ໜັງສືພິມ ປະຊາຊົນ

ສຳເລັດຊຸດຝຶກອົບຮົມວຽກງານກວດກາໃຫ້ແນວລາວສ້າງຊາດຂັ້ນເມືອງ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 17/02/2020 09:23:10 ຈຳນວນຢ້ຽມຊົມ 437 ຄັ້ງ

ກົມກວດກາສູູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມຝຶກອົບຮົມວຽກງານກວດກາໃຫ້ແກ່ພະນັກງານທີ່ເຮັດວຽກງານກວດກາແນວລາວສ້າງຊາດຂັ້ນເມືອງຂອງ 3 ແຂວງຄື: ຄໍາມ່ວນ, ສະຫວັນນະເຂດ ແລະ ເຊກອງ ຂຶ້ນໃນລະຫວ່າງວັນທີ 6-7 ກຸມພາຜ່ານມາ ທີ່ເມືອງນາກາຍ ແຂວງ ຄໍາມ່ວນ ພາຍໃຕ້ການເປັນປະ ທານຂອງທ່ານ ນາງ ຄໍາຈັນ ພົມແສງສະຫວັນ ຄະນະປະຈໍາພັກ ປະທານກວດກາພັກ-ລັດ ຮອງປະທານສູນກາງແນວລາວສ້າງຊາດ ຜູ້ຊີ້ນໍາວຽກ ງານກວດກາ, ມີທ່ານ ນາງ ສີພະຈັນ ນັນທະວົງສາ ຄະນະປະຈໍາ ຫົວໜ້າ ກົມກວດກາ ສນຊ ຕະຫຼອດຮອດພະນັກງານແນວລາວສ້າງຊາດຈາກ 3 ແຂວງເຂົ້າຮ່ວມ.
ກອງປະຊຸມຝຶກອົບຮົມໃນຄັ້ງນີ້ ແມ່ນເພື່ອປະຕິບັດຕາມ 6 ແຜນງານຂອງສູນ ກາງແນວລາວສ້າງຊາດທີ່ໄດ້ຮັບຮອງໃນກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ X ໂດຍສະ ເພາະແມ່ນແຜນງານທີ 4 ແຜນງານສ້າງຄວາມເຂັ້ມແຂງວຽກງານແນວລາວສ້າງຊາດເວົ້າລວມ, ເວົ້າສະເພາະແມ່ນໂຄງ ການຍົກສູງຄວາມສາມາດໃນ ການເຄື່ອນໄຫວວຽກງານກວດ ກາແນວລາວສ້າງຊາດຂອງກົມກວດກາ.
ຊຸດຝຶກອົບຮົມຄັ້ງນີ້, ໄດ້ນໍາເອົາ 7 ເອກະສານທີ່ສໍາຄັນ ເພື່ອມາສ້າງຄວາມຮັບຮູ້, ຄວາມເຂົ້າໃຈເພີ່ມເຕີມໃຫ້ແກ່ ຂະແໜງກວດກາແນວລາວ ສ້າງຊາດຂັ້ນເມືອງ ແລະ ແຂວງ, ເປັນຕົ້ນແມ່ນຄວາມ ຮູ້ພື້ນຖານກ່ຽວກັບວຽກງານກວດກາຂອງພັກ, ຄວາມຮູ້ພື້ນຖານກ່ຽວກັບວຽກງານກວດກາລັດ; ວຽກງານຄົ້ນຄວ້າແກ້ໄຂຄໍາຮ້ອງຟ້ອງ, ຮ້ອງທຸກ ແລະ ຄໍາສະເໜີ; ການສ້າງເອກະສານກ່ຽວກັບວຽກງານກວດກາ; ວຽກງານການຕິດຕາມ-ກວດກາແນວລາວສ້າງຊາດ; ກົດໝາຍວ່າດ້ວຍແນວລາວສ້າງຊາດ (ສະບັບປັບປຸງ) ແລະ ຂໍ້ກໍານົດວ່າດ້ວຍການຄົ້ນຄວ້າພິຈາລະນາແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄໍາສະເໜີ. ນອກຈາກນີ້ແລ້ວກອງປະຊຸມ ຍັງໄດ້ປະກອບຄໍາຄິດເຫັນຢ່າງກົງໄປກົງມາຕໍ່ຫົວຂໍ້ດັ່ງກ່າວ. ໃນໂອກາດນີ້, ທ່ານ ນາງ ຄໍາຈັນ ພົມແສງສະຫວັນ ໄດ້ມອບຄອມພິວເຕີຈໍານວນໜຶ່ງໃຫ້ແກ່ແນວລາວສ້າງຊາດເມືອງ.
(ຂ່າວ-ພາບ: ສນຊ)