ຫົວ​ຂໍ້ : Covid-19 ການທົດສອບພື້ນຖານເສດຖະກິດທົ່ວໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 18/02/2020 08:51:00 ຈຳ​ນວນ​ຜູ້​ເຂົ້າ​ຢ້ຽມ​ຊົມ 308 ຄັ້ງ

ຮຽບຮຽງ​ໂດຍ: ສີ​ວັນ

  ຕາມ​ຄຳ​ປະກາດ​ຂອງ​ອົງການ​ອະນາໄມ​ໂລກ (WHO), ມາຮອດ​ວັນ​ທີ 17 ກຸມພາ​ປີ 2020,  ໂຣກ​ລະບາດ​ພະຍາດ​ອັກເສບ​ປອດ​ທີ່​ເກີດ​ຈາກ​ເຊື້ອ​ໄວ​ຣັດ Corona ສາຍ​ພັນ​ໃໝ່ (COVID - 19) ມີ​ຜູ້​ຕິດເຊື້ອ​ໃນ​ທົ່ວ​ໂລກ 71.329 ຄົນ ແລະ ມີ​ຜູ້​ເສຍ​ຊີວິດ 1.775 ຄົນ, ໄດ້​ແຜ່​ລະບາດ​ໄປ 30  ປະເທດ ແລະ ເຂດ​ແຄ້ວ​ນ​ແລ້ວ. ເຖິງ​ວ່າ​ຍັງ​ບໍ່​ທັນ​ມີ​ໂຕ​ເລກ​ສະຖິຕິ​ຢ່າງ​ຄົບ​ຖ້ວນ​ກ່ຽວ​ກັບ​ຜົນ​ກະທົບ​ຂອງ Covid-19 ຕໍ່​ພື້ນຖານ​ເສດຖະກິດ​ໂລກ​ກໍ່​ຕາມ, ແຕ່​ມັນ​ພວມ​ສືບຕໍ່​ກໍ່​ຜົນ​ຮ້າຍ​ໃນ​ເບື້ອງ​ຕົ້ນ​ຕໍ່​ການເຄື່ອນໄຫວ​ເຮັດ​ການ​ຜະລິດ​ດຳເນີນ​ທຸລະ​ກິດ​ໃນ​ທົ່ວ​ໂລກ.
  ໂຣກ​ລະບາດ Covid-19 ເກີດ​ຂຶ້ນ​ໃນ​ໂອກາດ​ມື້​ພັກ​ວັນ​ບຸນ​ປີ​ໃໝ່​ປະ​ຈໍາ​ຊາດຂອງ​ ຊາວຈີນ (ຕຸດ​ຈີນ) ແລະ ບາງ​ ປະເທດ​ໃນ​ອາຊີ ໄດ້​ກໍ່​ຜົນ​ກະ ທົບ​ອັນ​ຫຍໍ້ທໍ້ ຕໍ່​ພື້ນຖານ​ເສດ ຖະກິດ​ຂອງ​ປະເທດ​ຕ່າງໆ ໂດຍ​ສະເພາະ​ແມ່ນ​ຈີນ, ໃນ​ຂົງເຂດ​ສາທາລະນະ​ສຸກ, ການທ່ອງທ່ຽວ, ຄົມມະນາຄົມ​ຂົນສົ່ງ, ການ​ຄ້າຂາຍ​ຍ່ອຍ, ການ​ສົ່ງ​ອອກ​-​ນຳ​ເຂົ້າ, ບັນດາ​ຂະແໜງ​ຜະລິດ​ຕາມ​ລະບົບ​ຕ່ອງ​ໂສ້, ການ​ບໍລິການ​ການ​ເງິນ.
ການ​ເກີດ​ພະຍາດ Covid-19 ພຽງ​ຄືນ​ດຽວ​ເທົ່າ​ນັ້ນ, ຈີນ ໄດ້​ປະກາດ​ການ​ຄິດໄລ່​ສະຖິຕິ​ແບບ​ໃໝ່, ບັນດາ​ຜູ້​ຕິດເຊື້ອ​ພະຍາດ ແລະ ຜູ້​ເສຍ​ຊີວິດ​ໄດ້​ເພີ່ມ​ຂຶ້ນ​ຢ່າງ​ກະທັນ​ຫັນ. ດັດຊະນີ​ໃນ​ຕະຫຼາດ​ຫຼັກ​ຊັບ​ອາຊີ ຖືກ​ຕົກ​ລາ​ຄາ.
