ຫົວ​ຂໍ້ : ຫວຽດນາມ ໃຫ້ບຸລິມະສິດນະໂຍບາຍຕ່າງປະເທດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 13/02/2020 09:04:43 ຈຳ​ນວນ​ຜູ້​ເຂົ້າ​ຢ້ຽມ​ຊົມ 415 ຄັ້ງ

  ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ທ່ານ ນາງ ເລ​ທິ​ຕວຽດ​ມາຍ ເອກ​ອັກຄະ​ລັດ​ຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ສສ ຫວຽດນາມ, ຫົວໜ້າ​ຄະນະ​ຜູ້ຕາງໜ້າ ຫວຽດນາມ ປະຈຳສະຫະ​ປະຊາຊາດ, ອົງການ​ການ​ຄ້າ​ໂລກ ແລະ ບັນດາ​ອົງການ​ສາກົນ​ຕ່າງໆ ຢູ່​ນະຄອນ​ເຊີ​ແນວ ປະເທດ​ສະ​ວິດ, ໄດ້​ມີ​ການ​ພົບ​ປະ​ກັບ​ທ່ານ ນາງ ທາ​ທຽນ​ນາ ວາ​ໂລ​ວາ​ຢາ ຜູ້ອຳນວຍການ​ໃຫຍ່​ຫ້ອງການ​ສະຫະ​ປະຊາຊາດ​ປະຈຳ ເຊີ​ແນວ ແລະ ຍື່ນ​ສານ​ຕາ​ຕັ້ງ​ຕໍ່ ທ່ານ  ອັນໂຕ​ນີ​ໂອ  ກູ​ເຕີ​ເຣສ ເລຂາທິການ​ໃຫຍ່​ສະຫະ​ປະຊາຊາດ ໃນ​ວັນ​ທີ 10 ກຸມພາ​ຜ່ານ​ມາ.
  ໃນ​ເວລາ​ພົບ​ປະ​ແລກປ່ຽນ​ກັນ​ສອງ​ຝ່າຍ ທ່ານ ນາງ ທາ​ທຽນ​ນາ ວາ​ໂລ​ວາ​ຢາ ຕີ​ລາຄາ​ສູງ​ບົດບາດ ແລະ ການ​ຮ່ວມ​ມືຂອງ ຫວຽດນາມ ກັບ ສະຫະ​ປະຊາຊາດ ໃນ​ຫຼາຍ​ຂົງເຂດ​ທີ່​ແຕກ​ຕ່າງ​ກັນ ແລະ ສະແດງ​ຄວາມ​ປາຖະໜາ​ວ່າ: ໃນ​ວາລະ​ຮັບ​ໜ້າທີ່​ເປັນ​ຜູ້​ປະສານ​ງານ​ຂອງ​ທ່ານ ນາງ ເລ​ທິ​ຕວຽດ​ມາຍ, ຫວຽດນາມ ຈະ​ສືບຕໍ່​ມີ​ການ​ປະກອບສ່ວນ​ຫຼາຍ​ຢ່າງ​ຢູ່​ບັນດາ​ເວທີ​ປາ​ໄສ​ການເຄື່ອນໄຫວ​ຂອງ ສະຫະ​ປະຊາຊາດ​ປະຈຳ ເຊີ​ແນວ, ຊຸກຍູ້​ການ​ພົວພັນ ລະຫວ່າງ ບັນດາ​ເວທີ​ປາ​ໄສ​ສະຫະ​ປະ ຊາຊາດ ແລະ ສະມາຄົມ​ບັນດາ​ປະເທດ ອາ​ຊຽນ ໃນ​ຖານະ​ເປັນ​ປະທານ​ອາ​ຊຽນ​ປີ 2020, ເພື່ອ​ເປົ້າ​ໝາຍ​ແຫ່ງ​ສັນຕິພາບ, ສະຖຽນ​ລະ​ພາບ, ພັດທະນາ​ຢ່າງ​ໝັ້ນຄົງ ແລະ ວັດທະນາ​ຖາວອນ​ລວມ ຂອງ​ອົງການ​ປະຊາ​ຊາດ.
  ທ່ານ ນາງ ເລ​ທິ​ຕວຽດ​ມາຍ ຢັ້ງຢືນ​ວ່າ: ການ​ພົວພັນ​ກັບ​ສະຫະ​ປະຊາຊາດ ຍາມ​ໃດ​ກໍ​ແມ່ນ​ບຸລິມະສິດ ໃນ​ນະໂຍບາຍ​ພົວພັນ​ຕ່າງປະເທດ​ຂອງ ຫວຽດ ນາມ. ຫວຽດນາມ ຍາມ​ໃດ​ກໍມີ​ຄວາມ​ພະຍາຍາມ ເພື່ອ​ກາຍເປັນ​ສະມາຊິກ​ທີ່​ຕັ້ງໜ້າ ແລະ ມີ​ຄວາມ​ຮັບຜິດຊອບ, ປະກອບສ່ວນ​ຢ່າງ​ແທດ​ຈິງ, ມີ​ປະສິດ​ທິ​ຜົນ​ເຂົ້າ​ໃນ​ບັນດາ​ການເຄື່ອນໄຫວ​ຂອງ​ສະຫະ​ປະຊາຊາດ, ບັນດາ​ອົງການ​ຈັດ​ຕັ້ງ​ສາກົນ​ຕ່າງໆ, ຊຸກຍູ້​ການ​ຮ່ວມ​ມື ລະຫວ່າງ ສະຫະ​ປະຊາຊາດ ແລະ ອາ​ຊຽນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110