດລ້ອມ; ຊຸກຍູ້ສົ່ງເສີມການທ່ອງທ່ຽວ ໂດຍສະເພາະການທ່ອງທ່ຽວຕາມລຽບແມ່ນໍ້າຂອງ ແລະ ສະຖານທີ່ທ່ອງທ່ຽວອື່ນໆທີ່ເຫັນວ່າເປັນທ່າແຮງ. ພ້ອມນັ້ນ ກໍໃຫ້ເອົາໃຈໃສ່ສົ່ງເສີມການຜະລິດເປັນສິນຄ້າຂອງປະຊາຊົນ ເພື່ອດຶງດູດການທ່ອງທ່ຽວ; ສ້າງສິ່ງອໍານວຍຄວາມສະດວກໃນດ້ານຕ່າງໆ ເພື່ອດຶງດູດນັກລົງທຶນໃຫ້ເຂົ້າມາລົງທຶນພາຍໃນເມືອງໃຫ້ຫຼາຍຂຶ້ນຕິດພັນກັບການເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບພາຍໃນເມືອງສັງທອງໃຫ້ດີ; ສືບຕໍ່ພັດທະນາວຽກງານການສຶກສາ ແລະ ວຽກງານສາທາລະນະສຸກ, ເພີ່ມທະວີແກ້ໄຂປະກົດການຫຍໍ້ທໍ້ຕ່າງໆໃນສັງຄົມເປັນຕົ້ນບັນຫາຢາເສບຕິດ ແລະ ອື່ນໆ; ບັນຫາສໍາຄັນແມ່ນພວກເຮົາຕ້ອງພ້ອມກັນຕັດສິນໃຈ, ບຸກໜ້າບືນຕົວຜ່ານຜ່າຄວາມຫຍຸ້ງຍາກດ້ານຕ່າງໆ ເພື່ອເຮັດໃຫ້ເມືອງສັງທອງມີບາດກ້າວໃໝ່ ແລະ ມີການພັດທະນາກ້າວຂຶ້ນຢ່າງບໍ່ຢຸດຢັ້ງ. ນອກນັ້ນ ໃຫ້ເອົາໃຈໃສ່ເຝົ້າລະວັງ ແລະ ຕິດຕາມສະພາບການແຜ່ລະບາດຂອງເຊື້ອໄວຣັສຕ່າງໆຈາກຂໍ້ມູນຂ່າວສານທາງການໃນແຕ່ລະໄລຍະ, ປະຕິບັດຕາມການແນະນຳໃນການປ້ອງກັນພະຍາດ ແລະ ໃຫ້ມີສະຕິໃນການບໍລິໂພກຂໍ້ມູນຂ່າວສານຈາກສື່ສັງຄົມອອນລາຍຕ່າງໆ.

ທ່ານນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຢາມ ພື້ນຖານການຜະລິດຂອງພໍ່ແມ່ປະຊົນ ເປັນຕົ້ນແມ່ນກຸ່ມການຜະລິດຕະພັນໄມ້ປ່ອງ ຢູ່ບ້ານນາປໍສາ, ຟາມລ້ຽງງົວນິວຊີແລນ ຢູ່ບ້ານເພຍລາດ, ຝາຍນໍ້າລົ້ນ ບ້ານຫີນສິ່ວ, ຟາມເຕົ່າ, ຟາມປູກໝາກແຕງ, ລວມທັງພົບປະໂອ້ລົມປະຊາຊົນບ້ານຊໍ້ ຊຶ່ງເປັນບ້ານໜຶ່ງໃນສາມບ້ານຂອງໂຄງການທົດລອງຮ່ວມມືແກ້ໄຂຄວາມທຸກຍາກ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ສປ ຈີນ ມີມູນຄ່າ 40 ຕື້ກວ່າກີບ ແນໃສ່ພັດທະນາພື້ນຖານໂຄງລ່າງ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກ ຕາມແນວທາງນະໂຍບາຍທີ່ພັກ-ລັດ ວາງອອກ ໃຫ້ປະກົດຜົນເປັນຈິງ.

(ຂ່າວ: ຫສນຍ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110