 ບັນດາ​ການເຄື່ອນໄຫວ​ທຸລະ​ກິດ​ຫຼາຍ​ແຫ່ງ​ຕ້ອງ​ປິດ​ປະຕູ, ບັນດາ​ບໍລິສັດ​ການບິນ​ໃນ​ໂລກ ໄດ້​ຍົກເລີກ ຖ້ຽວ​ບິນ​ຊົ່ວຄາວ ຫຼາຍ​ພັນ​ຖ້ຽວ​ຈາກ​ຈີນ ແລະ ໄປ​ຈີນ ລວມ​ທັງ​ຖ້ຽວ​ບິນ​ພາຍ​ໃນ​ປະ​ເທດ. ໃນ​ຊຸມ​ອາທິດ​ຜ່ານ​ມາ, ນະຄອນ​ອູ​ຮັ້ນ ແຂວງ​ຫູ​ເປີຍ ຂອງ​ຈີນ ຊຶ່ງ​ແມ່ນ​ນະຄອນ​ແຫ່ງ​ການ​ຜະລິດ​ລົດ​ໂອ​ໂຕ ໄດ້​ຢຸດຕິ​ການເຄື່ອນໄຫວ, ບັນດາ​ໂຮງງານ​ຕ້ອງ​ປິດ​ປະ​ຕູ. ຈາກ​ກຸ່ມ​ບໍລິສັດ​ຜະລິດ​ຍົນ Airbus ຂອງ​ເອີ​ຣົບ ຕະຫຼອດ​ຮອດ​ບໍລິສັດ​ລົດໄຟ​ຟ້າ Tesla ຫຼື ກຸ່ມ​ບໍລິສັດ Apple ຂອງ​ອາ​ເມ​ຣິ​ກາ ການ​ຜະລິດ​ກໍລ້ວນ​ແຕ່​ຕ້ອງ​ຫຼຸດ​ລະດັບ​ລົງ. ຍ້ອນ​ວ່າ, ຫຼາຍ​ແຂວງ, ນະຄອນ​ຂອງ​ຈີນ ໄດ້​ຕັດສິນ​ຈະ​ແກ່ຍາວ​ໄລຍະ​ພັກຜ່ອນ ເພື່ອ​ແນໃສ່​ຮັບ​ມື​ກັບ​ໂຣກ​ລະບາດ Covid-19.
  ໃນ​ຂະນະ​ດຽວ​ກັນ, ຂະ ແໜງ​ອຸດສາຫະກຳ​ສະບຽງ​ອາ ຫານ ກໍຖືກ​ຜົນ​ກະທົບຍ້ອນ​ບັນດາ​ເສັ້ນທາງ​ຄົມມະນາຄົມ​ລ້ວນ​ແຕ່​ຖືກ​ຢຸດ​ສະ​ງັກ. ຢູ່​ປະເທດ​ຝຣັ່ງ ຂະແໜງ​ບໍລິການ​ໂຮງແຮມ ເລີ່ມ​ໄດ້​ຮັບ​ຜົນ​ກະທົບ​ຍ້ອນ​ໂຣກ​ລະບາດ,  ຈຳນວນ​ຫ້ອງ​ພັກ​ທີ່​ຈ່ອງ​ໄວ້​ລ່ວງ​ໜ້າ​ໃນ​ເດືອນ​ມັງກອນ​ກວມ 80% ຖືກ​ຍົກເລີກ ແລະ  ໃນ​ເດືອນ​ກຸມພາ 100% ຖືກ​ຍົກ​ເລີກ.
ອົງການ​ບັນດາ​ປະເທດ​ສົ່ງ​ອອກ​ນ້ຳມັນ (OPEC)  ໄດ້​ຈັດການ​ປະຊຸມ​ດ່ວນ ຍ້ອນ​ຕະຫຼາດ​ໃຫຍ່  ກ່​ວາ​ໝູ່​ຢູ່​ຈີນ ຖືກ​ຢຸດ​ສະ​ງັກ​ຊົ່ວ​ຄາວ. ຣັດ​ເຊຍ, ມົງ​ໂກນ, ສ.ເກົາຫຼີ ໄດ້​ປິດ​ປະຕູ​ຊາຍ​ແດນ​ກັບ​ຈີນ ຊົ່ວ​ຄາວ. ໃນ​ຂະນະ​ທີ່​ບັນດາ​ປະເທດ​ຕາເວັນຕົກ ກໍ​ຂຸ້ນ​ຂ້ຽວ​ນໍາ​ເອົາ​ພົນລະເມືອງ​ຂອງ​ຕົນ ກັບ​ຄືນ​ເມືອ​ປະ​ເທດ. ຫຼາຍ​ປະເທດ​ໄດ້​ກ່າວ​ເຕືອນ​ພົນລະເມືອງ​ຫຼີກ​ລ່ຽງ​ການ​ເດີນທາງ​ໄປ​ຈີນ​ໃນ​ໄລຍະ​ນີ້. ສະນັ້ນ ຈຶ່ງ​ສົ່ງ​ຜົນ​ກະທົບ​ເຖິງ​ລະບົບ​ຕ່ອງ​ໂສ້​ໂລກ​ເກີດ​ຄວາມ​ສັບສົນ ຍ້ອນ​ຜົນ​ກະທົບ​ຈາກ​ໂຣກ​ລະບາດ Covid-19.
