ຫົວ​ຂໍ້ : ທຸກສິ່ງທຸກຢ່າງທີ່ຈີນເຮັດໃນປັດຈຸບັນລ້ວນແຕ່ເພື່ອປະຊາຊົນ

ເຜີຍ​ແຜ່​ໂດຍ​: siththiphone rasphone ເວ​ລາ: 17/02/2020 10:51:28 ຈຳ​ນວນ​ຜູ້​ເຂົ້າ​ຢ້ຽມ​ຊົມ 303 ຄັ້ງ

   ທຸກສິ່ງທຸກຢ່າງທີ່ຈີນເຮັດໃນປັດຈຸບັນລ້ວນແຕ່ເພື່ອຕອບສະໜອງກັບສຽງຮຽກຮ້ອງ ແລະ ຄວາມຕ້ອງການຂອງປະຊາຊົນ
   ທ່ານ ຊຸຍທຽນ ຂາຍເອກອັກຄະລັດຖະທູດຈີນປະຈຳອາເມຣິກາໄດ້ໃຫ້ສຳພາດຕໍ່ທ່ານສະຕີເຟນ ອິນສຄີບ ຜູ້ຈັດລາຍການ "ຂ່າວຕອນເຊົ້າ" (Morning Edition) ຂອງສະຖານີວິທະຍຸກະຈາຍສຽງສາທາລະນະທົ່ວປະເທດອາເມຣິກາ ຫຼື NPR ເມືອວັນທີ 13 ກຸມພາຜ່ານໂດຍໄດ້ຕອບຄຳຖາມກ່ຽວກັບສະພາບການທີ່ຈີນຕ້ານກັບການແຜ່ລະບາດຂອງພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ ແລະບັນຫາອື່ນໆ ທ່ານທູດກ່າວເນັ້ນໜັກວ່າ: ທຸກສິ່ງທຸກຢ່າງທີ່ຈີນເຮັດໃນປັດຈຸບັນ ເຊິ່ງລວມທັງການສັບຊ້ອນພະນັກງານການນຳ, ລ້ວນແຕ່ແມ່ນເພື່ອເປົ້າໝາຍໜຶ່ງດຽວ ນັ້ນກໍຄື: ເພື່ອຕອບສະໜອງກັບສຽງຮຽກຮ້ອງ ແລະ ຄວາມຕ້ອງການຂອງປະຊາຊົນ. ນີ້ຄືເປົ້າໝາຍພຽງໜຶ່ງດຽວທີ່ຊຸກຍູ້ໃຫ້ພວກເຮົາເຮັດໝົດທຸກສິ່ງທຸກຢ່າງໃນປັດຈຸບັນ.
   ເມື່ອເວົ້າເຖິງສະພາບການແຜ່ລະບາດຂອງພະຍາດ, ທ່ານກ່າວວ່າ, ພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ເປັນສິ່ງທ້າທາຍອັນໃຫຍ່ຫຼວງຕໍ່ຈີນ, ຫາກເວົ້າໃນລະດັບໃດໜຶ່ງ ກໍເປັນສິ່ງທ້າທາຍອັນໃຫຍ່ຫຼວງຕໍ່ປະຊາຄົມໂລກເຊັ່ນກັນ. ຄຽງຄູ່ກັບການພັດທະນາທາງສັງຄົມແລະການເຕີບໂຕທາງເສດຖະກິດ, ພວກເຮົາຄວນເຮັດແນວໃດເພື່ອແກ້ໄຂຄວາມຕ້ອງການດ້ານສາທາລະນະສຸກແລະຮັບມືກັບພະຍາດຕິດແປດແບບນີ້, ນີ້ເປັນສິ່ງທ້າທາຍຕໍ່ປະຊາຄົມໂລກແລະບັນດາລັດຖະບານຂອງປະເທດຕ່າງໆໃນທົ່ວໂລກ. ໃນຂະນະດຽວກັນ, ທ່ານຊຸຍທຽນຂາຍກ່າວຕື່ມວ່າ, ເຖິງວ່າສິ່ງທ້າທາຍແບບນີ້ບໍ່ເຄີຍມີມາກ່ອນ, ແຕ່ໃນຄວາມເປັນຈິງແລ້ວ, ກ່ອນການແຜ່ລະບາດຂອງພະຍາດຄັ້ງນີ້, ຈີນກໍໄດ້ກຳນົດເປົ້າໝາຍຊຸກຍູ້ໃຫ້ລະບົບການປົກຄອງປະເທດ ແລະ ຄວາມສາມາດດ້ານການປົກຄອງຫັນເປັນແບບທັນສະໄໝ ເຊິ່ງສອດຄ່ອງກັບເປົ້າໝາຍລວມໃນຂະບວນການປະຕິຮູບຂອງຈີນ. ການແຜ່ລະບາດຂອງພະຍາດໃນຄັ້ງນີ້ໄດ້ພິສູດເຖິງຄວາມຖືກຕ້ອງໃນການກຳນົດເປົ້າໝາຍດັ່ງກ່າວຂອງຈີນ ແລະ ພວກເຮົາຈະພະຍາຍາມສຸດຂີດເພື່ອບັນລຸເປົ້າໝາຍດັ່ງກ່າວ. ຂ້າພະເຈົ້າເຊື່ອວ່າ, ຈີນຈະສາມາດຖອດຖອນບົດຮຽນໄດ້ດີກວ່າເກົ່າແລະເຮັດໄດ້ດີກວ່າເກົ່າຈາກການປ້ອງກັນ ແລະ ຄວບຄຸມພະຍາດໃນຄັ້ງນີ້.
   ເມື່ອເວົ້າເຖິງບັນຫາທີ່ເຈົ້າໜ້າທີ່ລະດັບສູງສອງຄົນຂອງແຂວງຫູເປີຍທີ່ມີການແຜ່ລະບາດຂອງພະຍາດຢ່າງຮ້າຍແຮງທີ່ສຸດໃນຄັ້ງນີ້ ໄດ້ຖືກປົດຕຳແໜ່ງນັ້ນ, ທ່ານຊຸຍທຽນຂາຍກ່າວວ່າ, ທຸກສິ່ງທຸກຢ່າງທີ່ຈີນເຮັດໃນປັດຈຸບັນເຊິ່ງລວມທັງການສັບຊ້ອນເຈົ້າໜ້າທີ່, ລ້ວນແຕ່ເພື່ອເປົ້າໝາຍດຽວກັນ ນັ້ນກໍຄື:ເພື່ອຕອບສະໜອງກັບສຽງຮຽກຮ້ອງ ແລະ ຕາມຄວາມຕ້ອງການຂອງປະຊາຊົນ. ນີ້ຄືເປົ້າໝາຍພຽງໜຶ່ງດຽວທີ່ຊຸກຍູ້ໃຫ້ພວກເຮົາເຮັດໝົດທຸກສິ່ງທຸກຢ່າງໃນປັດຈຸບັນ. ພາຍໃຕ້ສະພາວະພິເສດແບບນີ້, ແນ່ນອນແລ້ວ, ຕ້ອງມອບໜ້າທີ່ຮັບຜິດຊອບຫຼາຍກວ່າເກົ່າ ແລະສຳຄັນກວ່າເກົ່າໃຫ້ຜູ້ທີ່ມີຄວາມຮູ້ຄວາມສາມາດສູງກວ່າ. ໂດຍຜະເຊີນໜ້າກັບການແຜ່ລະບາດຂອງພະຍາດ, ບາງຄົນຈະຮູ້ສຶກຢ້ານກົວ, ນີ້ເປັນເລື້ອງທຳມະດາທີ່ສຸດ. ສະນັ້ນ, ພວກເຮົາຈຶ່ງໄດ້ຍຶດໝັ້ນໃນຫຼັກການເປີດເຜີຍແລະໂປ່ງໃສ. ພວກເຮົາເຊື່ອໝັ້ນວ່າ: