ຫົວ​ຂໍ້ : ອິນໂດເນເຊຍອົສຕຣາລີ ເພີ່ມການຮ່ວມມືຮອບດ້ານ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 12/02/2020 08:53:58 ຈຳ​ນວນ​ຜູ້​ເຂົ້າ​ຢ້ຽມ​ຊົມ 211 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ວັນ​ທີ 10 ກຸມພາ​ຜ່ານ​ມາ, ທ່ານ ໂຈ​ໂກ ວິ​ໂດ​ໂດ ປະ​ທາ​ນາ​ທິບໍດີ ອິນ​ໂດ​ເນ​ເຊຍ ກ່າວ​ວ່າ: ອິນ​ໂດ​ເນ​ເຊຍ ແລະ ອົສ​ຕຣາ​ລີ ຄວນ​ຮ່ວມ​ມື​ກັນ​ເປັນ​ເສົາ​ຫຼັກ​ສຳລັບ​ການ​ເປັນ​ພັນທະ​ມິດ​ທີ່​ພັດທະນາ​ຢ່າງ​ບໍ່​ຢຸດ​ຢັ້ງ​ໃນ​ພາກ​ພື້ນ​ປາ​ຊີ​ຟິກ ເນື່ອງ​ຈາກ​ລັດຖະບານ ອິນ​ໂດ​ເນ​ເຊຍ ມີ​ຄວາມ​ເຂົ້າໃຈ​ຕໍ່​ຄວາມ​ທ້າ​ທາຍ​ທີ່​ປ່ຽນແປງ​ໄປ​ຢ່າງ​ຕໍ່​ເນື່ອງ​ທັງ​ໃນ​ດ້ານ​ສະພາບ​ພູມ​ອາກາດ ແລະ ການ​ເມືອງ.
  ຂະນະ​ດຽວ​ກັນ, ທ່ານ ວິ​ໂດ​ໂດ ແລະ ທ່ານ ສະ​ກັອດ ມໍ​ຣິ​ສັນ ນາຍົກລັດຖະມົນຕີ​ອົສ​ຕຣາ​ລີ ຮ່ວມ​ກັນ​ເປັນ​ສັກຂີ​ພິຍານ​ໃນ​ພິທີ​ລົງ​ນາມ​ແຜນ​ປະຕິບັດ​ການ 100 ວັນ ເພື່ອ​ກຽມ​ຄວາມ​ພ້ອມ​ກ່ອນ​ການ​ດຳເນີນ​ການ​ຕາມ​ຂໍ້​ຕົກລົງ​ການ​ຄ້າ​ເສລີ (FTA) ຢ່າງ​ເປັນ​ທາງ​ການ. ອີກ​ດ້ານ​ໜຶ່ງ, ອົສ​ຕຣາ​ລີ ແລະ ອິນ​ໂດ​ເນ​ເຊຍ ແມ່ນ​ໄດ້​ເຈລະຈາ FTA ກັນ​ມາ​ຢ່າງ​ຍາວ​ນານ​ຕັ້ງແຕ່​ປີ 2010 ກ່ອນ​ທີ່​ສະພາ​ຂອງ ອິນ​ໂດ​ເນ​ເຊຍ​ໃຫ້​ສັດຕະຍາບັນ​ເມື່ອ​ອາທິດ​ທີ່​ຜ່ານ​ມາ. ເນື້ອ​ໃນ​ສຳຄັນ​ຄື: ອິນ​ໂດ​ເນ​ເຊຍ ຍົກເວັ້ນ​ກຳແພງ​ພາສີ​ໃຫ້​ກັບ​ສິນຄ້າ​ທັງ​ໝົດ​ຂອງ​ອົສ​ຕຣາ​ລີ, 94% ຂອງ​ສິນຄ້າ​ທີ່​ອິນ​ໂດ​ເນ​ເຊຍ ສົ່ງ​ອອກ​ໄປ​ຍັງ ອົສ​ຕຣາ​ລີ ຈະ​ໄດ້​ຮັບ​ການ​ຍົກເວັ້ນ​ພາສີ ແລະ ລັດຖະບານ​ອົສ​ຕຣາ​ລີ ໄດ້​ເພີ່ມ​ໂອກາດ​ໃຫ້​ກັບ ອິນ​ໂດ​ເນ​ເຊຍ ໃນ​ການ​ເຂົ້າ​ສູ່​ອຸດສາຫະກຳ​ການ​ກະເສດ​ຂອງ​ອົສ​ຕຣາ​ລີ. ນອກຈາກ​ນີ້, ໜ່ວຍ​ງານ​ດ້ານ​ການ​ສຶກສາ, ສາທາລະນະ​ສຸກ ແລະ ອຸດສາຫະກຳ​ເໝືອງ​ແຮ່ ຂອງ​ອົສ​ຕຣາ​ລີ ຈະ​ໄດ້​ຮັບ​ໂອກາດ​ຫຼາຍ​ຂຶ້ນ​ໃນ​ການ​ເຂົ້າ​ສູ່​ຕະຫຼາດ ອິນ​ໂດ​ເນ​ເຊຍ ເຊັ່ນ​ດຽວ​ກັນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110