ໜັງສືພິມ ປະຊາຊົນ

ສອງເຂດຈຸດສຸມພັດທະນາ ເມືອງທ່າແຕງ ຮັບຟັງການເຜີຍແຜ່ ເອກະສານສຳຄັນຂອງພັກ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 17/02/2020 09:26:28 ຈຳນວນຢ້ຽມຊົມ 454 ຄັ້ງ

ເມື່ອບໍ່ດົນຜ່ານມາ, ທ່ານ ສົມເພັດ ເອິດລັດດາ ເລຂາພັກເມືອງທ່າແຕງ ພ້ອມຄະນະ ໄດ້ເຜີຍແຜ່ຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງ ຄະນະພັກເມືອງທ່າແຕງ ຄັ້ງທີ VI ຕິດພັນກັບເອກະສານສໍາຄັນຂອງພັກໃຫ້ຄະນະພັກຮາກ ຖານບ້ານ, ມີຫົວໜ້າ-ຮອງຈຸ ພ້ອມດ້ວຍສະມາຊິກພັກ ແລະ ຫົວໜ້າຊາວໜຸ່ມ, ແມ່ຍິງ, ປກສ-ປກຊ ຂັ້ນບ້ານໃນສອງເຂດຈຸດສຸມພັດທະນາຄື: ເຂດທີ 4 ແລະ ເຂດທີ 6 ໂດຍມີຫົວໜ້າສອງເຂດຈຸດສຸມພັດທະນາເຂົ້າຮ່ວມ.
ການລົງຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກເມືອງທ່າແຕງຄັ້ງທີ VI ຕິດພັນກັບເອກະສານສໍາຄັນຂອງພັກຄັ້ງນີ້ ໄດ້ແບ່ງອອກເປັນ 2 ຈຸ ຊຶ່ງຈຸທີ 1 ນໍາໂດຍທ່ານ ສົມເພັດ ເອິດລັດດາ ເຈົ້າເມືອງທ່າແຕງ ພ້ອມຄະນະລົງຜັນຂະຫຍາຍຢູ່ເຂດຈຸດສຸມພັດທະນາທີ 6 ແລະ ຈຸທີ 2 ນໍາໂດຍທ່ານ ແສງລາຕີຫຼອມຍະເດດ ຮອງເລຂາພັກເມືອງທ່າແຕງ ພ້ອມຄະນະ ລົງຜັນຂະຫຍາຍຢູ່ເຂດຈຸດສຸມພັດທະນາທີ 4 ຊຶ່ງຄະນະພັກຮາກຖານບ້ານ, ຫົວໜ້າ-ຮອງຈຸ ພ້ອມດ້ວຍສະມາຊິກພັກ ຕະຫຼອດຮອດຫົວໜ້າຊາວໜຸ່ມ, ແມ່ຍິງ, ປກສ-ປກຊ ຂັ້ນບ້ານໃນສອງເຂດຈຸດສຸມດັ່ງກ່າວຈະ ໄດ້ຮັບຮູ້, ເຂົ້າໃຈ ແລະ ໄດ້ກໍາແໜ້ນຢ່າງລະອຽດຈະແຈ້ງ, ເລິກເຊິ່ງ ເພື່ອຄວາມເປັນເອກະ ພາບທາງດ້ານທັດສະນະຊີ້ນໍາໆພາ ບົນພື້ນຖານການຫັນປ່ຽນແບບແຜນວິທີນໍາພາໃຫ້ຄຽງຄູ່ກັບແຜນການ ແລະ ແຜນງານອັນລະອຽດຕໍ່ເນື້ອໃນມະຕິກອງປະຊຸມໃຫຍ່ຜູ້ແທນອົງຄະນະພັກເມືອງທ່າແຕງ ຄັ້ງທີ VI, ມະຕິກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 9 ສະໄໝທີ IX ແລະ ມະຕິຂອງຄະນະບໍລິຫານງານສູນກາງພັກສະໄໝທີ X ຊຶ່ງຕໍ່ໜ້ານີ້ ຍັງຈະສືບຕໍ່ລົງຜັນຂະຫຍາຍຕື່ມອີກຢູ່ບັນດາເຂດຈຸດສຸມພັດທະນາໃນທົ່ວເມືອງທ່າແຕງໃຫ້ສໍາເລັດໂດຍພື້ນຖານ.
ໂອກາດນີ້ ທ່ານ ສົມເພັດ ເອິດລັດດາ ແລະ ທ່ານ ແສງລາຕີ ຫຼອມຍະເດດ ໄດ້ຜັດປ່ຽນກັນມີຄໍາຄິດຄຳເຫັນ ແລະ ຮຽກຮ້ອງໃຫ້ຄະນະພັກ ແລະ ສະມາຊິກພັກໃນສອງເຂດທີ 4 ແລະ ເຂດທີ 6 ຈົ່ງນໍາເອົາບັນດາເນື້ອໃນເອກະສານທີ່ໄດ້ຮັບຮູ້ເຂົ້າໃຈໄປຈັດຕັ້ງປະຕິບັດຢູ່ຂັ້ນຮາກຖານຂອງຕົນໃຫ້ເຂັ້ມແຂງ, ໜັກແໜ້ນ, ເພີ່ມທະວີການນໍາພາແກ້ໄຂຄວາມທຸກຍາກທາງດ້ານເສດຖະກິດ, ວັດທະນະທໍາ-ສັງຄົມ, ສອງກໍາລັງປະກອບອາວຸດ ເພື່ອຄວາມເປັນເອກະພາບຕາມທິດທາງ, ວິທີການ, ມາດຕະການທີ່ຂັ້ນເທິງວາງອອກ, ສ້າງຄວາມເຂັ້ມແຂງເຂົ້າໃນການປູກຝັ່ງ-ລ້ຽງສັດ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ໂດຍຖືກຕ້ອງຕາມລະບຽບການ, ສ້າງຄວາມເຊື່ອໝັ້ນອັນໜັກແໜ້ນທົ່ວສັງຄົມ ຕໍ່ພາລະກິດປ່ຽນແປງໃໝ່ພາຍໃຕ້ການນໍາພາຂອງພັກໃຫ້ຖືກຕ້ອງ ແລະ ແທດເໝາະກັບສະພາບຕົວຈິງ, ຢຶດໝັ້ນຕາມ 4 ເນື້ອໃນ 4 ຄາດດໝາຍ, ຕັ້ງໜ້າຜັນຂະຫຍາຍ, ຈັດຕັ້ງປະຕິບັດບັນດາມະຕິ ເພື່ອເຮັດໃຫ້ການພັດທະນາໃນແຕ່ລະວຽກງານທີ່ຂຶ້ນກັບຄວາມຮັບຜິດຊອບຢູ່ຂັ້ນຮາກຖານບ້ານໃຫ້ບັນລຸຕາມລະດັບຄາດໝາຍ.
(ຂ່າວ: ພອນ ບຸນອຸທິດ)