ຫົວ​ຂໍ້ : ຖະແຫຼງຂ່າວພິທີປະກວດນາງສາວ ນວ ຮອບ 20 ຄົນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 18/02/2020 09:03:48 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1058 ຄັ້ງ

  ພະ​ແນ​ກ​ຖະແຫຼງ​ຂ່າວ​ນະຄອນ ຫຼວງ​ວຽງ​ຈັນ ຮ່ວມ​ກັບ​ບໍລິສັດ​ກຣິດ​ຕິ​ພົງ ກຣຸບ ຈໍາ​ກັດ ໄດ້​ຈັດ​ງານຖະ ແຫຼງ​ຂ່າວ​ການ​ປະ​ກວດ​ນາງ​ສາວ​ນະ ຄອນຫຼວງ​ວຽງ​ຈັນ (ນວ) ຮອບ 20 ນາງ​ສາວ ຂຶ້ນ​ໃນວັນ​ທີ 15 ກຸມພາ​ຜ່ານ​ມາ​ ທີ່​ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ ໂດຍ​ມີ​ທ່ານ ນາງ ວິໄລ​ວອນ ຈັນທະ​ລາຕີ ຫົວໜ້າ​ພະ​ແນ​ກ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ ​ນະຄອນ​ຫຼວງວຽງ​ຈັນ; ທ່ານ ນາງ ອໍລະໄທ ສັນຕິ​ຄົງ​ຄາ ປະທານ​ບໍລິສັດ​ກຣິດ​ຕິ​ພົງ ກຣຸບ ຈໍາ​ກັດ ຊຶ່ງເປັນ​ຜູ້​ຮັບ​ຜິດຊອບໂຄງການ ປະກວດ​ນາງ​ສາວ​ນະຄອນຫຼວງ​ວຽງ​ຈັນ ​ປະ​ຈໍາ​ປີ 2020 ພ້ອມ​ດ້ວຍ​ນາງ​ສາວ ແລະ ແຂກ​ຖືກ​ເຊີນເຂົ້າ​ຮ່ວມ.
  ທ່ານ ນາງ ອໍລະໄທ ສັນຕິ​ຄົງ​ຄາ ໄດ້​ກ່າວ​ວ່າ:  ຂັ້ນ​ຕອນ​ການ​ຄັດ​ເລືອກ​ແມ່ນ​ເລີ່ມ​ຮັບ​ສະໝັກ​ແຕ່​ວັນ​ທີ 6 ມັງກອນ 2020 ຈົນ​ເຖິງ ວັນ​ທີ 2 ກຸມພາ 2020  ຊຶ່ງ​ຜ່ານ​ການ​ຄັດ​ເລືອກ​ໄດ້​ຈໍາ​ນວນ 100 ນາງ​ສາວ ຖື​ວ່າ​ໄດ້​ຮັບ​ຄວາມ​ສົນໃຈ​ຫຼາຍ, ໃນ​ການ​ຄັດ​ເລືອກ​ຮອບ​ທີ​ໜຶ່ງ​ແມ່ນ​ເລີ່ມ​ແຕ່​ວັນ​ທີ 5 ກຸມພາ 2020 ໄດ້​ຈໍາ​ນວນ 100 ນາງ​ສາວ​ໃຫ້​ເຫຼືອ​ຈໍາ​ນວນ 50 ນາງ​ສາວ; ຮອບ​ທີ 2 ໃນ​ວັນ​ທີ 8 ກຸມພາ 2020 ຄັດ​ເລືອກ​ຈາກ 50 ນາງ​ສາວ ໃຫ້​ເຫຼືອ 30 ນາງ​ສາວ ແລະ ຄັດ​ເລືອກ​ຮອບ​ທີ 3 ແມ່ນ​ຄັດ​ເລືອກ​ໃນ​ວັນ​ທີ 15 ກຸມພາ 2020 ໃຫ້​ເຫຼືອ​ພຽງ 20 ນາງ​ສາວ ເພື່ອໃຫ້​ໄດ້​ນາງ​ສາວ​ເຂົ້າ​ຮອບ​ການ​ປະ​ກວດ. ຮອບ​ຊີງ​ຊະນະ​ເລີດ​ແມ່ນ​ຈະ​ໄດ້​ຈັດ​ຂຶ້ນໃນ​ວັນ​ທີ 28 ມີນາ 2020 ທີ່​ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ. 
