ຫົວ​ຂໍ້ : ໂອນເງິນຂ້າມທະນາຄານຮູບແບບໃໝ່ ສະດວກປອດໄພ ແລະ ໄດ້ຮັບເງິນທັນທີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 18/02/2020 09:33:16 ຈຳ​ນວນ​ຜູ້​ເຂົ້າ​ຢ້ຽມ​ຊົມ 257 ຄັ້ງ

   ທະນາຄານ​ການ​ຄ້າ​ຕ່າງປະເທດ​ລາວ ມະຫາຊົນ (ທຄຕລ ຫຼື BCEL) ໄດ້​ຮ່ວມ​ມື​ກັບ ທະນາຄານ ບີ​ໄອ​ຊີ ລາວ ຈຳກັດ (BIC) ເປີດ​ໃຫ້ການ​ບໍລິການ ການ​ໂອນ​ເງິນ​ຂ້າມ​ທະນາຄານ ຜ່ານ Mobile Application ຊຶ່ງ​ເປັນ​ການ​ໂອນ​ເງິນຂ້າມ​ທະນາຄານ ຜ່ານ​ລະບົບ Application ທຳອິດ ຢູ່ ສປປ ລາວ ແລະ ເປັນ​ການ​ບໍລິການ​ຮູບ​ແບບ​ໃໝ່​ທີ່​ສະດວກ ປອດ​ໄພ ແລະ ໄດ້​ຮັບເງິນ​ທັນ​ທີ. ພິທີ​ເປີດ​ໃຫ້​ບໍລິການ​ຢ່າງ​ເປັນ​ທາງ​ການ​ໄດ້​ຈັດ​ຂຶ້ນ​ເມື່ອ​ບໍ່​ດົນ​ມາ​ນີ້​ທີ່ ໂຮງແຮມ​ລາວ​ ພລາຊາ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ສອນ​ໄຊ ສິດ​ພະ​ໄຊ ຜູ້​ວ່າການ​ທະນາຄານແຫ່ງ ສປປ ລາວ ມີ​ທ່ານ ນັນທະລາດ ແກ້ວ​ປະເສີດ ຮອງ​ຜູ້ອຳນວຍ ການ ທຄຕລ, ທ່ານ ລິ​ມ​ໄວຮຸ່ງ ຜູ້ອຳນວຍການ​ໃຫຍ່​ທະນາ ຄານ ບີ​ໄອ​ຊີ​ລາວ ຈຳກັດ, ພາກ ສ່ວນ​ທີ່​ກ່ຽວ​ຂ້ອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.
   ການ​ຮ່ວມ​ມື​ກັນ​ໃນ​ຄັ້ງ​ນີ້ ແມ່ນ​ເພື່ອ​ເຮັດ​ໃຫ້ການ​ໂອນ​ເງິນ ລະຫວ່າງ ທະນາຄານ​ເປັນ​ເລືື່ອງ​ງ່າຍ​ຂຶ້ນ ສຳເລັດ​ແບບ Real Time ໂດຍ​ບໍ່​ຕ້ອງ​ເຂົ້າ​ມາ​ທະ​ນາ​ຄານ. ໝາຍ​ຄວາມ​ວ່າ ລູກ​ຄ້າ​ຂອງ ທຄຕລ ສາມາດ​ນຳ ໃຊ້​ແອັບ BCEL One ເພື່ອ ໂອນ​ເງິນ​ຫາ​ບັນຊີ ຂອງ BIC  ໄດ້​ເລີຍ ແລະ ໃນ​ຂະນະ​ດຽວ​ກັນ ລູກ​ຄ້າ​ຂອງ BIC ແມ່ນ​ສາມາດ​ນຳ​ໃຊ້​ແອັບ BIC Best ເພື່ອ​ໂອນ​ເງິນ​ຫາ​ບັນຊີ​ຂອງ BCEL  ໄດ້​ແບບ Real Time ຕະຫຼອດ 24ຊົ່ວໂມງ​ເໝືອນ​ກັບ​ການ​ໂອນ​ເງິນ​ຫາ​ບັນຊີ​ພາຍ​ໃນ​ເຄືອ​ຂ່າຍ ຂອງ​ຕົນ​ເອງ ແລະ ສາມາດ​ໂອນ​ເງິນ​ໄດ້​ທັງ​ສາມ ສະກຸນ​ຫຼັກ ຄື: ກີບ, ບາດ ແລະ ໂດ​ລາ.
ທະນາຄານ​ແຫ່ງ ​ສປປ ລາວ ເຫັນ​ເຖິງ​ຄວາມ​ສຳຄັນໃນ​ການ​ໃຫ້​ບໍລິການ​ທຸລະ​ກຳທາງ​ດ້ານ​ການ​ເງິນໃຫ້​ແກ່​ຜູ້​ຊົມໃຊ້ ມີ​ຄວາມ​ສະດວກ​ສະບາຍ, ວ່ອງ ໄວ ແລະ ທົ່ວ​ເຖິງ​ຫຼາຍ​ກວ່າ​ເກົ່າ. ພ້ອມ​ດຽວ​ກັນ, ທະນາຄານ​ແຫ່ງ​ ສປປ ລາວ ກໍມີ​ຈຸດປະສົງ ໃຫ້​ບັນດາ​ທະນາຄານ​ຕ່າງໆ ສາມາດ​ໂອນ​ເງິນ​ຫາ​ກັນ​ໄດ້​ສະດວກ​ຂຶ້ນ ແລະ ນີ້​ກໍເປັນ​ຈຸດ​ເລີ່ມ​ຕົ້ນ ໂດຍ ທະນາຄານ ແຫ່ງ ສປປ ລາວ ແມ່ນ​ໄດ້​ອະນຸ​ຍາດ​ໃຫ້ BCEL ແລະ BIC ເປັນ​ຜູ້​ທົດ​ລອງ​ເລີ່ມ​ຕົ້ນການ​ເຊື່ອມ​ຕໍ່ລະຫວ່າງ​ທະນາຄານ​ກ່ອນ,  ຫຼັງ​ຈາກ​ນັ້ນ ແມ່ນ BCEL ແລະ BIC ຈຶ່ງ​ຈະ​ສາມາດ​ໃຫ້​ບໍລິການ​ຮູບ​ແບບ​ດຽວ​ກັນ ໄປ​ສູ່​ທະນາຄານ​ອື່ນໆ​ອີກ ພາຍ​ໃນ ສປປ ລາວ ໃນ​ໄລຍະ​ຕໍ່​ໄປ.
(ຂ່າວ: ສຳ​ນານ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110