ນັກສຶກສາ ປີ 3 - ປີ 4 ສາຍວິທະຍາສາດທໍາມະຊາດ ແລະ ສາຍໄອທີ ຂອງວິທະຍາໄລຄູ ແຂວງຫຼວງພະບາງ 40 ຄົນ ເຂົ້າຮ່ວມແລກປ່ຽນບົດຮຽນ ຮ່ວມ​ກັບ ມະຫາວິທະຍາໄລແຫ່ງຊາດຊິ໋ນຈູ ສ ເກົາຫຼີ ຜ່ານລະບົບອອນລາຍ ຊຶ່ງຈັດຂຶ້ນ​ໃນ​ອາ​ທິດ​ຜ່ານ​ມານີ້ ທີ່ຫ້ອງປະຊຸມວິທະຍາໄລຄູຫຼວງພະບາງ ໂດຍການເຂົ້າຮ່ວມຂອງທ່ານ ເກດ ພັນລັກ ຫົວໜ້າກົມສ້າງຄູ ກະຊວງສຶກສາທິການ ແລະ ກິລາ, ທ່ານ ຮາຢ໋ອງຊູ ຜູ້ຈັດການໂຄງການ ການຮ່ວມມືຝ່າຍມະຫາວິທະຍາໄລແຫ່ງຊາດຊິ໋ນຈູ, ມີພາກ​ສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

ທ່ານ ຫຸມພັນ ຄອນສະຫວັດ ຜູ້ອຳການວິທະຍາໄລຄູຫຼວງພະບາງ ໄດ້ກ່າວວ່າ: ສຳ​ລັບ​ການແລກປ່ຽນບົດຮຽນ​ຄັ້ງ​ນີ້ ໄດ້ມີ​ການ​ພົບ​ປະໃນຫົວຂໍ້ຕ່າງໆເຊັ່ນ: ແນວຄວາມຄິດກ່ຽວກັບການສ້າງຕັ້ງມະຫາວິທະຍາໄລ, ການສຶກສາຄູແຫ່ງຊາດລາວ ຊຶ່ງເປັນແນວຄິດອັນໃໝ່ຂອງການປັບປຸງ ແລະ ພັດທະນາລະບົບສາຍສ້າງຄູໃຫ້ສູງຂຶ້ນ, ຄຸນສົມບັດ ແລະ ຈັນຍາບັນຂອງຄູລາວ, ພິເສດຈະໄດ້ຮັບຟັງຂະບວນການຝຶກຫັດວິຊາຊີບໃຫ້ແກ່ນັກສຶກສາຄູມະຫາວິທະຍາໄລແຫ່ງຊາດຊິ໋ນຈູ ສ ເກົາຫຼີ, ຄວາມຄ້າຍຄືກັນ ແລະ ຄວາມແຕກຕ່າງກັນ ລະຫວ່າງວັດທະນະທໍາລາວ ແລະ ວັດທະນະທໍາ ສ ເກົາຫຼີ ລວມເຖິງຫົວຂໍ້ທີ່ສໍາຄັນຂອງບັນຫາ ແລະ ຄວາມຕ້ອງການຂອງຄູ-ອາຈານ ແລະ ນັກສຶກສາສາຍຄູວິທະຍາສາດ ແລະ ຄອມພິວເຕີ (ໄອທີ) ຕໍ່ການຝຶກອົບຮົມວິຊາດັ່ງກ່າວເພື່ອແນໃສ່ສ້າງຄວາມເຂັ້ມແຂງໃຫ້ແກ່ການປັບປຸງຫຼັກສູດ ແລະ ການສອນລະບົບ 12+4 (ສອນໄດ້ແຕ່ ມ.1 - ມ.7) ເພື່ອ​ສ້າງ​ໃຫ້​ຄູພາຍໃນວິທະຍາໄລຄູ ຫຼວງພະບາງໃຫ້ຄວາມເຂັ້ມແຂງ​ດີ​ຂຶ້ນເທື່ອລະກ້າວ, ເພື່ອກ້າວໄປສູ່ເປັນສູນແຫ່ງການພັດທະນາ COD ແລະ ກ້າວສູ່ຄວາມເປັນເລີດ COE ໃນໃນສາຍວິຊາ ວິທະຍາສາດ ແລະ ຄອມພິວເຕີໃນອານາຄົດ. (ຂ່າວ-ພາບ: ສີສຸວັນ)