  ເຖິງ​ຢ່າງໃດ​ກໍຕາມ, ບັນດາ​ນັກ​ຊ່ຽວຊານ​ຊີ້​ອອກ​ວ່າ: ບໍ່​ທັນ​ເຖິງ​ເວລາ​ທີ່​ຈະ​ມີ​ການ​ຕີ​ລາຄາ​ຢ່າງ​ຖີ່​ຖ້ວນ ກ່ຽວ​ກັບ​ຜົນ​ກະທົບ​ຂອງ​ໂຣກ​ລະບາດ Covid-19 ທີ່​ມີ​ຕໍ່​ເສດຖະກິດ​ໂລກ. ອົງການ​ຄົ້ນ​ຄວ້າ​ເຊັ່ນ: Moody’s, BNP Paribas Cadif, International SOS, ປະກາດ​ວ່າ: ເນື່ອງ​ຈາກ​ວ່າ ສປ ຈີນ ແມ່ນ​ພື້ນຖານ​ເສດຖະກິດ​ໃຫຍ່​ອັນ​ດັບ​ທີ 2 ຂອງ​ໂລກ, ກວມ​ເອົາ​ອັດຕາ​ສ່ວນ​ປະມານ 17% ລວມ​ຍອດ​ລາຍ​ຮັບ(GDP)  ທົ່ວ​ໂລກ ແລະ ປະກອບສ່ວນ​ປະມານ 33% ລະດັບ​ເຕີບ​ໂຕ​ເສດຖະກິດ​ທົ່ວ​ໂລກ ຄາດ​ວ່າ:ໂຣກ​ລະບາດ​ດັ່ງກ່າວ, ອາດ​ຈະ​ເຮັດ​ໃຫ້  GDP ທົ່ວ​ໂລກ​ຫຼຸດ​ລົງ​ປະມານ 0.3-0.7% ໃນ​ປີ​ນີ້. Oxford Economics ຄາດ​ຄະເນ​ວ່າ: ອາ​ເມ​ຣິ​ກາ ຈະ​ເສຍ​​ນັກທ່ອງ​ທ່ຽວ​ຈີນ ປະມານ 1,6 ລ້ານຄົນ​ໃນ​ປີ​ນີ້.
  ຄວາມຫວັງ​ການ​ເຕີບ​ໂຕ​ຂອງ​ເອີ​ຣົບ ອາດ​ຈະ​ຖືກ​ຜົນ​ກະທົບ​ເຊັ່ນ​ດຽວ​ກັນ. ທະວີບ​ເອີ​ຣົບ ນັບ​ມື້​ນັບ​ກາຍເປັນ​ຈຸດ​ນັດ​ພົບ​ທີ່​ດີ​ສຳລັບ​ແຂກ​ທ່ອງ​ທ່ຽວ​ຈີນ. ໃນ​ຂະນະ​ນັ້ນ, ວັນ​ທີ 13 ກຸມພາ, ທ່ານ ນາງ​ຄຣິ​ສ​ຕາ​ລິ​ນາ ໂຈ​ກິ​ວາ ຜູ້ອຳນວຍການ​ໃຫຍ່​ກອງ​ທຶນ​ເງິນຕາ​ສາກົນ (IMF) ໄດ້​ຕີ​ລາຄາ​ວ່າ: ການ​ເຕີບ​ໂຕຂອງ​ເສດຖະກິດ​ທົ່ວ​ໂລກ ຈະ​ຖືກ​ຜົນ​ກະທົບ “ເບົາບາງ” ຍ້ອນ​ໂຣກ​ລະບາດ COVID-19. ໃນ​ຈຸດ​ເວລາ​ນີ້, ຫຼາຍ​ປະເທດ ໂດຍ​ສະເພາະ​ແມ່ນ​ບັນດາ​ປະເທດ​ອາຊີ ພວມ​ກະກຽມ​ຮັບ​ມື, ມີ​ບັນດາ​ນະໂຍບາຍ​ໜູນ​ຊ່ວຍ​ວິ​ສາ​ຫະ​ກິດ​ຢ່າງ​ທັນ​ການ, ຫຼຸດຜ່ອນ​ອັດຕາ​ພາສີ​ອາກອນ, ໜູນ​ຊ່ວຍ​ຂົງເຂດ​ຮ້ານ​ອາຫານ, ການທ່ອງທ່ຽວ, ຮັບປະກັນ​ຄວາມ​ເປັນ​ລະບຽບ​ຮຽບຮ້ອຍ​ທາງ​ສັງຄົມ, ເຮັດ​ໃຫ້​ຈິດໃຈ​ປະຊາຊົນ​ເປັນ​ປົກກະຕິ, ພ້ອມ​ແລ້ວ​ທີ່​ຈະ​ຟື້ນ​ຟູ​ການ​ຜະລິດ​ດຳເນີນ​ທຸລະ​ກິດ ໃນ​ເມື່ອ​ໂຣກ​ລະບາດ​ໄດ້​ສິ້ນ​ສຸດ​ລົງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110