ຫົວ​ຂໍ້ : ຫົວໜ້າກົມຄວບຄຸມພະຍາດຕິດຕໍ່ຊີ້ແຈງບັນຫາປະເທດລາວບໍ່ມີຜູ້ຕິດເຊື້ອ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 18/02/2020 10:08:52 ຈຳ​ນວນ​ຜູ້​ເຂົ້າ​ຢ້ຽມ​ຊົມ 235 ຄັ້ງ

   ຕາມ​ການ​ໃຫ້​ສໍາ​ພາດ​ຂອງ​ທ່ານ ດຣ.ຣັດ​ຕະ​ນະ​ໄຊ ເພັດ​ສຸວັນ ຫົວໜ້າ​ກົມ​ຄວບ​ຄຸມພະ​ຍາດ​ຕິດຕໍ່​ຂອງ​ກະຊວງ​ສາທາລະນະ​ສຸກ ຕໍ່​ກໍລະນີ ຢູ່ ສປປ​ລາວ ຍັງ​ບໍ່​ທັນ​ມີ​ຜູ້​ຕິດເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ນັ້ນ ທ່ານ​ໄດ້​ໃຫ້​ເຫດຜົນ​ວ່າ: ເປັນ​ຫຍັງ​ປະເທດ​ອື່ນ​ຈຶ່ງ​ມີ​ຜູ້​ຕິດເຊື້ອ​ພະ ຍາດ ມີ​ແຕ່​ປະເທດ​ລາວ​ເຮົາ​ຍັງ​ບໍ່​ມີ​ກໍລະນີ​ນັ້ນ ອາດ​ຍ້ອນ​ຫຼາຍ​ປັດ​ໄຈເຊັ່ນ: ໄດ້​ມີ​ທີມ​ງານ​ຄັດ​ກອງ​ຢູ່​ດ່ານ​ເຂົ້າ-​ອອກ ແມ່ນ​ໄດ້​ມີ​ການ​ເຮັດ​ວຽກຢ່າງ​ຕັ້ງໜ້າ ເພື່ອ​ກວດ​ຫາ​ກໍລະນີ​ສົງໄສ, ມີ​ການ​ເຝົ້າ​ລະວັງ​ບຸກ ຄົນ ທີ່​ໄດ້​ສໍາ​ຜັດ​ກັບ​ກໍລະນີ ທີ່​ຕິດເຊື້ອ​ຢ່າງ​ໃກ້ຊິດ, ນັກ​ທ່ອງ​ທ່ຽວ ຈາກ​ຕ່າງປະເທດ ທີ່​ມີ​ການ​ລະບາດ​ເຂົ້າ​ມາ​ປະເທດ​ເຮົາ ແມ່ນ​ມີ​ບໍ່​ຫຼາຍ ຖ້າ​ທຽບໃສ່​ບ້ານ​ເພິ່ນ, ອາກາດ​ບ້ານ​ເຮົາ​ຂ້ອນ​ຂ້າງ​ຮ້ອນ ຊຶ່ງ​ບໍ່​ອໍາ​ນວຍ​ຕໍ່​ການ​ຂະຫຍາຍຕົວ​ຂອງ​ເຊື້ອ​ຈຸ​ລະ​ໂຣກ​ຊະນິດ​ນີ້, ຄວາມ​ໜາ​ແໜ້ນ​ຂອງ​ພົນລະເມືອງ ແລະ ທີ່ຢູ່​ອາໄສ​ຂອງ​ບ້ານ​ເຮົາ​ກໍ່​ບໍ່​ໜາ​ແໜ້ນ​ຫຼາຍ ແລະ ຢູ່​ແບບ​ເຮືອນ​ດຽວ​ເປັນ​ສ່ວນ​ໃຫຍ່ ແລະ ແນ່ນອນ​ວ່າວັດ​ທະ​ນະ​ທໍາ, ການ​​ສະບາຍດີ​ຂອງ​ບ້ານ​ເຮົາແມ່ນ​ຍົກ​ມື​ສະບາຍດີທັງ​ໝົດ​ທີ່​ເວົ້າ​ມາ ກໍ​ຍັງ​ບໍ່​ທັນ​ໄດ້​ມີ​ການ​ຢັ້ງຢືນ​ທີ່​ຊັດ​ເຈນ  ແຕ່​ກໍ​ຢາກ​ໃຫ້​ແຈ້ງ​ບັນດາ​ທ່ານ​ຮັບ​ຊາບ​ວ່າ ພວກ ເຮົາ ຍັງ​ບໍ່​ທັນ​ມີ​ກໍລະນີ​ທີ່​ຕິດເຊື້ອ​ໃນ​ປັດຈຸບັນ ແລະ​ຈົ່ງ​ໝັ້ນ​ໃຈ​ໃນ​ຄຸນ​ນະ​ພາບ ການ​ວິເຄາະ​ຂອງ​ພວກ​ເຮົາ​ແມ່ນ​ໄດ້​ມາດຕະຖານ​ເທົ່າ​ກັບ​ສາ​ກົນ.
