ຫົວ​ຂໍ້ : ຖ້ຽວບິນນະຄອນຫຼວງວຽງຈັນ-ນະຄອນດານັງຈະເປີດ ບໍລິການໃນທ້າຍເດືອນມີນາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 17/02/2020 09:24:22 ຈຳ​ນວນ​ຜູ້​ເຂົ້າ​ຢ້ຽມ​ຊົມ 333 ຄັ້ງ

ລັດ​ວິສາ​ຫະ​ກິດ ການບິນ​ ລາວ​ ຈະ​ເປີດ​ຖ້ຽວ​ບິນ​ນະຄອນ ຫຼວງ​ວຽງ​ຈັນ​-​ນະຄອນດານັງ-​ ວຽງ​ຈັນໃນ​ທ້າຍ​ເດືອນ​ມີນາ 2020 ທີ່​ຈະ​ມາ​ເຖິງນີ້ ເພື່ອ​ແນ ໃສ່​ໃນ​ການ​ເຊື່ອມຈອດການ ທ່ອງທ່ຽວ ລະຫວ່າງ ນະຄອນ ຫຼວງ​ວຽງ​ຈັນ ແລະ ນະຄອນ​ດາ​ນັງ ສສ ຫວຽດນາມ,  ການຖະແຫຼງ​ ຂ່າວ​ເປີດ​ຖ້ຽວ​ບິນ​ດັ່ງກ່າວ ໄດ້​ຈັດ​ຂຶ້ນເມື່ອ​ວັນ​ທີ 13 ກຸມພາຜ່ານ​ມາ​ທີ່​ລັດ​ວິ​ສາ​ຫະ​ກິດ​ດັ່ງກ່າວ
ທ່ານ ພົນ​ຈັດຕະວາ ບຸນ​ມາ ຈັນທະ​ວົງສາ ຜູ້ອຳນວຍການ ລັດ​ວິ​ສາ​ຫະ​ກິດ ​ການບິນ​ລາວ​ກ່າວ​ວ່າ: ເພື່ອ​ຮອງ​ຮັບ ແລະ ອຳນວຍ​ຄວາມ​ສະດວກ​ໃຫ້​ແກ່​ນັກ​ທ່ອງ​ທ່ຽວ ທີ່​ເດີນທາງ​ເຂົ້າ​ໄປທ່ອງ​ທ່ຽວ ສສ ຫວຽດນາມ ແລ້ວ​ມີ​ຈຸດປະສົງ​ຢາກ​ເຂົ້າ​ມາ ​ທ່ອງ​ທ່ຽວ ຢູ່ ສປປ ລາວ ພວກ​ເຮົາ​ພ້ອມ​ທີມ​ງານ​ຈຶ່ງ​ໄດ້​ສຶກ ສາ​ຄວາມ​ເປັນ​ໄປ​ໄດ້​ໃນ​ການ​ເຊື່ອມ​ຈອດ​ການທ່ອງທ່ຽວ ລະຫວ່າງ ນະຄອນຫຼວງ​ວຽງ​ຈັນ ແລະ ນະຄອນດາ​ນັງ ແຫ່ງ ສສ ຫວຽດນາມ ແລະ​ ເຫັນໄດ້​ ວ່າ​ມີ​ຄວາມ​ຕ້ອງການ​ຂອງ​ການທ່ອງທ່ຽວ ຈຶ່ງ​ໄດ້​ຕົກລົງ​ເປີດ​ຖ້ຽວ​ບິນ​ໄປ​ຍັງ​ເມືອງ​ດັ່ງ ກ່າວ, ເມື່ອ​ກ່ອນການບິນ​ລາວ ພວກ​ເຮົາ​ກໍ​ໄດ້​ເປີດ​ຖ້ຽວບິນ ໄປ​ຍັງ​ນະຄອນດາ​ນັງ ແລ້ວ​ໃນ​ປີ 2009 ແຕ່​ຍ້ອນ​ການ​ຂະຫຍາຍຕົວ​ຂອງ​ນັກ​ທ່ອງ​ທ່ຽວ​ໃນ​ເວລາ​ນັ້ນ​ຍັງ​ບໍ່​ທັນ​ສູງ ຈຶ່ງ​ໄດ້​ປິດ​ລົງ. ຕໍ່​ແຜນການ​ນີ້ ບໍລິສັດ​ການບິນ​ລາວ​ເຮົາ​ຈຶ່ງ​ໄດ້​ເປີດ​ຖ້ຽວ​ບິນ​ນະຄອນຫຼວງ​ວຽງ​ຈັນ​-​ນະຄອນ​ດາ​ນັງ​-​ວຽງ​ຈັນ ຈະ​ໄດ້​ເລີ່ມ​ຕົ້ນ​ເປີດ​ບິນ​ຢ່າງ​ເປັນ​ທາງ​ການ ໃນ​ວັນ​ທີ 29 ​ມີນາ  2020 ນີ້ ໂດຍ​ຈະ​ບິນຂຶ້ນ​ຈາກ​ວຽງຈັນ ເວລາ 11:10 ໂມງ ແລະ ຮອດ ດາ​ນັງເວລາ 12:50 ໂມງ ແລະ ອອກຈາກດາ​ນັງເວລາ 13:50 ໂມງ ຮອດວຽງຈັນ ເວລາ 15:35 ໂມງ. ການບິນ​ຈະ​ໃຊ້​ເວລາ 1 ຊົ່ວໂມງ 40 ນາທີ ໂດຍ​ນຳ​ໃຊ້​ເຮືອບິນ ATR72 ແລະ ໃນ​ອະ ນາ​ຄົດ​ຖ້າ​ເຫັນ​ວ່າ​ມີ​ຄວາມ​ຕ້ອງ ການ​ຂອງ​ຕະຫຼາດ​ສູງ​ທາງ​ລັດ​ວິ​ສາ​ຫະ​ກິດ​ຂອງ​ພວກ​ເຮົາ​ກໍຈະ​ເປີດ​ຖ້ຽວ​ບິນ​ເພີ່ມ ​ຂຶ້ນ ແລະ ນຳ​ໃຊ້​ເຮືອບິນ A320.
ທ່ານ​ກ່າວ​ຕື່ມ​ວ່າ: ການ​ເປີດ​ທ່ຽວບິນ​ນີ້​ນອກຈາກຈະ​ ເປັນ​ການ​ຮັບຮອງ​ການທ່ອງ ທ່ຽວແລ້ວຍັງ​ຈະ​ສ້າງ​ຄວາມ​ສະດວກ​ໃຫ້​ແກ່​ການ​ໄປ​ມາ ຫາ​ສູ່ ລະຫວ່າງ​ປະຊາຊົນ​ສອງ​ຊາດ​ພວກ​ເຮົາ ໂດຍ​ສະເພາະ​ບັນດາ​ນັກທຸລະກິດ​ຂອງ​ສອງ​ປະເທດ​ທີ່​ໄດ້​ດຳເນີນ​ທຸລະກິດ​ ໃນ ສສ ຫວຽດນາມ ແລະ ສປປ ລາວ, ນະຄອນ​ດາ​ນັງ​ໃນ​ປັດຈຸບັນ​ເປັນ​ເມືອງ​ທ່ອງ​ທ່ຽວ​ທີ່​ມີ​ຊື່​ສຽງ ຂອງ​ຫວຽດນາມ​ ແລະ ມີ​ນັກ​ທ່ອງ​ທ່ຽວ​ສົນໃຈ​ມາ​ທ່ອງ​ທ່ຽວ​ເປັນ​ຈຳນວນ​ຫຼາຍ​ລ້ານຄົົນ​ ໃນ​ແຕ່​ລະ​ປີ ແລະ ມີ​ຫຼາຍ​ສາຍ​ການບິນເປີດ​ຖ້ຽວ​ບິນມານະ ຄອນ​ດາ​ນັງ  ຊຶ່ງ​ກໍເປັນ​ໂອກາດ​ທີ່​ດີສຳລັບ​ການບິນ​ລາວ​ໃນ​ການ​ເປີດ​ຖ້ຽວ​ບິນ​ໄປ​ເມືອງ​ດັ່ງກ່າວ ເພື່ອ​ຈະ​ເຮັດ​ໃຫ້​ນັກ​ທ່ອງ​ທ່ຽວ​ສາມາດ​ເດີນທາງ​ມາ​ທ່ອງ​ທ່ຽວ ຕໍ່​ໃນ​ປະເທດເຮົາພາຍຫຼັງ​ທີ່​ທ່ອງ​ທ່ຽວ​ຢູ່​ນະຄອນ​ດາ​ນັງ.
 (ຂ່າວ:ສຳ​ນານ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110