ໜັງສືພິມ ປະຊາຊົນ

ຫວຽດນາມ ຍັງແມ່ນຈຸດໝາຍປາຍທາງແຫ່ງການລົງທຶນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 19/02/2020 10:47:48 ຈຳນວນຢ້ຽມຊົມ 616 ຄັ້ງ

ສຳນັກງານສະຖິຕິແຫ່ງຊາດຫວຽດນາມລະບຸວ່າ: ຫວຽດນາມ ຍັງແມ່ນປະເທດຈຸດໝາຍປາຍທາງດ້ານການລົງທຶນຂອງພາກພື້ນອາຊີຕາເວັນອອກສ່ຽງໃຕ້ ໂດຍໃນເດືອນທຳອິດຂອງປີນີ້ມີກິດຈະການໃໝ່ໆເຂົ້າມາຈົດທະບຽນໃນນະຄອນຫຼວງຮ່າໂນ້ຍ ສູງເຖິງ 8.276 ແຫ່ງ. ເຖິງແມ່ນວ່າຈໍານວນບໍລິສັດທີ່ເຂົ້າມາຈົດທະບຽນຈະຫຼຸດລົງ 17,9% ເມື່ອທຽບແບບປີຕໍ່ປີ, ແຕ່ເງິນທຶນຂອງກິດຈະການທີ່ຈົດທະບຽນ ໂດຍລວມແມ່ນເພີ່ມຂຶ້ນປະມານ 76,8%, ຄິດເປັນມູນຄ່າບັນລຸ 267 ລ້ານໆດົງ (ສະກຸນເງິນຫວຽດນາມ) ຊຶ່ງຂະຫຍາຍຕົວສູງສຸດໃນຮອບ 4 ປີ.
ການທີ່ມີກິດຈະການໃໝ່ໆມາຈົດທະບຽນໜ້ອຍລົງ, ສ່ວນໜຶ່ງເປັນເພາະຢູ່ໃນໄລຍະເທດສະການກິນກຸດ (ບຸນປີໃໝ່ຫວຽດນາມ) ຊຶ່ງຖືວ່າເປັນເທດສະການສໍາຄັນ ແລະ ຖືວ່າເປັນງານສະຫຼອງທີ່ໃຫຍ່ທີ່ສຸດຂອງຫວຽດນາມ. ສ່ວນການມີແຫຼ່ງເງິນລົງທຶນເພີ່ມຂຶ້ນສ່ວນໃຫຍ່ແມ່ນເປັນເພາະບໍລິສັດທີ່ຈົດທະບຽນເປັນບໍລິສັດໃຫ້ບໍລິການທາງດ້ານການເງິນ, ບໍລິສັດປະກັນໄພ ທີ່ມີທຶນຈົດທະບຽນລວມທັງໝົດ 144 ລ້ານໆດົງ ຫຼື ຄິດເປັນອັດຕາສ່ວນປະມານ 53,9% ຂອງທຶນຈົດທະບຽນໂດຍລວມ. ອີກຢ່າງໜຶ່ງ, ການຈົດທະບຽນຂອງບໍລິສັດໃໝ່ ຈະເຮັດໃຫ້ເກີດການຈ້າງງານຈຳນວນ 84.500 ຕຳແໜ່ງຫຼຸດລົງປະມານ 21,7% ເມື່ອທຽບແບບປີຕໍ່ປີ.
ທະນາຄານເພື່ອການຮ່ວມມືສາກົນແຫ່ງຍີ່ປຸ່ນ (ເຈບິກ) ເຄີຍເຮັດການສຳຫຼວດກຸ່ມຕົວຢ່າງບໍລິສັດທີ່ກຳລັງພິຈາລະນາໂອກາດທາງທຸລະກິດໃນຕ່າງປະເທດ 588 ແຫ່ງ ໃນໄລຍະທ້າຍປີ 2019 ພົບວ່າ: ຫວຽດນາມ ເລື່ອນຂຶ້ນ 1 ອັນດັບ ຊຶ່ງກາຍເປັນປາຍທາງການລົງທຶນທີ່ໜ້າດຶງດູດໃຈຫຼາຍທີ່ສຸດອັນດັບທີ 3 ສຳລັບທຸລະກິດຍີ່ປຸ່ນ, ຮອງຈາກອິນເດຍ ແລະ ຈີນ. ຜົນການສຳຫຼວດຍັງຊີ້ໃຫ້ເຫັນວ່າ: 36,4% ຂອງທຸລະກິດຍີ່ປຸ່ນ ໃນຕ່າງປະເທດແມ່ນຫວຽດນາມ ເປັນຈຸດໝາຍປາຍທາງທີ່ໜ້າສົນໃຈທີ່ສຸດສຳລັບໄລຍະກາງ ແລະ ໄລຍະຍາວ, ເພີ່ມຂຶ້ນຈາກປີກ່ອນແມ່ນ 2,5%. ຂະນະທີ່ ອິນເດຍ ຖືກເລືອກຫຼາຍທີ່ສຸດເປັນອັນດັບ 1 ຢູ່ທີ່ 47,8%, ຮອງລົງມາຄື ຈີນ ແມ່ນ 44,6%. ສ່ວນໄທ ແມ່ນຢູ່ອັນດັບທີ 4 ກວມ 32,9% ຕາມມາດ້ວຍ ອິນໂດເນເຊຍ ແລະ ອາເມຣິກາ.
