ໜັງສືພິມ ປະຊາຊົນ

ລາວໂທລະຄົມມອບພັນທະໃຫ້ລັດ 471 ຕື້ກວ່າກີບ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 14/02/2020 09:39:59 ຈຳນວນຢ້ຽມຊົມ 603 ຄັ້ງ

ກອງປະຊຸມສະຫຼຸບຜົນ ງານການເຄື່ອນໄຫວວຽກງານປະຈຳປີ 2019 ຂອງບໍລິສັດ ລາວໂທລະຄົມມະນາຄົມ ມະຫາຊົນ ໄດ້ເປີດຂຶ້ນໃນວັນທີ 11 ກຸມພາຜ່ານມາ ທີ່ສຳນັກ ງານໃຫຍ່ ພາຍໃຕ້ການເປັນປະ ທານຂອງທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມມະ ຫາຊົນ ໂດຍການເຂົ້າຮ່ວມຂອງທ່ານ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ,ໂທລະຄົມມະນາຄົມແລະການສື່ສານ (ປທສ) ຊຶ່ງ ມີຕົວແທນຈາກລາວໂທລະ ຄົມສູນກາງ ແລະ ສາຂາແຂວງ ເຂົ້າຮ່ວມ.
ທ່ານ ສຸພົນ ຈັນທະວີໄຊ ໄດ້ກ່າວລາຍງານການເຄື່ອນ ໄຫວວຽກງານດຳເນີນທຸລະກິດຂອງປີ 2019 ນີ້ວ່າ:ຜ່ານມາ ໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມໃນມູນຄ່າທັງໝົດ 25,93 ລ້ານໂດລາ, ປັດຈຸບັນລາວໂທລະຄົມມີສະຖານີມືຖື 2G,3G, 4G ແລະ 4,5G ທັງໝົດ 7.436 ສະຖານີ ໃນນີ້: GSM2G ຈຳນວນ 1.928 ສະຖານີ, ກວມ 47% ຂອງຫຼັງຄາເຮືອນໃນເຂດເທດສະບານ.ມີສັນຍານໂທລະສັບມືຖືຄວບຄຸມໄດ້ທົ່ວປະເທດ,ກວມປະຊາກອນ 80% ໃນນັນ 4G ກວມ 58% ທັງໝົດເລົ່ານີ້ໄດ້ກາຍເປັນປັດໃຈຫຼັກທີ່ພັກດັນໃຫ້ລາວໂທລະຄົມ ສາມາດຂະຫຍາຍລູກຄ້າໃໝ່ແລະ ຮັກສາຈຳນວນລູກຄ້າເກົ່າໄວ້ໄດ້, ມາຮອດປັດຈຸບັນມີລູກຄ້າໃຊ້ໂທລະສັບມືຖືໃນລະບົບຈຳນວນ 1.4 ລ້ານເລກໝາຍ, ໂທລະສັບຕັ້ງໂຕະ 33 ພັນເລກໝາຍ, ໂທລະສັບວິນໂຟນ 304 ພັນເລກໝາຍ ແລະ ອິນເຕີເນັດ 1.3 ລ້ານລູກຄ້າ, ໃນປີ 2019 ຜ່ານມາສາມາດສ້າງລາຍຮັບໄດ້ທັງໝົດ 1.702,5 ຕື້ກີບ (ລວມອາກອນ) ໃນນັ້ນກຳໄລສຸດທິ 177,5 ຕື້ກີບ, ສາມາດປະຕິບັດພັນທະໃຫ້ລັດຖະບານໄດ້ທັງໝົດຈຳນວນ 471,1 ຕື້ກີບ. ສຳລັບແຜນການປີ 2020ນີ້ ລາວໂທລະຄົມ ຈະສູ້ຊົນສ້າງຖານລູກຄ້າໃໝ່ໃຫ້ເພິ່ມ 97.934 ເລກໝາຍແລະສ້າງລາຍຮັບໃຫ້ໄດ້ທັງໝົດ 1.804,9 ຕື້ກີບ (ລວມອາກອນ) ແລະ ຄາດຄະເນວ່າຈະສາ ມາດປະຕິບັດພັນທະແລະເງິນປັນຜົນໃຫ້ລັດຖະບານຈຳນວນ 507,4 ຕື້ກີບ,ນອກຈາກນັ້ນຍັງຈະໄດ້ລົງທຶນທັງໝົດ 26,9 ລ້ານໂດລາ ເພື່ອສືບຕໍ່ປັບປຸງແລະຂະຫຍາຍເຄືອຂ່າຍການໃຫ້ບໍລິການດ້ານໂທລະຄົມ. (ຂ່າວ-ພາບ: ພູວຽງຄຳ)