ຫົວ​ຂໍ້ : ກອງປະຊຸມຄວາມໝັ້ນຄົງມິວນິກ ສືບຕໍ່ຫາລືຫຼາຍບັນຫາທົ່ວໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 18/02/2020 08:52:38 ຈຳ​ນວນ​ຜູ້​ເຂົ້າ​ຢ້ຽມ​ຊົມ 298 ຄັ້ງ

  ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 15 ກຸມພາ​ຜ່ານ​ມາ, ທ່ານ ເຈນ ສະ​ໂຕນ​ເທ​ນ​ເບີກ ເລຂາທິການ​ໃຫຍ່​ອົງການ​ສົນທິສັນຍາ​ອັດ​ລັງ​ຕິກ​ເໜືອ (NATO) ໄດ້​ກ່າວ​ສະແດງ​ຄວາມ​ຊົມເຊີຍ​ຕໍ່​ການ​ພົວພັນ ລະຫວ່າງ ອາ​ເມ​ຣິ​ກາ - ສະຫະພາບ​ເອີ​ຣົບ (ອີ​ຢູ) - ການ​ພົວພັນ​ມະຫາ​ສະໝຸດ​ອັດ​ລັງ​ຕິກ ຊຶ່ງ​ພວມ​ມີ​ທີ່​ຕັ້​ງສໍາ​ຄັນ ໃນ​ກອງ​ປະຊຸມ​ຄວາມ​ໝັ້ນຄົງ​ມິ​ວ​ນິກ (Munich).
  ຂ່າວ​ລະບຸ​ວ່າ: ກອງ​ປະຊຸມ​ຄວາມ​ໝັ້ນຄົງ Munich ຄັ້ງ​ທີ 56 ໄດ້​ເປີດ​ຂຶ້ນ​ດ້ວຍ​ການ​ເຂົ້າ​ຮ່ວມ​ຂອງ ປະມຸກ​ລັດ 40 ທ່ານ ແລະ ລັດຖະມົນຕີ, ຜູ້ຕາງໜ້າ​ຂອງ NATO, ສະມາຊິກ​ຂອງ​ຄະນະ​ກຳມະການ​ເອີ​ຣົບ, ຜູ້ຕາງໜ້າ​ອົງການ​ຈັດ​ຕັ້ງ​ບໍ່​ຂຶ້ນ​ກັບ​ລັດຖະບານ, ອົງການ​ສາກົນ ແລະ ວິ​ສາ​ຫະ​ກິດ 100 ຄົນ. ທ່ານ ເຈນ ສະ​ໂຕນ​ເທ​ນ​ເບີກ ຊີ້​ແຈງວ່າ: ຄວາມ​ພະຍາຍາມ​ໃດໆ ທີ່​ແນໃສ່​ປັດ​ເຂ່ຍ ເອີ​ຣົບ ອອກ​ຈາກ ອາ​ເມ​ຣິ​ກາ​ເໜືອ ກໍ​ບໍ່​ສາ​ມາດ​ເຮັດ​ໃຫ້ການ​ພົວພັນ​ພາກ​ພື້ນ​ມະຫາ​ສະໝຸດ​ອັດ​ລັງ​ຕິກ​ອ່ອນແອ​ລົງ​ໄດ້, ແຕ່​ຫາກ​ຍັງ​ມີ​ຄວາມ​ສ່ຽງ​ກໍ່​ຄວາມ​ແບ່ງ​ແຍກ​ຢູ່​ເອີ​ຣົບ​ອີກ​ດ້ວຍ. ທ່ານ ກໍ​ໄດ້​ສະແດງ​ຄວາມ​ເຊື່ອ​ໝັ້ນ​ຕໍ່​ການ​ພົວພັນ ລະຫວ່າງ ເອີ​ຣົບ ກັບ ອາ​ເມ​ຣິ​ກາ ອີກ​ດ້ວຍ.
  ພ້ອມ​ກັນ​ນັ້ນ, ທ່ານ ເອັມ​ມາ​ນູ​ແອວ ມາ​ຄຣອງ ປະທາ ນາທິບໍດີ ຝຣັ່ງ ໄດ້​ຄາດ​ຄະເນ​ວິໄສ​ທັດ​ກ່ຽວ​ກັບ ເອີ​ຣົບ ດ້ວຍ​ກໍາ​ລັງ​ແຮງ​ການ​ທະຫານ​ໃໝ່ ແລະ ທົບ​ທວນ​ເຖິງ​ນິວ​ເຄ​​ລຍ​ຂອງ​ເອີ​ຣົບ ແລະ ຊີ້​ໃຫ້​ເຫັນ​ຄວາມ​ແຕກ​ຕ່າງ​ກັນ​ຕົ້ນຕໍ​ໃນ​ສັງກາດ ສົງຄາມ​ເຢັນ ແລະ ໃນ​ປັດ​ຈຸ​ບັນ.
  ທ່ານ ແຟຣງ - ວອດ​ເຕີ ສະ​ຕິ​ນ​ເມ​ເອີ ປະທານາທິບໍດີ​ເຢຍ​ລະ​ມັນ ກ່າວ​ວ່າ: ແຕ່​ລະ​ປີ, ໂລກ​ນັບ​ມື້​ນັບ​ຫ່າງ​ໄກ​ຈາກ​ເປົ້າ​ໝາຍ​ສ້າງ​ໂລກ​ໃຫ້​ມີ​ສັນຕິພາບ​ກວ່າ​​ເກົ່າ ຜ່ານ​ການ​ຮ່ວມ​ມື​ສາກົນ, ທ່ານ ແຟຣງ - ວອດ​ເຕີ ສະ​ຕິນ​ເມ​ເອີ ກ່າວ​ວ່າ: ເອີ​ຣົບ ຄວນ​ເພີ່ມ​ທະວີ​ການ​ຄວບ​ຄຸມ​ຄວາມ​ໝັ້ນຄົງ​ຂອງ​ຕົນ ແລະ ໜຶ່ງ​ໃນ​ບັນດາ​ມາດ​ຕະການ ແມ່ນ​ເພີ່ມ​ງົບປະມານ​ດ້ານ​ປ້ອງ​ກັນ​ຊາດ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110