   ທ່ານ​ຍັງ​ໄດ້​ກ່າວ​ຕື່ມ​ວ່າ: ດັ່ງ​ທີ່​ໄດ້​ແຈ້ງ​ໃຫ້​ບັນດາ​ທ່ານ​ຮັບ​ຮູ້​ໃນ​ໄລຍະ​ຜ່ານ​ມາ​ແລ້ວ​ວ່າ ສປປ ລາວ ມີ​ຫ້ອງ​ວິເຄາະ​ທີ່​ໄດ້​ມາດຕະຖານ​ສາກົນ ທີ່​ສູນ​ວິເຄາະ ແລະ​ລະບາດ​ວິທະຍາ ພ້ອມ​ທັງ​ສະ​ຖາ​ບັນ ປາ​ສເຕີ, ໂຮງໝໍ​ມະໂຫສົດແມ່ນ​ມີ​ຄວາມ​ພ້ອມ​ໃນ​ການ​ກວດວິເຄາະທັງ  3 ແຫ່ງ​ຢູ່​ຂັ້ນ​ສູນ​ກາງ ແລະ ນອກ​ ນັ້ນພວກ​ເຮົາ​ຍັງ​ມີ​ເຄື່ອງກວດ​ວິເຄາະ​ແບບ​ເຄື່ອນ​ທີ່ຢູ່​ພາກ​ເໜືອ: ຫຼວງ​ນຳ​້ທາ ແລະ​ ຫຼວງພະ​ບາງ ເພື່ອ​ຄວາມ​ສະດວກ​ວ່ອງໄວໃນການຊອກ​ ຫາເຊື້ອພະຍາດ. ສະນັ້ນໃຫ້ ທ່ານໝັ້ນໃຈໃນ​ມາດຕະຖານ​ການວິເຄາະຫາ​ເຊື້ອ​ຂອງ​ພວກ​ເຮົາອີກຢ່າງ​ໜຶ່ງ​ທີ່​ສໍາ​ຄັນພວກ​ເຮົາ ໄດ້​ສົ່ງ​ຕົວຢ່າງທີ່​ກວດ​ແລ້ວ​ຢູ່​ລາວ ໄປ​ຫ້ອງ​ວິເຄາະ​ຢັ້ງຢືນ​ຂອງອົງການ​ອະນາໄມ​ໂລກ ທີ່​ ປະເທດ​ອົສ​ຕຣາ​ລ ຈໍາ​ນວນ 20 ຕົວຢ່າງ ແລະ ທັງ 20 ຕົວຢ່າງ​ກໍ​ໃຫ້​ຜົນ​ລົບ​ເຊັ່ນ​ດຽວ​ກັບ​ຫ້ອງ​ກວດ​ວິເຄາະ​ຂອງ​ລາວ ຄື​ເປັນ​ຜົນ​ລົບ.
ກ່ຽວ​ກັບ​ການ​ຕິດເຊື້ອ​ພະ ຍາດ​ຢູ່​ປະເທດ​ຕ່າງໆ ທ່ານ​ກ່າວ​ຕື່ມ​ອີກ​ວ່າ: ຈາກ​ໂຕ​ເລກ ວັນ​ທີ17 ກຸມພາ 2020 ຂອງ coronavirus  COVID-19 Global Cases by Johns Hopkins CSSE ໄດ້​ລາຍ​ງານ​ຈໍາ​ນວນ​ກໍລະນີ​ທັງ​ໝົດ​ທົ່ວ​ໂລກ ມີ​ກໍລະນີ​ຢັ້ງຢືນ​ການ​ຕິດພະຍາດ 71.329 ກໍ​ລະ​ນີ. ເສຍ​ຊີວິດ 1.775 ຄົນ, ປິ່ນປົວ​ດີ 10.972 ຄົນ ສະເພາະ​ໃນ​ສປ.ຈີນ ມີ​ກໍລະນີ​ຢັ້ງຢືນ​ການ​ຕິດພະຍາດ 70.549 ກໍລະນີ, ເສຍ​ຊີວິດ 1.696ຄົນ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110