ຫົວ​ຂໍ້ : ໂຮງໝໍສູນກາງ 103 ກຽມພ້ອມຮອງຮັບ ຜູ້ຕິດເຊື້ອພະຍາດໄວຣັດ ໂຄໂຣນາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 10/02/2020 09:57:26 ຈຳ​ນວນ​ຜູ້​ເຂົ້າ​ຢ້ຽມ​ຊົມ 325 ຄັ້ງ

ເພື່ອ​ເປັນ​ການ​ກະກຽມ​ຄວາມ​ພ້ອມ​ໃນ​ການ​ຮັບ​ມື​ກວດ​ກັ່ນ​ກອງ ພະຍາດ​ອັກ ເສບ​ປອດ​ຈາກ ເຊື້ອ​ຈຸ​ລະ​ໂ​ຣກ​ສາຍ​ພັນ​ໃໝ່ ຫຼື ເຊື້ອ​ໄວ​ຣັດ​ໂຄ​ໂ​ຣ​ນາ ໃນ​ວັນ​ທີ 7 ກຸມພາຜ່ານ​ມາ  ທ່ານ ບຸນ​ກອງ ສີ​ຫາ​ວົງ ລັດຖະມົນຕີ​ກະຊວງ​ສາທາລະນະ​ສຸກ​ໄດ້​ລົງ​ຕິດຕາມ​ຄວາມ​ພ້ອມ ໃນ​ການ​ກະກຽມ​ປ້ອງກັນ​ພະ ຍາດ​ດັ່ງກ່າວ ທີ່​ໂຮງ​ໝໍ​ສູນ​ກາງ 103 ໂດຍ​ການ​ຕ້ອນຮັບ​ຂອງ ທ່ານ ພົນ​ຈັດຕະວາ ບົວ​ສິງ ອິນ​ທະ​ວົງ ຫົວໜ້າ​ກົມ​ເສນາຮັກ ​ກະຊວງ​ປ້ອງ​ກັນ​ປະເທດ ພ້ອມ​ດ້ວຍຄະ​ນະ.
ທ່ານ ພັນ​ເອກ ສຸ​ລິ​ພັນ ເພັດ​ຈັນທະ​ລາ ​ຫົວໜ້າ​ການ​ທະຫານ​ໂຮງໝໍ​ສູນ​ກາງ 103 ກອງທັບ ຫົວໜ້າ​ວິຊາ​ການ​ແພດ ໄດ້​ລາຍ​ງານ​ໃຫ້​ທ່ານ​ລັດຖະມົນຕີ​ກະຊວງ​ສາທາລະນະ​ສຸກ​ຊາບ​ວ່າ: ໂຮງໝໍ​ສູນ​ກາງ 103 ກອງທັບ​ປະຊາຊົນ​ລາວ​ເປັນ​ອີກ​ໂຮງໝໍ​ໜຶ່ງ​ທີ່​ກະຊວງ​ສາທາລະນະ​ສຸກ​ຈັດ​ເປັນ​ສະຖານທີ່​ກວດ​ກັ່ນ​ກອງ​ຄົນ​ເຈັບ​ກໍລະນີ​ສົງ​ໄສ ຕາມ 4 ນິ​ຍາມ ຂອງ​ຜູ້​ທີ່​ຕິດເຊື້ອ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂລກ​ໄວ​ຣັດ​ໂຄ​ໂຣ​ນາ ແລະ ໄດ້​ກະກຽມ​ບຸກ​ຄະລາ​ກອນ​ທີ່​ມີ​ຄວາມ​ຊ່ຽວຊານ 20 ກວ່າ​ຄົນ ​ພ້ອມ​ສະຖານທີ່​ເພື່ອ​ກັ່ນ​ກອງ​ຄົນ​ເຈັບ​ໄວ້​ຢູ່​ເຂດ​ຮ້ອນ ຊຶ່ງ​ມີ 4 ຫ້ອງ 6 ຕຽງ​ນອນ ໃນ​ໄລຍະ​ຜ່ານ​ມາ​ໄດ້​ມີ​ກໍລະນີ​ສົງ​​ໄສ 3 ກໍລະນີ ແຕ່​ບໍ່​ພົບເຊື້ອ​ພະຍາດ​ນີ້.
ໃນ​ໂອກາດ​ດັ່ງກ່າວ​ທ່ານ​ລັດຖະມົນຕີ​ກະຊວງ​ສາທາລະນະ​ສຸກ​ຍັງ​ໄດ້​ເນັ້ນ​ໃຫ້​ຄະນະ​ນຳ​ຂອງ​ໂຮງໝໍ​ສູນ​ກາງ 103 ​ຈົ່ງ​ໄດ້​ພ້ອມ​ກັນ​ເອົາໃຈໃສ່​ຕິດຕາມ​ກະກຽມ​ຄວາມ​ພ້ອມ​ທຸກ​ດ້ານເຊັ່ນ: ບຸກ​ຄະລາ​ກອນ, ​ສະຖານທີ່, ອຸປະກອນ ເພື່ອ​ເຝົ້າ​ລະວັງ ແລະ ຕິດຕາມ​ຄົນ​ເຈັບ​ກໍລະນີ​ສົງ​ໄສຄື: ຄົນ​ເຈັບ​ທີ່​ມາ​ກວດ​ທີ່​ມີ​ອາການ​ເປັນໄຂ້ ຫຼາຍ​ກວ່າ 38 ອົງສາ ​ເປັນຫວັດ ເປັນ​ໄອ ຫາຍໃຈ​ຝຶດ​ ຄົນ​ເຈັບ​ທີ່​ມີ​ປະຫວັດ​ມາ​ຈາກ​ເຂດ​ທີ່​ມີ​ຄວາມ​ສ່ຽງ ຫຼື ການ​ລະບາດ​ໄດ້​ໃກ້​ຊິດ​ກັບ​ຄົນ​ທີ່​ເປັນ​ພະຍາດ​ດັ່ງກ່າວ ຖ້າ​ພົບ​ເຫັນ​ແມ່ນ​ໃຫ້​ນໍາ​ຕົວ​ຄົນ​ເຈັບ​ມາ​ກວດ​ກັ່ນ​ກອງ ກວດ​ຫາ​ເຊື້ອ​ໃນ​ກໍລະນີ​ພົບ​ວ່າ​ມີ​ຜູ້​ຕິດເຊື້ອ​ແມ່ນ​ຈະ​ນຳ​ສົ່ງ​ໄປ​ປິ່ນປົວ​ຢູ່​ໂຮງໝໍ​ມິດຕະພາບ.
 (ຂ່າວ: ສຳ​ນານ)


 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110