ຫຼັກການເປີດເຜີຍແລະໂປ່ງໃສຈະເຮັດໃຫ້ຄົນທັງຫຼາຍມີຄວາມໝັ້ນໃຈກວ່າເກົ່າ, ຈະຮັບຮູ້ ແລະ ເຂົ້າໃຈເຖິງສະພາບການແຜ່ລະບາດຂອງພະຍາດໄດ້ດີກວ່າເກົ່າ ເຊິ່ງລວມທັງຄວາມສ່ຽງ ກໍຄືການປ້ອງກັນ ແລະ ຄວບຄຸມພະຍາດຄວນເຮັດແນວໃດເພື່ອໃຫ້ໄດ້ດີກວ່າເກົ່າ. ຈີນໄດ້ເປີດເຜີຍຂໍ້ມູນທີ່ກ່ຽວຂ້ອງທຸກມື້ ກໍເພື່ອບອກກ່າວກັບປະຊາຊົນວ່າ: ຈີນພວມອອກແຮງຢ່າງສຸດຂີດເພື່ອຕ້ານກັບການແຜ່ລະບາດຂອງພະຍາດແລະໃຫ້ປະຊາຊົນໄວ້ວາງໃຈ. ແນ່ນອນ, ການເຮັດແນວນີ້ກໍມີຜົນດີຕໍ່ການຊ່ວຍໃຫ້ພວກເຮົາກຳຈັດຂ່າວປອມ, ລົບລ້າງຂ່າວລື ແລະ ປະຖິ້ມວິທະຍາສາດທຽມ.

   ໃນເວລາຕອບຄຳຖາມຂອງທ່ານສະຕີເຟນ ອິນສຄີບ ທ່ານຊຸຍທຽນຂາຍກ່າວວ່າ: ຈີນໄດ້ປິດທາງເຂົ້າອອກຂອງນະຄອນອູຮັ້ນແລະຫຼາຍຕົວເມືອງ, ຈຸດປະສົງກໍເພື່ອຕັດຊ່ອງທາງການແຜ່ລະບາດຂອງພະຍາດແລະປົກປ້ອງຄົນຈຳນວນຫລາຍ. ແນ່ນອນແລ້ວ, ຈີນຈະປະສົບຄວາມເສຍຫາຍຢ່າງໜັກໜ່ວງ, ແຕ່ເຮັດແນວນີ້ກໍເພື່ອຜົນປະໂຫຍດອັນກວ້າງແຂວາງຂອງທົ່ວໂລກ. ຖ້າບໍ່ຕັດຊ່ອງທາງການແຜ່ລະບາດຂອງພະຍາດ, ພະຍາດຈະແຜ່ລະບາດໄປສູ່ປະເທດອື່ນ, ແລ້ວກາຍເປັນວິກິດການສາກົນ. ສະນັ້ນ, ຂ້າພະເຈົ້າເຫັນວ່າ, ມາດຕະການດັ່ງກ່າວຂອງຈີນໄດ້ສ່ອງແສງເຖິງນ້ຳໃຈຕາມສຸພາສິດຈີນທີ່ວ່າ "ຂ້ອຍເຮັດເພື່ອໝົດທຸກຄົນແລະໝົດທຸກຄົນກໍຈະເຮັດເພື່ອຂ້ອຍ", ເຮັດແນວນີ້ແມ່ນເພື່ອທົ່ວໂລກ. ຂະນະດຽວກັນ, ຈີນກໍສະແດງຄວາມຂອບໃຈຕໍ່ການສະໜັບສະໜູນແລະການຊ່ວຍເຫຼືອຂອງປະຊາຄົມໂລກເຊັ່ນກັນ.
