ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວ​ທ) ແຂວງໄຊສົມບູນ ໄດ້ຈັດພິທີມອບ-ຮັບໜ້າທີ່ ລະຫວ່າງ ຫົວໜ້າພະແນກ ຜູ້ເກົ່າ ແລະ ຜູ້ໃໝ່ ຂຶ້ນ​ໃນວັນທີ 7 ຕຸລາຜ່ານ​ມານີ້ ທີ່ຫ້ອງປະຊຸມພະແນກ​ດັ່ງ​ກ່າວ ໂດຍການເປັນປະທານ ຂອງທ່ານ ພອຍຄຳ ຮຸ່ງບຸນຍວງ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ, ມີທ່ານ ຕົ່ງມົວ ຊົວໂກ້ ຮອງເຈົ້າແຂວງ ຫົວ​ໜ້າ​ພະ​ແນກ ຖວ​ທ ແຂວງ ແລະ ພາກ​ສ່ວນ​ກ່ຽວ​ຂ້ອງເຂົ້າຮ່ວມ.

ໃນກອງປະຊຸມ, ທ່ານ ທອງວັນ ທຳມະວົງ ຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການແຕ່ງຕັ້ງຮັກສາການຫົວໜ້າພະແນກ ຖວ​ທ ແຂວງ, ຂໍ້ຕົກລົງວ່າດ້ວຍການແຕ່ງຕັ້ງ ຮອງຫົວໜ້າພະແນກ. ໂອກາດນີ້, ທ່ານ ຕົ່ງມົວ ຊົວໂກ້ ໄດ້ຜ່ານບົດລາຍງານ ການນຳພາຊີ້ນຳ ວຽກງານໃນໄລຍະຜ່ານມາ. ຈາກນັ້ນ, ທ່ານ ຕົ່ງມົວ ຊົວໂກ້ ຫົວໜ້າພະແນກ ຖວ​ທ ຜູ້ເກົ່າ ແລະ ທ່ານ ທົງສະຫວັນ ໂພສະລາດ ຮັກສາການຫົວໜ້າພະແນກ ຖວ​ທ ຜູ້​ໃໝ່ ໄດ້ເຊັນບົດບັນທຶກມອບ-ຮັບໜ້າທີ່ວຽກງານຂອງຫົວໜ້າພະແນກ ຖວ​ທ ເພື່ອສືບຕໍ່ນຳພາຊີ້ນຳ ວຽກງານ ຖວ​ທ ໃຫ້ໄດ້ຮັບໝາກຜົນຂຶ້ນເລື້ອຍໆ.

 ທ່ານ ພອຍຄຳ ຮຸ່ງບຸນຍວງ ໄດ້ຮຽກຮ້ອງມາຍັງຜູ້ທີ່ມາຮັບໜ້າທີ່ໃໝ່ ໃຫ້ນຳໃຊ້ຄວາມຮູ້ຄວາມສາມາດ ເຮັດວຽກຕາມພາລະບົດບາດຂອງຕົນ ເປັນຕົ້ນແມ່ນ ການເຮັດວຽກແບບລວມສູນປະຊາທິປະໄຕ, ເຕົ້າໂຮມຄວາມສາມັກຄີພາຍໃນເປັນປຶກແຜ່ນ, ຍົກສູງການເຮັດວຽກງານການເມືອງແນວຄິດຕໍ່ພະນັກງານສະມາຊິກພັກ ແລະ ພະນັກງານພາຍໃນພະແນກ ພ້ອມທັງເປັນແບບຢ່າງນຳໜ້າທຸກດ້ານໃນການປະຕິດບັດວຽກງານໃນຂົງເຂດ ຖວ​ທ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ.

(ຂ່າວ-ພາບ: ແຂວງ​ໄຊ​ສົມ​ບູນ)