ຫົວ​ຂໍ້ : ມສ ລຽວໂຕ ລະດົມທຶນປະກອບສ່ວນປ້ອງກັນການລະບາດ ຂອງເຊື້ອຈຸລະໂຣກໂຄໂລນາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 11/02/2020 09:03:33 ຈຳ​ນວນ​ຜູ້​ເຂົ້າ​ຢ້ຽມ​ຊົມ 291 ຄັ້ງ

ຄະນະ​ບໍລິຫານ ຄູ​-​ອາຈານ​ໂຮງຮຽນ ມສ ລຽວ​ໂຕ ແລະ ກຸ່ມ​ໂຮງຮຽນ​ສອນ ແລະ ຮຽນ​ພາສາ​ຈີນ  ຮ່ວມ​ໃຈ​ກັນ​ລະດົມ​ທຶນ ເພື່ອ​ປະກອບສ່ວນ​ປ້ອງ​ກັນ​ການ​ລະບາດ​ຂອງ​ພະຍາດ​ອັກເສບ​ປອດ​ ທີ່​ເກີດ​ຈາກ​ເຊື້ອ​ຈຸ​ລະ​ໂຣກ (NCOV) ຢູ່ ສປ ຈີນ ພາຍຫຼັງ​ໄດ້​ມີ​ການ​ລະບາດ​ຢູ່​ເມືອງ​ອູ​ຮັ້ນ ແຂວງ​ຫູ​ເປີຍ ສປ ຈີນ ແຕ່​ທ້າຍ​ປີ 2019 ເປັນຕົ້ນ​ມາ ແລະ ແຜ່​ລາມ​ໄປ​ຫຼາຍ​ແຂວງ​ຂອງ ສປ ຈີນ ແລະ ຫຼາຍ​ປະເທດ​ໃນໂລກ ໃນ​ປັດ​ຈຸ​ບັນ.     
ການ​ລະດົມ​ທຶນ​ຄັ້ງ​ນີ້, ຈັດ​ຂຶ້ນ​​ໃນວັນ​ທີ 8 ກຸມພາ​ຜ່ານ​ມາ ຢູ່​ໂຮງຮຽນ​ດັ່ງກ່າວ ໂດຍ​ມີ​ທ່ານ ສົມ​ປະສົງ ຈັນທະ​ວົງ ປະທານ​ໂຮງຮຽນ ມສ ລຽວ​ໂຕ ປະທານ​ກຸ່ມ​ໂຮງຮຽນ​ສອນ ແລະ ຮຽນ​ພາສາ​ຈີນ, ທ່ານ ໄຊ​ປະເສີດ  ຕັງ​ຊະນະ ຮອງ​ປະທານ​ໂຮງຮຽນ ມສ ລຽວ​ໂຕ ຮອງ​ປະທານ​ກຸ່ມ​ໂຮງຮຽນ​ສອນ ແລະ ຮຽນ​ພາສາ​ຈີນ, ທ່ານ ບຸນ​ສົງ ສະຫວັນ​ວາ ລີ ຮອງ​ປະທານ​ໂຮງຮຽນ ມສ  ລຽວໂຕ ເລຂາທິການ​ກຸ່ມ​ໂຮງຮຽນ​ສອນ ແລະ ຮຽນ​ພາສາ​ຈີນ ພ້ອມ​ດ້ວຍ​ຄູ​-​ອາຈານ ເຂົ້າ​ຮ່ວມ.
ຜ່ານ​ການ​ລະດົມ​ທຶນ ສາມາດ​ຮວບຮວມ​ເງິນ​ໄດ້​ທັງ​ໝົດ 100 ລ້ານ​ກີບ ຊຶ່ງ​ເງິນ​ຈໍາ​ນວນ​ນີ້ ຈະ​ນໍາ​ໄປ​ມອບ​ໃຫ້​ລັດຖະບານ ສປປ ລາວ ນໍາ​ໄປ​ມອບ​ຕໍ່ໃຫ້​ລັດຖະບານ ສປ ຈີນ ນໍາ​ໃຊ້​ເຂົ້າ​ໃນ​ການ​ປ້ອງ​ກັນ​ການ​ລະບາດ​ຂອງ​ພະຍາດ​​ອັກເສບ​ປອດ​ຮຸນ​ແຮງທີ່​ເກີດ​ຈາກ​ເຊື້ອ​ຈຸ​ລະ​ໂຣກ (NCOV) ຢູ່ ສປ ຈີນ.
(ຂ່າວ​-​ພາບ: ສະບາ​ໄພ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110