   ສຸດທ້າຍ, ທ່ານຊຸຍທຽນຂາຍກ່າວວ່າ, ພາຍໃຕ້ການຊີ້ນຳນຳພາຂອງທ່ານປະທານສີຈິ້ນຜິງ, ສູນກາງພັກກອມມູນິດຈີນໄດ້ສ້າງຕັ້ງໜ່ວຍຮັບຜິດຊອບນຳພາເພື່ອຮັບມືກັບວຽກງານຕ້ານການແຜ່ລະບາດຂອງພະຍາດ. ອາດເວົ້າໄດ້ວ່າ, ຖ້າບໍ່ມີການນຳພາອັນເຂັ້ມແຂງຂອງທ່ານປະທານສີຈິ້ນຜິງ, ປະຊາຊົນຈີນຈະບໍ່ສາມາດມີກຳລັງສາມັກຄີອັນເຂັ້ມແຂງທີ່ຈະຕ້ານກັບການແຜ່ລະບາດຂອງພະຍາດຄືສູ່ມື້ນີ້. ທ່ານສີຈິ້ນຜິງຍັງໄດ້ສົນທະນາທາງໂທລະສັບກັບຜູ້ນຳຕ່າງປະເທດຫຼາຍທ່ານ ເຊິ່ງລວມທັງທ່ານໂດໂນ ທຣຳ ປະທານາທິບໍດີອາເມຣິກາ. ເຖິງວ່າຈີນໄດ້ປິດທາງເຂົ້າອອກຂອງບາງຕົວເມືອງຈົນນຳໄປສູ່ຄວາມເສຍຫາຍຫຼາຍຢ່າງ ເຊິ່ງລວມທັງຄວາມເສຍຫາຍທາງດ້ານເສດຖະກິດທີ່ມະຫາສານກໍຕາມ, ແຕ່ເວົ້າສຳລັບຈີນແລ້ວ, ຄວາມຜາສຸກຂອງປະຊາຊົນໂດຍສະເພາະແມ່ນຄວາມປອດໄພດ້ານຊີວິດ ແລະສຸຂະພາບແຂງແຮງຂອງປະຊາຊົນລ້ວນແຕ່ຢູ່ອັນດັບໜຶ່ງ ຈີນຈະພະຍາຍາມຢ່າງສຸດຂີດ ເພື່ອປົກປ້ອງຄວາມປອດໄພດ້ານຊີວິດແລະສຸຂະພາບຂອງປະຊາຊົນໂດຍບໍ່ພິຈາລະນາເຖິງມູນຄ່າຄວາມເສຍຫາຍໃດໆ. ໃນຂະນະດຽວກັນ, ຄົນທັງຫຼາຍກໍຕ້ອງການການພັດທະນາເສດຖະກິດແລະການເຄື່ອນໄຫວທາງສັງຄົມທີ່ເປັນປົກກະຕິ. ສະນັ້ນ, ຈີນກໍພະຍາຍາມຟື້ນຟູການເຄື່ອນໄຫວທາງເສດຖະກິດສັງຄົມໃຫ້ເປັນປົກກະຕິ ແຕ່ນີ້ກໍຂື້ນກັບຫລາຍປັດໄຈທີ່ເປັນສິ່ງຕັດສິນຊີ້ຂາດ ເຊິ່ງລວມທັງຄວາມພະຍາຍາມຂອງຈີນ, ລວມທັງພວກເຮົາໄດ້ປະຕິບັດງານໄປຕາມທິດທາງທີ່ຖືກຕ້ອງຫຼືບໍ່ ພ້ອມທັງວິທີຮັບມືແລະເຄື່ອງມືຂອງຈີນຈະປະສົບຜົນສຳເລັດຫຼືບໍ່. ພວກເຮົາພວມພະຍາຍາມຢ່າງສຸດຂີດ, ຂ້າພະເຈົ້າກໍມີຄວາມໝັ້ນໃຈຢ່າງເຕັມປ່ຽມຕໍ່ນັກວິທະຍາສາດແລະເຈົ້າໜ້າທີ່ທາງການແພດຂອງພວກເຮົາຈະສາມາດເຮັດໄດ້.


(ແຫຼ່ງ​ຂ່າວ: ສຳ​ນັກ​ຂ່າວ​ວິ​ທະ​ຍຸສາ​ກົນ​ແຫ່ງ​ປະ​ເທດ​ຈີນ ປະ​ຈຳ​ປັກ​ກິ່ງ )

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110