ຫົວ​ຂໍ້ : ຍີ່ປຸ່ນ-ອັງກິດ ປຶກສາຫາລືທາງການຄ້າຮ່ວມກັນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 12/02/2020 08:59:31 ຈຳ​ນວນ​ຜູ້​ເຂົ້າ​ຢ້ຽມ​ຊົມ 276 ຄັ້ງ

  ຂ່າວ​ຕ່າງປະເທດ​ລາຍ​ງາຍ​ວ່າ: ວັນ​ທີ 9 ກຸມພາ​ທີ່​ຜ່ານ​ມາ, ທ່ານ ໂດ​ມີນິກ ຣາບ ລັດຖະມົນຕີ​ກະຊວງ​ການ​ຕ່າງ ປະເທດ​ອັງກິດ ໄດ້​ເດີນທາງ​ໄປ​ຢ້ຽມຢາມ​ນະຄອນຫຼວງ​ໂຕ​ກຽວ ປະເທດ​ຍີ່ປຸ່ນ ໂດຍ​ການ​ຢ້ຽມຢາມ​ຕ່າງປະເທດ​ຄັ້ງ​ນີ້​ເປັນ​ຄັ້ງ​ທຳອິດ​ຂອງ​ທ່ານ ຣາບ ນັບ​ຕັ້ງແຕ່​ອັງກິດ ແຍກ​ຕົວ​ອອກ​ຈາກ​ການ​ເປັນ​ສະມາຊິກ​ຂອງ​ສະຫະພາບ​ເອີ​ຣົບ (EU) ເມື່ອ​ວັນ​ທີ 31 ມັງກອນ​ທີ່​ຜ່ານ​ມາ. ພາຍຫຼັງ​ເປັນ​ສະມາຊິກ​ມາ 47 ປີ ແລະ ຍີ່ປຸ່ນ​ເປັນ​ຈຸດໝາຍ​ແຫ່ງ​ທຳອິດ​ໃນ​ທະວີບອາຊີ ຫຼັງ​ຈາກ​ທ່ານ ຣາບ ສຳເລັດ​ພາລະກິດ​ການ​ຢ້ຽມຢາມ ອົສ​ຕຣາ​ລີ.
  ທ່ານ ຣາບ ໄດ້​ພົບ​ປະ​ປຶກສາ​ຫາລື​ກັບ​ທ່ານ ໂທ​ຊິ​ມິດ​ສຶ ໂມ​ເຕ​ງິ ລັດຖະມົນຕີ​ກະຊວງ​ການ​ຕ່າງປະເທດ​ຍີ່ປຸ່ນ ຊຶ່ງ​ບັນຫາ​ສຳຄັນ​ກ່ຽວ​ກັບ​ການ​ປຶກສາ​ຫາລື​ໃນ​ຫົວຂໍ້​ການ​ຄ້າ​ທີ່​ທັງ​ສອງ​ຝ່າຍ​ເຫັນ​ດີ​ກຽມ​ຄວາມ​ພ້ອມ​ຮ່ວມ​ກັນ ເພື່ອ​ນຳໄປ​ສູ່​ການ​ເຈລະຈາ​ຂໍ້​ຕົກລົງ​ການ​ຄ້າ​ເສລີ (FTA) ລະຫວ່າງ ອັງກິດ ແລະ ຍີ່ປຸ່ນ​ຢ່າງ​ເປັນ​ທາງ​ການ. ພາຍຫຼັງ​ລິ​ເລີ່ມ​ເມື່ອ​ປີ 2013 ຊຶ່ງ​ຄວນ​ດຳເນີນ​ການ​ຢ່າງ​ມີ​ປະສິດທິພາບ ແລະ ສຳເລັດ​ໃຫ້​ໄວ​ທີ່​ສຸດ. ຫຼັງ​ຈາກ​ນີ້, ທ່ານລັດຖະມົນຕີ​ກະຊວງ​ການ​ຕ່າງປະເທດ​ອັງກິດ ມີ​ກຳນົດ​ເດີນທາງ​ໄປ​ຢ້ຽມຢາມ ສິງກະໂປ ແລະ ມາ​ເລ​ເຊຍ ເປັນ​ຈຸດໝາຍ​ຕໍ່​ໄປ.
  ຂ່າວ​ລະບຸ​ວ່າ: ບໍລິສັດ​ທີ່​ຜະລິດ​ຍານພາຫະນະ​ຫຼາຍ​ແຫ່ງ​ຂອງ​ຍີ່ປຸ່ນ ແມ່ນ​ປະເທດ​ອັງກິດ ເປັນ​ຖານ​ການ​ຜະລິດ​ໃນ​ເອີ​ຣົບ​ມາ​ດົນ​ນານ​ຫຼາຍ​ທົດ​ສະ​ວັດ ແລະ ຜູ້​ປະກອບ​ການ​ທຸກ​ແຫ່ງ​ມີ​ຄວາມ​ຄິດ​ເຫັນ​ໄປ​ໃນ​ທິດ​ທາງ​ດຽວ​ກັນ​ວ່າ: ຖ້າ​ຫາກ​ຜົນ​ການ​ເຈລະຈາ ລະຫວ່າງ ອັງກິດ​ກັບ EU ໃນ​ໄລຍະ​ປ່ຽນ​ຜ່ານ​ທີ່​ທ່ານ​ໂບ​ຣິສ ຈອນ​ຊັນ ນາຍົກລັດຖະມົນຕີ​ອັງກິດ ຕ້ອງການ​ໃຫ້​ສຳເລັດ​ພາຍ​ໃນ​ວັນ​ທີ 31 ທັນວາ​ປີ​ນີ້ ບໍ່​ໄດ້​ຂໍ້​ສະຫຼຸບ  ໝາຍ​ຄວາມ​ວ່າ​ຈະ​ກາຍເປັນ​ການ​ອອກ​ຈາກ​ສະຫະພາບ​ເອີ​ຣົບ ແບບ​ບໍ່​ມີ​ຂໍ້​ຕົກລົງ, ອຸດ​ສາ​ຫະ​ກໍາ​ຍານ​ພາ ຫະ​ນະ​ຂອງ​ຍີ່ປຸ່ນ ໃນ​ອັງກິດ​ອາດ​ຈະ​ບໍ່​ຍືນ​ຍົງ​ອີກ​ຕໍ່​ໄປ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110