ໜັງສືພິມ ປະຊາຊົນ

ລາວ ພ້ອມເປັນເຈົ້າພາບຈັດກອງປະຊຸມ ແມ່ນຳ້ຂອງ-ແມ່ນຳ້ລ້ານຊ້າງ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 19/02/2020 09:48:34 ຈຳນວນຢ້ຽມຊົມ 644 ຄັ້ງ

ສປປ ລາວ ພ້ອມເປັນເຈົ້າພາບຈັດກອງປະຊຸມລັດ ຖະມົນຕີຕ່າງປະເທດແມ່ນຳ້ຂອງ-ແມ່ນ້ຳລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີ ຕ່າງປະເທດອາຊຽນ - ຈີນ ສະໄໝພິເສດ ຈະຈັດຂຶ້ນໃນ ວັນທີ 20 ກຸມພານີ້ ທີ່ນະຄອນ ຫຼວງວຽງຈັນ ຊຶ່ງຈະໄດ້ພິຈາ ລະນາຫຼາຍບັນຫາສຳຄັນ.
ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດໄດ້ຖະແຫຼງ ຂ່າວກ່ຽວກັບການກະກຽມເປັນເຈົ້າພາບຈັດກອງປະຊຸມລັດ ຖະມົນຕີຕ່າງປະເທດແມ່ນໍ້າຂອງ-ແມ່ນໍ້ລ້ານຊ້າງ ຄັ້ງທີ 5 ແລະ ກອງປະຊຸມລັດຖະມົນຕີຕ່າງປະເທດອາຊຽນ- ຈີນ ສະ ໄໝພິເສດຕໍ່ສື່ມວນຊົນ ໃນວັນທີ 18 ກຸມພານີ້ ທີ່ກະຊວງການຕ່າງປະເທດໃຫ້ຮູ້ວ່າ: ກອງປະຊຸມຄັ້ງນີ້ແມ່ນເພື່ອທົບທວນຄືນການຈັດຕັ້ງຜັນຂະຫຍາຍຜົນກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 2, ກອງປະຊຸມລັດຖະ ມົນຕີຕ່າງປະເທດແມ່ນໍ້າຂອງ -ແມ່ນໍ້າລ້ານຊ້າງ ຄັ້ງທີ 4 ແລະ ແຜນປະຕິບັດງານ 5 ປີ ແມ່ນໍ້າຂອງ-ແມ່ນໍ້າລ້ານຊ້າງ (2018-2022) ແລະ ຈະໄດ້ຮ່ວມກັນປຶກສາຫາລືໃນການວາງທິດທາງການຮ່ວມມືໃນຕໍ່ໜ້າໂດຍແນໃສ່ການຮ່ວມກັນພັດທະນາເສດຖະກິດ-ສັງຄົມ ໃນຂົງເຂດພາກພື້ນແມ່ນໍ້າຂອງບົນພື້ນ ຖານ 3 ເສົາຄໍ້າ (ການເມືອງ-ຄວາມໝັ້ນຄົງ; ການພັດທະນາ ເສດຖະກິດ; ສັງຄົມ-ວັດທະນະທໍາ ແລະ ການໄປມາຫາສູ່ຂອງປະຊາຊົນ ໃນພາກພື້ນແມ່ນໍ້າຂອງ) ແລະ 5 ຂົງເຂດບຸລິມະສິດ (ການບໍລິຫານຊັບພະຍາກອນນໍ້າ; ການພັດທະນາກະສິກໍາ ແລະ ລຶບລ້າງຄວາມທຸກຍາກ; ການເຊື່ອມໂຍງ ແລະ ເຊື່ອມຈອດ; ສ້າງຂີດຄວາມສາມາດໃນການຜະລິດ ແລະ ເສດຖະກິດຂ້າມຊາຍແດນ.
ນອກຈາກນີ້, ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ຍັງເປັນການກະກຽມໃຫ້ແກ່ກອງປະຊຸມຜູ້ນຳ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ທີ່ ສປປ ລາວ ຈະເປັນເຈົ້າພາບຈັດຂຶ້ນໃນເດືອນມີນາ 2020 ທີ່ ນະຄອນຫຼວງວຽງຈັນ.
ເອກະສານສໍາຄັນ ທີ່ຈະພິຈາລະນາຮັບຮອງເອົາໃນກອງປະຊຸມ ຄັ້ງນີ້ ມີ 1 ສະບັບ ຄື: ບົດຖະແຫຼງຂ່າວຮ່ວມຂອງກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 (Joint Press Communique of the 5th Mekong-Lancang Cooperation Foreign Ministers’ Meeting). ພ້ອມທັງ ຮັບຊາບເອກະສານຄັດຕິດ ຈໍານວນ 3 ສະບັບຄື: 1). ບົດລາຍງານຄວາມຄືບໜ້າການຈັດຕັ້ງປະຕິບັດແຜນປະຕິບັດງານ 5 ປີ, 2). ຕາຕະລາງຕິດຕາມ ຄວາມຄືບໜ້າການຈັດຕັ້ງປະຕິບັດໂຄງການຮ່ວມມື ແລະ 3). ບົດແນະນໍາ ຂອງສູນຄົ້ນຄວ້າແມ່ນໍ້າຂອງ ສາກົນກ່ຽວກັບການສ້າງແລວພັດທະນາເສດຖະກິດແມ່ນໍ້າຂອງ-ແມ່ນໍ້າລ້ານຊ້າງ, ພາຍຫຼັງສຳເລັດກອງປະຊຸມ ກໍຈະມີກອງປະຊຸມຖະແຫຼງຂ່າວຂອງປະທານຮ່ວມຄືທ່ານລັດຖະມົນຕີຕ່າງປະເທດ ແຫ່ງ ສປປ ລາວ ແລະ ທ່ານທີ່ປຶກສາແຫ່ງລັດ, ລັດຖະມົນຕີຕ່າງປະເທດແຫ່ງ ສປ ຈີນ.
ສຳລັບກອງປະຊຸມລັດຖະ ມົນຕີຕ່າງປະເທດອາຊຽນ-ຈີນ ສະໄໝພິເສດມີຈຸດປະສົງເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນຮ່ວມກັນລະ ຫວ່າງອາຊຽນ ແລະ ຈີນ ໃນການຊອກຫາຊ່ອງທາງ, ລວມທັງແລກປ່ຽນບົດຮຽນທີ່ດີ ແລະ ກຳນົດມາດຕະການໃນການຕ້ານ ແລະ ຮັບມືການລະບາດຂອງພະຍາດອັກເສບປອດຈາກເຊື້ອຈຸລະໂຣກໂຄໂຣ ນາສາຍພັນໃໝ່ (COVID-19).
ນອກຈາກນີ້ ຍັງຈະພິຈາ ລະນາຮັບຮອງເອົາຖະແຫຼງ ການຮ່ວມຂອງປະທານກ່ຽວກັບ ການຕ້ານ ແລະ ຮັບມືກັບການລະບາດ ຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ໂຄໂຣນາ ໄວຣັດ (COVID-19) ເພື່ອເປັນທິດທາງໃຫ້ແກ່ຂະແໜງການກ່ຽວຂ້ອງໄປຜັນຂະຫຍາຍຕໍ່ໄປ. ພາຍຫຼັງສຳເລັດກອງປະຊຸມຈະມີການຖະແຫຼງຂ່າວຂອງປະທານຮ່ວມກ່ຽວກັບຜົນຂອງກອງປະຊຸມ.
(ຂ່າວ-ພາບ : ສຸກສາຄອນ)