ຫົວ​ຂໍ້ : ຜູ້ຕິດເຊື້ອ Covid-19 ໃໝ່ຢູ່ຈີນ ເພີ່ມຂຶ້ນ 1.886 ຄົນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/02/2020 08:59:01 ຈຳ​ນວນ​ຜູ້​ເຂົ້າ​ຢ້ຽມ​ຊົມ 502 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ຄະນະ​ກຳມະການ​ອະນາໄມ ແລະ ສຸຂະພາບ​ແຫ່ງ​ຊາດ​ຈີນ ໄດ້​ໃຫ້​ຮູ້​ໃນ​ວັນ​ທີ 18 ກຸມພາ​ຜ່ານ​ມາ​ວ່າ: ມີ 31 ແຂວງ​ລວມ​ທັງ​ເຂດ​ປົກຄອງ​ຕົນ​ເອງ, ກຳແພງ​ນະຄອນ, ກອງ​ທະຫານ​ການ​ຜະລິດ ແລະ ສ້າງສາ​ຊິ່ນ​ຈ່ຽງ​ຂອງ​ຈີນ ໄດ້​ລາຍ​ງານ​ຜູ້​ຖືກ​ບົ່ງມະຕິ​ຕິດເຊື້ອ​ພະຍາດ​ອັກເສບ​ປອດ​ຈາກ​ໄວ​ຣັດ​ໂຄ​ໂຣ​ນາ​ສາຍ​ພັນ​ໃໝ່ (Covid-19) ທີ່​ເພີ່ມ​ຂຶ້ນ​ໃໝ່ 1.886 ຄົນ, ໃນ​ນັ້ນ​ມີ​ອາການ​ສາຫັດ 1.097 ຄົນ, ຜູ້​ເປັນ​ພະຍາດ​ທີ່​ເສຍ​ຊີວິດ​ທີ່​ເພີ່ມ​ຂຶ້ນ​ໃໝ່​ມີ 98 ຄົນ, ຜູ້​ຖືກ​ສົງໄສ​ຕິດເຊື້ອ​ພະຍາດ​ທີ່​ເພີ່ມ​ຂຶ້ນ​ໃໝ່ ມີ 1.432 ຄົນ.
ໃນ​ມື້​ດຽວ​ກັນ, ຜູ້​ໄດ້​ຮັບ​ການ​ປິ່ນປົວ​ໃຫ້​ຫາຍ​ຂາດ ແລະ ອອກ​ໂຮງໝໍ​ທີ່​ເພີ່ມ​ຂຶ້ນ​ໃໝ່ ມີ 1.701 ຄົນ, ຜູ້​ສຳຜັດ​ກັບ​ຜູ້​ເປັນ​ພະຍາດ​ຢ່າງ​ໃກ້ຊິດ​ທີ່​ໄດ້​ຮັບ​ການບົ່ງມະຕິ​ສຸຂະພາບ​ຜ່ານ​ການ​ສັງເກດ​ທາງ​ການ​ແພດ ມີ 27.908 ຄົນ. ໄດ້​ຮັບ​ການ​ລາຍ​ງານ​ຜູ້​ຖືກ​ບົ່ງມະຕິ​ຕິດເຊື້ອ​ພະຍາດ​ຈາກ​ເຂດ​ບໍລິຫານ​ພິເສດ​ມາ​ກາວ, ຮົງ​ກົງ ແລະ ໄຕ້​ຫວັນ ໄລ່​ລວມ​ມີ 92 ຄົນ​ຄື: ເຂດ​ບໍລິຫານ​ພິເສດ​ຮົງ​ກົງ 60 ຄົນ (ໃນ​ນັ້ນ​ຜູ້​ປິ່ນປົວ​ດີ ແລະ ອອກ​ໂຮງໝໍ 2 ຄົນ, ເສຍ​ຊີວິດ 1 ຄົນ), ເຂດ​ບໍລິຫານ​ພິເສດ​ມາ​ກາວ 10 ຄົນ (ໃນ​ນັ້ນ​ມີ​ຜູ້​ອອກ​ໂຮງໝໍ 5 ຄົນ), ແຄວ້​ນ​ໄຕ້​ຫວັນ 22 ຄົນ (ອອກ​ໂຮງໝໍ 2 ຄົນ, ເສຍ​ຊີວິດ 1 ຄົນ).