  ຈຸດປະສົງ​ຂອງ​ການ​ປະ​ກວດ​ນີ້ ເພື່ອ​ເປັນ​ການ​ຊຸກຍູ້​ສົ່ງເສີມ​ວຽກ​ງານ​ທາງ​ດ້ານ​ວັດ​ທະ​ນະ​ທໍາ, ວຽກ​ງານ​ທາງດ້ານ​ການທ່ອງທ່ຽວ​ໃນ​ນະຄອນຫຼວງ​ວຽງ​ຈັນ​ໃຫ້​ມີ​ບັນ ຍາກາດ​ເບີກບານ​ມ່ວນຊື່ນ ​ມີ​ຫຼາກ​ຫຼາຍ​ກິດ​ຈະ​ກໍາ ​ຊຶ່ງ​ໃນ​ກິດ​ຈະ​ກໍາ​ການ​ປະ​ກວດ​ນີ້​ແມ່ນ​ຈະ​ໄດ້​ພ້ອມ​ກັນ​ຄັດ​ເລືອກ​ເອົາ​ຕົວ​ແທນ​ຂອງ​ນາງ​ສາວ​ຜູ້​ທີ່​ມີ​ເງື່ອນໄຂ​ມີ​ມາດຖານ​ທີ່​ທາງ​ຄະນະ ກໍາ​ມະການ​ໄດ້​ກໍາ​ນົດ​ໄວ້​ ເປັນຕົ້ນ​ແມ່ນ​ເລື່ອງ​ຮູບ​ຮ່າງ​ໜ້າ​ຕາ, ກິລິຍາ​ມາລະຍາດ, ຄວາມ​ຮູ້​ຄວາມ​ສາມາດ​ແລະ ​ພອນ​ສະ​ຫວັນ​ນີ້​ແມ່ນ​ມາດຖານ​ທີ່​ໄດ້​ກໍາ​ນົດ​ໄວ້ ເພື່ອ​ໃຫ້​ໄດ້​ນາງ​ສາວ​ມາ​ເປັນ​ທູດ​ວັດ​ທະ​ນະ​ທໍາ​ແລະ​ເຂົ້າ​ຮ່ວມ​ກິດ​ຈະ​ກໍາ​ວັດ​ທະ​ນະ​ທໍາ​ທີ່​ທາງ ນວ ຈະ​ຈັດ​ຂຶ້ນ​ ໂດຍ​ສະເພາະ​ເຂົ້າ​ຮ່ວມຂະບວນການ​ແຫ່​ພະ​ພຸດ​ທະ​ຮູບ​ມິ່ງ​ບ້ານ ມິ່ງ​ເມືອງ ຂອງ​ລາວ​ເຮົາ​ກໍ​ຄື​ນະຄອນຫຼວງ​ວຽງ​ຈັນ, ໃນ​ບຸນ​ປະເພນີ​ກຸດສົງການ ຫຼື​ ວ່າ​ບຸນປີໃໝ່​ລາວ​ທີ່​ເຄີຍ​ຈັດ​ກັນ​ມາ, ນອກ​ນັ້ນ​ຜູ້​ທີ່​ເປັນ​ຕົວ​ແທນ​ນາງ​ສາວ ນະຄອນຫຼວງ ວຽງຈັນ​ ຈະ​ໄດ້​ເຂົ້າ​ຮ່ວມ​ກິດ​ຈະ​ກໍາ​ທາງ​ດ້ານ​ວັດ​ທະ​ນະ​ທໍາ​ທາງ​ດ້ານ​ສັງ ຄົມ​ຕ່າງໆ ທີ່​ທາງ​ນະຄອນຫຼວງ​ວຽງ ຈັນ​ຈັດ​ຂຶ້ນ ໃຫ້​ສົມ​ກັບ​ຄໍາ​ຂວັນ​ນາງ​ສາວ​ນະຄອນຫຼວງ​ວຽງ​ຈັນ​ທີ່​ວ່າ: “ນໍາ​ຄຸນຄ່າ​ແມ່ຍິງ​ລາວ​ກ້າວ​ສູ່​ຄວາມທັນ​ສະໄໝ ຄຽງ​ຄູ່​ໄປ​ກັບ​ວັດ​ທະ​ນະ​ທໍາ”.
  ສໍາ​ລັບ​ລາງວັນ​ຊະນະ​ເລີດ​ນາງ​ສາວ​ນະຄອນຫຼວງ​ວຽງ​ຈັນ ຈະ​ໄດ້​ຮັບ​ເງິນສົດ​ມູນ​ຄ່າ 20 ລ້ານ​ກີບ ພ້ອມ​ສາຍ​ສະພາຍ​ນາງ​ສາວ​ນະຄອນຫຼວງ, ມົງກຸດ​ເພັດ​ຈາກ​ຮ້ານ​ຄໍາ​ພູ​ວົງ ມູນ​ຄ່າ 50 ລ້ານ​ກີບ, ຄໍາ ນໍ້າ​ໜັກ 1 ບາດ​ຈາກ​ຮ້ານ​ຄໍາ​ພູ​ວົງ ພ້ອມ​ດ້ວຍ​ລາງວັນ​ອື່ນໆ; ຮອງ​ອັນ​ດັບ​ໜຶ່ງ​ໄດ້​ຮັບ​ເງິນສົດ​ມູນ​ຄ່າ 10 ລ້ານ​ກີບ​ພ້ອມ​ສາຍ​ສະພາຍ, ມົງກຸດ​ເພັດ​ຈາກ​ຮ້ານ​ຄໍາ​ພູ​ວົງ ມູນ​ຄ່າ 30 ລ້ານ​ກີບ, ຄໍານໍ້າ​ໜັກ​ສອງ​ສະຫຼຶງ​ຈາກ​ຮ້ານ​ຄໍາ​ພູ​ວົງ ພ້ອມ​ດ້ວຍ​ລາງວັນ​ຈາກ​ຜູ້​ອຸ​ປະ​ຖໍາ ແລະ ຮອງ​ອັນ​ດັບ​ສອງ ໄດ້​ຮັບ​ເງິນສົດ​ມູນ​ຄ່າ 5 ລ້ານ​ກີບ ​ພ້ອມ​ສາຍ​ສະພາຍ, ມົງກຸດ​ເພັດ​ຈາກ​ຮ້ານ​ຄໍາ​ພູ​ວົງ​ມູນ​ຄ່າ 30 ລ້ານ​ກີບ ແລະ ຄໍານໍ້າ​ໜັກ​ສອງ​ສະຫຼຶງ​ຈາກ​ຮ້ານ​ຄໍາ​ພູ​ວົງ.
(ຂ່າວ​-​ພາບ: ຍຸ​ພິນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110