ໜັງສືພິມ ປະຊາຊົນ

ບໍລິສັດ IHC ມອບຢາ ແລະ ອຸປະກອນການແພດ ໃຫ້ແກ່ລັດຖະບານ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 11/02/2020 09:00:40 ຈຳນວນຢ້ຽມຊົມ 485 ຄັ້ງ

ບໍລິສັດທີ່ປຶກສາດ້ານການ ລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ (IHC ) ໄດ້ນຳເອົາຢາ ແລະ ອຸປະກອບການແພດ ສຳລັບການປ້ອງກັນ ແລະ ກວດເຊື້ອພະຍາດ ອັກເສບປອດ ສາຍພັນໃໝ່ ໂຄໂຣນາ (Corona Virus) ມາມອບໃຫ້ລັດຖະບານ ແຫ່ງ ສປປ ລາວ.
ພິທີມອບ-ຮັບ ເຄື່ອງດັ່ງກ່າວ ໄດ້ຈັດຂຶ້ນໃນວັນທີ 10 ກຸມພານີ້ ທີ່ກະຊວງການເງິນ ໂດຍການກ່າວມອບ ຂອງທ່ານ ປີຊາໄຊ ແກ້ວໄຊຍະຈັກ, ປະທານບໍລິສັດທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ແລະ ໃຫ້ກຽດກ່າວຮັບ ໂດຍແມ່ນທ່ານ ສົມດີ ດວງດີ ຮອງນາຍົກລັດຖະມົນ ຕີ ລັດຖະມົນຕີກະຊວງການ ເງິນ ຫົວໜ້າຄະນະສະເພາະ ກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ (Novel Corona Virus: NCoV); ມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍ ພະນັກງານທີ່ກ່ຽວຂ້ອງຂອງສອງຝ່າຍເຂົ້າຮ່ວມ.
ເຄື່ອງທີ່ນຳມາມອບ ເພື່ອຊ່ວຍເຫຼືອ ໃນຄັ້ງນີ້ ປະກອບມີ ເຄື່ອງກວດພະຍາດ ຈຳນວນ 2 ເຄື່ອງ, ນໍ້າຢາກວດເຊື້ອພະຍາດ ຈຳນວນ 2.500 ຫຼອດ, ຊຸດເຄື່ອງນຸ່ງປ້ອງກັນຈຳນວນ 120 ຊຸດ, ຖົງມື ຈຳນວນ 100.000 ຄູ່, ລວມມູນຄ່າທັງໝົດ ປະມານ 100.000 ໂດລາ.
ໃນໂອກາດນີ້, ທ່ານ ສົມດີ ດວງດີ ໄດ້ຕາງໜ້າໃຫ້ລັດຖະ ບານ ກ່າວສະແດງຄວາມຂອບ ໃຈ ແລະ ຊົມເຊີຍຕໍ່ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ທີ່ໄດ້ນຳເອົາຢາ ແລະ ອຸປະກອນການແພດມາຊ່ວຍ ເຫຼືອໃນຄັ້ງນີ້ ຊຶ່ງການປະ ກອບສ່ວນຊ່ວຍເຫຼືອດັ່ງ ກ່າວ ແມ່ນສອດຄ່ອງກັບຄວາມ ຮຽກຮ້ອງຕ້ອງການຂອງສະ ພາບຄວາມເປັນຈິງໃນປັດຈຸ ບັນ ໂດຍສະເພາະ ການປະ ກອບສ່ວນປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກ ເຊື້ອຈຸລະໂຣກສາຍພັນໃໝ່ (Novel Corona Virus: NCoV) ຢູ່ ສປປ ລາວ ພ້ອມທັງຊີ້ນຳໃຫ້ພາກສ່ວນກ່ຽວຂ້ອງ ຂອງກະຊວງສາທາລະນະສຸກ ນຳເອົາເຄື່ອງຊ່ວຍເຫຼືອດັ່ງກ່າວ ໄປຄຸ້ມຄອງ ແລະ ນຳໃຊ້ ໃຫ້ມີປະສິດທິພາບ ແລະ ປະສິດທິຜົນສູງສຸດ.
(ຂ່າວ ແລະ ພາບ: ກົມປະ ຊາສຳພັນ ສນຍ)