ຫົວ​ຂໍ້ : ກອງປະຊຸມວົງແຄບລັດຖະມົນຕີກະຊວງປ້ອງກັນປະເທດອາຊຽນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/02/2020 08:57:27 ຈຳ​ນວນ​ຜູ້​ເຂົ້າ​ຢ້ຽມ​ຊົມ 446 ຄັ້ງ

 ວິທະຍຸ​ກະຈາຍສຽງຫວຽດ ນາມ​ລາຍ​ງານ​ວ່າ: ກອງ​ປະຊຸມ​ວົງ​ແຄບ​ລັດຖະມົນຕີ​ກະຊວງ​ປ້ອງ​ກັນ​ປະເທດ​ບັນດາ​ປະ ເທດອາ​ຊຽນ (ADMM) ໄດ້​ດໍາ​ເນີນ​ໃນ​ວັນ​ທີ 18 ກຸມພາ​ຜ່ານມາ, ຢູ່​ນະຄອນຫຼວງ​ຮ່າ​ໂນ້ຍ ປະເທດ​ຫວຽດນາມ. ນີ້​ແມ່ນ​ເຫດການ​ເປີດ​ສາກ​ໃຫ້​ແກ່​ບັນດາ​ການເຄື່ອນໄຫວ, ກອງ​ປະຊຸມ​ປ້ອງ​ກັນ​ປະເທດ - ການ​ທະຫານ ອາ​ຊຽນ ຂັ້ນ​ລັດຖະມົນຕີ ໂດຍ​ກະຊວງ​ປ້ອງ​ກັນ​ປະເທດ ຫວຽດນາມ ເປັນ​ເຈົ້າພາບ ຈັດ​ຂຶ້ນ​ໃນ​ປີ​ເປັນ​ປະທານ ອາ​ຊຽນ 2020 ຂອງ​ຫວຽດນາມ.
 ໃນ​ກອງ​ປະຊຸມ, ທ່ານ ພົນ​ຕີ ເລ​ຮຸຍ​ວິ້ງ ຮອງ​ຫົວໜ້າ​ເສນາ​ທິ​ການ​ໃຫຍ່ ກອງທັບ​ປະຊາຊົນ​ຫວຽດນາມ ເນັ້ນ​ໜັກ​ວ່າ: ກອງ​ປະຊຸມ ADMM ວົງ​ແຄບ ຄັ້ງ​ນີ້ ມີ​ທີ່​ຕັ້ງ, ບົດ​ບາດ​ສໍາ​ຄັນ​ພິເສດ. ກອງ​ປະຊຸມ​ຄັ້ງ​ນີ້ ແມ່ນ​ເວທີ ເພື່ອ​ໃຫ້​ລັດຖະມົນຕີ​ກະຊວງ​ປ້ອງ​ກັນ​ປະເທດ​ບັນດາ​ປະເທດ ອາ​ຊຽນ ດໍາ​ເນີນ​ການ​ປຶກສາ​ຫາລື​ກ່ຽວ​ກັບ​ບັນດາ​ເນື້ອ​ໃນ​ຮ່ວມ​ມື​ດ້ານ​ປ້ອງ​ກັນ​ຊາດ ໃນ​ປີ 2020, ກໍາ​ນົດ​ທິດ​ການ​ຮ່ວມ​ມື​ໃນ​ປີ 2020 ແລະ ຊຸມ​ປີ​ຕໍ່​ໄປ. 
 ພ້ອມ​ກັນ​ນັ້ນ, ກອງ​ປະຊຸມ​ດັ່ງກ່າວ ກໍ​ແມ່ນ​ໂອກາດ​ເພື່ອ​ໃຫ້​ຫວຽດນາມ​ຢັ້ງຢືນ​ບົດບາດ​ເປັນ​ປະທານ​ໃນ​ການ​ບໍລິຫານ, ປະສານ​ງານ​ໃນ​ການ​ຮ່ວມ​ມື​ດ້ານ​ປ້ອງ​ກັນ​ຊາດ ລະຫວ່າງ ບັນດາ​ປະເທດ ອາ​ຊຽນ. ກອງ​ປະຊຸມ​ຄັ້ງ​ນີ້ ກໍ​ແມ່ນ​ໂອກາດ​ເພື່ອ​ໃຫ້ ຫວຽດນາມ ໂຄສະນາ​ພາບ​ພົດ, ທີ່​ຕັ້ງ​ບົດບາດ​ຂອງ​ປະເທດ​ຊາດ, ຂອງ​ກອງທັບ​ປະຊາຊົນ​ຫວຽດນາມ ໃນ​ພາກ​ພື້ນ ແລະ ສາ​ກົນ.
 ກອງ​ປະຊຸມ ADMM ວົງ​ແຄບ 2020, ລວມ​ມີ​ວາລະ​ປະຊຸມ​ຄົບ​ຄະນະ ແລະ ການ​ພົບ​ປະ​ບໍ່​ເປັນ​ທາງ​ການ ລະຫວ່າງ ລັດຖະມົນຕີ​ກະຊວງ​ປ້ອງ​ກັນ​ປະເທດ ບັນດາ​ປະເທດ ອາ​ຊຽນ  ກັບ ອົສ​ຕຣາ​ລີ.
 ຂ່າວ​ລະບຸ​ວ່າ: ຫົວຂໍ້​ຂອງ​ບັນດາ​ກອງ​ປະຊຸມ​ປ້ອງ​ກັນ​ຊາດ - ການ​ທະຫານ ອາ​ຊຽນ ໃນ​ປີ 2020, ລວມ​ທັງ​ກອງ​ປະຊຸມ ADMM ວົງ​ແຄບ ແມ່ນ​ການ​ຮ່ວມ​ມື​ດ້ານ​ປ້ອງ​ກັນ​ຊາດ ເພື່ອ​ອາ​ຊຽນ ສະໜິດ​ຕິດ​ພັນ ແລະ ເປັນ​ເຈົ້າ​ການ​ຮັບ​ມື. 
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110