ຫົວ​ຂໍ້ : ປະທານ ສນຊ ຊີ້ນຳວຽກງານຢູ່ ເມືອງສົບເບົາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 13/02/2020 09:04:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 340 ຄັ້ງ

(ຂປລ). ປະທານ​ສູນ​ກາງ​ແນວ​ລາວ​ສ້າງ​ຊາດ (ສນຊ) ພົບ​ປະ​ໂອ້​ລົມ​ຄະນະ​ພັກ, ອຳນາດ​ການ​ປົກຄອງ​ເມືອງ​ສົບ​ເບົາ ໃນ​ວັນ​ທີ 11 ກຸມພາ​ຜ່ານ​ມາ ຮຽກຮ້ອງ​ໃຫ້​ສືບຕໍ່​ຖື​ສຳຄັນ ແລະ ເອົາໃຈໃສ່​ວຽກ​ງານ​ສຶກສາ​ອົບຮົມ​ການເມືອງ​ແນວ​ຄິດ​ໃຫ້​ມີ​ຫຼາຍ​ຮູບ​ຫຼາຍ​ສີ ເພື່ອ​ເພີ່ມ​ຄວາມ ຮັບ​ຮູ້  ແລະ​ ເຂົ້າໃຈ​ແຈ້ງ​ຕໍ່​ແນວທາງ​ນະໂຍບາຍ ຂອງ​ພັກ, ການ​ປະຕິບັດ ລັດ​ຖະ​ທຳ​ມະນູນ ແລະ ກົດໝາຍ, ປະກອບສ່ວນ ເຂົ້າ​ໃນ​ການ​ພັດທະນາ ເສດ​ຖະ​ກິດ​-​ສັງຄົມ,ປົກ​ປັກ​ຮັກສາ​ຮີດຄອງ​ປະເພນີ​ອັນ​ດີງາມ ຂອງ​ບັນດາເຜົ່າ ເມືອງ​ສົບ​ເບົາ ໃຫ້​ນັບ​ມື້​ເຂັ້ມ​ແຂງ.
ໃນ​ໂອກາດ​ພົບ​ປະ​ໂອ້ ລົມ​ຕໍ່​ຄະນະ​ພັກ, ອຳນາດ​ການ​ປົກຄອງ​ເມືອງ​ສົບ​ເບົາ ແຂວງ​ຫົວພັນ, ທ່ານ ໄຊ​ສົມ​ພອນ ພົມວິຫານ ກຳມະການ​ກົມ ການເມືອງ​ສູນ​ກາງ​ພັກ ປະ ທານ​ສູນ​ກາງ​ແນວລາວ​ສ້າງ​ຊາດ ຫົວໜ້າ​ອະນຸ​ກຳມະການ​ໂຄສະນາ ແລະ ຂະບວນ​ການ ກອງ​ປະຊຸມ​ໃຫຍ່​ຜູ້​ແທນ ທົ່ວ​ປະເທດ​ຄັ້ງ​ທີ XI ຂອງ​ພັກ ​ໄດ້​ກ່າວ​ຄຳ​ຊົມເຊີຍຕໍ່​ຜົນ​ສໍາ​ເລັດ​ໃນ​ການ​ນໍາ​ພາ​ຊີ້​ນຳ​ຂອງ​ຄະນະ​ພັກ, ອຳນາດ​ການ​ປົກຄອງ ຂັ້ນ​ຕ່າງໆ, ພີ່ນ້ອງ​ປະຊາຊົນ​ບັນດາເຜົ່າພາຍ​ໃນ​ເມືອງ​ສົບ​ເບົາ​ ທີ່​ໄດ້​ປະກອບ​ສ່ວນ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ ມີ​ຜົນສຳເລັດ​ເປັນ​ຢ່າງ​ດີ. ພ້ອມ​ດຽວ​ກັນ​ນີ້ ກໍໄດ້​ມີ​ທິດ​ຊີ້​ນຳ​ໃຫ້​ສືບຕໍ່​ຖື​ສຳຄັນ ແລະ ເອົາໃຈໃສ່​ການ​ສຶກສາ​ອົບຮົມ​ການເມືອງ​ແນວ​ຄິດ​ຕໍ່​ພະນັກ​ງານຫຼັກ​ແຫຼ່ງ, ທະຫານ, ຕຳຫຼວດ ຕະຫຼອດ​ຮອດປະຊາຊົນ​ບັນດາເຜົ່າ​ໃຫ້​ກວ້າງຂວາງ, ເລິກເຊິ່ງ ຫຼາຍ ຮູບ​ຫຼາຍ​ສີ ເພື່ອ​ໃຫ້​ເຂົາເຈົ້າມີ​ຄວາມ​ຮັບ​ຮູ້ ແລະ ​ເຂົ້າໃຈ​ແຈ້ງ​ຕໍ່​ແນວທາງນະໂຍບາຍ​ຂອງ ພັກ, ປະກອບສ່ວນ​ໃນ​ການປະ ຕິບັດລັດ​ຖະທຳ​ມະນູນ ແລະ​ກົດໝາຍ, ປະກອບສ່ວນເຂົ້າ​ໃນການ​ພັດທະນາ​ເສດ​ຖະ ກິດ​-​ສັງຄົມ​ຂອງ​ເມືອງ, ປົກ​ປັກ​ຮັກສາ​ຮີດຄອງປະເພນີ​ອັນ​ດີງາມຂອງບັນດາເຜົ່າ, ເອົາ ໃຈໃສ່ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຂອງ​ອົງຄະນະ​ພັກ​ເມືອງ, ແຜນ​ພັດທະນາ​ເສດ​ຖະ​ກິດ- ສັງຄົມ​ຂອງ​ເມືອງ​ໃຫ້​ບັນລຸຕາມ​ແຜນການ ໂດຍ ຂຸດ​ຄົ້ນ​ບັນດາ​ທ່າແຮງ ເພື່ອ ສ້າງ​ແຫຼ່ງ​ລາຍ​ຮັບທີ່​ໝັ້ນ​ທ່ຽງ ເປັນຕົ້ນ​ແມ່ນ ວຽກ​ງານ​ບໍລິການ ຕິດ​ພັນ​ກັບ​ການທ່ອງທ່ຽວ​ທຳ​ມະ​ຊາດ ແລະ ວັດທະນະທຳ; ເອົາໃຈໃສ່​ວຽກ​ງານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ເອົາໃຈໃສ່​ສະກັດ​ກັ້ນ ແລະ ແກ້​ໄຂ​ປະກົດ​ການ​ຫຍໍ້ທໍ້​ໃນ​ສັງຄົມ, ການຟຸມ​ເຟືອຍ, ບັນຫາ​ຢາ​ເສບ​ຕິດ, ການ​ຄ້າຂາຍ​ທີ່ບໍ່​ຖືກ ຕ້ອງ​ຕາມ​ລະບຽບ​ກົດໝາຍ; ປົກ​ປັກ​ຮັກສາຊັບພະຍາກອນ​ທຳ​ມະ​ຊາດ ກໍຄື​ປ່າໄມ້​ທີ່​ເປັນ​ຊັບສົມບັດ​ລວມ​ຂອງ​ຊາດ​ໃຫ້​ ຍືນ​ຍົງ; ຊຸກຍູ້​​ໃຫ້​ປະຊາຊົນ​ຜະລິດ​ກະສິກຳ​ເປັນ​ສິນຄ້າ, ລ້ຽງສັດ​ປະເພດ​ຕ່າງໆ ເພື່ອ​ສ້າງ​ລາຍ​ຮັບ​ແກ້​ໄຂ ຄວາມທຸກ​ຍາກ​ຂອງ​ປະຊາ​ຊົນ.
ໃນ​ໂອກາດ​ນີ້, ປະທານ ສນຊ ຍັງ​ໄດ້​ລົງຢ້ຽມຢາມ​ຮາກ​ຖານ​ບ້ານ ເປັນ​ຕົ້ນ​ແມ່ນ ບ້ານຫ້ວຍ​ຕຸງ ຊຶ່ງ​ເປັນ​ບ້ານ​ຊົນ ເຜົ່າ​ຢ້າວ ທີ່​ປະຊາຊົນພວມ​ສຸມ​ໃສ່​ປູກ​ຕົ້ນໄມ້​ໃຫ້​ໝາກ​ປະເພດ ລຳໄຍ, ໝາກມ່ວງ ເພື່ອ​ເປັນ​ສິນ ຄ້າ​ໃນ​ອະນາຄົດຕາມ​ທ່າແຮງ​ ຂອງ​ທ້ອງຖິ່ນ​ດັ່ງ​ກ່າວ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110