ຫົວ​ຂໍ້ : ການນຳກະຊວງ ຮສສ ມອບເຄື່ອງ ຊ່ວຍເຫຼືອໃຫ້ແຂວງຜົ້ງສາລີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 18/02/2020 09:19:41 ຈຳ​ນວນ​ຜູ້​ເຂົ້າ​ຢ້ຽມ​ຊົມ 260 ຄັ້ງ

   ທ່ານ ຄໍໍາ​ແພງ ໄຊ​ສົມແພງ ລັດຖະມົນຕີ ກະຊວງ​ແຮງ​ງານ ແລະ  ສະຫວັດດີ​ການ​ສັງຄົມ (ຮສສ) ພ້ອມ​ດ້ວຍ​ຄະນະ​ໄດ້​ເຄື່ອນ​ໄຫວ​ຢ້ຽມຢາມ ແລະ ມອບ​ເຄື່ອງ​ຊ່ວຍເຫຼືອ​ໃຫ້​ແຂວງ​ຜົ້ງ​ສາລີ ໃນ​ຕອນ​ເຊົ້າ​ວັນ​ທີ 17 ກຸມພາ 2020 ນີ້ ​ທີ່​ຫ້ອງ​ປະຊຸມ​ຄະນະ​ປະຈຳ​ຫຼັງ​ເກົ່າ​ເມືອງ​ຜົ້ງ​ສາລີ ໂດຍ​ການ​ຕ້ອນຮັບ ຂອງ​ທ່ານ ທອງ​ສີ ເສົາ​ສຸ​ລີ​ພົມ ຮອງ​ເຈົ້າແຂວງ​ຜົ້ງ​ສາລີ ພ້ອມ​ຄະ​ນະ.
ທ່ານ ທອງ​ສີ ເສົາ​ສຸ​ລີ​ພົມ ໄດ້​ລາຍ​ງານ​ສະພາບ​ຈຸດ​ພິເສດ, ການ​ພັດທະນາ​ເສດຖະກິດ - ສັງຄົມ ໂດຍ​ຫຍໍ້​ໃຫ້ ທ່ານ ລັດຖະມົນຕີ ຮສສ ໄດ້​ຮັບ​ຊາບ​ວ່າ: ເສດຖະກິດ​ປີ 2019 ຂອງ​ແຂວງ ມີ​ລວມ​ຍອດ​ຜະລິດ​ຕະ​ພັນ​ຂະຫຍາຍຕົວ​ຢູ່​ໃນ​ລະດັບ 6,69% (ແຜນການ 6,97%). ສຳລັບ​ວຽກ​ງານ​ຄຸ້ມ​ຄອງ​ເ​ເຮ​ງ​ງານ​ຕ່າງປະເທດ​ໄດ້​ປະຕິບັດ​ຂຶ້ນ​ທະບຽນ 167 ຫົວໜ່ວຍ, ອອກ​ບັດ​ອະນຸຍາດ​ເຮັດ​ວຽກ​ຈຳນວນ 374 ຄົນ, ຍິງ 89 ຄົນ, ທຽບໃສ່​ແຜນ​ປີ 57% ຕໍ່​ປີ. ວຽກ​ງານ​ປະກັນ​ສັງຄົມ​ໄດ້​ຂະ​ຫຍາຍ​ອັດຕາ​ປົກ​ຄຸ້ມ​ປະກັນ​ສັງຄົມ​ບັນລຸ​ໄດ້ 96 ຄົນ, ຍິງ 52 ຄົນ ທຽບ​ໃສ່​ເ​ເຜນ​ການ​ປີ​ບັນລຸ  80% ຕໍ່​ປີ. ວຽກ​ງານ​ສັງຄົມ​ສົງເຄາະ​ໄດ້​ຮັບ​ການ​ຊ່ວຍ​ເຫຼື່ອ​ເຄື່ອງ​ອຸປະໂພກ ແລະ ບໍລິໂພກ​ຈາກ​ພາຍ​ໃນ​ກະຊວງ ຮສສ ໃນ​ປີ 2019 ມີ​ຈໍາ​ນວນ 1.810 ຫຼັງຄາ, 69 ບ້ານ, 1.810 ຄອບຄົວ, ພົນລະເມືອງ 8.619 ຄົນ, ຍິງ 4.005 ຄົນ, ຄິດ​ເປັນ​ມູນ​ຄ່າ 51.100.000 ກີບ ແລະ ວຽກ​ງານ​ອື່ນໆ.
   ໂອກາດ​ນີ້, ທ່ານ ຄໍາ​ແພງ ໄຊ​ສົມ​ແພງ ໄດ້​ເນັ້ນ​ບາງ​ວຽກ​ໃຫ້​ພະນັກງານ​ຫຼັກ​ແຫຼ່ງ​ຂອງ​ພະ​ແນກ ຮສສ ຕ້ອງ​ໄດ້​ເອົາໃຈໃສ່​ເປັນຕົ້ນ​ຄື: ວຽກ​ງານ​ຈັດ​ຕັ້ງ​ພະ​ນັກ​​ງານ, ວຽກ​ງານ​ແຜນການ ແລະ ການ​ລົງທຶນ​ຮ່ວມ​ມື​ສາກົນ, ວຽກ​ງານ​ຝຶກ​ອົບຮົມ ເ​ເລະ ພັດທະນາ​ສີ​ມື​ແຮ​ງ​ງານ,  ວຽກ​ງານ​ຄຸ້ມ​ຄອງ​ແຮງ​ງານ​ຕ່າງປະເທດ, ວຽກ​ງານ​ປະກັນ​ສັງຄົມ, ວຽກ​ງານ​ສັງຄົມ​ສົງເຄາະ, ວຽກ​ງານ​ນະໂຍບາຍ​ຕໍ່​ຜູ້​ທີ່​ມີ​ຜົນງານ, ພິການ,  ຜູ້​ອາຍຸ​ສູງ ແລະ ວຽກ​ງານ​ເກັບ​ກູ້​ລະ​ເບີດ​ບໍໍ່​ທັນ​ເ​ເຕກ ໃຫ້​ພ້ອມ​ກັນ​ປະຕິບັດ​ເອົາໃຈໃສ່ ແລະ ໃຫ້​ໄດ້​ຮັບ​ຜົນ​ດີ. ໂອກາດ​ດຽວ​ກັນ​ນີ້, ທ່ານ ລມຕ ຍັງ​ໄດ້​ມອບ​ເຄື່ອງນຸ່ງ​ຫົ່ມ, ເກີບ​ຈຳນວນ 100 ແກັດ ແລະ ເກືອ 3.000 ກິໂລ ລວມ​ມູນ​ຄ່າ​ທັງ​ໝົດ 159 ລ້ານ​ກີບ. 
 (ຂ່າວ​-​ພາບ: ແຂວງ​ຜົ້ງ​ສາລີ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110