ຫົວ​ຂໍ້ : ຮອດປີ 2022 ເສດຖະກິດ ລິດຕົວນີ ຈະເຕີບໂຕເພີ່ມຂຶ້ນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/02/2020 08:54:40 ຈຳ​ນວນ​ຜູ້​ເຂົ້າ​ຢ້ຽມ​ຊົມ 258 ຄັ້ງ

(ເນື່ອງ​ໃນ​ໂອກາດ​ວັນຊາດ ລິດ​ຕົວ​ນີ 16/2/1990-16/2/2020)
ຮຽບຮຽງ: ລຸ້ງ​ດາວ ບຸນ​ມີ

  ປະເທດ​ລິດ​ຕົວ​ນີ ຫຼື ມີຊື່​ ທາງ​ການ​ວ່າ: ສາທາລະນະລັດ ລິດ​ຕົວ​ນີ  ຕັ້ງ​ຢູ່​ທາງ​ທິດຕາເວັນ ອອກ​ຂອງ​ທະວີບ​ເອີ​ຣົບ, ມີ​ເຂດ ແດນ​ຕິດ​ກັບ​ທະເລ​ບານຕິກ ຢູ່​ລະຫວ່າງປະເທດ​ລັດ​ເວຍ ແລະ ຣັດ​ເຊຍ, ມີ​ເນື້ອທີ່​ທັງ​ໝົດ 65.300 ກິໂລ​ຕາ​ແມັດ, ມີ​ຊາຍ​ແດນ​ທາງ​ດ້ານ​ເໜືອ​ຕິດ​ກັບລັດ​ເວຍ,  ດ້ານ​ຕາເວັນ​ອອກ​ສ່ຽງ​ໃຕ້​ຕິດ​ກັບ ເບ​ລາ​ຣຸດ, ໂປ​ໂລຍ ແລະ ທາງ​ດ້ານ​ຕາເວັນຕົກ​ສ່ຽງ​ໃຕ້​ຕິດ​ກັບຣັດ​ເຊຍ,  ຖ້າ​ຂ້າມທະເລ​ບານຕິກໄປ​ທາງ ດ້ານ​ຕາເວັນ ຕົກ​ແມ່ນ​ມີ​ຊາຍ​ແດນ​ຕິດ​ກັບຊູແອັດ ແລະ ດານ​ມາກ,   ນະຄອນຫຼວງ​ຂອງ ປະເທດ​ແມ່ນວີ​ນ​ນຸດ. 
  ນະໂຍບາຍ​ ສຳລັບ​ປີ 2016-2020 ລັດຖະບານ​ລິດ​ຕົວ​ນີໃຫ້​ຄວາມ​ສຳຄັນ​ກັບ​ສະ ຫວັດດີ​ການ​ຄອບຄົວ,  ການ​ປັບປຸງ​ລະບົບ​ສາທາລະນະ​ສຸກ, ການ​ແກ້​ໄຂ​ບັນຫາ​ຄວາມທຸກ​ຍາກ  ແລະ  ຄວາມ​ສະເໝີພາບ, ການ​ປັບປຸງ​ຄຸນ​ນະ​ພາບ  ແລະ ການ​ເຂົ້າ​ເຖິງ​ການ​ສຶກສາ,  ການ​ນຳ​ສະເໜີ​ນະໂຍບາຍ​ພາສີ​ທີ່​ບໍ່​​ສັບຊ້ອນ  ແລະ  ມີ​ຄວາມ​ເປັນ​ທຳ​ຫຼາຍ​ຂຶ້ນ  ລວມ​ທັງ​ລະບົບ​ບຳ​ເນັ​ດ-​ບຳນານທີ່​ມີ​ຄວາມສົມ ​ດູນ ແລະ ລັດຖະບານຈະ​ດຳ ເນີນ​ນະໂຍບາຍ​ການ​ຕ່າງປະ ເທດ ແລະ ຄວາມ​ໝັ້ນຄົງ​ທີ່​ມີ​ປະສິດ​ທິພາ​ບ.  ດ້ານ​ໂຄງ​ສ້າງ​ທາງເສດຖະກິດຂອງລິດ​ຕົວ​ນີ ທີ່​ສຳຄັນ​ປະກອບ​ມີອຸດສາຫະກຳ ແລະ  ພະລັງງານ,   ການ​ກໍ່ສ້າງ, ການ​ຄ້າ, ການ​ຂົນສົ່ງ ແລະ ການ​ບໍລິການ. ໃນ​ດ້ານ​ເຕັກ​ໂນ​ໂລ ຊີ, ລິດ​ຕົວ​ນີເປັນ​ປະເທດ​ທີ່​ມີ​ຄວາມ​ຈະເລີນ​ກ້າວໜ້າ​ໃນ​ການ​ຄົ້ນ​ຄ້​ວາ ແລະ ການ​ພັດທະນາ​ວິທະຍາສາດ​ສາຂາ​ຕ່າງໆ  ໂດຍ​ສະເພາະ​ຢ່າງ​ຍິ່ງ ເຕັກ​ໂນ​ໂລ​ຊີ ຊີວະ​ພາບ ແລະ ເຕັກ​ໂນ​ໂລ​ຊີ​ເລ​ເຊີ ໂດຍ​ນຳ​ວິທະຍາສາດ​ເຫຼົ່າ​ນີ້​ມາ​ໝູນ​ໃຊ້ ແລະ ໃຊ້​ປະໂຫຍດ​ໃນ​ກິດຈະການ​ດ້ານ​ການ​ແພດ. ດ້ານ​ການ​ຄ້າ ແລະ ການ​ລົງທຶນ ຈາກ​ຕ່າງປະເທດ​ມີ​ທ່າ​ອ່ຽງ​ເພີ່ມ​ຂຶ້ນ  ເນື່ອງ​ຈາກ​ລັດຖະບານ​ໄດ້​ອອກ​ກົດໝາຍ​ຫຼາຍ​ສະບັບ  ຊຶ່ງ​ອຳນວຍ​ປະໂຫຍດ​ຕໍ່​ຜູ້​ລົງທຶນ ໃຫ້​ເຂົ້າ​ມາ​ລົງທຶນ​ໃນລິດ​ຕົວ​ນີ. ປັດ​ໄຈ​ຕ່າງໆທີ່​ສະໜັບສະໜູນ​ການ​ລົງທຶນ​ໃນ  ລິດ​ຕົວ​ນີ  ເນື່ອງ​ຈາກ​ເປັນ​ປະເທດ​ທີ່​ມີ​ຄວາມ​ໝັ້ນ ຄົງ​ທາງ​ເສດຖະກິດ  ແລະ  ການ​ເມືອງ.  ທະນາຄານ​ແຫ່ງ​ລິດ​ຕົວ​ນີ ໄດ້​ປະ​ເມີນ​ວ່າ: ຈະສົ່ງ​ຜົນ​ໃຫ້​ ເສດຖະກິດ​ລິດ​ຕົວນີເຕີບໂຕ ​ເພີ່ມ​ຂຶ້ນ​ອີກ 1,9% ໂດຍ​ສະເລ່ຍ​ ໃນ​ລະຫວ່າງ​ປີ 2015-2022.  
  ລິດ​ຕົວ​ນີ ມີ​ລວມ​ຍອດຜະ ລິດ​ຕະ​ພັນ​ພາຍ​ໃນ​ປະເທດ ຫຼື GDP ບັນລຸ 47,17 ຕື້​ໂດລາ, ລາຍ​ໄດ້​ສະເລ່ຍ​ຕໍ່​ຫົວຄົນແມ່ນ 16.680 ກວ່າ​ໂດ​ລາ (ທະນາ ຄານ​ໂລກ 2017),  ອັດຕາການ  ​ວ່າງ​ງານ 6,4% (ຂໍ້​ມູນ ​ປີ 2019), ອັດຕາການຂະຫຍາຍຕົວ​ຂອງ GDP ແມ່ນ 3,8% (ທະນາຄານ​ໂລກ 2017), GDP ແຍກ​ຕາມ​ຂະແໜງການ​ຜະລິດ:    ກະ​ສິ​ກໍາ 3,3%,   ອຸດ ສາຫະກຳ 30,4%,  ການ​ບໍລິການ  66,4%.  ຜົນ​ຜະລິດ​ທາງ​ກະສິກຳ​ມີເຂົ້າ, ມັນ ຕົ້ນ, ຕົ້ນ​ບີດ (ໃຊ້​ເຮັດ​ນ້ຳຕານ), ປໍ, ພືດ​ຜັກ​ຕ່າງໆ, ຊີ້ນ​ງົວ, ນົມ​ສົດ, ໄຂ່​ໄກ່ ແລະ ປາ. ສ່ວນ​ອຸດ ສາຫະກຳ​ມີ ອຸປະກອນ​ຕັດ​ເຫຼັກ, ເຄື່ອງ​ຈັກ​ໄຟຟ້າ,  ອຸປະກອນ​ກ່ຽວ​ກັບ​ໂທລະພາບ,  ຕູ້ເຢັນ ແລະ  ຕູ້​ແຊ່​ແຂງ,  ການ​ກັ່ນ​ປີ​ໂຕ​ຣ​ລ້ຽມ,  ການ​ຕໍ່​ເຮືອ  (ເຮືອ​ຂະ​​ໜາດ​ນ້ອຍ)  ການ​ເຮັດ​ເຟີ​ນີ​ເຈີ, ແຜ່ນແພ, ອາຫານ​ສຳເລັດ​ຮູບ,  ປຸ໋ຍ,  ເຄື່ອງ​ຈັກ​ທາງ​ການ​ກະສິກຳ,  ອຸປະກອນ​ກ່ຽວ​ກັບ​ສາຍຕາ,  ສ່ວນ​ປະກອບ​ຂອງ​ເຄື່ອງ​ໄຟຟ້າ, ຄອມ​ພິວ​ເຕີ  ແລະ ການ​ເຮັດ​ເຄື່ອງ​ປະ​ດັບ.  ມູນ​ຄ່າ​ການ​ສົ່ງ​ອອກ​ບັນລຸ  23,52  ພັນ​ລ້ານ​ໂດ​ລາ. 
  ສາທາລະນະ​ລັດ  ປະຊາ ທິປະໄຕ  ປະຊາຊົນ​ລາວ  ແລະ ສາທາລະນະ​ລັດ  ລິດ​ຕົວ​ນີ ສ້າງ ຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ​ໃນ​ວັນ​ທີ 1 ກັນຍາ ປີ 1994.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110