ທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວ​ທ) ແຂວງສາລະວັນ ເນັ້ນ 3 ເນື້ອໃນທີ່ສຳຄັນຂອງວຽກ ຖວ​ທ ໃຫ້ພະນັກງານການນຳ ແລະ ວິຊາການ ຫ້ອງການ ຖວ​ທ ເມືອງລະຄອນເພັງ ແລະ ເມືອງຄົງເຊໂດນ ໃຫ້ເອົາໃຈໃສ່ສືບຕໍ່ຈັດຕັ້ງປະຕິບັດໃຫ້ສຳເລັດ ແລະ ມີຄຸນນະພາບເຊັ່ນ: ໃຫ້ສືບຕໍ່ຈັດຕັ້ງປະຕິບັດຜັນຂະຫຍາຍເນື້ອໃນມະຕິ ເລກທີ 25/ກມສພ ລົງວັນທີ 17 ພືດສາພາ 2021 ວ່າດ້ວຍການເພີ່ມທະວີການນຳພາຂອງພັກຕໍ່ວຽກງານວັດທະນະທຳໃນໄລຍະໃໝ່ ຜ່ານສື່ຕ່າງໆໃຫ້ເປັນຂະບວນກວ້າງຂວາງ. ສື່ບຕໍ່ລົງເກັບຂໍ້ມູນຂຽນປະຫວັດວັດຖຸບູຮານ, ສະຖານທີ່ທ່ອງທ່ຽວທີ່ເປັນຮອງຮອຍປະຫວັດສາດ ແລະ ທຳມະຊາດ, ພ້ອມທັງກຳກົດ ແລະ ສ້າງແຜນພັດທະນາດ້ານການທ່ອງທ່ຽວໃຫ້ຈະແຈ້ງຊັດເຈນ. ນອກນັ້ນ, ທ່ານຍັງໄດ້ນຳເອົາເນື້ອໃນ ຄຳໂອ້ລົມ ຂອງທ່ານ ພັນຄຳ ວິພາວັນ ນາຍົກລັດມົນຕີ ສປປ ລາວ ທີ່ທ່ານໄດ້ໂອ້ລົມຕໍ່ສື່ມວນຊົນລາວ ໃນຄັ້ງວັນທີ 6 ຕຸລາຜ່ານມາ.

 ການລົງເຄື່ອນໄຫວໂອ້ລົມຢູ່ 2 ເມືອງ​ຄັ້ງ​ນີ້ ໄດ້ມີຂຶ້ນໃນວັນທີ 20 ຕຸລາ ຜ່ານ​ມານີ້ ທີ່ຫ້ອງການ ຖວທ ເມືອງລະຄອນເພັງ ແລະ ເມືອງຄົງເຊໂດນ ໂດຍມີພະນັກງານຂະແໜງການອ້ອມຂ້າງພະແນກ ຖວທ ແຂວງ ແລະ ຫ້ອງການ ຖວທ ທັງ​ສອງ​ເມືອງເຂົ້າຮ່ວມຮັບພັງ.

(ພາບ-ຂ່າວ: ໂສພາ ສໍພະໄຊ)