  ຂ່າວ​ລາຍ​ງານ​ວ່າ: ໃນ​ກອງ​ປະຊຸມ​ພິເສດ​ວ່າ​ດ້ວຍ​ການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ພະຍາດ Covid-19 ໂດຍ​ການ​ເປັນ​ປະທານ​ຂອງ​ທ່ານ ຫຼີ​ເຄີ້​ສຽງ ນາຍົກລັດຖະມົນຕີ​ຈີນ ຢູ່​ປັກ​ກິ່ງ ໂດຍ​ມີ​ການ​ລາຍ​ງານ​ວ່າ: ຍ້ອນ​ຄວາມ​ພະຍາຍາມ​ຢ່າງ​ຕັ້ງໜ້າ​ໃນ​ການ​ປ້ອງ​ກັນ ແລະ ຄວບ​ຄຸມ ເຮັດ​ໃຫ້​ສາມາດ​ຢັບ​ຢັ້ງ​ການ​ແຜ່​ລະບາດ​ໃນ​ວົງ​ກ້ວາງ, ສະຖານະ​ການ​ ການ​ແຜ່​ລະບາດ​ໃນ​ທົ່ວ​ປະເທດ​ມີ​ທ່ວງ​ທ່າ​ດີ​ຂຶ້ນ. ຢ່າງໃດ​ກໍ​ຕາມ, ສູນ​ກາງ​ການ​ແຜ່​ລະບາດ​ໃນ​ຂະນະ​ນີ້​ຍັງ​ຄົງ​ຢູ່​ເມືອ​ງາ​ອູ​ຮັ້ນ ແຂວງ​ຫູ​ເປີຍ, ການ​ປ່ຽນແປງ​ຂອງ​ໂຣກ​ລະບາດ​ຍັງ​ມີ​ຄວາມ​ສັບສົນ, ການ​ປ້ອງ​ກັນ ແລະ ຄວບ​ຄຸມ​ຕາມ​ເຂດ​ຕ່າງໆ ຍັງ​ປະ​ມາດ​ບໍ່​ໄດ້. 
  ກອງ​ປະຊຸມ ຍັງ​ໄດ້​ລະບຸ​ວ່າ: ເມືອງ​ອູ​ຮັ້ນ ແລະ ແຂວງ​ຫູ​ເປີຍ ຄວນ​ທຸ້ມເທ​ກໍາ​ລັງ​ໃນ​ການ​ກວດກາ​ຜູ້​ປ່ວຍ​ຕໍ່​ໄປ, ເພີ່ມ​ຕຽງ​ຜູ້​ປ່ວຍ​ໃຫ້​ຫຼາຍ​ຂຶ້ນ. ພ້ອມ​ກັນ​ນັ້ນ,ລັດຖະບານ​ຈະ​ສົ່ງ​ກໍາ​ລັງ​ຊ່ວຍເຫຼືອ​ທາງ​ການ​ແພດ​ເພີ່ມ​ຕິດຕາມ​ຄວາມ​ຕ້ອງການ​ໃນ​ການ​ຮັກສາ​ຜູ້​ປ່ວຍ, ລະດົມ​ແພດ​ຜູ້​ຊ່ຽວຊານ​ຮັກສາ​ຜູ້​ປ່ວຍ​ທີ່​ມີ​ອາການ​ສາຫັດ​ຫຼາຍ​ຂຶ້ນ, ປຸກລະດົມ​ໃຊ້​ແຜນການ​ຮັກສາ ແລະ ຕໍາ​ລາ​ຢາ​ທີ່​ໄດ້ຜົນ​ທາງ​ຄ​ລີ​ນິກ, ຫຼຸດ​ຈໍາ​ນວນ​ຜູ້​ປ່ວຍ​ອາການ​ສາຫັດ​ໃຫ້​ໜ້ອຍ​ລົງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110