ຫົວ​ຂໍ້ : ຍີ່ປຸ່ນ ກຽມແຜນກະຕຸ້ນເສດຖະກິດ 26 ພັນຕື້ເຢັນ

ເຜີຍ​ແຜ່​ໂດຍ​: admin ເວ​ລາ: 15/12/2019 14:34:52 ຈຳ​ນວນ​ຜູ້​ເຂົ້າ​ຢ້ຽມ​ຊົມ 108 ຄັ້ງ

 ຂ່າວ​ຕ່າງປະເທດ​ລາຍ​ງານ​ເມື່ອ​ມໍ່ໆ​ມາ​ນີ້​ວ່າ: ລັດ ຖະບານ​ຍີ່ປຸ່ນ ກໍາ​ລັງ​ກະກຽມ​ອອກ​ມາດ​ຕະການ​ກະ​ຕຸ້ນ​ເສດຖະກິດ​ໃນ​ມູນ​ຄ່າ 26 ພັນ​ຕື້​ເຢັນ ຫຼື ປະມານ 2,39 ຕື້​ໂດ​ລາ ເພື່ອ​ຟື້ນ​ຟູ​ເສດຖະກິດ​ຂອງ​ຍີ່ປຸ່ນ ໃນ​ໄລຍະ​ເວລາ​ທີ່​ສະພາບ​ເສດຖະກິດ​ທົ່ວ​ໂລກ​ເຕີບ​ໂຕ​ຊ້າ​ລົງ ແລະ ເພື່ອ​ຮັບ​ມື​ກັບ​ຜົນ​ກະທົບ​ຂອງ​ມາດ​ຕະການ​ປັບ​ຂຶ້ນ​ພາສີ​ການ​ບໍລິໂພກ ທີ່​ມີ​ຜົນ​ບັງຄັບ​ໃຊ້​ໃນ​ເດືອນ​ຕຸລາ​ທີ່​ຜ່ານ​ມາ.

   ຂ່າວ​ລະບຸ​ວ່າ: ທ່ານ ຊິນ​ໂຊ ອາ​ເບະ ນາຍົກລັດຖະມົນຕີ​ຍີ່ປຸ່ນ ເປີດເຜີຍ​ໃນ​ກອງ​ປະຊຸມ​ຮ່ວມ​ກັບ​ເຈົ້າ​ໜ້າທີ່​ລະດັບ​ສູງ​ຂອງ​ລັດຖະບານ ກ່າວ​ວ່າ: ພວກ​ເຮົາ​ໄດ້​ມີ​ມາດ​ຕະການ​ທີ່​ມີ​ປະສິດ​ຕິ​ພາບ ໂດຍ​ມີ​ເປົ້າ​ໝາຍ​ທີ່​ຈະ​ຊ່ວຍ​ໃຫ້​ເສດຖະກິດ​ຂອງ​ຍີ່ປຸ່ນ ລອດ​ພົ້ນ​ຈາກ​ຄວາມ​ສ່ຽງ​ທີ່​ຫຼຸດ​ລົງ. ມາດ​ຕະການ​ກະ​ຕຸ້ນ​ເສດຖະກິດ​ສະບັບ​ນີ້ ຖື​ເປັນ​ສະບັບ​ທຳອິດ​ໃນ ຮອບ 3 ປີ ແລະ ມີ​ຈຸດປະສົງ​ທີ່​ຈະ​ຮອງ​ຮັບ​ຜົນ​ກະທົບ​ຈາກ​ມາດ​ຕະການ​ປັບ​ຂຶ້ນ​ພາສີ​ການ​ບໍລິໂພກ ຈາກ​ລະດັບ 8% ຂຶ້ນ​ສູ່​ລະດັບ 10% ຊຶ່ງ​ມີ​ຜົນ​ບັງຄັບ​ໃຊ້ ໃນ​ວັນ​ທີ 1 ຕຸລາ​ຜ່ານ​ມາ ແລະ ເພື່ອ​ຮັບ​ມື​ກັບ​ສະພາບ​ເສດຖະກິດ​ທີ່​ຊ້າ​ລົງ ເນື່ອງ​ຈາກ​ຂໍ້​ຂັດ​ແຍ້ງ​ທາງ​ການ​ຄ້າ​ລະຫວ່າງ​ອາ​ເມ​ຣິ​ກາ ແລະ ຈີນ.

   ຂ່າວ​ຍັງ​ລະບຸ​ວ່າ: ມາດ​ຕະການ​ດັ່ງກ່າວ ເນັ້ນ​ໃສ່​ການ​ໃຊ້​ຈ່າຍ​ດ້ານ​ສາທາລະນະ​ໃນ​ວົງ​ເງິນ 13,2 ພັນ​ຕື້​ເ​ຢັນ ຊຶ່ງ​ລວມ​ເຖິງ​ການ​ປ່ອຍ​ເງິນ​ກູ້​ດອກ​ເບ້ຍ​ຕ່ຳ ໂດຍ​ມີ​ຈຸດປະສົງ​ທີ່​ຈະ​ຟື້ນ​ຟູ​ລະບົບ​ພື້ນຖານ​ໂຄງ​ລ່າງ​ທີ່​ໄດ້​ຮັບ​ຄວາມ​ເສຍ​ຫາຍ​ຈາກ​ໄພ​ທຳ​ມະ​ຊາດ​ໃນ​ໄລຍະ​ຜ່ານ​ມາ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110