ຫົວ​ຂໍ້ : ທູດ ສປປ ເກົາຫຼີ ລະນຶກວັນເກີດ ທ່ານ ກິມ ເຈິງ ອິນ ຄົບຮອບ 78 ປີ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/02/2020 08:44:38 ຈຳ​ນວນ​ຜູ້​ເຂົ້າ​ຢ້ຽມ​ຊົມ 409 ຄັ້ງ

  ທ່ານ ລີ ຢົງ ຊົນ ເອກ​ອັກ​ຄະ​ລັດ​ຖະ​ທູດ ສປປ ເກົາຫຼີ ປະ​ຈໍາ ສປປ ລາວ ໄດ້​ຈັດ​ງານ​ລ້ຽງລະ​ນຶກວັນ​ເກີດ​ສະຫາຍ ກິມ ເຈິງ ອິນ  ຜູ້​ນໍາ​ທີ່​ຍິ່ງ​ໃຫຍ່​ຂອງ​ປະຊາຊົນ ສປປ ເກົາຫຼີ ຄົບຮອບ 78 ປີ​ ໃນ​ວັນ​ທີ 14 ກຸມພາ​ຜ່ານ​ມາ​  ທີ່ໂຮງ​ແຮມ​ເມືອງ​ແທັງ ນະຄອນ​ຫຼວງວຽງ​ຈັນ ໂດຍ​ມີ​ທ່ານ ປ້ານ ນ້ອຍ​ມະນີ ປະທານ​ສູນ​ກາງ​ສະຫະ​ພັນ​ກໍາ​ມະ​ບານ​ລາວ ປະທານ​ສະມາຄົມ​ມິດຕະພາບ ​ລາວ​- ສປປ ເກົາຫຼີ, ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດຖະມົນຕີ​ປະ​ຈໍາສໍາ​ນັກ​ງານ​ນາຍົກລັດຖະມົນຕີ, ທ່ານ  ທອງ​ສະຫວັນ  ພົມວິຫານ ຮອງ​ລັດຖະມົນຕີ​ກະຊວງ​ການ​ຕ່າງປະເທດ  ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.
  ໃນ​ພິ​ທີ ທ່ານ ລີ ຢົງ ຊົນ ໄດ້​ຍົກ​ໃຫ້​ເຫັນ​ຊີ​ວະ​ປະ​ຫວັດ, ຜົນງານ ແລະ ການເຄື່ອນໄຫວ ​ຂອງທ່ານ ກິມ ເຈິງ ອິນ ຊຶ່ງ​ແມ່ນ​ນັກ​ທິດ​ສະ​ດີ​ແນວຄິດ​ ດີເດັ່ນ ແລະ ລັດ​ຖະ​​ບູລຸດ​ການ ເມືອງ​ທີ່​ດີ​ເລີດ​ຂອງ ສປປ ເກົາຫຼີ​ ກ້າວ​ສູ່​ເສັ້ນທາງ​ແຫ່ງ​ໄຊຊະ ນະ ຍ້ອນ​ພັກ ແລະ ປະຊາຊົນ ສປປ ເກົາຫຼີ ໄດ້​ກ້າວ​ເດີນ​ຕາມ​ເສັ້ນທາງ​ແນວ​ຄິດ ແລະ ທິດ​ສະ​ດີ​ຂອງທ່ານ; ສ​ປ​ປ ເກົາ​ຫຼີ ​ຈຶ່ງ​ສາມາດ​ປົກ​ປັກ​ຮັກ​ສາ​ອໍາ​ນາດ​ອະທິປະ​ໄຕ​ໄວ້​ໄດ້​ຢ່າງ​ສົມ​ກຽດ ແລະ  ​ບັນລຸ​ຜົນ​ສໍາ​ເລັດ​ອັນ​ໃຫຍ່​ຫຼວງ​ກວ່າ​ເກົ່າ.
  ທ່ານ​ທູດ​ກ່າວ​ຕື່ມ​ວ່າ: ສໍາ​ລັບ​ສາຍ​ພົວພັນ ແລະ ການ​ຮ່ວມ​ມື​ທີ່​ເປັນ​ມູນເຊື້ອ​ລະຫວ່າງ ສປປ ເກົາຫຼີ ແລະ ສປປ ລາວ ແມ່ນ​ການ​ພົວພັນ​ອັນ​ລໍ້າ​ຄ່າ​ໂດຍ​ການ​ເອົາໃຈໃສ່​ຊີ້​ນໍາ​ຢ່າງ​ໃກ້ຊິດ​ຂອງ​ບັນດາ​ສະຫາຍ​ການ​ນໍາ​ສອງ​ປະເທດ​ໄດ້​ເຮັດ​ໃຫ້​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ເປັນ​ມູນເຊື້ອ​ລະຫວ່າງ​ສອງ​ປະເທດ​ພວກ​ເຮົາ​ສືບຕໍ່​ເສີມ​ຂະຫຍາຍ​ນັບ​ມື້​ນັບ​ແໜ້ນ​ແຟ້ນ​ຂຶ້ນ​ໄປ​ເລື້ອຍໆ.
(ຂ່າວ: ທອງ​ດຳ ມິ​ໂຍ​ລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110