ເຈບິກ ລະບຸວ່າ: ບໍລິສັດຍີ່ປຸ່ນ ມີຄວາມໝັ້ນໃຈຫຼາຍຕໍ່ການເຕີບໂຕໃນອະນາຄົດຂອງຫວຽດນາມ ລວມທັງແຮງງານຄຸນນະພາບສູງ ແລະ ຄ່າຈ້າງແຮງງານຕ່ຳ ໂດຍສອດຄ່ອງກັບການລາຍງານຂອງໄພວໍເຕີ ເຮົາຄູເປີ ໃນໄລຍະທ້າຍເດືອນທັນວາຂອງປີທີ່ຜ່ານມາທີ່ໄດ້ເປີດເຜີຍບົດລາຍງານວ່າ: ການເຮັດທຸລະກິດຂ້າມຊາດໃນອາຊີ-ປາຊີຟິກ ປີ 2019-2020 ຜ່ານການສຳຫຼວດຄວາມຄິດເຫັນຜູ້ນຳທຸລະກິດຫຼາຍກວ່າ 1.000 ຄົນໃນປະເທດສະມາຊິກກຸ່ມການຮ່ວມມືທາງດ້ານເສດຖະກິດອາຊີ-ປາຊີຟິກພົບວ່າ: ຜູ້ນໍາທຸລະກິດຕ່າງໆໃນ ຫວຽດນາມ ແມ່ນເຫັນໄປໃນທາງບວກຫຼາຍກວ່າຜູ້ນຳທຸລະກິດໃນປະເທດສະມາຊິກອື່ນໆ ໂດຍຜູ້ນຳທຸລະກິດໃນຫວຽດນາມໝັ້ນໃຈວ່າ: ລາຍໄດ້ບໍລິສັດຈະເຕີບໂຕຂຶ້ນສູງທີ່ສຸດໃນຮອບ 5 ປີ. ຂະນະທີ່ຜູ້ນຳປະເທດອື່ນໆ ມີຄວາມເຊື່ອໝັ້ນພຽງແຕ່ 34%. ນອກຈາກນີ້, ຜູ້ນຳທຸລະກິດໃນຫວຽດນາມ 4 ໃນ 5 ຄົນ ຊີ້ບອກວ່າ: ມີແຜນເພີ່ມງົບປະມານດ້ານການພັດທະນາລະບົບອັດຕະໂນມັດ ແລະ ທັກສະແຮງງານ 80% ມີຄວາມເຊື່ອໝັ້ນວ່າ: ເຕັກໂນໂລຊີ ເປັນເຄື່ອງມືສຳຄັນທີ່ຈະນຳໄປສູ່ຄວາມສຳເລັດໃນການດຳເນີນທຸລະກິດ, ແຕ່ບໍ່ໄດ້ມີສະເພາະໃນນະຄອນຫຼວງຮ່າໂນ້ຍເທົ່ານັ້ນ ທີ່ພະຍາຍາມດຶງດູດບໍລິສັດຕ່າງຊາດເຂົ້າມາລົງທຶນ. ທາງການນະຄອນໂຮ່ຈິມິນ ກໍຍັງເດີນໜ້າສະໜັບສະໜູນການພັດທະນາເຕັກໂນໂລຊີຂໍ້ມູນຂ່າວສານ ເພື່ອສ້າງເມືອງອັດສະລິຍະທີ່ເນັ້ນນະວັດຕະກຳ ແລະ ປັບປຸງຄຸນນະພາບຊີວິດຂອງຜູ້ຄົນໃນໂຮ່ຈິມິນໃຫ້ດີຂຶ້ນ.
