ຫົວ​ຂໍ້ : ທຄຕລ ເປີດບໍລິການ 4 ຜະລິດຕະພັນໃໝ່ຢ່າງເປັນທາງການ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 19/02/2020 11:07:47 ຈຳ​ນວນ​ຜູ້​ເຂົ້າ​ຢ້ຽມ​ຊົມ 505 ຄັ້ງ

   ທະນາຄານການຄ້າຕ່າງ ປະເທດລາວມະຫາຊົນ  (ທຄຕລ) ໄດ້​ເປີດ​ແນະນຳ 4 ຜະລິດ​ຕະ​ພັນ​ໃໝ່ ເພື່ອ​ຮັບ​ໃຊ້​ສັງຄົມ ຢ່າງ​ເປັນ​ທາງ​ການ​ເມື່ອ​ບໍ່​ດົນ​ມາ​ນີ້ ທີ່​ສຳນັກງານ​ດັ່ງກ່າວ ໂດຍ​ມີ ທ່ານ ພູ​ຂົງ ຈັນທະ​ຈັກ ຜູ້ອຳນວຍການ​ໃຫຍ່ ທຄຕລ ພາກ​ສ່ວນ​ທີ່​ກ່ຽວຂ້ອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.
   ໃນ​ການ​ເປີດ 4 ຜະລິດ​ຕະ​ພັນ​ໃໝ່​ຄັ້ງນີ້ ລ້ວນ​ແຕ່​ມີ​ຄຸນ​ລັກສະນະ​ໂດດ​ເດັ່ນ​ທີ່​ຕອບ​ໂຈດ​ຄວາມ​ຕ້ອງການ​ຂອງ​ການ​ບໍລິການ​ທາງ​ການ​ເງິນ​ໃນ​ຍຸກ​ດີ​ຈີຕອນ ຊຶ່ງ​ປະກອບ​ມີ: BCEL OneCash ປຽບສະ ​ເໝືອນ​ກະເປົາ​ເງິນ​ເອ​ເລັກ​ໂຕຣ ​ນິກ​​ ຊຶ່ງເປັນ​ຜະລິດ​ຕະ​ພັນ​ບັດ Virtual Prepaid ໜຶ່ງ​ຂອງ ທຄຕລ ໂດຍ​ຜູ້​ທີ່​ຕ້ອງການ​ນຳ​ໃຊ້​ບໍ່​ຈຳເປັນ​ຕ້ອງ​ມີ​ບັນຊີ​ກັບ ທຄຕລ ຊຶ່ງຄຸນ​ລັກສະນະ​ເດັ່ນ​ແມ່ນ​ສາມາດ​ສ້າງ ແລະ ສົ່ງ​ບົງ​ເງິນ (Cash Voucher) ເພື່ອ​ເປັນ​ຂອງຂວັນ​ໃຫ້​ແກ່​ບຸກຄົນ​ອື່ນ​ທີ່​ມີ​ບັນຊີ ຫຼື ບໍ່​ມີ​ບັນຊີ​ກັບ BCEL ໃນ​ເທດສະການ​ຕ່າງໆ​ໄດ້​ເຊັ່ນ: ປີ​ໃໝ່​ສາກົນ, ປີ​ໃໝ່​ລາວ, ປີ​ໃໝ່​ຈີນ​-​ຫວຽດ (ກຸດ​ຈີນ​-​ເຕັດ​ຫວຽດ), ວັນ​ແມ່ຍິງ​ສາ ກົນ, ງານ​ວັນ​ເກີດ, ຮັບ​ຂວັນ​ລູກ, ອວຍພອນ​ຄູ່​ສົມລົດ, ຂຶ້ນ​ເຮືອນ​ໃໝ່ ແລະ ງານ​ສຳຄັນ​ອື່ນໆ ເອີ້ນ​ວ່າ​ເປັນ​ມິ​ຕິ​ໃໝ່​ຂອງ​ການ​ໃຫ້​ຂອງຂວັນ​ທີ່​ເປັນ​ເງິນ​ໃນ​ວັນ​ສຳຄັນ, ບໍ່​ວ່າ​ທ່ານ​ຈະ​ຢູ່​ໃສໃກ້​ ຫຼື​ ໄກ, ເວລາ​ໃດ​ທ່ານ​ກໍ ຈະບໍ່​ພາດ​ທີ່​ຈະ​ສົ່ງ​ຄວາມສຸກ​ໃຫ້​ແກ່​ຄົນ​ທີ່​ທ່ານ​ຮັກ​ໄດ້, ຄົນ​ຮັບ​ກໍດີໃຈຄົນ​ໃຫ້​ກໍມີ​ຄວາມ​ສຸກ. ນອກຈາກ​ນັ້ນ, ກໍຍັງ​ສາ ມາດ​ໃຊ້​ຈ່າຍ​ຄ່າ​ສາ​ທາ​ລະນຸປະ ​ໂພກຄ່າ​ໄຟຟ້າ, ຄ່າ​ນ້ຳປະປາ, ຄ່າ​ໂທລະສັບ ແລະ  ຄ່າ​ບໍລິການ​ ອື່ນໆ​ໄດ້ ຜ່ານ​ແອັບ BCEL One ແລະ ໃນ​ມໍ່ໆ​ນີ້​ຈະ​ສາມາດ​ໃຊ້​ບໍລິການ​ຜ່ານ​ຕູ້ ATM ແລະ Counter ຂອງ ທຄຕລ ໄດ້, BCEL OneCare ເປັນ​ທີ່ປຶກ ສາ​ສ່ວນ​ຕົວ​ຂອງ​ທ່ານທີ່ເຂົ້າ​ເຖິງ​ງ່າຍ ແລະ ຕິດຕໍ່​ໄດ້​ຕະຫຼອດ 24 ຊົວ​ໂມງ ເພື່ອ​ສອບ​ຖາມ​ຂໍ້​ມູນ​ຜະລິດ​ຕະ​ພັນ ແລະ ການ​ບໍລິການ​ຂອງ ທຄຕລ. ເຖິງ​ວ່າ​ລູກ​ຄ້າ​ຈະ​ຢູ່​ແຫ່ງ​ຫົນ​ໃດ​ຂອງ​ໂລກ​ກໍສາມາດ​ຕິດຕໍ່ ແລະ ສອບ​ຖາມ​ຜ່ານ OneCare ໄດ້​ ດ້ວຍ​ການ​ໂທ, ແຊັດ ຫຼື ຝາກ​ຂໍ້ຄວາມ​ສຽງ ໂດຍ​ໃຊ້ Data/Wifi, ບໍ່​ເສຍ​ຄ່າ​ໂທ ບໍ່​ຕ້ອງ​ເປີດ Roaming ເມື່ອ​ໄປ​ຕ່າງ​ປະ​ເທດ. ຮັບປະກັນ​ຄວາມ​ປອດ​ໄພ​ໃນ​ການ​ເຮັດ​ທຸລະ​ກຳ​ຂອງ​ລູກ​ຄ້າ ເນື່ອງ​ຈາກ OneCare ແມ່ນ​ເປັນ​ການ​ໂທ​ແບບ Video Call ເພື່ອ​ຢືນຢັນ​ຕົວ​ຕົນ​ຂອງ​ລູກ​ຄ້າ ແລະ ກວດ​ເອກະສານ ຊຶ່ງ​ເປັນ​ການ​ບໍລິການ​ຫຼັງ​ການ​ຂາຍ ທີ່​ສາມາດ​ຕິດຕໍ່ Call Center ຜ່ານ​ແອັ​ບພ​ີ​ເຄ​ຊັນ​ໄດ້ ຊຶ່ງ​ໃນ​ອະນາ​ຄົດ​ຈະ​ສາມາດອອກ​ບັດ ​ໃໝ່, ເປີດ​ບັນຊີ​ໃໝ່ ແລະ ສາ ມາດ​ໂອນ​ເງິນ​ມູນ​ຄ່າ​ສູງ​ໄດ້, QR Withdrawal  ມິ​ຕິ​ໃໝ່​ຂອງ​ການ​ຖອນເງິນ​ສົດ​ຈາກ​ຕູ້  ATM ດ້ວຍ QR Code ຜ່ານ​ແອັບ BCEL One ໂດຍ​ບໍ່​ຈຳເປັນ​ຕ້ອງ​ໃຊ້​ບັດ ATM. ລືມ​ບັດ​ກໍ​ຖອນ​ໄດ້​ພຽງ​ໃຊ້ BCEL One ຂັ້ນຕອນ​ງ່າຍໆພຽງ  Login ເຂົ້າ​ແອັບ BCEL One ເລືອກ ​ຟັງ​ຊັນ ຖອນເງິນ​ສົດຜ່ານ​ຕູ້ ATM ແລ້ວ​ປະຕິບັດ​ຕາມຂັ້ນ​ຕອນ​ເພື່ອ​ລໍຖ້າ​ສະ​ແກນ, ຫຼັງ​ຈາກ​ນັ້ນ ກົດ​ປຸມ​ຖອນເງິນ​ດ້ວຍ QR Code ທີ່​ໜ້າ​ຈໍ​ຕູ້ ATM ເພື່ອ​ໃຊ້​ໂທລະສັບ​ມາສະ​ແກນ QR Code ພ້ອມ​ໃສ່​ລະຫັດ​ບັດ ATM ທີ່​ໜ້າ​ຈໍ​ຕູ້ ແລ້ວເງິນ ​ກໍຈະ​ອອກ​ຈາກ​ຕູ້ ATM ທັນ ທີ,BCEL i-Bank Version 4 ໄດ້​ປັບປຸງ​ໃຫ້​ນຳ​ໃຊ້​ເທິງ Smart Phone ໃນ​ຮູບ​ແບບ​ແອັບ​ເທິງ​ມື​ຖື (Mobile Application) ສຳລັບ​ລະບົບ iOS ແລະ Android ທີ່​ຊ່ວຍ​ໃຫ້​ລູກ​ຄ້າ​ໂດຍ​ສະເພາະ​ນິຕິບຸກຄົນ​ໃຊ້​ງານ​ໄດ້​ງ່າຍ​ຂຶ້ນ, ທັງ​ຮັບປະກັນ​ຄວາມ​ປອດ​ໄພ​ ໂດຍ​ລູກ​ຄ້າສາມາດ​ຢືນຢັນ​ການ​ເຮັດ​ທຸລະກຳ​ດ້ວຍ​ການ​ສະ​ແກນ​ໃບ​ໜ້າ ແລະ ແຈ້ງ​ເຕືອນ​ລາຍການ​ລໍຖ້າ​ອະນຸມັດ​ຜ່ານ​ແອັບ​ທຸກ​ຄັ້ງ ພ້ອມ​ມີ​ປະ ຕິທິນ​ທຸ​ລະ​ກໍາ ເພື່ອ​ເບິ່ງ​ຄືນ​ພາບ​ລວມ​ຂອງ​ການ​ເຮັດ​ທຸລະ​ກຳ ໃນ​ໄລຍະ​ຜ່ານ​ມາ ໃນ​ຮູບ​ແບບ​ທີ່​ສະດວກ​ຂຶ້ນ ແລະ ປັບປຸງ​ອີກ​ຫຼາຍ​ຟັງ​ຊັນ​ໃຫ້​ທຸກ​ການ​ໃຊ້​ງານ​ໃນ i-Bank ຕອບ​ໂຈດ​ຄວາມ​ຕ້ອງການ​ໃນ​ການ​ນຳ​ໃຊ້​ຂອງ​ລູກ​ຄ້າ​ໃນ​ຍຸກ​ດີ​ຈີ​ຕອນ.
   ການ​ເປີດ​ການ​ນໍາ​ໃຊ້ 4 ຜະລິດ​ຕະ​ພັນ​ດັ່ງກ່າວ​ລ້ວນ​ແຕ່​ເປັນ​ການ​ບໍລິການ​ທີ່​ອຳນວຍ​ຄວາມ​ສະດວກ​ສະບາຍ​ໃຫ້ແກ່​ ລູກ​ຄ້າ ເປັນ​ການ​ໝູນ​ໃຊ້​ເຕັກ​ໂນ​ໂລ​ຊີ​ເຂົ້າ​ໃນ​ວຽກ​ງານ​ການ​ບໍລິການ​ທາງ​ການ​ເງິນ​ໃຫ້​ມີ​ຄວາມ​ທັນ​ສະໄໝ, ວ່ອງໄວສາ ມາດ​ຊ່ວຍ​ໃຫ້​ວຽກ​ງານ​ການ​ເງິນ​ຂອງ​ລູກ​ຄ້າ​ເປັນ​ເລື່ອງ​ທີ່​ງ່າຍ​ຂຶ້ນ ລູກ​ຄ້າ​ສາມາດ​ເຮັດ​ທຸລະ​ກຳ ແລະ ແກ້​ໄຂ​ບັນຫາ​ໄດ້​ທັນທີ ໂດຍ​ບໍ່​ຕ້ອງ​ເຂົ້າ​ມາ​ທະນາຄານ. 
(ຂ່າວ:ທຄຕລ)

 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110