ໜັງສືພິມ ປະຊາຊົນ

ຖະແຫຼງການອາຊຽນ ຮ່ວມກັນຮັບມືກັບພະຍາດ covid-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 18/02/2020 08:57:24 ຈຳນວນຢ້ຽມຊົມ 544 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ຖະແຫຼງ ການປະທານກ່ຽວກັບເລື່ອງ ອາຊຽນ ຮ່ວມກັນຮັບມືກັບເຊື້ອພະຍາດ Covid - 19 ໂດຍທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ປະກາດໃຊ້ ພາຍຫຼັງປຶກສາຫາລືກັບບັນດາປະເທດສະມາຊິກ ອາຊຽນ, ໃນສະພາບການທີ່ເຊື້ອພະຍາດດັ່ງກ່າວ ມີການຜັນແປຢ່າງສັບສົນ.
ຂ່າວລະບຸວ່າ: ຖະແຫຼງ ການດັ່ງກ່າວ, ໄດ້ສະແດງຄວາມວິຕົກກັງວົນຂອງການນໍາບັນດາປະເທດ ອາຊຽນ ຕໍ່ການຜັນແປຂອງເຊື້ອພະຍາດ Covid-19. ພ້ອມທັງເນັ້ນໜັກເຖິງຄວາມສາມັກຄີຂອງ ອາຊຽນ ໃນການຮ່ວມແຮງຮ່ວມໃຈກັນຄວບຄຸມ ແລະ ສະກັດກັ້ນການແຜ່ລາມຂອງເຊື້ອພະຍາດ Covid-19, ຮັບປະກັນໃຫ້ປະຊາຊົນມີຊີວິດທີ່ສະຫງົບສຸກ. ນອກຈາກນັ້ນ, ຖະແຫຼງການສະບັບດັ່ງກ່າວ ກໍໄດ້ເນັ້ນໜັກວ່າ: ບັນດາປະເທດ ອາຊຽນ ຈະສືບຕໍ່ຮັກສານະໂຍບາຍເປີດປະຕູ; ເຫັນດີເປັນເອກະພາບຕໍ່ການສົມທົບໃນວຽກງານກວດກາສາທາລະນະສຸກຢູ່ດ່ານຊາຍແດນແຫ່ງຕ່າງໆຂອງບັນດາປະເທດສະມາຊິກ; ຮຽກຮ້ອງໃຫ້ບັນດາອົງການຕາງໜ້າທາງການທູດຂອງບັນດາປະເທດສະມາຊິກອາຊຽນ ປະຈໍາຢູ່ປະເທດທີ 3, ໜູນຊ່ວຍດ້ານກົງສູນໃຫ້ພົນລະເມືອງ ອາຊຽນ ໃນກໍລະນີຈໍາເປັນ ກໍຄືຮ່ວມມືກັນຢ່າງມີປະສິດທິຜົນສະກັດກັ້ນການເຜີຍແຜ່ຂໍ້ມູນຂ່າວທີ່ບໍ່ມີມູນຄວາມຈິງກ່ຽວກັບເຊື້ອພະຍາດ Covid - 19. ໃນບົດບາດເປັນປະທານສະພາປະສານງານ ອາຊຽນ (ACC), ຫວຽດນາມ ສະເໜີຈັດຕັ້ງກອງປະຊຸມພິເສດຂອງ ACC ແລະ ສົມທົບກັບ ຈີນ ຈັດກອງປະຊຸມພິເສດ ລັດຖະມົນຕີການຕ່າງປະເທດ ອາຊຽນ - ຈີນ ເນື່ອງໃນໂອກາດ ຈັດກອງປະຊຸມ ລັດຖະມົນຕີການຕ່າງປະເທດ ແມ່ນໍ້າຂອງ - ແມ່ນໍ້າລ້ານຊ້າງ ຄັ້ງທີ 5 ຢູ່ ນະຄອນຫຼວງວຽງຈັນ ແຫ່ງສປປ ລາວ ໃນເດືອນມີນານີ້ ເພື່ອປຶກສາຫາລືກ່ຽວກັບການຮ່ວມກັນຮັບມືກັບເຊື້ອພະຍາດ Covid - 19.
ຖະແຫຼງການລະບຸວ່າ: ອາຊຽນ ສະໜັບສະໜູນຄວາມພະຍາຍາມອັນໃຫຍ່ຫຼວງຂອງລັດຖະບານ ແລະ ປະຊາຊົນຈີນ ພ້ອມທັງປະເທດຕ່າງໆໃນໂລກ ເພື່ອຕໍ່ຕ້ານພະຍາດ Covid - 19, ອາຊຽນ ໄດ້ດຳເນີນການຮ່ວມມືກັບຈີນ, ຍີ່ປຸ່ນ ແລະ ສ.ເກົາຫຼີ ກ່ຽວກັບການປ້ອງກັນຄວບຄຸມພະຍາດເທື່ອນີ້, ພ້ອມທັງຕົກລົງເພີ່ມທະວີການແລກປ່ຽນຂໍ້ມູນ, ບົດຮຽນ ແລະ ແຜນການ ລະຫວ່າງ ປະເທດສະມາຊິກອາຊຽນ, ລະຫວ່າງອາຊຽນ ກັບ ປະເທດຕ່າງໆເຊັ່ນ: ຈີນອົງການອະນາໄມໂລກ ຫຼື WHO ເປັນຕົ້ນ.