ໃນໄລຍະຫຼາຍປີທີ່ຜ່ານ ມາ, ນະຄອນໂຮ່ຈິມິນ ມີບົດ ບາດຢ່າງຫຼວງຫຼາຍໃນການພັດທະນາເສດຖະກິດຂອງປະເທດ, ຊ່ວຍເຮັດໃຫ້ GDP ຂອງຫວຽດນາມ ຂະຫຍາຍຕົວໃນອັດຕາສ່ວນ 24%. ຊ່ວຍກະຕຸ້ນການເຕີບໂຕຂອງການຜະລິດດ້ານອຸດສາຫະກຳຄິດເປັນອັດຕາສ່ວນປະມານ 18% ແລະ ມີສ່ວນຊ່ວຍດ້ານການສົ່ງອອກຂອງປະເທດປະມານ 16% ແຕ່ນະຄອນໂຮ່ຈິມິນ ກໍມີຄວາມທ້າທາຍຫຼາຍດ້ານທີ່ອາດຈະເປັນອຸປະສັກຕໍ່ການຊຸກຍູ້ນະໂຍບາຍທີ່ເນັ້ນນະວັດຕະກຳນຳໜ້າ ໂດຍສະເພາະອັດຕາການເຕີບໂຕທາງດ້ານເສດຖະກິດຂອງປະເທດບໍ່ຍືນຍົງ ແລະ ປະຊາກອນຂະຫຍາຍຕົວຢ່າງວ່ອງໄວ.
ທ່ານ ຫງວຽນ ແທັງຟອງ ປະທານຄະນະກຳມະການພັກກອມມູນິດຂອງນະຄອນໂຮ່ຈິມິນ ກ່າວວ່າ: ການປັບປ່ຽນຮູບແບບການເຕີບໂຕທາງດ້ານເສດຖະກິດດ້ວຍການຫັນໄປເນັ້ນດ້ານນະວັດຕະກໍາ ແລະ ເຕັກໂນໂລຊີກ້າວໜ້າ ເປັນສິ່ງສຳຄັນທີ່ສຸດທີ່ຈະສ້າງຫຼັກປະກັນໄດ້ວ່າ ນະຄອນໂຮ່ຈິມິນ ຍັງພັດທະນາຕໍ່ໄປ ແລະ ຍັງມີບົດບາດນຳໜ້າ ໃນການກະຕຸ້ນເສດຖະກິດຂອງປະເທດ. ການພັດທະນາຢ່າງວ່ອງໄວຂອງເຕັກໂນໂລຊີຍຸກການປະຕິວັດອຸດສາຫະກຳ 4,0 ທີ່ມາພ້ອມກັບເຕັກໂນໂລຊີປະເພດຕ່າງໆເຊັ່ນ: ບິກດາຕ້າ, ປັນຍາປະດິດ (AI) ແລະ ອິນເຕີເນັດ (IOT) ເພີ່ມໂອກາດໃຫ້ກັບນະຄອນໂຮ່ຈິມິນ ຢ່າງຫຼວງຫຼາຍທີ່ຈະເດີນໜ້າແຜນການຕາມທີ່ກຳນົດໄວ້ ເພື່ອກ້າວຂຶ້ນມາເປັນເມືອງອັດສະລິຍະໃນທີ່ສຸດ.
ປັດຈຸບັນ, ບໍລິສັດທີ່ມີຊື່ສຽງຂອງຍີ່ປຸ່ນສອງແຫ່ງຄື: ມິຊຸບິຊິ ຄຼອບ ແລະ ໂນມູຣະຣຽວ ເອສເຕດ ດີວີລົບເມັນ ຮ່ວມມືກັບວິນກຣຸບ ກຸ່ມບໍລິສັດໃຫຍ່ທີ່ສຸດຂອງຫວຽດນາມ ໄດ້ຈັດເຮັດໂຄງການພັດທະນາໂຮ່ຈິມິນ ຊີຕີ ໃຫ້ເປັນເມືອງອັດສະລິຍະ ຮອງຮັບຄວາມຕ້ອງການຂອງປະຊາກອນຍຸກໃໝ່ ແລະ ການເຂົ້າມາມີບົດບາດໃນຊີວິດຜູ້ຄົນຂອງເຕັກໂນໂລຊີກ້າວໜ້າທັງຫຼາຍ.

ຮຽບຮຽງໂດຍ: ວິໄລພອນ