ຫົວ​ຂໍ້ : ຜູ້ອຳນວຍການໃຫຍ່ອົງການອາຫານ ແລະ ການກະເສດ ຢ້ຽມຢາມລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/02/2020 08:53:52 ຈຳ​ນວນ​ຜູ້​ເຂົ້າ​ຢ້ຽມ​ຊົມ 468 ຄັ້ງ

  ທ່ານ ກຸຍ ດົງ​ຢູ (Dr. Qu Dongyu)  ຜູ້ອຳນວຍການໃຫຍ່ ອົງການ​ອາຫານ   ແລະ  ການ​ກະເສດ  (FAO)  ຊຶ່ງ​ມີສຳນັກງານ​ໃຫຍ່​ຕັ້ງ​ຢູ່​ນະຄອນຫຼວງ​ໂຣມ  ປະເທດອີຕາ​ລີ   ພ້ອມດ້ວຍຄະນະໄດ້​ເດີນທາງ​ມາ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ​ໃນ​ລະຫວ່າງ​ວັນ​ທີ 18-20 ກຸມພາ 2020  ຊຶ່ງ​ເປັນ​ຄັ້ງ​ທຳອິດນັບຕັ້ງແຕ່​ທ່ານ​ໄດ້​ຮັບ​ຕຳແໜ່ງ​ເປັນຜູ້ອຳນວຍການ​ໃຫຍ່​ຄົນ​ໃໝ່​ຂອງອົງການ FAO ແລະ ເປັນ​ຄັ້ງ​ທີ ສອງ  ​ໃນ​ຮອບ​ສອງ​ປີ​ຕິດຕໍ່​ກັນ ທີ່​ຜູ້ອຳນວຍການ​ໃຫຍ່ ອົງການ FAO ໄດ້​ເດີນທາງມາ​ຢ້ຽມຢາມ ສປປ ລາວ ໃນ​ປີ 2019 ຜ່ານ​ມາ  ຊຶ່ງ​ເປັນ​ຄັ້ງ​ທຳອິດ ​ໃນ​ຮອບ 30 ປີ.
  ໃນ​ໂອກາດ​ເດີນທາງ​ມາ​ຢ້ຽມຢາມສປປ ລາວ ຄັ້ງ​ນີ້,  ຄະນະ​ຜູ້ແທນ​ຈາກອົງການ FAO ໄດ້​ເຂົ້າ ຢ້ຽມຂໍ່າ​ນັບ​ການ​ນຳ​ຂັ້ນ​ສູງ​ຂອງ ສປປ ລາວ ໂດຍ​ໄດ້​ເຂົ້າ​ຢ້ຽມ​ຂ່ຳນັບ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ໃນ​ວັນ​ທີ 19 ກຸມພາ 2020 ໃນ​ໂອກາດ​ດັ່ງກ່າວ​ນີ້  ທ່ານ​ນາ ຍົກລັດຖະມົນຕີ ກໍໍໄດ້​ຕີ​ລາຄາສູງ​ ຕໍ່​ການ​ຢ້ຽມຢາມ ສປປ ລາວ ຂອງ​ຄະນະ​ຜູ້​ແທນ​ດັ່ງກ່າວ  ຊຶ່ງ ເປັນ​ການ​ຮັດ​ແໜ້ນ​ສາຍ​ພົວພັນ​ການ​ຮ່ວມ​ມືລະຫວ່າງ ສປປ ລາວ ແລະ ອົງການໃຫ້ແໜ້ນແຟ້ນຂຶ້ນ​ກວ່າ​ເກົ່າ ແລະ ໄດ້​ມີ​ການແລກປ່ຽນ​ປຶກສາ​ຫາລືກ່ຽວ​ກັບ​ບັນດາ​ໂຄງການ​ຮ່ວມ​ມື​ໃນໄລຍະຜ່ານ​ມາ ແລະ ແນວທາງ​ການ​ຮ່ວມ​ມື​ໃນຕໍ່ໜ້າ ໂດຍສະເພາະແມ່ນ​ຂໍ້​ລິ​ເລີ່ມ​ຈາກ​ມື​ສູ່​ມື (Hand-in-Hand Initiative) ຂອງຜູ້ອຳນວຍການ​ໃຫຍ່​ຄົນ​ໃໝ່ ຊຶ່ງ​ຈຸດປະສົງ​ແມ່ນ​ເພື່ອ​ນຳ​ເອົາ​ການ​ຊ່ວຍເຫຼືອ​ຈາກ​ບັນດາ​ຄູ່​ຮ່ວມ​ພັດທະນາມາສູ່​ບັນດາ​ປະເທດ​ທີ່​ມີ​ຄວາມ​ຈຳ​ເປັນ. 
  ທ່ານນາຍົກລັດຖະມົນຕີ ໄດ້​ຕາງໜ້າ​ໃຫ້​ລັດຖະບານ ແລະ ປະຊາຊົນ​ລາວ ສະແດງ​ຄວາມ​ຂອບໃຈ​ມາ​ຍັງ​ອົງການອາຫານ ແລະ ການ​ກະເສດທີ່​ ໄດ້​ປະກອບສ່ວນ​ໃນ​ການ​ລະດົມ​ຂົນຂວາຍ​ທຶນ​ເຂົ້າ​ໃນ​ການ​ປັບປຸງ ແລະ ພັດທະນາ​ວຽກ​ງານ​ໃນ​ຂົງເຂດ​ກ່ຽວຂ້ອງ ໂດຍ​ຜ່ານ​ບັນດາ​ໂຄງການ​ຕ່າງໆທີ່​ໄດ້​ຈັດ​ຕັ້ງ​ປະຕິບັດຮ່ວມ​ກັບຂະແໜງການ​ພາກລັດຂອງ​ລາວ ລວມ​ເຖິງ​ບັນດາ​ໂຄງການຊ່ວຍເຫຼືອ​ທີ່​ຈະ​ມີ​ຂຶ້ນ​ໃນ​ອະນາ​ຄົດ. ນອກຈາກ​ນີ້, ທ່ານນາຍົກລັດ ຖະມົນຕີຍັງ​ໄດ້​ໃຫ້​ຂໍ້​ມູນ​ແກ່ທ່ານ​ຜູ້ອຳນວຍການ​ໃຫຍ່ອົງການ FAO ກ່ຽວ​ກັບ​ບັນດາ​ວຽກງານ​ບຸລິ​ມະ​ສິດ​ຕ່າງໆ​ຂອງ​ລັດຖະບານ ໂດຍ​ສະເພາະ​ການ​ສຸມ​ໃສ່​ການຈັດຕັ້ງ​ປະຕິບັດແຜນ​ພັດທະນາ​ເສດ​ຖະ​ກິດ​-​ສັງຄົມ 5  ປີ  ຄັ້ງ​ທີ  8  ​(2016 - 2020)  ກໍຄືການ​ກະກຽມ​ໃຫ້​ແກ່​ການ​ສ້າງ​ແຜນ​ພັດທະນາ​ເສດ​ຖະ​ກິດ​-​ສັງຄົມ 5 ປີ ຄັ້ງ​ທີ IX (2021-2025), ລວມ​ທັງ​ສຸມ ໃສ່​ການຈັດຕັ້ງ​ປະຕິບັດວາລະ 2030 ເພື່ອ​ການ​ພັດທະນາ​ແບບ​ຍືນ​ຍົງ, ຄວາມ​ພະຍາຍາມ​ເຮັດ​ໃຫ້ ສປປ ລາວ ຫຼຸດ​ພົ້ນ​ອອກ​ຈາກສະຖານະ​ພາບ​ປະເທດ​ດ້ອຍ​ພັດທະນາ ໂດຍ​ສະເພາະ​ການ​ລຶບລ້າງ​ຄວາມທຸກ​ຍາກ ແລະ ການ​ລຶບລ້າງ​ໄພ​ອຶດຫິວ ກໍ​ຄື​ການ​ປັບປຸງ​ຊີວິດ​ການ​ເປັນ​ຢູ່​ຂອງ​ພໍ່​ແມ່​ປະຊາຊົນ​ໃຫ້​ດີ​ຂຶ້ນ ຊຶ່ງ​ວຽກ​ງານ​ເຫຼົ່ານັ້ນ​ລ້ວນ​ແຕ່​ເປັນ​ວຽກ​ທີ່​ຕິດ​ພັນ​ ໂດຍ​ກົງ​ກັບ​ບຸ​ລິ​ມະ​ສິິດ ແລະ ເປົ້າ​ໝາຍ​ຂອງ ອົງການ FAO. ສະນັ້ນ, ການ​ສືບຕໍ່ ແລະ ຮັດ​ແໜ້ນ​ການ​ຮ່ວມ​ມື​ກັບ​ອົງການ ແມ່ນ​ມີ​ຄວາມ​ສຳ​ຄັນ. 
  ໃນ​ໂອກາດ​ດັ່ງກ່າວ, ທ່ານ​ຜູ້ອຳນວຍການ​ໃຫຍ່ອົງການ FAO ໄດ້​ສະແດງ​ຄວາມ​ຂອບໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ ແລະ ການ​ເດີນທາງ​ມາ​ຢ້ຽມຢາມ​ໃນ​ຄັ້ງ​ນີ້ ຖື​ເປັນ​ນິມິດ​ໝາຍ​ອັນໃໝ່ ແລະ  ບາດກ້າວ​ທີ່​ສຳຄັນສະ ແດງ​ໃຫ້​ເຫັນ​ເຖິງ​ການ​ຮ່ວມ​ມື​ທີ່​ດີລະຫວ່າງ ສປປ ລາວ ແລະ ອົງ ການ FAO ໃນ​ໄລຍະ​ຜ່ານ​ມາ ແລະ ການ​ເອົາໃຈໃສ່​ເປັນ​ພິເສດ ໃນ​ການ​ຮ່ວມ​ມື​ວຽກ​ງານດ້ານ​ການ​ຄ້ຳປະກັນ​ສະບຽງ​ອາຫານ ແລະ ປັບປຸງ​ໂພຊະ​ນາ​ການ. 
  ໃນ​ໄລຍະ​ການ​ຢ້ຽມຢາມ ສປປ ລາວ, ທ່ານ​ຜູ້ອຳນວຍການ​ໃຫຍ່ ອົງການ FAO ໄດ້​ເຂົ້າຢ້ຽມ​ ຂາໍ່ນັບທ່ານ ລຽນ ທີ​ແກ້ວ ລັດ ຖະມົນຕີກະຊວງ​ກະສິກຳ ແລະ ປ່າໄມ້; ທ່ານ  ສົມ​ມາດ  ພົນເສນາ   ລັດຖະມົນຕີກະຊວງຊັບພະຍາ ກອນ​ທຳ​ມະ​ຊາດ ແລະ ສິ່ງ ແວດລ້ອມ ແລະ ທ່ານ  ທອງ​ ຜ່ານ ສະຫວັນ​ເພັດ ຮອງ​ລັດ ຖະມົນຕີກະຊວງການຕ່າງປະ ເທດ   ພ້ອມ​​ຍັງ​ໄດ້​ເດີນທາງ​ໄປ​ຢ້ຽມ​ຊົມ​ບັນດາໂຄງການທີ່ຈັດ ​ຕັ້ງ​ປະຕິບັດ​ຮ່ວມ​ກັນລະຫວ່າງ ອົງການ FAO ແລະ ຄູ່​ຮ່ວມ​ງານ​ພາກ​ລັດ ທີ່ສະ​ຖາ​ບັນ​ຄົ້ນຄວ້າ​ກະສິກຳ, ປ່າໄມ້ ແລະ ການພັດ ທະນາ​ຊົນນະບົດແຫ່ງ​ຊາດ.
ອົງການ FAO ໄດ້​ມີ​ການ​ຮ່ວມ​ມື​ກັບ ສປປ ລາວ ຕັ້ງແຕ່​ປີ 1975 ເປັນຕົ້ນ​ມາ ແລະ ໄດ້​ສ້າງຕັ້ງ​ຫ້ອງການ​ຜູ້ຕາງໜ້າ​ຂອງ​ຕົນ ປະຈຳ ສປປ ລາວ ໃນ​ປີ 1980  ໃນ​ປັດຈຸບັນ ສປປ ລາວ ແລະ ອົງການ FAO ກໍາ​ລັງ​ຈັດ​ຕັ້ງ​ປະຕິບັດ​ແຜນ​ງານ​ຊ່ວຍເຫຼືອ ສປປ ລາວ ຊຶ່ງ​ມີ​ມູນ​ຄ່າ 37 ລ້ານ​ໂດ​ລາ​ ສໍາ​ລັບ 2016-2021.
(ຂ່າວ:  ກະຊວງ​ການ​ຕ່າງ​ປະ​ເທດ​-​ພາບ: ສຸກ​ສະຫວັນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110